1 Ita, anakko, adda pay sumagmamano a maibagak kenka; agsipud ta madlawko a maburiboran ti panunotmo maipapan iti panagungar ti natay.

2 Kitaen, kunak kenka, nga awan ti panagungar—wenno, kunaek, iti sabali a pannao, a saan nga isuot daytoy nainlasagan a bagi ti kinaagnanayon, saan nga isuot daytoy panagrupsa ti saan a panagrupsa—agingga iti yaay ni Cristo.

3 Kitaen, ipatungpalna ti panagungar ti natay. Ngem kitaen, anakko, awan pay ti panagungar. Ita, ipalgakko kenka ti maysa a palimed; nupay kasta, adu a palimed ti naidulin, nga awan ti makaammo no saan mismo a ti Dios. Ngem ipakitak kenka ti maysa a banag a sinaludsodko a naanep iti Dios tapno maammuak—ti maipapan iti panagungar.

4 Kitaem, adda panawen a naituding a dumteng ti panagungar ti amin manipud iti patay. Ita awan ti makaammo no kaano a dumteng daytoy a panawen; ngem ammo ti Dios ti naituding a panawen.

5 Ita, no adda man umuna a panawen, wenno maikadua a panawen, wenno maikatlo a panawen, a panagungar ti amin a tao manipud iti patay, awan aniamanna; agsipud ta ammo ti Dios amin dagitoy a bambanag; ket umanayen kaniak ti pannakaammok a kastoy ti maaramid—nga adda naituding a panawen a panagungar ti amin manipud iti patay.

6 Ita masapul nga adda nagbaetan ti panawen ti ipapatay ken ti panawen ti panagungar.

7 Ket ita kayatko a saludsoden no ania ti pagbalinan dagiti kararua dagiti tattao manipud iti daytoy panawen ti ipapatay agingga iti naituding a panawen nga agpaay iti panagungar?

8 Ita saan a bale no adda man nasursurok ngem maysa a daras a naituding nga agpaay iti panagungar ti tattao; ta saan a matay ti amin a mamimpinsan, ket awan aniamanna daytoy; kas maysa nga aldaw ti amin iti Dios, ket marukod laeng ti panawen kadagiti tattao.

9 Ngarud, adda panawen a naituding iti tattao nga agungardanto manipud iti patay; ket adda nagbaetan ti panawen ti ipapatay ken ti panagungar. Ket ita, maipapan iti daytoy nagbaetan ti panawen, no ania ti pagbalinan dagiti kararua ti tattao ti banag a sinaludsodko a naanep iti Apo tapno maammuak; ket daytoy ti banag nga ammok a mismo.

10 Ket inton dumteng ti panawen a bumangon ti amin, isunto a maammuanda nga ammo ti Dios ti amin a panawen a naituding iti tao.

11 Ita, maipapan iti kasasaad ti kararua iti nagbaetan ti patay ken ti panagungar—Kitaen, naipakaammo kaniak babaen ti anghel, a dagiti espiritu ti amin a tao, apaman a suminada manipud iti daytoy nainlasagan a bagi, wen, ti espiritu ti amin a tao, nasayaat man wenno dakes, maipanda iti balay ti Dios a nangted iti biagda.

12 Ket mapasamakto, a maawat dagiti espiritu dagiti nalinteg iti kasasaad ti kinaragsak, a maawagan iti paraiso, a kasasaad ti panaginana, a kasasaad ti kinatalna, a paginanaanda iti amin a pakariribukanda ken amin a pakakumikomanda, ken panagleddaangda.

13 Ket mapasamakto, a dagiti espiritu dagiti nadangkes, wen, dagiti dakes—ta kitaen, awan ti biangda wenno bingayda iti Espiritu ti Apo; gapu ta kitaen, pinilida ti dakes nga aramid a saan a ti naimbag; ngarud simrek ti espiritu ti sairo kadakuada, ket tinagikuana ti balayda—ket dagitoy ti maibelleng iti adayo a lugar ti kinasipnget; addanto panagsangit, ken panagdung-aw, ken panagngariet, ket gapu daytoy iti kinadakesda, a naiturong a paadipen iti pagayatan ti sairo.

