1 Ket napasamak a nabilin da Alma ken Amulek a pumanaw iti dayta a siudad; ket pimmanawda, ket nakapanda iti daga ti Sidom; ket kitaen, nasarakanda sadiay amin a tao a pimmanaw iti daga ti Ammonihah, a napagtalaw ken nabato, gapu ta namatida kadagiti balikas ni Alma.

2 Ket insalaysayda kadakuada ti amin a napasamak kadagiti assawada a babbai ken annakda, kasta met ti maipanggep kadakuada, ken ti bileg ti pannakaisalakanda.

3 Kasta met a naidalit ni Zeezrom iti sakit iti Sidon, iti nakaro a gurigor, a bunga iti nakaro a panagtutuok ti panunotna gapu iti kinadakesna, ta impagarupna nga awanen da Alma ken Amulek; ket impagarupna a napapatayda gapu iti kinadangkesna. Ket daytoy nadagsen a basol, ken adu a sabsabali pay a basbasolna, ti nangburibor iti panunotna agingga a nagbalin daytoy a nakaro unayen ti saemna, nga awanen ti pannakaisalakan; ngarud nangrugi a nakarikna ti nakaro unay a bara.

4 Ita, idi mangngegna nga adda da Alma ken Amulek iti daga ti Sidom, nangrugi a timmured ti rikna ti pusona; ket nangipatulod a dagus iti mensahe kadakuada, a tarigagayanna nga umayda kenkuana.

5 Ket napasamak a napanda a dagus, a tinungpalda ti mensahe nga impatulodna kadakuada; ket simrekda iti balay ni Zeezrom; ket nasarakanda iti iddana, masakit, a nakapsut unay iti nakaro a gurigor; ken kasta pay a nasaem unay ti pampanunotna gapu kadagiti kinadangkesna; ket intanggayana ti imana idi makitana ida, ket dinawatna nga agasanda.

6 Ket napasamak nga iniggaman ni Alma ti imana, a kinunana: Patiem kadi ti bileg ni Cristo a mangisalakan?

7 Ket simmungbat a kinunana: Wen, patiek amin a balikas nga insuroyo.

8 Ket kinuna ni Alma: No patiem ti pannubbot ni Cristo maagasanka.

9 Ket kinunana: Patiek a mayannurot kadagiti balikasmo.

10 Ket kalpasanna immawag ni Alma iti Apo, a kunana: O Apo a Diosmi, kaasiam koma daytoy a tao, ket agasam a mayannurot iti pammatina ken ni Cristo.

11 Ket idi maisao ni Alma dagitoy a balikas, timmakder a dagus ni Zeezrom, ket rinugianna ti nagna; ket napasamak daytoy iti nalaus a siddaaw dagiti amin a tao; ket nagwaras daytoy a pannakaammo iti intero a daga ti Sidom.

12 Ket binuniagan ni Alma ni Zeezrom iti Apo; ket rinugianna iti dayta a kanito ti nangasaba kadagiti tattao.

13 Ket nangbangon ni Alma ti simbaan iti daga ti Sidom, ken nangkonsagrar kadagiti papadi ken mannursuro iti daga, ken namuniag iti Apo iti asino man nga agtarigagay a mabuniagan.

14 Ket napasamak nga aduda; agsipud ta immayda manipud iti amin a paset iti aglawlaw ti Sidom, ket nabuniaganda.

15 Ngem no maipanggep kadagiti tattao nga adda iti daga ti Ammonihah, nagtalinaedda pay laeng a natangken ti panagpuspusona ken nasukir a tattao; ket saanda nagbabawi ti basbasolda, impagapuda a bileg ti sairo ti adda kada Alma ken Amulek; agsipud ta addada iti propesion ni Nehor, ket saanda patien ti panagbabawi ti basbasolda.

16 Ket napasamak a da Alma ken Amulek, gapu ta tinallikudan ni Amulek ti amin a balitokna, ken pirak, ken dagiti napateg a bambanagna, nga adda iti daga ti Ammonihah, para iti balikas ti Dios, isu nga inlaksid dagiti sigud a gagayyemna kasta met ti ama ken kakabsatna;

17 Ngarud, kalpasan ti panangbangon ni Alma iti simbaan iti Sidom, a nakitana ti napalalo a pannakateppel, wen, nabigbigna a nateppel dagiti tattao maipapan iti kinapalangguad dagiti pusoda, ket nangrugida a nagpakumbaba iti Dios, ket rinugianda nga inurnos ti bagbagida iti santuarioda tapno agdaydayawda iti Dios iti altar, agtultuloyda nga agsiput ken agkararag, tapno maisalakanda manipud ken ni Satanas, ken manipud iti pannakatay, ken manipud iti pannakadadael—

18 Ita kas kinunak, kalpasan a nakita ni Alma dagitoy a bambanag, innalana ngarud ni Amulek ket immay iti daga ti Zarahemla, ket innalana iti balayna, ket inaywananna kadagiti pagtutuokanna, ket pinapigsana iti Apo.

19 Ket kasta ti panaggibus ti maika sangapulo a tawen ti panagturay dagiti ukom kadagiti Nephi.