1 Ita, bayat ti kasta nga agtultuloy a panangasaba ni Ammon kadagiti tattao ni Lamoni, agsublitayo iti pakaammo ni Aaron ken dagiti kabsatna; agsipud ta kalpasan ti ipapanawna iti daga ti Middoni inturong ti Espiritu iti daga ti Nephi, uray pay iti balay ti ari ti intero a daga malaksid ti daga ti Ismael; ket isu ti ama ni Lamoni.

2 Ket napasamak a napan isuna kenkuana iti palasio ti ari, a kaduana dagiti kabsatna, ket nagtamed iti ari, ken kinunana kenkuana: Kitaen, O ari, dakami ti kabsat ni Ammon, a winayawayaam iti pagbaludan.

3 Ket ita, O ari, no isalakanmo ti biagmi, agbalinkami a katulongam. Ket kinuna ti ari kadakuada: Tumakderkayo, agsipud ta ipaayko kadakayo ti biagyo, ket saanko ipalubos nga agbalinkayo a katulongak; ngem ipilitko a kasabaandak; agsipud ta nariribukan ti panunotko gapu iti kinamanagayat ken kinaindaklan dagiti balikas ti kabsatyo a ni Ammon; ket tarigagayak a maammuan ti gapuna no apay a saanna nakaikuyogan kadakayo manipud iti Middoni.

4 Ket kinuna ni Aaron iti ari: Kitaen, imbaon ti Espiritu ti Apo iti sabali a papanan; napan iti daga ti Ismael, tapno isurona dagiti tattao ni Lamoni.

5 Ita kinuna ti ari kadakuada: Ania daytoy nasaom a maipanggep iti Espiritu ti Apo? Kitaen, daytoy a banag ti mangriribuk kaniak.

6 Ken maysa pay, ania daytoy kinuna ni Ammon—No agbabawikayo maisalakankayo, ket no saankayo nga agbabawi, mapatalawkayonto iti maudi nga aldaw?

7 Ket sinungbatan ni Aaron ken kinunana kenkuana: Patiem kadi nga adda Dios? Ket kinuna ti ari: Ammok a kinuna dagiti Amalekita nga adda Dios, ken pinalubosak ida nga agpatakder kadagiti santuario, tapno maummongda ti bagbagida nga agdayaw kenkuana. Ket no kunam ita nga adda Dios, kitaen patiekto.

8 Ket ita idi mangngeg ni Aaron daytoy, nangrugi a nagrag-o ti pusona, ket kinunana: Kitaen, ipanamnamak bayat ti panagbiagmo, O ari, nga adda Dios.

9 Ket kinuna ti ari: Dios kadi dayta Naindaklan nga Espiritu a nangiruar kadagiti ammatayo iti daga ti Jerusalem?

10 Ket kinuna ni Aaron kenkuana: Wen, isu dayta Naindaklan nga Espiritu, ket pinarsuana amin a bambanag iti langit ken iti daga. Patiem kadi daytoy?

11 Ket kinunana: Wen, patiek a pinarsua ti Naindaklan nga Espiritu amin a bambanag, ket tarigagayak nga ibagam kaniak ti maipanggep kadagitoy amin a bambanag, ket patiek dagiti balikasmo.

12 Ket napasamak nga idi nakita ni Aaron a patien ti ari dagiti balikasna, inrugina manipud iti pannakaparsua ni Adan, nga imbasana ti nasantuan a kasuratan iti ari—no kasano a pinarsua ti Dios ti tao a kalanglangana, ken inikkan ti Dios iti bilbilin, ken gapu iti panagbasol, natnag ti tao.

13 Ket inlawlawag ni Aaron kenkuana ti nasantuan a kasuratan manipud iti pannakaparsua ni Adan, nga imbaskagna iti sangona ti pannakatnag ti tao, ken ti nailubongan a kasasaad kasta met ti plano ti pannakasubbot, a naisagana manipud iti pamuon ti lubong, babaen ken ni Cristo, para kadagiti amin a mamati iti naganna.

14 Ket gapu ta natnag ti tao saanna maikari ti aniaman ti bagina; ngem nasubbot dagiti basolda iti panagsagaba ken ipapatay ni Cristo, babaen ti pammati ken panagbabawi, ken dadduma pay; kasta met a pugsatenna ti bedbed ti ipapatay, tapno maawanan ti tanem iti panagballigi, ken iti kasta maalimon ti pannilud ti ipapatay iti panangnamnama iti gloria; ket inlawlawag ni Aaron amin dagitoy a bambanag iti ari.

