1 Ngkai ti na okirikaki n ara rongorongo nakon Amarakaai ma naake a biri nako mangaia nakon te rereua; bwa, nooria, e bon kairia ake a nako mangaia, man nakon abaia Nibwaite i buakoia Reimwanaite, ma ni kakiriwea nanoia Reimwanaite bwa a na un ni kaaitaraia ana aomata Nibwaai, n te aro are aia uea Reimwanaite e kanakoa te katanoata ni kabuta abana, i buakoia ana aomata, bwa a na ikoikotiia riki bwa a na manga buaka ni kaaitaraia Nibwaite.

2 Ao e koro bukina bwa ngke e a tia n nako te katanoata i buakoia ao e bon korakora maakuia; eng, a maaku n aki kakukureia te uea, ao a maaku naba n nako ni buaka ni kaaitaraia Nibwaite bwa mwiina ao e bua maiuia. Ao e koro bukina bwa a rawa n nako, ke a mwaiti riki mai i buakoia ake a rawa n ongo n ana tua te uea.

3 Ao e koro bukina bwa e korakora unin te uea ibukin aia aki ongotaeka; ngaia are e angan Amarakaai bwa e na kaira mwakoron ana taanga ni buaka ake a ongo n ana taeka, ao e tuangnga bwa e na waaki nako man tuangiia bwa a na anai aia bwai ni buaka.

4 Ngkai nooria, aio bon te bwai are e tangiria Amarakaai; bwa ngkai bon te aomata ae bwaati ni kamwane ibukin karaoan buakaka ngaia are e karaoa te babaire i nanona bwa e na kabwaka aia uea Reimwanaite.

5 Ao a mena i aan ana kairiri mwakoroia Reimwanaite ake a nano iroun te uea; ao e ukoukora te anga n anai nano nakoia ake a aki ongotaeka; ngaia are e waaki nakon te tabo are Onita, bwa ikai are a bane ni biri nako iai Reimwanaite, bwa a kunea bwa e a roko te taanga ni buaka, ao, a taku inanoia bwa a roko bwa a na tiringia, ngaia are a biri nako Onita, are te tabo are a mena iai bwai ni buaka.

6 Ao a tia n rinea te mwaane temanna bwa e na uea ao e na mataniwi i aoia ma ni kamatoai aia iango ma te babaire ae matoatoa bwa a na aki kairoroaki bwa a na kaaitaraia Nibwaite.

7 Ao e koro bukina bwa a bon ikotiia i marenaia iaon tabon te tabuki are e aranaki bwa Anetebwati, ni katauraoi nakon te buaka.

8 Ngkai bon tiaki nanon Amarakaai bwa e na buakaniia n aron ana tua te uea; ma nooria, bon nanona bwa e tangiria bwa e na tangiraki irouia aia taanga ni buaka Reimwanaite, bwa e aonga ni kairia ma ni kabwaka te uea man ueana man taua te abanuea.

9 Ao nooria, e koro bukina bwa e karekea te anga are ana taanga ni buaka a katei aia umwanrianna n te mwarua are i rarikin te tabuki are Anetebwati.

10 Ao e koro bukina bwa ngke e a bong ao e kanakoia taan uarongorongo nakon te tabuki are Anetebwati, bwa e tangiria bwa te mataniwi are e mena iaon te tabuki, are arana Reaontaai, e na ruo nako naano, bwa e tangiria n taetae mangaia.

11 Ao e koro bukina bwa ngke e reke te rongorongo iroun Reaontaai ao e rawa n ruo rikaaki man te tabuki. Ao e koro bukina bwa Amarakaai e manga kananako riki te kaua tai bwa e tangiria bwa e na ruo. Ao e koro bukina bwa Reaontaai e bon rawa; ao e manga kananako riki te katen tai.

12 Ao e koro bukina bwa ngke Amarakaai e kunea bwa e aki kona ni karuoa Reaontaai mai taubukin te tabuki, ao e waerakea te tabuki, ma ni kaniia ana tabo n tautia Reaontaai; ao e a manga kananako riki te kaaua tai ana rongorongo nakon Reaontaai, n tangiria bwa e na ruo, ao bwa e na kairiia ana tautia mangaia.

13 Ao e koro bukina bwa ngke e a tia n ruo Reaontaai ma ana tautia nakon Amarakaai, ao Amarakaai e tangiria bwa e na ruo ma ana taanga ni buaka n te tairiki, man otabwaninia aomata ake a mena n te tabo arei ake e a tia te uea n anga te kariaia bwa e na kairia, ao bwa e na anga ngaia nako nanon bain Reaontaai, ngkana e kona ni karaoia (Amarakaai) bwa te kauoman n tia kairiri iaon te taanga ni buaka ae bwanin.

14 Ao e koro bukina bwa Reaontaai e ruo ma ana aomata man otabwaninia ana aomata Amarakaai, n te aro are i mwaain utiia n te ngaina ao a bon otabwaniniaki n ana taanga Reaontaai.

15 Ao e koro bukina bwa ngke a nooria bwa a bon otabwaniniaki, ao a bubuti nakon Amarakaai bwa e na bon kariaia bwa a na ikotaki ma tariia, bwa aonga n aki tiringaki. Ao bon aio are e bon tangiria Amarakaai.

16 Ao e koro bukina bwa e anganako ana aomata, ni kaitaraa are e tua te uea. Ao bon aio are e tangiria Amarakaai, bwa e aonga ni kakoroa bukin ana babaire ibukin kabwakakin te uea.

17 Ao ngkanne bon te katei irouia Reimwanaite, bwa ngkana e mate mataniwia aia mataniwi, bwa a na manga rinea te kauoman ni mataniwi bwa mataniwia aia mataniwi.

