1 Ao e koro bukina bwa a bon toki ao a kararoaia teutana. Ao e taku Moronaai nakon Taraemena: Nooria, Taraemena, bwa ti aki tangiria n riki bwa aomata aika a kawawaea nako te raraa. Ko ataia bwa kam mena i nanon baira, ma tiaki nanora bwa ti kan tiringingkami.

2 Nooria, ti aki roko ni buaka ni kaaitaraingkami bwa ti na kawawaea raraami ibukin te kan tautaeka; ao ti aki naba tangiria bwa ti na kaira temanna mai i buakomi nakon te amo n tautoronaki. Ma aio bukina are kam a kaaitaraia iai; eng, ao kam un iroura ibukin ara aro.

3 Ma ngkai, kam nooria bwa e mena iroura te Uea; ao kam nooria bwa te Uea e a tia n anga ngkami nako nanon baira. Ao ngkanne I tangiria bwa ko na ataia bwa e karaoaki aio nakoira ibukin ara aro ma ara onimaki iroun Kristo. Ao ngkanne bwa kam aki kona n tiringa ara onimaki aio.

4 Ngkai kam nooria bwa aio raoi ana onimaki ni koaua te Atua; eng, kam nooria bwa te Atua e na boutokaira, ma ni kawakinira, man aki kamaunaira, ngkana ti kakaonimaki nakoina, ao nakon ara onimaki, ma ara aro; ao e na bon aki kona ni kariaia te Uea bwa ti na tiringaki ma ti ngkana ti bwaka n riaoan te tua ma ni kaakea ara onimaki.

5 Ao ngkai, Taraemena, I tuangko, n aran te Atua are te kabanea ni mwaaka, are e a tia ni kakorakorai baira are e a tia iai n reke korakorara i aomi, man ara onimaki, man ara aro, ao man waakin ara taromauri, ao man ara ekaretia, ao man te boutokaa ae tabu are ti anganiia buura ma natira, man te inaomata are ti a kabaeaki iai ma ara tabo ao abara; eng, ao man kawakinan ana taeka te Atua ae tabu, are ti a kareke iai kukureira ni kabane; ao ma ni bwaai ni kabane ake a kakawaki iroura—

6 Eng, ao tiaki ti aio; I a tuangko ibukin tangiran te maiu iroura, bwa kam na anganiira ami bwai ni buaka ao ti na aki ukora raraami, ma ti na anganingkami maiumi, ngkana kam toua kawaimi man aki manga buaka ni kaaitaraira riki.

7 Ao ngkai, ngkana kam aki karaoa aio, nooria, kam mena ngkai i nanon baira, ao N na tuangiia au aomata bwa a na bwaka iaomi ma ni kaikoaki rabwatami bwa kam aonga ni mate, bwa kam aonga ni kamaunaki; ao ngkanne ti na nooria bwa antai riki ae korakora i aoia te botanaomata aio; eng, ti na nooria bwa antai ae e na kairaki nakon te tautoronaki.

8 Ao ngkai e koro bukina bwa ngke Taraemena e ongo taeka aikai e roko man anga ana kabaang ma ana kabaang ae uarereke, ma ana kai ni katebe nako nanon bain Moronaai, man taku nakoina: Nooria, aikai ara bwai ni buaka; ti na anganingkami, ma ti aki kariaia bwa ti na karaoa te tuea ma ngkami, bwa ti bon ataia bwa ti na urua, ao natira naba; ma anai ara bwai ni buaka, ao kariaia bwa ti na nakon te rereua; bwa mwiina ti na tauii ara kabaang ao ti na mate ke ti tokanikai.

9 Nooria, tiaki ngaira kaain ami onimaki; ao ti bon aki kakoaua bwa te Atua e anga ngaira nako nanon baimi; ma ti kakoaua bwa ami anga ni kamwane ae kamanoingkami man ara kabaang. Nooria, kam a kamanoaki man ami ootanga ni bwabwa ma ami ootanga ni buaka.

10 Ao ngkanne ngke Taraemena e toki ana kakarabakau, ao Moronaai e kaoka te kabaang ma bwaai ni buaka, ake e a tia ni butimwaei, nakon Taraemena, ma ni kangai: Nooria, ti na katoka te buaka n tokina.

