1 Hwɛ, afei ɔbaa dɛ ber a Ammon no dɔm no tsimii wɔ Jershon asaase do no, nyew, na wɔpaam Lamanfo so fii asaase no do, ma dɔm a wɔwɔ asaase do no siee hɔn efun no—

2 Afei woenntum annkan hɔn ewufo no osiandɛ wɔdɔɔ sõ dodow; nna woenntum annkan Nephifo so hɔn ewufo—mbom ɔbaa dɛ ber a wosiee hɔn efun no, na wɔdze hɔn akɔnkye na sũ nye mpaabɔ baa ewiei no (na iyi sii wɔ afe duesia no mu wɔ ber a atsɛmbuafo a wɔhwɛ Nephi no nkorɔfo do no hɔn afe a otsĩa duesia no mu) asomdwee hyɛɛ ase toatoaa do baa asaase nyina do kyɛree.

3 Nyew, na dɔm no bɔɔ mbɔdzen dzii Ewuradze ne mbrasɛm do; na wodzii Nyankopɔn n’ayɛdze do pɛpɛɛpɛr dɛ mbrɛ Moses mbra no tse; osiandɛ wɔkyerɛɛ hɔn dɛ wondzi Moses mbra do nkesi dɛ ɔbɛhyɛ mã.

4 Na dɛm maa basabasayɛ biara ennsi dɔm no mu wɔ afe duesia no nyina mu wɔ ber a atsɛmbuafo hwɛ Nephi no nkorɔfo do no.

5 Na ɔbaa dɛ atsɛmbuafo no hɔn afe a otsĩa duesuon no mu no nna asomdwee da ho wɔ hɔ.

6 Mbom ɔbaa dɛ ɔdze rokɔ afe duesuon n’ewiei no, ɔbarimba bi baa Zarahemla asaase do hɔ a nna ɔyɛ Christ-otsiafo, na ɔhyɛɛ ase dɛ ɔrekã nsɛm a otsia nkɔnhyɛ a nkɔnhyɛfo no akã a ɔfa Christ ne mbaa ho kyerɛ dɔm no.

7 Afei mbra biara nnyi hɔ a otsia nyimpa ne gyedzi; osiandɛ otsia Nyankopɔn ne mbra dzendzenndzen dɛ wɔbɛyɛ ma mbra bi a ɔdze sorbi bɛba abɛda nyimpa mu.

8 Osiandɛ kyerɛwsɛm kã dɛ: Hom nsan mu nyi ndɛ da yi, nyia hom bɔsom no.

9 Afei sɛ nyimpa bi pɛ dɛ ɔsom Nyankopɔn a, ɔwɔ ho kwan dɛ ɔyɛ; anaadɛ sɛ ɔwɔ gyedzi wɔ Nyame mu a ɔwɔ ho kwan dɛ ɔsom no; na mbom sɛ ɔmmpɛ dɛ onya gyedzi wɔ no mu a mbra biara nnyi hɔ dɛ wɔtwe n’aso.

10 Mbom sɛ odzi ewu a wɔtwe n’aso dze ku no bi; na sɛ otwa edwoo so a wɔtwe n’aso no; na sɛ owia adze so a wɔtwe n’aso; na sɛ ɔto awar so a wɔtwe n’aso; nyew, na dɛm emumuyɛdze yi nyina wɔtwe hɔn aso wɔ ho.

11 Na mbra wɔ hɔ dɛ wɔtwe nyimpa aso wɔ hɔn bɔn a wɔyɛɛ no ho. Naaso, mbra biara nnyi hɔ a otsia nyimpa ne gyedzi; dɛm ntsi, nyimpa yɛ bɔn nko a nna wɔtwe n’aso wɔ dza ɔayɛ no ho; dɛm ntsi nyimpa nyina gyina gyinabew kor do.

12 Na dɛm Christ-otsiafo yi, ne dzin dze Korihor, (na mbra nntum nnkyer no) ɔhyɛɛ ase dɛ ɔrekyerɛkyerɛ nkorɔfo no dɛ Christ biara nnyi hɔ. Na nna ɔkyerɛ dɛ:

13 O hom a wɔakyekyer hom ahyɛ nkwasea enyidado hun ase, ebɛnadze ntsi na hom dze nkwaseasɛm a ɔtse dɛm kyekyer homho? Ebɛnadze ntsi na hom hwɛ Christ bi kwan? Na obiara runntum nnhu dza ɔreba.

