1 Ao e koro bukina bwa ngke a tia ni katea te ekaretia n te aba, te uea are Ramonaai e tangira Amon bwa e na iria nakon te aba are Nibwaai, bwa e na kaotia nakon tamana.

2 Ao e roko bwanan te Uea nakon Amon, ni kangai: Ko na aki nako nakon te aba are Nibwaai, bwa nooria, te uea e na uokoukora maiumi; ma ko na nako nakon te aba are Matonaai; bwa nooria tarim are Aaron, ao Murokaai ao Amma a kabureaki.

3 Ao ngkanne e koro bukina bwa Amon e ongo aio, ao e taku nakon Ramonaai: Nooria, tariu ake a kabureaki i Matonaai, ao N na nako bwa N na kainaomataia.

4 Ao ngkanne Ramonaai e taku nakon Amon: I ataia ni korakoran te Uea bwa ko kona ni karaoi bwaai ni kabane. Ma nooria, N na airi ma ngkoe nakon te aba are Matonaai; bwa uean te aba are Matonaai, are arana Anteomo, bon raraou; ngaia are N na nako nakon te aba are Matonaai, bwa N na kabwaka nanon uean te aba, ao e na kaotinakoia tarim man te nne ni kaikain.

5 Ao Amon e taku nakoina: Akea ae e tuangai ma ti te Atua; ao e taku nakoiu—Nako ao kamaiuia tarim, bwa a kabureaki n te aba are Matonaai.

6 Ao ngkanne Ramonaai e a tia n ongo aio ao e tuangiia ana toro bwa a na katauraoi ana aoti ma ana kai ni buaka.

7 Ao e taku nakon Amon: Nako mai ao N na nako ma ngkoe nakon te aba are Matonaai, ao N na bubutia te uea ikekei bwa e na kaotinakoia tarim man te nne ni kaikain.

8 Ao e koro bukina bwa Amon ma Ramonaai a mwananga, a kaitibo ma taman Ramonaai, are e uea ni kabuta te aba.

9 Ao nooria, e taku taman Ramonaai nakoina: E aera ngkai ko aki kaea te baka n amwarake n te bong are e kakannato arei ngke I karaoa te baka n amwarake nakoia natiu mwaane, ao nakoia au botanaomata?

10 Ao e taku naba nakoina: Ao ko na aera ma te Nibwaite aio ae temanna mai i buakoia natiia taan kewe?

11 Ao e koro bukina bwa Ramonaai e kabwarabwara nakoina bwa a na aera, bwa e maaku ni kaunna.

12 Ao e kaota naba nakoina bukin tikuna n ueana, bwa e aki nakon tamana ni kaea te baka n amwarake are e a tia ni katauraoia.

13 Ao ngkanne ngke Ramonaai e karakin bwaai ni kabane nakoina, nooria, e mimi bwa e un tamana irouna, ao e taku: Ramonaai, ko na nako ni kainaomataia Nibwaite aikai, aika naati mwaane ae natin te tia kewe. Nooria, e rawebwaia ara bakatibu; ao ngkai natina mwaane a manga roko i buakora bwa n aia waaki ni mwaamwana te aba ao aia kewe, a na kamwaneira, bwa a na manga anai ara bwai mai iroura.

14 Ao ngkanne taman Ramonaai e tua bwa e na tiringa Amon n te kabaang. Ao e tua naba bwa e na aki nakon te aba are Matonaai, ma e na oki mangaia nakon te aba are Itimaera.

15 Ma Ramonaai e taku nakoina: N na aki tiringa Amon, ao N na aki naba oki nakon te aba are Itimaera, ma N na nakon te aba are Matonaai bwa I aonga ni kainaomataia tarin Amon, bwa I ataia bwa aomata aika a etieti ao ana burabeti aika tabu te Atua ni koaua.

16 Ao ngkanne tamana ngke e ongo taeka aikai, e bon un irouna, ao e kaotinakoa ana kabaang bwa e na tiringnga ni kabwaka nako aontano.

17 Ma Amon e tei ma n taku nakoina: Nooria, ko na aki tiringa natim; ma e ngae n anne, e raoiroi riki bwa e na bwaka nakoim, bwa nooria, e a tia n rairananona man ana bure: ma ngkana ngkoe ko bwaka n te tai aei, i nanon unim, e na bon aki kona ni kamaiuaki tamneim.

