1 Hinataq, paykunaman kay simikunata Alma rimariqtin, panpapi tiyarikurqan; Amulektaq sayarispa khaynata paykunaman yachachiyta qallarirqan:

2 Wawqeykuna, Yayaq Churin nispa yachachisqayku Cristoq hamunanmanta rimasqa kasqan imaymanakunamanta sanp’a runa kanaykichista mana atikunantan yuyani; ari, yachanin noqaykumanta manaraq t’aqakushaqtiykichis kaykuna allintapuni qankunaman yachachisqa kasqanta.

3 Ñak’arisqaykichisrayku, ima ruwanaykichista qankunaman yachachinasuykichispaq ancha munasqay wawqeymanta munasqaykichista hinan, huk chikanta rimarirqasunkichis umaykichista alistananpaq; ari, iñiyman, sonqo ñit’iykukuyman iman anyarqasunkichis.

4 Ari, askha iñiyniyoq kanaykichiskama, Yayaq rimayninta sonqoykichispi tarpunaykichiskama, sumaq kayninmanta mallinaykichispaq.

5 Rikurqaykutaqmi—Yayaq Churinpichu rimay kan, ichari manachu Cristo kan, nispa umaykichispa tapakuynin kasqanta.

6 Rikurqankichistaqmi askha kutita qankunaman wawqey sut’inchasqanta; qespinapaq rimay Cristopi kasqanta.

7 Rimarqanmi wawqey, Zenospa rimayninkunamanta, Yayaq Churinwan qespiy hamun nispa; rimallarqantaqmi Zenockpa rimayninkunamanta, Moisespa rimayninkunamantapas rimallarqantaqmi, kay imaymanakuna cheqaq kasqanta sut’inchananpaq.

8 Kunantaq noqa kikiymanta qankunaman sut’inchasaq kaykuna cheqaq kasqanmanta. Nisaykichsitaq—yachanin runakunaq wawankuna puraman Cristo hamunanta, llaqtanpa huchakunata Paypi hap’inanpaq, runakunaq huchankunarayku ñak’arinanta. Wiraqocha Yayan kayta rimarqan.

9 Nesitakunmi ñak’ariy ruwasqa kanan. Wiñay Yayaq ancha hatun ruwanankuman hinataq ñak’ariy ruwasqa kanan; mana chayqa, llapan runakunan mana pantaypuni qollunanku. Llapankun rumiyachisqa kanku, llapankun urmasqa chinkasqapiwan kanku; wañunankutaqmi nesitakusqan ñak’ariy mana ruwasqachu kanman chayqa.

10 Nesitakunmi ancha hatun qhepa kaq arpay kanan; ari, manan runaq arpayninchu nitaq uywakunaqchu, nitaq ima urpiqpas; manan runa arpaychu kanqa, ichaqa, mana tukukuyniyoq wiñay-wiñaypaq arpaymi kanan.

11 Manan ima runapas kanchu kikin yawarninta sut’uchinanpaq, huk runakunaq huchankunarayku ñak’arinanpaq. Kunanqa, runata huk runa wañuchinman chayri, chanin kamachisqa-siminchisri wawqenpa kawsaynintachu qechunqa? Manan niykichismi.

12 Ichaqa kamachisqa-simiqa mañakun wañucheqpa kawsaynintan; chhaynaqa, manan imapas kanmanchu runakunaq huchankunamanta kuticheq mana tukukuyniyoq ñak’ariymanta aswan pisiqa.

13 Chhaynaqa, nesitakunmi ancha hatun qhepa kaq arpay kanan, chay patamantaq kanqa utaq nesitakunqa yawar sut’uchiy tukuchina; chaymantaq Moisespa kamachisqa-simin hunt’akunqa; ari, llapanmi hunt’asqa kanqa, sapanka ch’iñi sapanka seq’e ima; manataq imapas pasanqachu.

14 Kaymi kamachisqa-simiq hunt’a ima ninan, sapanka qayllankuna chay ancha hatun qhepa arpayman qhawachispa. Chay ancha hatun qhepa arpaytaq kanqa Yayaq Churin, ari, mana tukukuyniyoq wiñaypaqwan.

