1 Ka sa yaco ni sa oti e rua na siga ka rua na bogi era sa vakarau kauta na yagona na tui ka vakotora ena dua na ibulubulu qara vatu era a vakarautaka me ra dau bulu kina na nodra mate.

2 Oqo na ranadi ni sa rogoca na irogorogo kei Amoni, sa talatala yani me lako mada mai vua.

3 Ka sa yaco ni sa kitaka ko Amoni me vaka sa vakaroti kina, ka lako yani vua na ranadi, ka taroga se cava e vinakata me vakayacora.

4 Ka sa kaya na ranadi vua: Era sa tukuna vei au na dauveiqaravi nei watiqu ni ko sa parofita ni Kalou savasava, ka sa tiko vei kemuni na kaukauwa mo vakayacora e vuqa na cakacaka e veivakurabuitaki ena yacana;

5 O koya, kevaka sa vakakina, au gadreva mo curu mada yani ka raica na watiqu, ni sa oti e rua na siga ka rua na bogi na dede ni nona davo koto ena nona idavodavo; ka so era kaya ni sa bera ni mate; ia e so tale era kaya ni sa mate ka sa bona na yagona, ka sa dodonu me sa laki vakotori ki na ibulubulu qara vatu; ia ki vei au, au kila ni sa bera ni bona.

6 Oqori sara ga na veika e gadreva tu ko Amoni, ka ni kila ni sa curumi Lamonai na tui na kaukauwa ni Kalou; e kila ni sa takali vua na iubi butobuto ni tawavakabauta, kei na rarama ka sa vakararamataka na nona vakasama, na rarama ni nona lagilagi na Kalou, sai koya na rarama talei ni nona vinaka—io, na rarama oqo sa vakavuna na marau ni yalona, sa vakasavi tani kina na o ni butobuto, ka sa vakacaudreva na yagona kei na yalona na rarama ni bula tawavakaiyalayala, io, sa kila ko koya ni sa rawa na yagona na ka oqo, ka sa kau yani vua na Kalou—

7 O koya, na ka sa vinakata vua na ranadi sai koya na ka duadua e gadreva ko koya. O koya sa curu kina ki loma me raica na tui me vaka na nona gagadre na ranadi; ka raica na tui, ka kila ni sa sega ni mate.

8 Ka sa kaya ko koya vua na ranadi: Sa sega ni mate ko koya, ia sa moce ga vua na Kalou, ka na yadra ena mataka; o koya mo dou kakua kina ni buluti koya.

9 Ka sa kaya tale vua ko Amoni: Ko sa vakabauta na ka oqo? A sa kaya vua na ranadi: Sa kena ivakadinadina wale ga vei au na nomu vosa, kei na nodra vosa na neirau dauveiqaravi; ia au sa vakabauta ni na yaco vakaidina me vaka na ka ko sa tukuna.

10 A sa kaya vua ko Amoni: Ko sa kalougata ena levu ni nomu vakabauta; Au sa kaya vei iko, yalewa, sa sega na vakabauta levu vakaoqo vei ira kece na Nifaiti.

11 Ka sa yaco ni sa yadravi watina tiko na ranadi, mai na gauna ko ya me yacova na gauna ko ya ena mataka ka tukuna ko Amoni ni na yadra kina.

12 Ka sa yaco ni sa duri cake mai ko koya, me vaka na vosa i Amoni; ia ni sa yadra mai, sa dodoka yani na ligana vua na yalewa, ka kaya: Me vakalougatataki ga na yaca ni Kalou, ia mo kalougata tale ga ko iko.

13 Me vaka ga ni ko sa bula tiko, raica, au sa raica vakaidina na noqu Dauveivueti; ka na lako mai ko koya, ena sucu mai vua e dua na yalewa, ka na mai sereki ira kecega na tamata sa vakabauta na yacana. Ia, ni sa cavuta oti na vosa oqo, sa vuabale na nona marau, ka davo sobu tale ena reki; a sa bale sobu tale ga na ranadi, ni sa vakamalumalumutaki koya na kaukauwa ni Yalotabu.

