1 Ao ngkanne, natiu Ereman, I anganiko te tua bwa ko na anai mwiin rongorongo ake a tia ni katukaki irou;

2 Ao I anganiko naba te tua bwa ko na korea rongorongoia te botanaomata aio, n aron ae I a tia ni karaoia, iaon ana bwaatua Nibwaai, ma ni kaawakin bwaai aika a tabu are I a tia ni kaawakin, n aron ae I a tia ni kaawakin; bwa iai bukina ae kakannato are a kawakinaki iai.

3 Ao bwaatua aika a buraati aikai, ake iai taian koroboki iai, ake iai mwiin koroboki aika tabu, ake a mena iai kateirikiaia ara bakatibu, n aron are mai i moana—

4 Nooria, e a tia n taetae ni burabetiaki irouia ara bakatibu, bwa a na kawakinaki man uotaki rikaaki man te roro teuana nakon are teuana, man tararuaki ao ma ni kawakinaki ni bain te Uea ni karokoa te tai are e na waaki nako, nakon aaba, reeti, neewe ao botanaomata, bwa a na atai bwaai aika a raba ake a koreaki i aoia.

5 Ao ngkai nooria, ngkana a kawakinaki e na riai n tiku raneaneaia; eng, ao ai aroia naba ni kabane bwaatua ake iai koroboki aika tabu iai.

6 Ao ngkanne tao ko na taku bwa iai te burababa irou; ma nooria I taku nakoim, bwa a riki bwaai aika a korakora man bwaai aika a uarereke man aki kaangaanga; ao bwaai aika a uarereke n angiin te tai a kaminoia aika a wanawana.

7 Ao te Uea ae te Atua e bon mwakuri ma te kantaninga bwa e na karokoa ana babaire are kakannato man akea tokina; ao man bwaai aika a uarereke ao te Uea e kaminoia aika a wanawana ma ni karekea kamaiuaia aomata aika a mwaiti.

8 Ao ngkai, e a kaman iai te wanawana iroun te Atua bwa bwaai aikai a na kawakinaki; bwa nooria, a karababa aia urururing te botanaomata aio, eng, ma ni kakoaua nakoia aika a mwaiti ibukin buren aroia, ma ni kairia aika a mwaiti nakon ataakin Atuaia nakon kamaiuan tamneia.

9 Eng, I taku nakoim, bwa ngke arona bwa akea bwaai aikai ake a koreaki n rongorongo aikai, ake iai ni bwaatua aikai, ao Amon ma tarina a bon aki kona ni kairoroia ngaa ma ngaa mwaitia Reimwanaite bwa a na kakoaua buren aia katei aia bakatibu; eng, rongorongo aikai ma aia taeka a uotia nakon te rairannano; nanona bwa, a kairia nakon ataakin aia Uea ae Atuaia, ao bwa a na kimwareirei i nanon Iesu Kristo aia Tia Kaboia.

10 Ao antai ae e na ataia bwa tao a na riki bwa ngaia taan kairia ngaa ma ngaa, eng, ao ngaa ma ngaa naba tarira aika a bonotaninga, Nibwaite, ake a kamatoai nanoia ngkai n te bure ma te buakaka, nakon ataakin aia Tia Kaboia.

11 Ngkai mwakuri aika a kamimi aikai a bon aki kaotaki ni bwanin nakoiu; ngaia are I taona nanou.

12 Ao e a tau naba ngkana I a ti taekinna naba bwa iai bukin kawakinakia ae wanawana, ae bukina ae e ataia te Atua; bwa e bon anganga kaetieti ni wanawanana iaon ana mwakuri ni kabane, ao a eti kawaina, ao kawaina kanga aiaron te mronron ae akea tokina.

13 O uringnga, uringnga, natiu ae Ereman, matoatoan ana tua te Atua. Ao e taku: Ngkana kam kaawakin au tua ao kam na rikirake iaon te aba—Ma ngkana kam aki kaawakin ana tua ao kam na teweaki nako mai matana.

