1 Ao ngkanne ngke Amon ma tarina a maenako n tian abaia Reimwanaite, nooria Aaron e mwananga ni kaineta te aba ae aranaki irouia Reimwanaite, bwa Ierutarem, bwa e ingoanaki i mwin aban aia bakatibu ni bungiaki; ao e raroa bwa e toma ma tian Moomon.

2 Ao ngkanne Reimwanaite ma Amwarakaite ao ana aomata Amuron a tia ni katea te kaawa teuana ae korakora ae aranaki bwa Ierutarem.

3 Ao ngkanne Reimwanaite e bon tau aron matoaia, ma Amwarakaite ao Amuronaite a bon matoatoa riki, ngaia are a karikia Reimwanaite bwa a na kamatoai nanoia, bwa a na matoatoa i nanon te buakaka ao n aia mwakuri aika bati n ribaki.

4 Ao e koro bukina bwa Aaron e roko nakon te kaawa are Ierutarem, ma ni waaki moa ni kabwarabwara nakoia Amwarakaite. Ao e waaki ni kabwarabwara nakoia i nanon aia tinakaoke, bwa a tia ni katei tinakoke n aron ana waaki Neooa; bwa a mwaiti Amwarakaite ao Amuronaite ake a ira aron ana waaki Neooa.

5 Ngaia are. ngke Aaron e rin ni kabwarabwara i nanon teuana aia tinakaoke bwa e na kabwarabwara nakoia aomata, ao ngke e taetae nakoia, nooria e a teirake te Amwarakaite temanna ao e waaki ni kauntaeka mangaia, ni kangai: Teraa ae ko a tia ni kaota koauana, Ko a tia n noora te anera? E aera ngkai a aki kaoti anera nakoira? Nooria tiaki bwa a raraoi aomata aikai n aroia ami botanaomata?

6 Ko taku naba, ngkana kam aki rairinanomi ao kam na mate. Ko kanga n atai kanoan ara iango ma nanora. Ko kanga n ataia bwa ti na riai n rairinanora? Ko kanga n ataia bwa tiaki te botanaomata ngaira aika ti raoiroi? Nooria ti a tia ni katei taabo aika a tabu, ao ti ikoikotaki n taromauria te Atua. Ti kakoaua bwa te Atua e na kamaiuia aomata ni kabane.

7 Ao ngkanne Aaron e taku nakoina: Ko kakoaua bwa natin te Atua e na roko ni kabooia aomata nako man aia bure?

8 Ao e taku te mwaane arei nakoina: Ti aki kakoaua bwa ko ataa te bwai anne. Ti bon aki kakoauai katei ni burababa aikanne. Ti aki kakoaua bwa ko atai bwaai aika a na roko, ke ni kakoaua naba bwa ara bakatibu atai bwaai ake a taekin ake a na roko.

9 Ao ngkanne Aaron e kauki koroboki aika tabu nakoia ni kaineti ma rokon Kristo, ao ni kaineti naba ma mangautia maate, ao are e na bon akea te kaboaki ibukiia aomata nako ma ti man maten ao marakin Kristo, ao ana mwakuri ni kamaiu raraana.

10 Ao e koro bukina bwa ngke e kabwaranakoi bwaai aikai nakoia ao a un irouna, ao a bwainingareia: ao a rawa n ongo n taeka ake e taekin.

11 Ngaia are, ngke e nooria bwa a rawa n ongo n ana taeka, e otinako man aia auti n nebo, ma n nakon te kaawa ae uarereke are e aranaki bwa Aani-Aantaai, ao e kunea Murokaai ikekei bwa e kabwarabwara nakoia: ma Amma ao tarina. Ao a kauntaeka ma aika a mwaiti ibukin te taeka.

12 Ao e koro bukina bwa aomata a kamatoai nanoia, ngaia are a kitania ma ni kawara te aba are Matonaai. Ao a kabwarabwara n te taeka nakoia aika a mwaiti, ao tabemwaang a kakoauai taeka ake e reireinia.

13 Ngaia are, Aaron ma tarina tabemwaang a uotaki man teweaki nakon nanon te nne ni kaikain ao nikiraia a biri nako mai Matonaai nakon taabo ake a uakaan.

14 Ao naake a teweaki nako nanon te nne ni kaikain a kainnanoaki ni bwaai aika a mwaiti, a kainaomataki ni baia Ramonaai ma Amon, ao a kamwarakeaki ma ni kunnikaiaki.

15 Ao a mwananga riki n taekina te taeka, ao ngaia are a kainaomataki te moan tai man te nne ni kaikain; ao a tia ni kainnanoaki.

16 Ao a mwananga nakon taabo ake a kairaki nako iai iroun Tamnein te Uea, ni kabwarabwara ana taeka te Atua i nanon auti n nebo ni kabane ake aia bwai Amwarakaite, ke n taabo ake a botaki iai Reimwanaite ake a kariaiakaki iai n rin.

17 Ao e koro bukina bwa te Uea e a kakabwaiaia, n te aro are a mwaiti ake a kairaki nakon ataakin te koaua; eng, a bon kaota te koaua nakoia aika a mwaiti ibukin aia bure, ao aia katei aia bakatibu, ake a bure.

18 Ao e koro bukina bwa Amon ma Ramonaai a oki man te aba are Matonaai nakon te aba are Itimaera, are bon abaia ni bwaibwai.

19 Ao te uea are Ramonaai e aki tangiria bwa Amon e na beku ibukina ke e na riki bwa ana toro.

20 Ma e baireia bwa a na kateaki auti n nebo n te aba are Itimaera; ao e baireia bwa ana botanaomata, ke aomata ake a mena n ana tabo, a na ikotaki.

21 Ao e kimwareirei i aoia, ao e reireinia bwaai aika a mwaiti. Ao e tuangiia naba bwa aomata ngaia aika a mena i aana, ao a bon inaomata, ao a inaomata man ana karawawata te uea, are tamana; bwa tamana e a tia n anganna bwa e na tautaeka i aoia aomata ake a mena n te aba are Itimaera, ao n te aba are e uakaan mangaia.

22 Ao e taekinna naba bwa e na reke irouia te inaomata n taromauria te Uea ae Atuaia n aron bwaai ake a tangiri, n taabo nako ake a mena iai, ngkana a mena n te aba are e tautaeka iai te uea are Ramonaai.

23 Ao Amon e bon kabwarabwara nakoia ana aomata te uea are Ramonaai; ao e koro bukina; bwa e reireinia bwaai ni kabane ni kaineti ma te raoiroi; Ao e kairoroia ni katoa bong, ma te nanomwaka; ao a ongo n ana taeka, ao a kakaonimaki ni kawakina ana tua te Atua.