14 Hwɛ, dza hom frɛ no nkɔnhyɛ nyinara a hom se nkɔnhyɛfo krɔnkrɔn na wɔakã ato hɔ no, hwɛ, ne nyinara yɛ hom egyanom hɔn nkwasea amambra.

15 Hom yɛ dɛn hu dɛ ɔyɛ nokwar? Hwɛ, hom runntum nnhu ndzɛmba a hom nnyim ho hwee; dɛm ntsi hom runntum nnhu dɛ Christ bi bɛba.

16 Hom hwɛ kwan kã dɛ hom hu hom bɔnfakyɛ. Mbom hwɛ, iyi yɛ abɔdamdwen; na hom adwen a wɔayɛ basabasa yi fi hom egyanom hɔn amambra no a ogya hom ma hom nya gyedzi wɔ ndzɛmba a onnyi hɔ no mu.

17 Na nsɛm a ɔtsetse dɛm pii na ɔkãa kyerɛɛ hɔn, ɔkãa kyerɛɛ hɔn dɛ werdambɔ biara nnyi hɔ a obotum dze adasamba hɔn bɔn akyɛ hɔn, na dɛ nyimpa biara dza ɔba no do no fi nankasa n’abrabɔ; dɛm ntsi sɛ nyimpa biara bɛyɛ prɔmprɔm a nna ofi nankasa ne nyansaa, na dɛ nyimpa biara no konyimdzi gyina n’ahoɔdzen do; na biribiara a nyimpa bɛyɛ no nnyɛ bɔn.

18 Na dɛm na ɔkãa kyerɛɛ hɔn, dze twee dodowara hɔn akoma, ma hɔn tsir mu yɛɛ dzen dze yɛɛ emumuyɛdze, nyew, ɔtwee mbaa pii, nye mbarimba so pii ma wɔbɔɔ ndwamanbra—na ɔkãa kyerɛɛ hɔn dɛ sɛ nyimpa wu a nna oewu.

19 Afei dɛm ɔbarimba yi kɔr Jershon asaase so do dɛ ɔrekɛkã dɛm nsɛm yi wɔ Ammon no dɔm no mu, hɔn a nkyɛ wɔyɛ Lamanfo no.

20 Mbom hwɛ, wɔyɛ enyansafo koraa kyɛn Nephifo no hɔn mu dodowara; na wosuoo no mu na wɔkyekyeer no, na wɔsoaa no kɔr Ammon a ɔyɛ ɔsɔfopanyin wɔ dɔm no do no enyim.

21 Na ɔbaa dɛ ɔmaa woyii no edzi fii asaase no do. Na ɔbaa Gideon asaase do, na ɔhyɛɛ ase dɛ ɔrekasa kyerɛ hɔn so; na ennsi no yie amma no koraa wɔ ha, osiandɛ wɔfaa no na wɔkyekyeer no na wɔsoaa no dze no kɔr ɔsɔfopanyin no, nye ɔtsɛmbuafopanyin no so a ɔhwɛ asaase no do no enyim.

22 Na ɔbaa dɛ ɔsɔfopanyin no see no dɛ: Ebɛnadze ntsi na irikyima kontom Ewuradze n’akwan yi? Edɛnadze ntsi na ekã kyerɛ nkorɔfo yi dɛ Christ biara remmba, dze resɛɛ hɔn adwen yi? Ebɛnadze ntsi na ekasa tsia nkɔnhyɛfo krɔnkrɔn hɔn nkɔnhyɛ nyinara yi?

23 Afei ɔsɔfopanyin no ne dzin dze Giddonah. Na Korihor see no dɛ: Osiandɛ mennkyerɛkyerɛ hom egyanom hɔn nkwasea amambra no, na osiandɛ mennkyerɛkyerɛ nkorɔfo yi ma wɔmmfa nkwasea ayɛdze nye nyɛe a tsetseberdo asɔfo hyɛɛ too hɔ, ama woedzi hɔn do dze enya tum na tumdzi wɔ hɔn do ma wɔayɛ atɔbɔ, amma wɔamma hɔn tsir do, na mbom wɔdze hɔn nsɛm abrɛ hɔn adze.

24 Hom kã dɛ nkorɔfo yi yɛ fahodzifo. Hwɛ, mekã dɛ wɔwɔ nkowaasom mu. Hom kã dɛ dɛm tsetse nkɔnhyɛ yinom yɛ nokwar. Hwɛ, mekã dɛ hom nnyim dɛ ɔyɛ nokwar no.

25 Hom kã dɛ nkorɔfo yi yɛ afɔdzifo a wɔahwe ase osian ɔwofo ne mbrato ntsi. Hwɛ, mekã dɛ ɔba nndzi fɔ osian n’awofo ho ntsi.

