1 Ao e koro bukina bwa i mwina ngke e a tia ni katoka ana taetae nakoia aomata ao a mwaiti ma i buakoia ake a kakoauai ana taeka, ao a moanna n rairinanoia, man ukoukori koroboki aika tabu.

2 Ma bon angiia riki a bon tangiria bwa a na tiringa Aramwa ma Amureki; bwa a un iroun Aramwa, ibukin mataatan ana taeka nakon Teeterom; ao a taku naba bwa Amureki e a tia ni kewe nakoia, ao e a tia ni kabuakaka ni kaitaraa aia tua ao ni kaaitaraia naba aia taan reirei te tua ma aia taan moti.

3 Ao a bon un naba iroun Aramwa ma Amureki; ao ibukina bwa a kaotiota te koaua ni katereterea buakakaia, a kataia n tiringia n te aro ae raba.

4 Ma e koro bukina bwa a aki; ma a uotia ma ni kabaeiia ni kabaebae aika a matoatoa, ao a uotia nako matan mataniwia taan moti n te aba.

5 Ao aomata a waaki ma ni kakoaua ni kaaitaraia—ni kakoaua bwa a tia ni kabuakaka ni kaitaraa te tua, ao aia taan reirei te tua ma taan moti n te aba, ao aomata ni kabane ake n te aba; ma ni kakoaua naba bwa ti temanna te Atua, ao e na kanakoa natina i buakoia aomata, ma e na aki kamaiuia; ao a mwaiti aekan bwaai ake aomata a taetae ni kakoaua iai ni kaaitaraia Aramwa ma Amureki. Ngkai aio are e a karaoaki i matan mataniwia taan moti n te aba.

6 Ao e koro bukina bwa Teeterom e rang mimi n taian taeka ake a tia n taekinaki; ao e bon ataa naba aron kamatakian te iango, are e a tia ni karaoia i buakoia aomata n aron ana taeka ni kewe; ao tamneina e a moanna ni karawawataki i aan ataakin oin ana kairua; eng, e a moanna n otabwaniniaki ni kammarakin moone.

7 Ao e koro bukina bwa e a waaki n tang nakoia aomata, ni kangai: Nooria, I bure, ao mwaane aikai a itiaki i matan te Atua. Ao e waaki ni bubuti ibukiia man te tai arei; ma a kabuakaka ni kaitaraa ni kangai: Ko niniaki iroun te riaboro? Ao a bawareia man teweia nako mai i buakoia, ao ni kabane naba ake a kakoauai taeka ake a tia n taekinaki iroun Aramwa ma Amureki; a bon teweaki nako, ao a kanakoaki mwaane bwa a na karebanaia n taian atibu.

8 Ao a uotia buuia ao natia man ikotiia, ao ane e onimaki ke e a tia n reireinaki bwa e na kakoaua ana taeka te Atua a bon kariaia bwa a na teweaki nako nanon te ai, ao a uoti naba rongorongo are e mena iai koroboki aika tabu, ma n teweia nako nanon te ai naba, bwa aonga ni bue ma ni mauna n te ai.

9 Ao e koro bukina bwa a uota Aramwa ma Amureki, ma n uotia nakon te tabo ni mate ibukin te onimaki, bwa aonga ni kakoaua mateia ake a na kanaki n te ai.

10 Ao ngke Amureki e noora marakiia aine ao ataei ake a kanaki n te ai, e bon maraki naba; ao e taku nakon Aramwa: Ti na kanga ni mataku n te aro ae e aki tamaroa aio? Mangaia ae ti na arora baira, ma ni kamwakura mwaakan te Atua are e mena iroura, ma ni kamaiuia man uran te ai.

11 Ma Aramwa e taku nakoina: E tukai te Tamnei bwa N na arora baiu; bwa nooria te Uea e butimwaiia nakoina, ma te mimitong, ao e bon kariaia bwa a na karaoa aio, ke bwa aomata a na karaoa aei nakoia, ibukin matoatoan nanoia, bwa taian motikitaeka are e na kamwakuria iaoia n unna e na bon eti; ao raraaia naake akea bureia e na tei bwa te bwai ni kakoaua ni kaaitaraia, eng, ma n tang ni korakora ni kaaitaraia n te kabanea ni bong.

12 Ngkai Amureki e taku nakon Aramwa: Nooria, tao a na kabuekira naba.

13 Ao Aramwa e taku: Ke e na iraki nanon te Uea. Ma nooria, e tuai ni bane ara mwakuri; mangaia ae aki kona ni kabuekira.

14 Ngkai e a koro bukina bwa ngke rabwataia ake a tia n teweaki nako nanon te ai a tia ni bue, ma taian rongorongo naba, mataniwia taan moti n te aba e roko ao e tei imatan Aramwa ma Amureki, ngkai a kabaeaki ao e oroi tabaia ni baina, ao e taku nakoia: I mwin te bwai are kam a tia n nooria, kam na kabwarabwara riki nakoia te botanaomata aio, bwa a na manga kona n teweaki nako nanon te nei n ai ma te burimton?

15 Nooria, ko nooria bwa akea iroumi te mwaaka ni kamaiuia ake a teweaki nako nanon te ai; ao te Atua e aki kamaiuia naba kioina ngkai bon kaain te ekaretia naba are ngkami. Ao mataniwia taan moti e oroi tabaia riki, ma ni kangai: Teraa ae kam na taekinna ibukimi?