14 Ao ngkai uringnga, natiu, bwa te Atua e a tia ni mwiokoiko ma bwaai aikai, ake e kaawakin bwa a tabu, are e na taua naba ma ni kawakinna bwa iai bukina ae wanawana irouna, bwa e na kaota mwaakana nakoia rooro aika a na roko.

15 Ao ngkanne nooria, I tuangko iroun tamnein te taeka ni burabeti, bwa ngkana ko karaoa te bure ni kaineti ma ana tua te Atua, nooria, bwaai aika a tabu aikai a na bon anaaki mai iroum ni mwaakan te Atua, ao ko na kanakoaki nakon Tatan, bwa e na ioiko n aron kunin te wiita n te ang.

16 Ma ngkana ko kawakina ana tua te Atua, ma ni karaoi bwaai aika a tabu ni kaineti ma te bwai are e tuangko te Uea, (bwa ko na bubuti nakon te Uea ibukin bwaai ni kabane are ko na karaoi mangaia) nooria, akea te mwaaka iaon te aba ke i moone ae kona n anaia mai iroum, bwa te Atua e korakora mwaakana ni kakoroi bukin ana taeka ni kabane.

17 Bwa e na kakoroi ana berita ni kabane, are e na karaoi nakoim, bwa e a tia ni kakoroi bukin ana berita ake e karaoi nakoia ara bakatibu.

18 Bwa e berita bwa e na kaawakin bwaai aikai bwa iai bukina ae wanawana irouna, bwa e na kaota mwaakana nakoia rooro aika a na roko.

19 Ao nooria, teuana bukina ae e a koro bukina, bon kaokaia ngaa ma ngaa mwaitia aika Reimwanaite nakon ataakin te koaua; ao e a tia ni kaota mwaakana irouia, ao e na bon teimatoa naba ni kaota mwaakana irouia nakoia roro aika a na roko; ngaia are a na bon kawakinaki.

20 Ngaia are I anganiko te tua, natiu ae Ereman, bwa ko na botumwaaka ni kakoroi bukin au taeka ni kabane, ao bwa ko na botumwaaka ni kaawakin ana tua te Atua n aron ake a koreaki.

21 Ao ngkai, N na taetae nakoim ni kaineti ma bwaatua ake uabwi ma aua, bwa ko na tauii, bwa mwakuri aika a kamimi ma mwakuri aika a roo, ma aia mwakuri ni karaba, ke aia mwakuri ni karaba aomata ake a tia n tiringaki, bwa a na kaotaki nakoia te botanaomata aio; eng, ni kabane aia tiritiri, ma aia iraa, ma aia anaibwai n iowawa, ma buakakaia ni kabane ma aia mwakuri aika bati n ribaki, bwa a na kaotaki nakoia te botanaomata aio; eng, ngaia are ko na kaawakin bwaai n raitaeka aikai.

22 Bwa nooria, te Uea e nooria ana aomata bwa a waaki ni karaoi mwakuri aika a roo, eng, ni waakin mwakuri n tiritiri aika raba ma mwakuri aika bati n ribaki; ngaia are te Uea e taku, ngkana aki raira nanoia ao a na kamaunaki mai iaon te aba.

23 Ao te Uea e taku: N na katauraoa nakon au toro ae Katerem, te atibu, ae e na raneanea ni kaootaa te roo, bwa N na kaota nakoia au botanaomata ae a toro irou aia mwakuri tariia, eng, aia mwakuri ni karaba, aia mwakuri n roo, ma buakakaia ao aia mwakuri aika bati n ribaki.

24 Ao ngkanne, natiu te mwaane, aikai bwaai n raitaeka aika a katauraoaki bwa e aonga ni koro bukin ana taeka te Atua, are e taekinna ni kangai:

25 N na kaotinakoi man te roo nakon te oota aia mwakuri ni kabane aika a raba ma aia mwakuri aika bati n ribaki; ao N na kamaunaia mai aon te aonaba ngkana aki rairinanoia; ao N na kaoti aia mwakuri aika a raba ma aia mwakuri aika bati n ribaki nakon te oota, nakoia aomata ni kabane ake a na bwaina te aba aio i mwina.