14 Ita daytoy ti sasaaden ti kararua dagiti dakes, wen, iti kasipngetan, ken iti nakaal-alingget a kasasaad, sibubuteng a kumitkita iti dumardarang a gura ti pungtot ti Dios kadakuada; isu nga agtalinaedda iti kastoy a kasasaad, kasta met kadagiti nalinteg nga adda iti paraiso, agingga iti kanito a panagungarda.

15 Ita, adda sumagmamano a nakaawat a daytoy a kasasaad ti kinaragsak ken kinaladingit ti kararua, sakbay iti panagungar, isu ti umuna a panagungar. Wen, awatek a mabalin a makuna a panagungar, ti ibabangon dagiti espiritu wenno kararua ken ti pannakaisaadda iti kinaragsak wenno kinaladingit, mayannurot kadagiti balikas a naisaon.

16 Ket kitaen, naibaga manen, nga adda umuna a panagungar, ti panagungar dagiti adda idi, wenno adda ita, wenno addanto, agingga iti panagungar ni Cristo manipud kadagiti natay.

17 Ita, saanmi nga ipagarup a daytoy nga umuna a panagungar, ti naisao iti daytoy a wagas, a mabalin nga isu ti panagungar dagiti kararua ken ti pannakaisaadda iti kinaragsak wenno kinaliday. Saanyo a mabalin nga ipapan a daytoy ti kaipapananna.

18 Kitaen, kunak kadakayo, Saan; ngem kayatna a sawen ti isusubli ti kararua iti bagi, kadakuada manipud kadagiti aldaw ni Adan agingga iti panagungar ni Cristo.

19 Ita, no agtiponto man a mamimpinsan ti kararua ken ti bagi dagiti naibagan, a nadangkes ken nalinteg, saanko nga ibaga; bay-an nga umdasen, nga ibagak nga agungardanto amin; wenno iti sabali a pannao, mapasamak ti panagungarda sakbay ti panagungar dagiti natay kalpasan ti panagungar ni Cristo.

20 Ita, anakko, saanko a sawen nga umayto ti panagungarda iti panagungar ni Cristo; ngem kitaen, itedko a kas kapanunotak, agtiponto manen dagiti kararua ken bagi, dagiti nalinteg, iti panagungar ni Cristo, ken ti yuulina idiay langit.

21 Ngem no maaramidto iti panagungarna wenno kalpasanna, saanko a maibagan; ngem daytoy laeng ti masaok, nga adda ti panawen iti nagbaetan ti patay ken panagungar ti bagi, ken ti kasasaad ti kararua iti kinaragsak wenno kinaladingit agingga iti kanito a pinili ti Dios nga agungar dagiti natay, ket agtipon, ti kararua ken ti bagi, ket maidatag iti sango ti Dios, ket maukom babaen ti aramidda.

22 Wen, daytoy ti pannakatungpal ti pannakaisubli dagiti banag a naibagan babaen dagiti propeta.

23 Ti karurua ket maisublinto iti bagi, ken ti bagi iti kararua; wen, ket ti tunggal gurong ken tulang maisublinto iti bagina, wen, saanto a mapukaw uray maysa a buok ti ulo; ngem maisublinto amin a banag iti sigud ken naan-anay a bagina.

24 Ket ita, anakko, daytoy ti pannakaisubli a nasao a nagaon kadagiti propeta—

25 Ket isunton ti panagrimat dagiti nalinteg iti pagarian ti Dios.

26 Ngem kitaen, umay ti nakaal-alingget nga ipapatay kadagiti dakes; agsipud ta matayda mainaig kadagiti banag maipapan iti kinalinteg; agsipud ta narugitda, ket awan ti narugit a banag a makatawid iti pagarian ti Dios; ngem mapapanawda, ken naikeddeng a makiraman iti bunga ti bannogda wenno ti aramidda, a kinadakes; ket uminumda iti ared-ed ti napait a kopa.