14 Oqo ni sa raica ko Amoni ni sa sovaraki na Yalo ni Turaga me vaka na nona vakamamasu, ena vukudra na Leimanaiti, ko ira na wekana, ko ira era sa vakatubura tiko vakalevu na rarawa vei ira na Nifaiti, se vei ira kece na tamata ni Kalou ena vuku ni nodra caka ca kei na nodra ivakarau, sa lolou sobu e duruna, ka tekivu me sovaraka na yalona ena masu kei na vakavinavinaka vua na Kalou ena veika sa vakayacora vei ira na wekana; ka sa malumalumu tale ga ena reki; ka ratou sa bale tolutolu kina ki na qele.

15 Ia ni ra sa raica na dauveiqaravi ni tui ni ratou sa bale no, era sa vakatekivu me tagi tale ga vua na Kalou, ni sa yaco tale ga vei ira me ra rerevaka na Turaga, ni sai ira era a mai vakadinadinataka vua na tui na kaukauwa i Amoni.

16 Ka sa yaco ni ra sa masuta na yaca ni Turaga, ena nodra igu, me yacova ni ra sa bale sobu kecega ki na qele, ia sa vo duadua ga e dua na yalewa ni Leimanaiti, na yacana ko Apisi, ni sa saumaki vua na Turaga ena vuqa na yabaki sa oti, ena vuku ni dua na raivotu veivakurabuitaki nei tamana—

17 Ia ni sa saumaki tu vua na Turaga, ka sega ni vakatakila, o koya, ni sa raica ni ra sa bale sobu kecega ki na qele na dauveiqaravi nei Lamonai, kei na nona marama tale ga, na ranadi, kei na tui, kei Amoni ka davo vakatoboicu no ena qele, sa kila ni oqo na kaukauwa ni Kalou; ia ni nanuma ni oqo e dua na gauna vinaka, ena nona vakaraitaka vei ira na tamata na veika e yacovi ira oqo, ena nodra raica na veika oqo ena rawa ni vakavuna na nodra vakabauta na kaukauwa ni Kalou, o koya sa cici yani kina mai na dua na vale ki na dua tale, me tukuna vei ira na tamata me ra kila.

18 Ka sa vakatekivu me ra soqoni vata yani ki na nona vale na tui. Sa lewevuqa sara era yaco yani, era sa kurabui vakalevu, ni ra sa raica na tui, kei na ranadi, kei ira kece na nodrau dauveiqaravi ni ra sa davo vakatoboicu no ena qele, ko ira kecega era sa davo koto me vaka era sa mate; era sa raici Amoni tale ga, ka raica, sa Nifaiti ko koya.

19 Ia oqo a ra sa vosa kudrukudru na tamata; era sa kaya eso ni sa yaco vakaidina vei ira e dua na leqa levu, se vua na tui kei na nona vuvale, ni sa vakatara ko koya me tiko ena nodra vanua e dua na Nifaiti.

20 Ia e so tale era sa vunauci ira ka kaya: E sa kauta mai na tui na leqa oqo ki na nona vuvale, ni a lewa me ra vakamatei na nona dauveiqaravi ka a veiseyaki na nodra qele ni manumanu ena wai ko Sepusi.

21 Ia era sa vunauci talega mai vei ira na tagane ka ra tu ena wai ko Sepusi me vakatalabusesetaka na nona qele ni manumanu na tui, ni ra sa cudruvi Amoni vakalevu sara ni a vakamatea mai kea e so na wekadra, ka ra via vakasava na nona qele ni manumanu na tui.

22 Ia oqo, e dua vei ira, na tacina e dua vei ira ka a vakamatea ko Amoni ena iseleiwau; ni se cudruvi Amoni vakalevu sara tiko, sa ucuna na nona iseleiwau ka lako yani me vakalutuma vei Amoni, me vakamatea; ia ni sa laveta cake na nona iseleiwau me yaviti koya, raica, sa bale sobu ka mate sara.

23 Eda sa raica eke ni sa sega ni rawa me vakamatei ko Amoni, ni a kaya vakaoqo na Turaga vei Mosaia, na tamana: Au na taqomaki koya me vaka na nomu vakabauta—o koya sa soli koya kina ko Mosaia vua na Turaga.

