1 Kunanqa churiy, rimarisqa kasqa sayarichiymanta huk chikanta rimarinay kashan. Waqllichirqankun qelqakunata huk chikan runakuna, kayraykutaq pantarqanku. Rikushanitaqmi kaymanta umayki mana qasilla kasqanta. Qanmanmi kayta hamut’achisayki.

2 Nisaykin churiy—kay sayarichiyqa kananmi Yayaq chaninchayninwan. Nesitakunmi, llapan imaymanakuna imayna kanankuman sayarichisqa kananku. Nesitakunmi chanintaqmi, Cristoq atiyninman kawsariyninmanwan hina runaq nunan runa-kurkunman yapamanta sayarichisqa kanan, runa-kurkuq tukuy imaymanankuna kikinkuman yapamanta sayarichisqa kanan.

3 Nesitakuntaqmi Yayaq chaninchayninwan, ruwayninkunaman hina runakuna taripasqa kanankupaq. Kay kawsaypi ruwayninku, sonqonkuq munayninkupas allin karqan chayqa, allin kaqllamantaqmi qhepa p’unchawpi paykuna sayarichisqa kanqaku.

4 Ruwayninku millay karqan chayqa, millayllataqmi paykunaman sayarichisqa kanqa. Chhaynaqa, tukuy imaymanakunan imayna kanankuman sayarichisqa kanqa, llapanpas maypi kanan runa-kurkuman—wañuq mana wañuqman hatarichisqa, waqlliq mana waqlliqman—mana tukukuyniyoq kusikuyman, Yayaq qhapaq-suyun chaskinankupaq, utaq mana tukukuyniyoq muchuyman, saqraq suyun chaskiq; huknin huk makipi, huk kaqtaq huk kaq makipi;

5 Huknin kusikuyman hatarichisqa kusikuy munasqanman hina, utaq allinpaqpas allin kaq munasqanman hina. Hukkaqtaq millayman, millay munasqanman hina; p’unchawnintinchu millay ruwayta munarqan, chhaynan tuta hamuqtin millay kaqta chaskinqa.

6 Chhaynallataqmi hukkaq makipipas. Huchankunamanta kutirimuspa, p’unchawninkunaq tukukuyninkama chanin kaqta munarqan chayqa, chhaynallatataqmi chaninchaypi qosqa kanqa.

7 Kaykunan Wiraqochaq kutichikapusqan kanku; ari, kaykunan horqosqa, mana tukukuq tutayaqmanta kacharichisqa kaqkuna. Khaynatan paykuna sayanku, utaq urmankupas. Paykuna kikinkun kikin taripakuqninku kanku, allin kaqta utaq mana allin kaqtapas ruwanankupaq.

8 Yayaq kamachiyninkunaqa mana t’ikrakuqmi. Chhaynaqa, allichasqan ñan kashan pipas chaypi puriyta munaspa qespichisqa kananpaq.

9 Kunantaq churiy, amaña huk kutintapas Yayaykita phiñarichiychu chay yachachiyninkunapi, chhaynata kunan huchallikusqaykita hina.

10 Ama yuyaychu, sayarichiymanta rimasqa kasqanrayku, huchamanta kusikuyman sayarichisqa kanaykita. Qanta nisayki, millay ruwayqa, manan hayq’aqpas kusikuychu karqan.

11 Kunantaq churiy, kay kawsaypi kaq runakunaqa, utaq aychapi kaq llapan runakunaqa p’ushqo hayaqepi, millay ruwanaq watananpiwanmi kashanku; kay pachapi mana Yayayoqmi kanku, Yayaq imayna kaynin kontrataq rirqanku; chhaynaqa, kusikuy imayna kanan kontrapin kashanku.

12 Sayarichiy simiq ima ninanri, hukta kay pachapi kasqanmanta mana imayna kananman hina churaychu, ichari imayna kananpa kontraman churaychu?

13 Manan khaynachu churiy, sayarichiypa ima ninanqa—millayta millaypaq, aychakaqta aychakaqpaq, saqrakaqta saqrakaqman, allinta allin kaqpaq, chaninchayta chaninchaypaq, chanin kaqta chanin kaqpaq, khuyapakuqta khuyapakuqpaq kutichimuymi.

14 Khaynaqa churiy, wawqeykikunawan khuyapakuq kay. Chaninchaywan ruwayniykikunata ruway, chaninta taripay, pasaqllataq allin kaqta ruway. Kay llapan imaymanakunata ruwanki chayqa, suñaykitan chaskinki; ari, khuyapakuymi qanman yapamanta sayarichisqa kanqa; chaninchaymi yapamanta qanman kutirichisqa kanqa; chanin taripaymi yapamanta qanman sayarichisqa kanqa, allin kaqpiwantaq qanmana yapamanta qosqa kanqa.

15 Qanmanta lloqsiqmi yapamanta qanman kutirimunqa sayarichisqataq kanqa. Chhaynaqa, sayarichiy simiqa, huchasapatan hunt’asqatapuni kundenan, manataq imallatapas payta chaninchanchu.