18 Ao e koro bukina bwa Amarakaai e karekea te anga are temanna mai i buakoia ana toro e na angaanga te bwai ni kamamate teutana i mwiin teutana nakon Reaontaai n uaa ae e mate.

19 Ngkai, ngke e a mate Reaontaai, ao Reimwanaite a bon rinea Amarakaai bwa aia mataniwi ao mataniwia aia mataniwi.

20 Ao e koro bukina bwa Amarakaai e mwananga ma ana taanga ni buaka (bwa e a tia ni karekea are e tangiria) nakon te aba are Nibwaai, nakon te kaawa are Nibwaai, are bon te kaawa n tua ae bubura.

21 Ao e roko te uea ma ana tautia bwa e na kaitibo mangaia, bwa e taku i nanona bwa Amarakaai e a tia ni kakoroa bukin te bwai are e tua nakoina, ao bwa Amarakaai e a tia n ikota te taanga ni buaka ae moan te korakora bwa a na kaaitaraia Nibwaite n te buaka.

22 Ma nooria, ngke e roko te uea bwa e na kaitibo mangaia ao Amarakaai e karekea te anga are ana toro a na mwananga ni kaitibo ma te uea. Ao a nako ma ni bobaraaki i matan te uea, bwa aongkoa a na karinea ibukin kakannatona.

23 Ao e koro bukina bwa te uea e arora baina bwa e na kateirakeia, n aron aia katei Reimwanaite, bwa kanikinaean te rau, are bon te katei are a anaia mai irouia Nibwaite.

24 Ao e koro bukina bwa ngke e kateirakea are te moan aomata mai aontano, nooria e bon ewara buroon te uea; ao e bwaka nako aontano.

25 Ngkai ana toro te uea a bon biri nako; ao ana toro Amarakaai a tang, ni kangai:

26 Nooria, ana toro te uea a bon ewara buroona, ao e a tia ni bwaka ao a bon biri nako; nooria, nako mai ao nooria.

27 Ao e koro bukina bwa Amarakaai e tua bwa ana taanga ni buaka a na mwananga man noora te bwai are e riki nakon te uea; ao ngke a roko n te tabo arei, ma ni kunea bwa te uea e wene i buakon raraana, Amarakaai e bakan korakora unna, ao e taku: Ane e tangira te uea, ao e na mwananga nako ma ni kakioia ana toro bwa aonga n tiringaki.

28 Ao e koro bukina bwa ni kabane ake a tangira te uea, ngke a ongo taeka aikai, a roko ao a kakioia ana toro te uea.

29 Ngkai ana toro te uea ngke a noora te taanga ni buaka ae kakioia, a bon maaku riki, ao a biri nakon te rereua, man roko nakon te aba are Taraemera man ikotaki ma ana aomata Amon.

30 Ao te taanga ni buaka are e kakioia e oki rikaaki, i mwin kakioakia ae e aki koro bukina, ao ngaia are Amarakaai, man ana anga ni kewe, ao e a tangiraki irouia aomata.

31 Ao e koro bukina bwa n te bong are i mwina ao e roko n te kaawa are Nibwaai ma ana taanga ni buaka, man taua te kaawa.

32 Ao ngkai e koro bukina bwa te uea n aine, ngke e ongo bwa e a tia n tiringaki te uea—bwa Amarakaai e kanakoia taan uaa rongorongo bwa a na tuanga te uea n aine bwa e a tia n tiringaki te uea irouia ana toro, ao e a tia ni kakioia ma ana taanga ni buaka, ma e matebuaka kakioakia, ao a bon tia ni biri nako—

33 Ngaia are, ngke e karekea ana rongorongo aei te uea n aine e bon kananako nakon Amarakaai, bwa e na kamaiuia kaain te kaawa are bubura; ao e tangiria naba bwa e na kawaria; ao e tangiria bwa e na kairia taan kakoaua mangaia ni kaineti ma maten te uea.

34 Ao e koro bukina bwa Amarakaai e uota te toro are e tiringa te uea, ao naake raona ni kabane, man nakon te uea n aine, nakon te tabo are e tekateka iai; ao a bane ni kakoaua nakoina bwa te uea e bon tiringaki i bon irouia ana toro; ao a taku naba: A tia ni biri nako: tiaki bwa iai te kakoaua ni kaaitaraia? Ao ngaia are e a rau nanon te uea n aine ni kaineti ma maten te uea.

35 Ao e koro bukina bwa Amarakaai e ukoukora te kan tangiraki iroun te uea n aine, ao e anaia bwa buuna; ao ngaia are man ana anga ni kewe, ma aia ibuobuoki ana toro ake a kamwamwane, ao e reke te abanuea irouna; eng, ao e a bon kamatoaki bwa te uea ni kabuta te aba, i buakoia te botanaomata ake Reimwanaite, ake bon Reimwanaite, ma Remueraite ma Itimaeraite, ma ni kabane ake a biri nako mai i buakoia Nibwaite, man ana tai n tautaeka Nibwaai ni karokoa te tai ae ngkai.

36 Ao ngkanne, taan biri nako aikai, bon iai irouia te reirei ma te rongorongo ae titebo ma Nibwaite, eng, ngkai a bon tia n reireinaki n te rabakau ae titebo mai iroun te Uea, ma e ngae n anne, ao te bwai ae kamimi taekinana, bwa e aki maan i mwin birinakoia ao a bon riki ni korakora riki man rawa n rairananoia, man iowawa riki, man buakaka ma ni kakamaku riki nakoia Reimwanaite—bwa a butimwaei kateia Reimwanaite; man taromauria anti, ma aekan kaibwabwaru nako; eng, ma ni mwaninga taekan te Uea ae Atuaia.