15 Ket napasamak a kalpasan ti panangilawlawag ni Aaron kadagitoy a bambanag kenkuana, kinuna ti ari: Ania ti aramidek tapno maaddaanak iti agnanayon a biag a kas iti imbagam? Wen, ania ti aramidek tapno maipasngayak iti Dios, tapno maapsut ti kaadda daytoy nadangkes nga espiritu iti barukongko, ket maawatko ti Espirituna, tapno mapnoak iti rag-o, tapno saanak a mailaksid iti maudi nga aldaw? Kitaen, kinunana, iwaksik amin a sanikuak, wen, tallikudak ti pagariak, tapno maawatko daytoy naindaklan a rag-o.

16 Ngem kinuna ni Aaron kenkuana: No tarigagayam daytoy a banag, no agtamedka iti Dios, wen, no ibabawim amin a basbasolmo, ket agtamedka iti Dios, ket awagam ti naganna nga addaan iti pammati, patiem a maawatmo, kalpasanna maawatmo ngarud ti namnama a tartarigagayam.

17 Ket napasamak nga idi maibaga ni Aaron dagitoy a balikas, nagtamed ti ari iti Apo, a nagparintumeng; wen, nga uray la nga indasayna ti bagina iti daga, ket immawag a siindaklan, a kinunana:

18 O Dios, imbaga ni Aaron kaniak nga adda Dios; ket no adda Dios, ken no sika ti Dios, ipakaammomto kadi ti bagim kaniak, ket iwaksikto amin a basbasolko tapno maammuanka, ken tapno mabangonak manipud kadagiti natay, ket maisalakanak iti maudi nga aldaw. Ket ita idi naibaga ti ari dagitoy a balikas, nadalupasay a kasla natay.

19 Ket napasamak a nagtataray dagiti katulonganna ket imbagada iti reyna ti amin a napasamak iti ari. Ket napan isuna iti ari; ket idi nakitana a naudatal a kasla natay, kasta met ni Aaron ken dagiti kabsatna a kasla isuda ti nakaigapuan ti pannakatuangna, nakapungtot isuna kadakuada, ket binilinna dagiti katulonganna, wenno dagiti katulongan ti ari, nga alaen ken papatayenda ida.

20 Ita nakita dagiti katulongan ti nakaigapuan ti pannakatuang ti ari, ngarud saanda naitured a gammatan ni Aaron ken dagiti kabsatna; ket nagpakaasida iti reyna a kinunada: Apay a bilinennakami a mangpapatay kadagitoy a tao, idinto a kitaen nabilbileg ti maysa kadakuada ngem kadakami amin? Ngarud mapasagkami iti sangoda.

21 Ita idi nakita ti reyna ti buteng dagiti katulongan nangrugi met a nagbuteng iti kasta unay, ta amangan ta addaanto iti dakes a nanglukon kenkuana. Ket binilinna dagiti katulonganna a mapan agayab iti tattao, tapno patayenda da Aaron ken dagiti kabsatna.

22 Ita idi nakita ni Aaron ti kinapinget ti reyna, isu, a makaammo met iti kinatangken ti panagpuspuso dagiti tattao, nagamak ta amangan no agtitipon dagiti ummong, ket tumaud ti nakaro a panagsusussik ken panangriribuk kadakuada; ngarud intag-ayna ti imana ket binangonna ti ari manipud iti daga, ket kinunana kenkuana: Tumakderka. Ken timmakder, ket naipasubli ti pigsana.

23 Ita napasamak daytoy iti imatang ti reyna ken ti adu kadagiti katulongan. Ket idi nakitada nagsiddaawda iti kasta unay, ket nangrugida a nagbuteng. Ket nagtakder ti ari, ket rinugianna ti nanarawidwid kadakuada. Ket insurona ida, agingga a namalbaliw ti sangabukel a sangakabbalayanna iti Apo.

24 Ita adda ummong a naguummong gapu iti bilin ti reyna, ket nangrugi ti nakaro a tantanabutobda gapu ken ni Aaron ken dagiti kabsatna.

25 Ngem sireregget nga immasideg ti ari kadakuada ket inannonganna ida. Ket napagtalnada nga agpapan ken ni Aaron ken dagiti kaduana.