24 Ka sa yaco ni ra sa raica na lewevuqa ni sa bale na tamata, o koya sa via vakamatei Amoni, era sa rere vakalevu sara, ka sega ni doudou me ra dodoka yani na ligadra me tarai koya se dua tale vei ira na bale no; a ra sa kurabui kecega ka veitarogi vakai ira se kaukauwa cava sa yaco kina na ka oqo, ka cava na kena ibalebale.

25 Ka sa yaco ni sa lewe vuqa vei ira era kaya ni ko Amoni na Yalo Cecere, ka so tale era kaya ni sa talai mai vua na Yalo Cecere ko koya;

26 Ia e so tale era vunauci ira, ka kaya ni ko koya e dua na manumanu rerevaki, ka ra tala mai na Nifaiti me mai vakararawataki ira.

27 Ka so tale era kaya ni a talai Amoni mai na Yalo Cecere, me vakararawataki ira ena vuku ni nodra caka cala; ka sai koya na Yalo Cecere oqo sa dau qaravi ira tiko na Nifaiti, ka sa dau vakabulai ira mai na ligadra; ka ra kaya ni ko koya na Yalo Cecere ga oqo sa vakarusa e vuqa vei ira na wekadra, ko ira na Leimanaiti.

28 Ka sa yaco me kaukauwa sara kina na nodra veilecalecavi. Ka ena gauna era veilecalecavi tiko kina vakaoqo, sa lako mai na yalewa dauveiqaravi ka vakavuna na nodra soqoni mai na lewevuqa, ena gauna e raica kina na nodra veilecalecavi na lewevuqa sa rarawa vakalevu sara ka tagi.

29 Ka sa yaco ni sa lako yani ka taura na ligana na ranadi, me rawa ni vakaduri koya kina mai na qele; ia ni taura ga na ligana sa duri ka tucake e yavana, ka kaci ena domo levu, ka vaka: Me vakacaucautaki ko Jisu, ni sa vakabulai au mai na eli vakarerevaki! Me vakacaucautaki na Kalou, ni lomani ira mada na tamata oqo!

30 Ia ni sa tukuna oti na veika oqo, sa roqota na ligana, ni sa vakasinaiti ena marau, ka cavuta na veivosa tawakilai, ni sa kitaka oti oqo, sa taura na tui, ko Lamonai, ena ligana, ka raica sa duri ka tucake e yavana.

31 Ia ko koya, ni sa raica sara na nodra veilecalecavi na nona tamata, sa lako yani ka tekivu me vunauci ira, ka me vakatavulica vei ira na vosa ka rogoca mai na gusui Amoni; ia ko ira kecega sa rogoca na nona vosa era sa vakabauta, ka yaco me ra saumaki vua na Turaga.

32 Ia sa vuqa vei ira era sa sega ni via rogoca na nona vosa; o koya era sa dui gole ga kina ka lako yani.

33 Ka sa yaco ni sa tucake mai ko Amoni sa vunau tale ga vei ira, ka vakatalega kina ko ira kece na dauveiqaravi nei Lamonai; ka ra sa vunautaka kece vei ira na tamata e duavata ga na ka—ni sa veisau na yalodra; ni sa sega tale ni tu vei ira e dua na gagadre me ra vakayacora na ca.

34 Ia raica, sa lewevuqa era sa tukuna vei ira na tamata ni ra sa raica na agilosi ka veivosaki vata kei ira; ka ra sa tukuna vei ira na veika ni Kalou, kei na nona yalododonu.

35 Ka sa yaco ni ra sa lewevuqa era sa vakabauta na nodra vosa; ia ko ira kecega sa vakabauta era sa papitaisotaki; ka sa yaco me ra tamata yalododonu, ka ra sa tauyavutaka na lotu ena kedra maliwa.

36 Ka sa tekivu vakaoqo na cakacaka ni Turaga ena kedra maliwa na Leimanaiti; ka sa tekivu tale ga kina na nona sovaraka na Turaga vei ira na Yalona; ia eda sa raica kina ni sa dodo tu na ligana vei ira kecega na tamata era na veivutuni ka vakabauta na yacana.