26 Na hom kã so dɛ Christ bɛba. Mbom hwɛ, mekã dɛ hom nnyim dɛ Christ bi bɛba. Na hom kã so dɛ woboku no dze ama wiadze bɔn.

27 Na dɛm na hom dze twe dɔm yi ma wɔtaa hom egyanom nkwasea amambra nye homankasa hom pɛ ekyir; na hom kã hɔn hyɛ nsuadze tse dɛ mbrɛ wɔhyɛ nkowaasom mu mpo, ama hom dze hom yafun aato hɔn nsaanodwuma do, amma woenntum ammfa akokodur amma hɔn mu do, ammfa anngye hɔn kyɛfa nye hɔn ndzinoa.

28 Nyew, na wonntum mmfa dza ɔyɛ hɔn dze nnyɛ hɔnho osiandɛ wosuro dɛ annhwɛ a wɔbɔfom hɔn asɔfoe no a wɔhyɛ hɔn kɔndua dɛ mbrɛ wɔpɛ, na wɔayɛ hɔn araa ma woenya gyedzi wɔ hɔn amambra, nye hɔn adaaso nye hɔn adwen hun na enyido-adzehu nye hɔn ndaadaa esumadze mu, dɛ ɔsɛ dɛ wɔyɛ, na sɛ wɔannyɛ dza wɔase hɔn dɛ wɔnyɛ no a, wɔbɔfom nyimpa bi a wonnyim no a wɔse dɛ ɔyɛ Nyame—nyimpa bi a obiara nnyim no na wonnhu no da, obi a onnyi hɔ da anaadɛ ɔremmba da.

29 Afei ber a ɔsɔfopanyin no nye ɔtsɛmbuafopanyin no hun mbrɛ n’akoma esi epirim no, nyew, ber a wohun dɛ ɔbɛkã nsɛmbɔn etsia Nyankopɔn mpo no, woemmbua ne nsɛm a ɔkãa no mu biara; mbom wɔmaa wɔkyekyeer no; na wɔdze no hyɛɛ nsordaafo mpanyimfo nsa ma wɔdze no kɔr Zarahemla asaase do dze no kɔr Alma nye ɔtsɛmbuafopanyin a ɔyɛ ambrado wɔ asaase nyinara do no enyim.

30 Na ɔbaa dɛ ber a wɔnye no baa Alma na ɔtsɛmbuafopanyin no enyim no, ɔkɔr do yɛɛ dza ɔyɛɛ wɔ Gideon asaase do no ara wɔ hɔ so; nyew, ɔkɔr do kãa kasabɔn.

31 Na ɔsoɛree kãa ano bɔɔdosɛm akɛse wɔ Alma n’enyim, na ɔkasaa bɔn dze tsiaa asɔfo nye akyerɛkyerɛfo, dɛ hɔn na wɔatwe dɔm no dze hɔn akɛhɛn hɔn egyanom amambra gyangyan mu, ama woeenya kwan dze hɔn yafun ato dɔm no do.

32 Afei Alma see no dɛ: Iyim dɛ yɛmmfa hɛn yafun nnto dɔm yi do; na hwɛ medze mankasa me nsa ayɛ edwuma ahwɛ moho fitsi ber a atsɛmbuafo hyɛɛ ase dɛ woridzi adze yi dze besi sesei, na ammfa moho mpo koraa dɛ mutu akwan pii kyin bɔ asaase do aprɔw kã Nyame n’asɛm dze kyerɛ mo nkorɔfo yi.

33 Na ammfa moho koraa dɛ mayɛ edwuma pii wɔ asɔr yi mu, Menngyee sika senine mpo da wɔ m’edwumayɛ ho; nna m’enuanom yi mu biara so nngyee hwee da, gyedɛ atsɛmbua egua no do nko; na ɔno so mpo yɛgye wɔ hɛn mber dodow a yɛdze dzi asɛm ho dɛ mbrɛ mbra se.

34 Na afei, sɛ yɛnngye biribiara wɔ hɛn edwuma a yɛyɛ wɔ asɔr no mu ho a, nna ebɛn mfaso na yenya wɔ asɔr no mu, ana nnyɛ nokwar no a yɛreda no edzi no nko, ama yeedzi dɛw wɔ hɛn nuanom hɔn enyigye ho?