16 Ngkai te tia moti aio bon kaain te waaki ma te onimaki are Neooa, are e tiringa Kiteon.

17 Ao e koro bukina bwa Aramwa ma Amureki aki kaeka; ao e oroia riki, ma n anga ngaia nakoia taan mwakuri bwa a na teweaki nako nanon te karabuti.

18 Ao ngke a tia n teweaki nako nanon te karabuti i mwin teniua te bong, ao a roko taan reirei te tua aika a mwaiti ma taan moti, ma ibonga, ma tia reirei, ake taan rabakau n ana waaki Neooa; ao a roko nakon te karabuti bwa a na nooria, ao a titirakinia taeka aika a mwaiti; ma a bon aki kaekaia.

19 Ao e koro bukina bwa te tia moti e tei i mataia, ao e taku: E aera ngkai kam aki kaekai aia taeka te botanaomata aio? Kam aki ataia ae iai mwaakau n anga ngkami nako nanon te ai? Ao e tuangia bwa a na taetae; ma aki taetae.

20 Ao e koro bukina bwa a nako ao a waakina kawaia, ma a manga roko n te bong are i mwina; ao te tia moti e a manga oroi naba tabaia. Ao a mwaiti naba, ake a roko man oroi naba tabaia man taku, Kam na manga tei riki ni motiki taekaia te botanaomata aio, ma ni kabuakaka ara tua? Ngkana e rang korakora mwaakami e aera ngkai kam aki kamaiuingkami.

21 Ao a bon mwaiti bwaai ake a taekin nakoia, ni kangengea wiia iaoia, ma ni baware iaoia, ma n taku: E na kanga aron taraara ngkana ti a kabuakakaaki?

22 Ao a mwaiti bwaai, eng, aekakin aro nako ake a bon taekin nakoia; ao a bon bwainikirinia i nanon boong aika a mwaiti. Ao a bon taua te amwarake ma irouia bwa aonga ni baki, ao te ran bwa aonga n taka; ao a bon anai naba mai irouia aia kunnikai ao a bon bebeekan; ao aio aroia ni kabaeaki ni kabaebae aika a matoatoa, ma ni kainaki n te karabuti.

23 Ao e koro bukina bwa i mwin are a tia ni kainnano i nanon boong aika a mwaiti, (ao bon n te katebwi ma uoua ni bong, n te katebwi n namwakaina, n aia katebwina n ririki n tautaeka taan moti iaoia ana aomata Nibwaai) are mataniwia taan moti iaon te aba are Amonia ma aia taan reirei ao aia taan reirei te tua aika a mwaiti a nakon te karabuti are a kabaeaki iai Aramwa ma Amureki ni kabaebae aika a matoatoa.

24 Ao mataniwia taan moti e tei i mataia, ao e oroia riki, ma n taku nakoia: Ngkana iai mwaakan te Atua iroumi kainaomataingkami man taian kabaebae aikai, ao ngkanne ti na kakoaua bwa te Uea e na kamaunaia te botanaomata aio n aron ami taeka.

25 Ao e koro bukina bwa a bane ni waaki ma n oroia, n taekin taeka akekei naba, ni karokoa te kabanea; ao ngke e a tia te kabanea n taetae nakoia, mwaakan te Atua e mena iaoia Aramwa ma Amureki ao a teirake ma n tei iaon waeia.

26 Ao Aramwa e tang, ni kangai: Maan raa ngaira are ti na kainnano n taian maraki aika a korakora aikai, O te Uea? O te Uea, anganiira te korakora n aron ara onimaki are e mena iroun Kristo, nakon te kainaomataki. Ao a urui taian kabaebae ake a kabaeaki iai; ao ngke a noori aikai aomata, a waaki ni biri nako, bwa maakan te kamaunaki e roko irouia.

27 Ao e koro bukina bwa e rang korakora maakuia n te aro are a bwaka iaon tano, ao aki karekea mataroan te karabuti are mai tinaniku; ao te aonaba e korakora ruruna, ao oon te karabuti e raeuaki nakon uoua, n te aro are a bwaka nako aon te aba; ao mataniwia taan moti, ao taan reirei te tua, ao ibonga, ao taan reirei, ake a oroia Aramwa ma Amureki, a tiringaki ni bwakana arei.

28 Ao Aramwa ma Amureki a otinako ma i nanon te karabuti, ao aki maraki; bwa te Uea e anganiia te mwaaka, n aron aia onimaki are iroun Kristo. Ao n te tai naba arei a otinako man te karabuti; ao a bwara man kabaeaia; ao te karabuti e bwaka nako aontano, ao ni kabane aomata ake a mena i nanon oona, a mate, ma aki Aramwa ma Amureki; ao n te tai naba arei a otinako man te kaawa.

29 Ao ngkanne aomata ngke a tia n ongo te karongoa ae korakora a biri n roko ni mwaiti bwa a kan ataia bwa teraa ae riki; ao ngke a noora Aramwa ma Amureki n otinako man te karabuti, ao oona a bwaka nako aontano, a rotaki n te maaku ae korakora, ao a biri nako mai mataia Aramwa ma Amureki n aiaron te kooti ma natina ae e biri nako mai iroun te raian; ao a bon biri nako mai matan Aramwa ma Amureki.