26 Ao ngkai, natiu te mwaane, ti nooria bwa a bon aki rairi nanoia; ngaia are a bon tiringaki, ao ngaia are e a koro moa bukin ana taeka te Atua; eng, mwakuri aika bati n ribaki aika a raba a bon kaotaki man te roo nakoira.

27 Ao ngkai, natiu te mwaane, I anga te tua nakoim bwa ko na tauii ni kabane aia tuea, ma aia berita, ma aia boraraoi n aia mwakuri aika bati n ribaki aika a raba; eng, ma aia kanikina ni kabane ma aia waaki aika a kamimi ni kabane ko na karabai mai irouia te botanaomata aio, bwa a na aki atai, bwa mwiina a karina ni bwaka n te roo naba ao a manga kamaunaki.

28 Bwa nooria, iai te maraia iaon te aba aio, bwa e na roko te tiringaki nakoia ni kabane taan mwakuri n te roo, nakon mwaakan te Atua, ngkana a bon tawaa; ngaia are I tangiria te botanaomata aio bwa a na aki tiringaki.

29 Ngaia are ko na tauii aia babaire ni karaba ibukin aia berita ma aia berita aika tabu mai irouia te botanaomata aio, ma ti buakakaia ma aia tiritiri ma aia mwakuri aika bati n ribaki ae ko na kaotia nakoia; ao ko na reireiniia bwa a na ribaa aekan te buakaka ma mwakuri aika bati n ribaki ma tiritiri akanne; ao ko na reireiniia naba bwa aomata aikai a bon tiringaki ibukin buakakaia ma aia mwakuri aika bati n ribaki ma aia tiritiri.

30 Bwa nooria, a tiringia ni kabane ana burabeti te Uea ake a roko i buakoia n taekina nakoia aia bure; ao raraaia ake a tiringia e bon tang nakon te Uea ae Atuaia ibukin te irantaanga i aoia ake taan tiringia; ao ngaia are e roko ana motikitaeka te Atua i aoia taan mwakuri n te roo ma botaki ni karaba aika buakaka.

31 Eng, ao e na maraia te aba n aki totoki ibukiia naake a mwakuria te roo ma botaki ni karaba aika buakaka, n tiritiri, ngkana aki rairinanoia i mwaain ae a tai.

32 Ao ngkai, natiu te mwaane, uringi taeka ake I a tia n taekin nakoim; tai anganiia te botanaomata aio babaire aika a karaba aikai, ma reireinia bwa a na aki toki ni kairiribai nakon te bure ma te buakaka.

33 Kabwarabwara nakoia te rairannano, ma onimakinan te Uea are Iesu Kristo; reireinia bwa a na kananorinanoia ao a na nimamannei man nanorinano inanoia; reireinia bwa a na kaaitarai ana kariri nako te riaboro, n aia onimaki iroun te Uea are Iesu Kristo.

34 Reireinia bwa a na aki kua ni mwakuri aika a raraoi, ma a na nimamannei man nanorinano inanoia; bwa aikai ake a na karekea raun tamneia.

35 O, uringnga, natiu te mwaane, ao reireiniko te wanawana i nanon ataeim; eng, reireiniko n am tai n ataei bwa ko na kaawakin ana tua te Atua.

36 Eng, tang nakon te Atua ibukin boutokaam; eng, tarai am mwakuri ni kabane bwa ko karaoi nakon te Uea, ao taraia bwa taabo nako ake ko kawari, ko nako iai ibukin te Uea; eng, taraia bwa am iango ni kabane a kaineta te Uea; eng, taraia bwa ana namakin nanom e mena iaon te Uea n taai nako.