11 Ngkai I aki kona n uring taeka ake I taekin, ngaia ae ngkai e maiu te Uea, kam na bon aki kona n nako ma ti ngkana kam tuea i mwaain nakomi bwa kam na aki manga okirira ni manga kaaitaraira bwa ti na buaka. Ao ngkanne ngkai kam a mena i nanon baira ti na kabwaroa raraami iaon tano, ke kam na ira nanon are I a tia n uotia rake nakoim.

12 Ao ngkai ngke Moronaai e a tia n taekin taeka aikai, e taua ana kabaang Taraemena, ao e un iroun Moronaai, ao e biri rake bwa e na tiringa Moronaai; ma ngke e tabekarake ana kabaang, nooria, temanna ana tautia Moronaai e oroia nako aon tano ao e uruaki man kain tauana; ao e orea naba Taraemena ao e reke kunin atuuna ao e bwaka nako aontano. Ao Taraemena e butaki nako mai mataia n nako buakoia ana tautia.

13 Ao e koro bukina bwa te tautia are e tei ikekei, are e korea kunin atuun Taraemena, e ana kunin te atu arei man irana mai aontano, ao e katekea i tabon ana kabaang, ma ni katangainaa nakoia, man kangai nakoia n te bwanaa ae korakora:

14 N aiaron te kun n atu aei ae bwaka nako aontano, are bon kunin atuun ami mataniwi, ao kam na bwaka naba nako aontano ti ngkana kam anganiira ami bwai ni buaka ma ni kitanira ma te berita ae tabu ibukin te rau.

15 Ngkai a bon mwaiti, ake ngke a ongo taeka akekei man noora kunin te atu are iaon te kabaang, ao a bon rotaki n te maaku; ao a mwaiti ake a roko ma ni karenakoi aia bwai ni buaka i waen Moronaai, ma ni karaoa te berita ae tabu ibukin te rau. Ao ni kabane ake a karaoa te berita ae tabu a bon kariaiakaki bwa a na nako nakon te rereua.

16 Ngkai e koro bukina bwa Taraemena e bon rianako unna, ao e kakiriwea nanoia nikiraia ana tautia bwa a na un, bwa a na kakorakora riki uniia ni kaaitaraia Nibwaite.

17 Ao ngkai Moronaai e bon un, ibukin matoatoan nanoia Reimwanaite; ngaia are e tuangiia ana botanaomata bwa ana bwaka i aoia man tiringia. Ao e koro bukina bwa a waaki n tiringia; eng, ao a un ma aia kabaang Reimwanaite ma korakoraia.

18 Ma nooria, a bon teretere raoi rabwataia ake aki karabaki ma atuuia ake aki karabaki nakon kakangin aia kabaang Nibwaite; eng, nooria a bon ewaraki man oreaki, eng, ma ni waekoa ni bwaka n aia kabaang Nibwaite; ao a bon kamaunaki, n aron are e taetae ni burabeti iai ana tautia Moronaai.

19 Ngkai Taraemena, ngke e nooria bwa a bon kan bane n tiringaki, e kakorakora n tang nakon Moronaai, ma ni berita bwa e na karaoa te berita ae tabu ma ana aomata naba, ngkana a kamauraki maiuia nikiraia, bwa a na aki manga teirake ni buaka ni kaaitaraia riki.

20 Ao e koro bukina bwa Moronaai e karekea te anga bwa e na toki te mwakuri ni kamamate i buakoia aomata. Ao e anai bwaai ni buaka mai irouia Reimwanaite; ao i mwin are a tia ni karaoa te berita ae tabu mangaia ibukin te rau ao a kariaiakaki bwa a na nako nakon te rereua.

21 Ao ngkanne mwaitia aia mate a bon aki warekaki ibukin korakoran mwaitia; eng, e bon rang korakora mwaitia aia mate, Nibwaite ao Reimwanaite.

22 Ao e koro bukina bwa a bon kare nako aia mate nakon nanon ranin Tiran, ao a buti nako man taunaki i kabin marawa.

23 Ao aia taanga ni buaka Nibwaite, ke Moronaai, a oki man okira mwengaia ma abaia.

24 Ao ikai are e a toki iai aia katebwi ma waniua n ririki n tautaeka i aoia ana botanaomata Nibwaai taan moti. Ao ikai are e a toki iai ana rongorongo Aramwa, are e koreaki iaon ana bwaatua Nibwaai.