15 Khaynatataq qespiyta Pay apamunqa, sutinpi llapan kreyiqkunaman; kaytaqmi chay qhepa arpaypa imayna kanan, khuyapakuypa llank’ayninta apamunanpaq, kaytaq chaninchayta atipan; yuyayninkuman kutirimunankupaq iñiyniyoq kanankupaq imayna ruwanata runakunaman apamuspa.

16 Khaynatataqmi khuyapakuyqa, chaninchaypa munayninta hunt’ayta atinman, qespi kay makipitaq paykunata muyurin; yuyayman kutirinapaq iñiyta mana llank’achiqtaq chaninchaypa mañakuyninpa hunt’asqa kamachisqa-simiman churasqa kan. Chhaynaqa, yuyayman kutirinapaq iñiyniyoq kaqllapaqmi chay ancha hatun wiñay-wiñaypaq kutichikapuy apamusqa kanqa.

17 Chhaynaqa, Yayañayá qankunaman qochun wawqeykuna, yuyayman kutirimunapaq iñiyniykichista llank’achiyta qallarinaykichispaq, qollanan sutinta waqyayta qallarinaykichispaq, qankunawan khuyapakuyniyoq Pay kananpaq.

18 Ari, Paymanta khuyapakuyrayku mañakuychis. Qespichinanpaq ancha atiyniyoqmi Pay.

19 Llanp’u sonqo kaychis, Payman waqyakuytataq qatillaychis.

20 Payta waqyakuychis chakraykichispi kaqtiykichis, ari, llapa uywaykichiskunarayku.

21 Wasiykichispi Payta waqyakuychis, ari, wasiykichispi llapa kaqkunarayku; tutamantanpi, chawpi p’unchawpi, tutayaqtinpas.

22 Ari, awqaykichispa atiynin kontra Paymanta mañakuychis.

23 Ari, Payta waqyakuychis llapa chaninchaypa awqan saqra kontra.

24 Payta waqyakuychis chakraykichispa rurunkunarayku, chaypi t’ikarinaykichispaq.

25 Mañakuychis chakraykichispa uywankunarayku, uywaykichiskuna mirananpaq.

26 Ichaqa, manan llapanchu kay; wasiykichis ukhupi nunaykichista seqariyachiychis pakasqa k’uchuykichiskunapi, purunniykichiskunapiwan.

27 Wiraqochata mana waqyakuqtiykichistaq sonqoykichis hunt’a kananta kachariychis, allin kayniykichisrayku, qankuna muyureqniykichispi kaq runakunaq allin kayninkuraykupiwan pasaqlla yayaman-rimarikuypi kaspaykichis.

28 Kunantaq niykichis ancha munasqay wawqeykuna—ama yuyaychischu llapan kay kasqanta. Kay llapan imaymanakunata ruwasqaykichis pataman, nesitaqkunamanta q’alalla kaqkunamantawan ayqenkichis, manataq onqoqkunata ni ñak’ariqkunamantapas watukunkichischu, nesitaqkunamantaq kapusoqmiykichismanta—kapusunkichis chayqa—mana qonkichischu chayqa, qankunata nisaykichis, mana kay mayqen kaqkunatapas ruwankichischu chayqa, yanqapaqmi yayaman-rimarikuyniykichis, manataqmi imapaqpas sirvisunkichischu, iñiy mananchaq ishkay uyakuna hinataqmi kankichis.

29 Chhaynaqa, khuyapakuyniyoq kayta qonqankichis chayqa, mana ima chaninniyoq kaqtin runakunaq sarukachasqan, ch’uyanchaqkunaq choqasqan q’opa hinan kapunkichis.

30 Kunanqa wawqekuna kay tukuy sut’inchaykunata chaskisqaykichis pataman, kay imaymanakunamanta qollanan qelqakuna cheqaqchasqantawan rikuspa, yuyayman kutirimuy rurukunata apamuspa hamunaykichistan munayman.