37 Reitaki ma te Uea n am waaki ni kabane, ao e na kairiko nakon ae raoiroi; eng, ngkana ko wene n te bong wene i nanon te Uea, bwa e na tararuaiko n am tai ni matu; ao ngkana ko teirake n te ingabong taraia bwa e na onrake nanom ni karabwarabwa nakon te Atua; ao ngkana ko karaoi bwaai aikai, ko na uotaki rake n te kabanea ni bong.

38 Ao ngkai, natiu te mwaane, iai te bwai ae I kan taekinna ibukin te bwai are ara bakatibu a aranna bwa te booro, ke te tia kairi—ke ara bakatibu aranna bwa te Riaona, are, nanona, te kambwati; ao te Uea e bon katauraoia.

39 Ao nooria, akea te aomata ae kona ni karaoa te bwai ae rang kamimi aron mwakuriana. Ao nooria, e bon katauraoaki bwa e na kaota nakoia ara bakatibu te kawai are a riai n toua i nanon te rereua.

40 Ao e bon mwakuri ibukiia n aron aia onimaki i nanon te Atua; ngaia are, ngkana iai aia onimaki ni kakoaua bwa te Atua e kona ni kammwakuri taian kainikoto akekei bwa a na kotea te kawai are a riai n toua, nooria, e bon riki aei, ngaia are e reke irouia te bwai ae kamimi aio, ma bwaai riki aika a kamimi tabeua ake a riki man mwaakan te Atua, n te bong teuana nakon te bong teuana.

41 Ma e ngae n anne, ibukina bwa bwaai aika a kamimi aikai a riki ma ni mwakuri aika a uarereke ao e bon kaota nakoia mwakuri aika a kamimi. A bon taningaroti, ao a mwaninga ni kamwakura aia onimaki ma aia botumwaaka ao ngkanne a toki naba mwakuri ake a kamimi akekei, ao aikoa waaki ni kawaia.

42 Ngaia are a tiku i nanon te rereua, ke a aki mwananga ni kaineta kawaia, ao a karawawataki n te baki ma te taka, ibukin riaoan tua irouia.

43 Ao ngkai, natiu te mwaane, I tangiria bwa ko na oota bwa aki riki bwaai aikai n akea te bwai ae a katotongnga; bwa ngkai ara bakatibu a taningaroti n ongeaba nakon te kambwati aio (ngkai bwaai aikai bwain te aonaba) ao a bon aki riki rake; ao ai bon aekan naba bwaai aika a tamnei.

44 Bwa nooria, e na bon riai n rang beebete ibukim bwa ko na ongeaba nakon ana taeka Kristo, are e na kotea nakoim te kawai ae eti nakon te kakukurei ae akea tokina, n aekaia naba ara bakatibu bwa a na ongeaba nakon te kambwati, are e na kotea nakoia te kawai ae eti nakon te aba ni berita.

45 Ao ngkai I kangai, tiaki bwa iai aekan te bwai teuana n te bwai aei? Bwa n aron are te tia kairiri aei e bon kairia ara bakatibu, ngke a ira kawaina, nakon te aba ni berita, ao a na taeka Kristo, ngkana ti ira kawaina, e na uotira riaon mwaruan te nanokawaki nakon te aba ni berita ae tamaroa riki.

46 O natiu te mwaane, ti na riai n aki taningaroti ibukina bwa e beebete te kawai; bwa bon aekaia naba ara bakatibu; bwa e bon katauraoaki ibukiia, bwa ngkana a taraia ao a na kamaiuaki; ao ai bon aekara naba. E katauraoaki te kawai, ao ngkana ti taraia ao ti na maiu n aki toki.

47 Ao ngkai, natiu te mwaane, taraia bwa ko kaawakin raoi bwaai aika a tabu aikai, eng, taraia bwa ko taara te Atua ma ni maiu. Nako nakoia te botanaomata aio man taekina te taeka, man taua ma nanom. Natiu te mwaane, tiabo.