26 Ket napasamak nga idi nakita ti ari a napagtalna dagiti tattao, imbilinna nga agtakder da Aaron ken dagiti kabsatna iti tengnga ti ummong, ket iti kasta ikasabada kadakuada ti balikas.

27 Ket napasamak a nangipaulog ti ari iti pakdaar iti intero a daga, kadagiti taona nga adda iti intero a dagana, nga adda iti amin a lugar iti aglawlaw, a bumeddeng iti baybay, iti daya ken iti laud, ken naisina manipud iti daga ti Zarahemla babaen ti akikid a paset ti langalang, a naibannuyat iti daya a baybay agingga iti laud a baybay, ken aglikmot iti beddeng ti igid ti baybay, ken dagiti nagbedngan ti kabakiran nga adda iti amianan nga umasideg ti daga ti Zarahemla, iti nagbedngan ti Manti, iti uluanan ti karayan Sidon, a dimmanon nga agpalaud manipud iti daya—ket kasta ti pannakaisina dagiti Lamanita ken Nephita.

28 Ita, nagindeg iti langalang dagiti nasadsadut a paset dagiti Lamanita, ket nagyanda kadagiti tolda; ket naiwarasda iti langalang iti laud, iti daga ti Nephi; wen, ken kasta met iti laud ti daga ti Zarahemla, kadagiti nagbedngan iti igid ti baybay, ken iti laud iti daga ti Nephi, iti lugar nga immuna a tinawid dagiti ammada, iti kasta nagpatingga iti igid ti baybay.

29 Ken kasta met nga adu dagiti Lamanita iti daya iti igid ti baybay, a nagyabugan kadakuada dagiti Nephita. Ket iti kasta dandani napalawlawan dagiti Lamanita dagiti Nephita; nupay kasta nasakupen dagiti Nephita ti amin nga akin-amianan a paset ti daga a bumeddeng iti langalang, iti uluanan ti karayan Sidon, iti laud manipud iti daya, iti aglawlaw ti igid ti langalang; iti amianan, uray pay nga agingga a nakadanonda iti daga a ninagananda iti Bountiful.

30 Ket naibeddeng iti daga a ninagananda iti Desolation, gapu iti kaadayona nga agpaamianan ta dimmanon pay iti daga a nagnaedan dagiti nadadael a tattao, nga akintulang kadagiti nasaotayon, a naduktalan dagiti tattao ti Zarahemla, nga isu ti lugar nga immuna a simmangladanda.

31 Ket naggapuda sadiay iti papanda iti langalang iti abagatan. Kasta ti pannakanagan ti daga nga agpaamianan iti Desolation, ket nanaganan ti daga nga agpaabagatan iti Bountiful, gapu ta langalang daytoy a napno iti amin a kita ti atap nga ayup a nadumaduma, a paset daytoy ti naggapu iti daga nga agpaamianan para iti taraon.

32 Ket ita, agadayo laeng iti maysa nga aldaw ken kagudua a panagbiahe ti Nephita, manipud iti Bountiful ken iti daga ti Desolation, manipud iti daya agingga iti makinlaud a baybay; ket kasta ti dandani pannakapalawlaw ti daga ti Nephi ken ti daga ti Zarahemla iti danum, gapu ta adda iti bassit a lengges ti daga iti nagbaetan ti daga nga agpaamianan ken ti daga nga agpaabagatan.

33 Ket napasamak a nagyan dagiti Nephita iti daga ti Bountiful, uray pay manipud iti daya nga agpalaud iti baybay, ket kasta ti kinasirib dagiti Nephita, a kaduada dagiti guardia ken buyotda, nabalembeman dagiti Lamanita iti abagatan, tapno iti kasta saandan a makatagikua iti amianan, tapno saanda a masakup ti daga nga agpaamianan.

34 Ngarud awanen ti sanikua dagiti Lamanita no saan iti daga laeng ti Nephi, ken iti langalang iti aglawlaw. Ita daytoy ti sirib dagiti Nephita—ta kabusor kadakuada dagiti Lamanita, saanda ipalubos ti panagsagabada iti tunggal daga, ken kasta met a tapno maaddaanda iti pagilian a kamanganda, a mayannurot iti tarigagayda.

35 Ket ita siak, kalpasan ti panangibagak daytoy, agsubliak manen iti salaysay da Ammon ken Aaron, da Omner ken Himni, ken dagiti kabsatda.