31 Ari, hamunaykichista, amaña astawan sonqoykichista rumiyachinaykichista imataq munayman. Kunanmi qespiyniykichispa pachan, p’unchawnin ima; chhaynaqa, yuyayniykichisman kutirimunkichis, manataq sonqoykichista rumiyachinkichischu chayqa, kunanpachan ancha hatun qespiy imayna kanan qankunaman apamusqa kanqa.

32 Kay kawsaymi Yayawan tupanankupaq runakunaq alistakunanku pacha; ari, kay kawsaypa p’unchawninmi ruwayninkuta runakuna ruwanankupaq p’unchaw.

33 Kunantaq, ñawpaqta qankunaman nisqayta hina, askha sut’inchaykuna imataq kapurqasunkichis chayqa, qankunamanta mañakusaykichis, ama tukukuykamachu suyachiychis yuyayniykichisman kutirimunaykichis p’unchawta. Wiñay-wiñaypaq alistakunanchispaq noqanchisman qosqa kay kawsaypa p’unchaw patamanqa, kay kawsaypi kananchiskama tiempunchista mana allinyachisunchischu chayqa, laqha tutan hamunqa, manataqmi chaypi ima ruwanapas ruwakuyta atikunmanchu.

34 Chay millay ñak’ariyman apamusqa kaspaqa, manan kay niyta atiwaqchischu: Kutirimusaqmi yuyayniyman, Yayaymanmi kutirisaq, nispa. Manan, manan kayta niyta atiwaqchischu; kay kawsaymanta lloqseqtiykichis runa-kurkuykichispi kaq nunallataqmi chay wiñay-wiñay pachapi atiyniyoq kanqa runa-kurkuykichis hap’ikunanpaq.

35 Wañuykama yuyayman kutirimuyniykichispa p’unchawninta suyachirqankichis chayqa, saqraq nunanman watasqan wakirqankichis, paypata hinataqmi qankunata pay markasunkichis; chhaynaqa, Wiraqochaq Nunanmi qankunamanta hitirirqan, manataqmi qankunapi maypi kananpaq kanchu, saqrataq qankunapi tukuy atiyniyoq. Kaytaqmi millay ruwaqkunaq tukukuypi imayna kayninku.

36 Kaytaqa yachani—manan qhelli wasikunapiqa tiyanichu, ichaqa, chaninkunaq sonqonkupin, nispa Wiraqocha nisqanrayku. Nillarqantaqmi Pay: Qhapaq-suyuypin chaninkuna tiyanqaku manaña astawan lloqsinankupaq; ichaqa, yuraqyachisqan p’achanku kanan Chitaq yawarninwan, nispa.

37 Kunanqa ancha munasqay wawqeykuna, kay imaymanakunata yuyarinaykichistan munayman, Yayaq ñawpaqenpi manchakuywan qespiyniykichista llank’aynaykichista; amaña astawan Cristoq hamunanta mananchanaykichista;

38 Amaña astawan Qollanan Nuna kontra ankallikuspa, ichaqa Payta chaskiychis, Cristoq sutintataq churakuychis. Ñut’u hallpakama k’umurikuychis, Yayatataq yupaychaychis, nunapipas cheqaqpipas, maypiña kaqtiykichispas. Sapa p’unchaw añaychakuypi kawsaychis, imaymana saminchaykunata, khuyapakuykunatawan qosqasuykichisrayku.

39 Ari, anyallasaykichitaqmi wawqeykuna, pasaqlla yayamanrimarikunaykichispaq; saqraq wateqayninkunawan mana pantachisqa kanaykichispaq, pay mana atipanasuykichispaq, qhepa p’unchawpi paypa mana kanaykichispaq. Manan allintachu payqa qosunkichis.

40 Kunantaq ancha munasqay wawqeykuna sonqo ñit’iykukuyniyoq kanaykichispaq, imaymana ñak’ariykunata awantanaykichistapaq ima anyaykichisman; ancha wakcha kasqaykichisrayku qarqoqniykichiskuna kontra mana millay rimanaykichispaq; paykuna hina huchallikuqkuna mana wakiwaqchispaq;

41 Ichaqa, sonqo ñit’iykukuyniyoq kaychis, awantaychis chay muchuykunata, llapan ñak’ariyniykichiskunamanta huk p’unchaw samarinaykichista suyaspaykichis.