35 Afei sɛ ɔtse dɛm a nna ebɛnadze ntsi na ese yɛkã nsɛmpa no kyerɛ nkorɔfo yi dze nya mfaso, wɔ aber a w’ankasa nyim dɛ yennya mfaso biara yi? Na afei egye dzi dɛ sɛ nsɛmpa yi ma nkorɔfo yi nya enyigye a ɔtse dɛm wɔ hɔn akoma mu a, nna yɛredaadaa hɔn a?

36 Na Korihor buaa no dɛ, Nyew.

37 Na Alma see no dɛ: Ana egye dzi dɛ Nyame bi wɔ hɔ?

38 Na obuaa dɛ, Oho.

39 Afei Alma see no dɛ: Ana ebɛgye kyim bio dɛ Nyame bi nnyi hɔ, na agye kyim so wɔ Christ ho? Na hwɛ, mese wo dɛ, minyim dɛ Nyame wɔ hɔ, na dɛ Christ so bɛba.

40 Na afei ana ewɔ dasegye bi gye dze kyerɛ dɛ Nyame bi nnyi hɔ, anaadɛ Christ bi remmba? Mese wo dɛ innyi bi, gyedɛ wo nsɛm ara.

41 Mbom, hwɛ, mowɔ ndzɛmba pii a ɔyɛ dasegye dɛ ndzɛmba yi yɛ nokwar; na wo so wɔ ndzɛmba pii a ɔyɛ dasegye dɛ ɔyɛ nokwar; ana ebɛgye ho kyim? Ana egye dzi dɛ ndzɛmba yinom nyina yɛ nokwar?

42 Hwɛ, minyim dɛ egye dzi, na mbom ndaadaa sunsum bi na ɔafa wo, ma eyi Nyame no Sunsum no tokyen ma onnyi tsenabew bi wɔ wo mu; mbom abɔnsam na ɔwɔ tum wɔ wo do, na ɔnye wo rikyin ridzi dwuma bɔn bi ama oeenya kwan asɛɛ Nyame ne mba.

43 Na afei Korihor see Alma dɛ: Sɛ ibeyi asɛnkyerɛdze bi akyerɛ me ma magye edzi dɛ Nyame bi wɔ hɔ, nyew, akyerɛ me dɛ ɔwɔ tum a ɔno na ɔbɛma magye edzi dɛ wo nsɛm yɛ nokwar.

44 Mbom Alma see no dɛ: Ehu nsɛnkyerɛdze ara yie; Ana ebɔsɔ wo Nyame ahwɛ? Ana ebɛse dɛ, Kyerɛ me asɛnkyerɛdze, wɔ ber a atse w’enuanom yinom nyina nye nkɔnhyɛfo krɔnkrɔn nyina so hɔn dasegye yi? Kyerɛwsɛm nyina dzi w’enyim adagyaw, nyew, na ndzɛmba nyina so kyerɛ dɛ Nyame wɔ hɔ; nyew, asaase mpo, nye ndzɛmba nyina a ɔwɔ do, nyew, noho a okyin, nyew, sor abɔdze so a wɔwɔ sor a wokyin hɔnho gye dase dɛ Bɔadze Kokroko bi wɔ hɔ.

45 Naaso erokɔ aprɔw, gye dase kyerɛ dɔm yi dɛ Nyame bi nnyi hɔ, dze twe hɔn akoma ekyir? Ana ibotum agye kyim wɔ dɛm dasegye yi nyina ho? Na ɔsee dɛ: Nyew, mebɛgye kyim, gyedɛ iyi asɛnkyerɛdze bi kyerɛ me.

46 Na afei ɔbaa dɛ Alma see no dɛ: Hwɛ midzi yaw osian w’akoma a epirim ntsi, nyew, dɛ eda ho ropow nokwar sunsum, ma wo kra akɔ ɔsɛɛ mu.

47 Mbom hwɛ, oye koraa dɛ wo kra bɛyew sen dɛ akra pii bodua w’akohwi nye wo ndaadaa do akɔ ɔsɛɛ mu; dɛm ntsi sɛ egye kyim bio a, hwɛ Nyankopɔn bɔhwe wo, ma aatɔ mmum, amma enntum emmbue w’ano bio ammfa anndaadaa dɔm yi bio.

48 Afei Korihor see no dɛ: Menngye kyim dɛ Nyame bi wɔ hɔ, na mbom menngye nndzi dɛ Nyame bi wɔ hɔ; na mekã so dɛ, nnyim dɛ Nyame bi wɔ hɔ; na gyedɛ iyi asɛnkyerɛdze bi dze kyerɛ me, annyɛ dɛm a merenngye nndzi.

