1 Ao ngkai e koro bukina bwa n te katebwi ma teuana n namwakaina n te katebwi ma ruaiwa n ririki, n tebwina bongin te namwakaina, ao aia taanga ni buaka Reimwanaite a bon nooraki ni waaki nakon te aba are Amonia.

2 Ao nooria, e a bon tia ni manga kateaki kaua te kaawa anne, ao Moronaai e katea ana taanga ni buaka i rarikin tian te kaawa, ao a kena te tano n otabwaninia iai bwa otangaia man aia kai ni katebe ma aia atibu Reimwanaite; bwa nooria, a bon un ma taian atibu ao taian kai ni katebe.

3 Nooria, i taekinna bwa te kaawa are bubura are Amonia e a tia ni manga kateaki kaua. I taku nakoim, eng, bwa e bon manga kateaki kaua mwakorona; ao ibukina bwa a bon tia Reimwanaite ni kamauna ngkoa ibukin buakakaia aomata, ao a taku inanoia bwa e na manga beebete naba uruakana.

4 Ma nooria, ai korakora ra nanokawakia; bwa nooria, Nibwaite a bon kena te bwariko n tano ae e abwaabwaki n otabwaninia, are e bon rang rietata n te aro are Reimwanaite a bon aki kona ni kareia n aia atibu ma kanoan aia kai ni katebe bwa a na boo iai, ao aki kona naba n roko irouia man aia tabo n rin.

5 Ngkai n te tai aei ao mataniwia aia mataniwi Reimwanaite a bon rianako miimiia, ibukin wanawanaia Nibwaite ni katauraoa nneia ae a na mano iai.

6 Ngkai aia taan kairiri Reimwanaite a kataua mai nanoia, ibukin korakoran mwaitia, eng, a kataua mai nanoia bwa te bwai ae e na kakukurei nakoia ngkana a roko nakoia n aron are a tia ni karaoia mai i mwaaina; eng, ao a tia naba ni katauraoia ma aia otanga, ma otangan bwabwaia; ao a a tia naba ni katauraoia ma aia kun ni man, eng, kunnikai aika a matenten bwa karabaia ngkai a bebeekan.

7 Ao ngkai a bon tauraoi raoi a bon taku inanoia bwa e na bon beebete anakiia ma tautoronakia tariia n te amo n tautoronaki, ke ni kamateia man tiringia n aki akaaka n aron nanoia.

8 Ma nooria, bon te miimii ae korakora irouia, bwa a bon tauraoi ibukiia, n te aro ni katauraoi ae e bon tuai man ataaki mai i mwaina i buakoia natin Riaai. Ngkai a tauraoi ni buaka ma Reimwanaite i aan ana kairiri Moronaai.

9 Ao e koro bukina bwa Reimwanaite, ke Amarakaaite, a bon rianako miimiia n aron aia katauraoi nakon te buaka.

10 Ngkai, ngke arona bwa te uea are Amarakaai e bon roko man te aba are Nibwaai, mai i moan ana taanga ni buaka, tao e na bon karekea te anga are Reimwanaite a na bon ekianako Nibwaite n te kaawa are Amonia; bwa nooria, e aki tabe ma raraaia ana botanaomata.

11 Ma nooria, Amarakaai e bon aki roko ngaia nakon te buaka. Ao nooria, ana mataniwi are mataniwia aia mataniwi a rawa n ekiia nako Nibwaite n te kaawa are Amonia, bwa Moronaai e bita aron waakinan bwaai i buakoia Nibwaite, n te aro are Reimwanaite a bon nanokawaki ibukin aia tabo ni karabaraba ao aki kona n roko nakoia.

12 Ngaia are, a oki rikaaki nakon te rereua, man anai aia bwaai ni kabane ao ma ni mwananga ni kaineta te aba are Noa, bwa a taku inanoia bwa bon te kauoua n tamaroa n tabo are a na kaaitaraia Nibwaite iai.

13 Bwa aki ataia bwa Moronaai e a tia ni waakina aron kamatoatoakia, ke e a tia ni katei taabo ni kamanomano ibukin kawakinakia, ni kaawa ni kabane n aaba ake irarikiia; ngaia are, a mwananga nakon te aba are Noa ma te nanomatoa; eng, mataniwia aia mataniwi a bon roko ao a karaoa te berita bwa a na tiringia aomata ake kaain te kaawa are bubura anne.

14 Ma nooria, a miimii bwa te kaawa are Noa, are e a tia ngkoa n riki bwa te tabo ae aki bati ni matoatoa, e a tia ngkai n riki, man ana waaki Moronaai, ni matoatoa, eng, n te aro are e a riao riki korakorana nakon te kaawa are Amonia.

15 Ao ngkai, nooria, bon te bwai ae wanawana ae karaoia Moronaai aei; bwa e kataua i nanona bwa a na maaku n te kaawa are bubura are Amonia; ao kioina bwa te kaawa are bubura are Noa e a tia ngkoa n riki bwa mwakoron te aba are e nang aki matoatoa, ao a na bon kawaria ni buakanna; ao ngaia are e bon riki n aron are e tangiria.