18 Ao riki, e bon riai bwa ko na taotaona nanom; bwa ngkana ko tiringa natim, ao ngkai bon te aomata ae akea burena, e na takarua raraana mai aontano nakon te Uea ae Atuana, bwa e na ruoniko te kabomwi; e na bon bua tamneim.

19 Ao ngkanne Amon ngke e a tia n atong taeka aikai nakoina, e kaeka, ni kangai: I ataia bwa ngkana N na tiringa natiu ao I bon kawawaea te raraa ae akea burena; bwa bon ngkoe ae ko kataia ni kamatea.

20 Ao e arora baina bwa e na tiringa Amon. Ma Amon e kaaitarai ana oro, ao e orea baina n te aro are e aki kona ni kabongana.

21 Ao ngkanne te uea ngke e nooria bwa e kona Amon n tiringnga, e bubutia Amon bwa e na kamaiua.

22 Ma Amon e taku nakoina: Nooria, N na oroiko ti ngkana ko anganai tariu bwa a na otinako man te nne ni kaikain.

23 Ao ngkanne te uea, ibukin maakuna bwa mwiina e bua maiuna, e taku: Ngkana ko kamaiuai, ao N na anganiko te bwai are ko tuatua, e aoria ngkana iteran ueau.

24 Ao ngkanne Amon ngke e nooria bwa e a mena te uea i aan te bwai are e tangiria, e taku nakoina: Ngkana ko kariaia tariu bwa a na otinako man te nne ni kaikain, ao Ramonaai bwa e na tiku ueana, ma n anganna inaomatana bwa e na karaoa oin nanona ni bwaai ake e iangoi, ao N na kamaiuko; ao ngkana ko aki, N na oroiko nako aontano.

25 Ao ngkanne Amon ngke e a tia n taekin taeka aikai, ao te uea e kimwareirei ibukin maiuna.

26 Ao ngke e nooria bwa Amon akea nanona ni kan tiringnga, ao ngke e noora naba korakoran ana tangira ibukin natina Ramonaai, e bon korakora miimiina, ao e taku: Ibukina bwa ti aikai aika ko tangiri, bwa N na kainaomataia tarim, ma ni kariaia bwa natiu ae Ramonaai, e na tiku n taua ueana, nooria, N na kariaia nakoim bwa natiu te mwaane e na tiku ueana man te tai aei ao n aki toki; ao N na aki manga oki n tautaekanna—

27 Ao N na kariaia naba bwa tarim a na kaotinakoaki man te nne ni kaikain, ao ngkoe ma tarim kam na kona n irai nakon ueau; bwa e korakora kan noorami. Bwa e bon rang mimi te uea n ana taeka ake e taekin, ao n taeka naba ake e a tia n taekin Ramonaai, ngaia are e bon rang kan reireinaki.

28 Ao e koro bukina bwa Amon ao Ramonaai a waaki iaon kawaia nakon te aba are Matonaai. Ao Ramonaai e bon kukurei uean te aba irouna; ngaia are tarin Amon a kaotinakoaki man te nne ni kaikain.

29 Ao ngke e a kaitibo Amon mangaia ao e bon rotaki n te nanokawaki ae korakora, bwa nooria a bon akea karabaia, ao e bon korakora menain kuniia ibukin kabaeaia n taian kabaebae aika a mamatoa. Ao a korakai naba ni baki, n taka, ao ni karawawata n aekaia nako; e ngae n anne a bon taotaonakin nano i nanon rawawataia ni kabane.

30 Ao, n aron te bwai are e riki, bon tekebuakaia bwa a mena i nanon baia te botanaomata aika a matoatoa riki nanoia ao a bonotaninga; ngaia are aki ongo n aia taeka, ao a teweaki nako, ma n oreaki, ma ni kakioaki man te bata teuana nakon te bata teuana, ao man te tabo teuana nakon te tabo teuana, ni karokoa ae a roko n te aba are Matonaai; ao a tauaki ma n teweaki nako nanon te nne ni kaikain, ma ni kabaeaki ni kabaebae aika a matoatoa, ao ma ni kabureaki i nanon te maan ae mwaiti te bong, ao a kainaomataki irouia Ramonaai ma Amon.