49 Afei Alma see no dɛ: Asɛnkyerɛdze yi na medze bɛma wo, ɔno nye dɛ ebɔtɔ mmum, dɛ mbrɛ me nsɛm se; na mekã wɔ Nyame ne dzin mu dɛ tɔ mmum, amma enntum annkasa bio.

50 Afei ber a Alma kãa dɛm nsɛm yi no, Korihor tɔɔ mmum, ma oenntum annkasa, dɛ mbrɛ Alma ne nsɛm se no.

51 Na afei ber a ɔtsɛmbuafo panyin no hun iyi no, ɔtseen ne nsa na ɔkyerɛwee dze kyerɛɛ Korihor dɛ: Ana agye edzi dɛ Nyame wɔ tum? Woana do na epɛ dɛ Alma dua dze yi n’asɛnkyerɛdze? Ana epɛ dɛ ɔtseetsee binom dze yɛ asɛnkyerɛdze kyerɛ wo? Hwɛ, oeyi asɛnkyerɛdze akyerɛ wo; na afei ebɛgye kyim bio anaa?

52 Na Korihor tseen ne nsa na ɔkyerɛɛw, dɛ: Minyim dɛ matɔ mmum, osiandɛ munntum mennkasa; na minyim dɛ biribiara nnyi hɔ a obotum dze dɛm adze yi aba mo do, gyedɛ Nyame no tum; nyew, na minyim dada so dɛ Nyame wɔ hɔ.

53 Mbom hwɛ, abɔnsam adaadaa me; osiandɛ oyii noho kyerɛɛ me dɛ ɔbɔfo, na ɔsee me dɛ: Kɔ na kɛgye dɔm yi, osiandɛ hɔn nyina ayew, na woekedzi Nyame bi a wonnyim no ekyir. Na ɔsee me dɛ: Nyame biara nnyi hɔ; nyew, na ɔkyerɛkyerɛɛ me dza menkã. Na makyerɛkyerɛ ne nsɛm no; na osiandɛ me honam su adwen enyigye ho ntsi medze kyerɛkyerɛe; na medze kyerɛkyerɛe araa kesii dɛ midzii konyim mpo, na iyi maa megyee dzii dɛ ɔyɛ nokwar; na iyi ntsi na ɔmaa mitsiaa nokwar no araa kesii dɛ medze ndom kɛse yi aba mo do.

54 Afei ber a ɔkãa dɛm wiei no, ɔpaa Alma kyɛw dɛ ɔmbɔ mpaa mma Nyankopɔn ma onyi ndom no mfi no do.

55 Mbom Alma see no dɛ: Sɛ woyi ndom yi fi wo do a ebɔtwe dɔm yi hɔn akoma asan ekyir bio; dɛm ntsi, ɔbɛyɛ hɔ ama wo dɛ mbrɛ Ewuradze pɛ.

56 Na ɔbaa dɛ ndom no emmfi Korihor do; mbom woyii no tokyen, na okyinkyiin efiefi serɛserɛɛ edziban.

57 Afei adze a oesi Korihor no do no tahyee asaase nyina do ntsɛmara; nyew, ɔtsɛmbuafo panyin no maa wɔbɔɔ dawur kyerɛɛ dɔm nyinara a wɔwɔ asaase no do a wɔagye Korihor ne nsɛm no edzi no dɛ, wonnu hɔnho ntsɛntsɛm amma dɛm atsɛmbu no ammba hɔn so hɔn do.

58 Na ɔbaa dɛ hɔn nyinara gyee dzii dɛ Korihor yɛ omumuyɛnyi; dɛm ntsi hɔn nyinara sakyeer bio baa Ewuradze hɔ; na iyi dze Korihor n’emumuyɛ no baa ewiei. Na Korihor kyinkyiin efiefi serɛserɛɛ edziban dzii.

59 Na ɔbaa dɛ ber a ɔnenam dɔm no mu no, nyew, dɔm a wɔatsew hɔnho efi Nephifo ho na wɔfrɛ hɔnho Zoramfo a, na hɔn banodzifo nye bi a wɔfrɛ no Zoram—na ber a ɔnenam hɔn mu no, hwɛ wotwui faa no do na wotsiatsiaa no do kesii dɛ owui.

60 Na dɛm ntsi yehu nyia ɔkontom Ewuradze n’akwan mu no mbrɛ n’ewiei tse; na dɛm ma yehu so dɛ abɔnsam renngye ne mba abamba wɔ da a odzi ewiei no mu, na mbom ɔtwe hɔn ntsɛntsɛm dze hɔn kɔ hɛl.