16 Ao nooria, Moronaai e rinea Riaai bwa mataniwia mataniwi i aoia kaain te kaawa anne; ao bon Riaai naba anne are e buaka ma Reimwanaite n te mwarua i mainikun te karaanga are Tiitan.

17 Ao ngkai nooria e koro bukina, bwa Reimwanaite ngke a kunea bwa Riaai e mataniwia te kaawa anne a bon aki kukurei riki, bwa e bon korakora maakakin Riaai irouia; ma e ngae n anne ao mataniwia aia mataniwi a bon tia ni berita bwa a na ekaanako te kaawa; ngaia are, a karokoia aia taanga ni buaka.

18 Ngkai nooria, a bon aki kona Reimwanaite n rin i nanon aia tabo ni kamanomano ma ti man te tabo n rin, ibukin rietatan te tano are a bon tia ni kawaerakea, mai nanon te mwanono ae e kekenaki ni katobibi, ma ti man te tabo n rin.

19 Ao ngaia are Nibwaite a bon tauraoi n tiringia ni kabane ake a kataia n tamwarake nakon te tabo ni kamanomano n aanga tabeua, ni kareia n taian atibu ma kanoan taian kai ni katebe.

20 Ngaia are a tauraoi, eng, aia mwaane ake a korakora riki, ma aia kabaang ao aia bana, bwa a na oroia ake a kataia n rin nakon aia tabo ake a kawakinaki iai man te tabo n rin; ao ngaia are a tauraoi n tei n un bon ibukiia ni kaaitaraia Reimwanaite.

21 Ao e koro bukina bwa mataniwia aia mataniwi Reimwanaite a uotia aia taanga ni buaka nakon te tabo n rin, ao a un ma Nibwaite, bwa aonga n rin n aia tabo ake a kawakinaki iai; ma nooria, a bon kakioaki n oki ngkai ao manga i mwina, n te aro are a bon tiringaki n te tiritiri ae korakora.

22 Ao ngkanne ngke a kunea bwa aki kona n tokanikai i aoia Nibwaite man te tabo n rin, ao a waaki ni kena rikaaki aia tano bwa aonga n reke aia tabo n rin nakon aia kairiribai, bwa e aonga n titebo aroia n un; ma nooria, i nanon aia tai ni kataia ni karaoa aio ao a bon bwaka n taian atibu ma kanoan taian kai ni katebe are a karebanaki iai; ao aki kaona te mwarua n te tano are a na katikia rikaaki ma a bon kaonna n aia mate ma aia ikoaki.

23 Ngaia are Nibwaite a tokanikai i aoia aia kairiribai; ao ngaia are Reimwanaite a bon kataia n tiringia Nibwaite ni karokoa ae mataniwia aia mataniwi a bon bane n tiringaki; eng, ao e bon raka iaon teuana te ngaa Reimwanaite ake a bon tiringaki; ao n te itera are teuana, bon akea naba temanna te Nibwaite ae tiringaki.

24 Tao bon nimangaun ake a ikoaki, ake a teretere raoi nakon kanoan taian kai ni katebe man te tabo n rin, ma a bon otangaia n aia otanga, ma otangan bwabwaia, ma otangan atuuia, n te aro are a ikoaki waeia, are bon angiina a bon rang kaakaiaki.

25 Ao e koro bukina bwa Reimwanaite ngke a nooria bwa mataniwia aia mataniwi a bane n tiringaki a bon biri nako nanon te rereua. Ao e koro bukina bwa a oki nakon te aba are Nibwaai, ni kaongoa aia uea, Amarakaai, are bon bungiaki ngkoa bwa te Nibwaite, korakoran buaia raoia.

26 Ao e koro bukina bwa e bon korakora unna irouia ana aomata, ibukina bwa e aki reke irouna te bwai are e tangiria mai irouia Nibwaite; bwa e bon tuai n tautaekaniia n te amo n tautoronaki.

27 Eng, e bon korakora unna, ao e taetaebuaka te Atua, ma Moronaai naba, ma n tuea n te berita ae nano bwa e na mooi n raraana; ao aio ibukina bwa Moronaai e a tia ni kaawakin ana tua te Atua ibukin kawakinakia ana botanaomata.

28 Ao e koro bukina, bwa n te itera are teuana, ana botanaomata Nibwaai a bon kaitaua te Uea ae Atuaia ibukin korakorana ae akea kabootauana ni kainaomataia mai nanon baia aia kairiribai.

29 Ao ikai are e a toki aia katebwi ma ruaiwa n ririki n tautaeka taan moti i aoia ana botanaomata Nibwaai.

30 Eng, ao e bon reitinako te rau i buakoia, ao e korakora nakoraoin te aro n te ekaretia ibukin aia ongotaeka ma aia botumwaaka nakon ana taeka te Atua, are e bon taekinaki nakoia irouia Ereman ma Tiburon, ma Korianton, ma Amon, ma tarina, eng, ao irouia ni kabane ake a tia ni katabuaki n ana botaki ae tabu te Atua, ni bwabetitoaki nakon te rairannano, ma ni kanakoaki bwa a na kabwarabwara i buakoia aomata.