1 Karon nahitabo nga sa ikaunom nga tuig sa paghari sa mga maghuhukom sa katawhan ni Nephi, walay mga panagbingkil ni mga gubat sa yuta sa Zarahemla;

2 Apan ang katawhan gisakit, oo, gisakit sa hilabihan tungod sa pagkawala sa ilang kaigsoonan, ug tungod usab sa pagkawala sa ilang mga panon ug kahayopan, ug tungod usab sa pagkawala sa ilang kaumahan sa lugas, nga gitunob-tunoban ug gilaglag sa mga Lamanita.

3 Ug hilabihan kaayo ang ilang mga kasakit nga ang matag kalag adunay katarongan nga magbangotan; ug mituo sila nga kini tungod sa mga paghukom sa Dios nga gipadala nganha kanila tungod sa ilang pagkadaotan ug sa ilang pagkasalawayon; busa nahigmata sila sa usa ka paghinumdom sa ilang katungdanan.

4 Ug gisugdan nila sa pagtukod ang simbahan sa mas hingpit nga paagi; oo, ug daghan ang gibunyagan didto sa katubigan sa Sidon ug nasakop sa simbahan sa Dios; oo, gibunyagan sila pinaagi sa kamot ni Alma, kinsa giordinahan nga labaw nga pari sa katawhan sa simbahan, pinaagi sa kamot sa iyang amahan nga si Alma.

5 Ug nahitabo nga sa ikapito nga tuig sa paghari sa mga maghuhukom dihay mga tulo ka libo ug lima ka gatos ka tawo nga mitipon sa ilang mga kaugalingon ngadto sa simbahan sa Dios ug gibunyagan. Ug sa ingon natapos ang ikapito nga tuig sa paghari sa mga maghuhukom sa katawhan ni Nephi; ug dihay nagpadayon nga kalinaw sa tanan nga panahon.

6 Ug nahitabo nga sa ikawalo nga tuig sa paghari sa mga maghuhukom, nga ang katawhan sa simbahan misugod sa pagkamapagarbohon, tungod sa hilabihan kadaghan sa ilang katigayonan, ug sa ilang maanindot nga mga sida nga panapton, ug sa ilang maanindot nga pagkalubid nga panapton, ug tungod sa ilang pundok sa gagmay ug dagkong kahayopan, ug sa ilang mga bulawan ug mga pilak, ug sa tanang matang sa mahalon nga mga butang, nga ilang naangkon tungod sa ilang kakugi; ug tungod niining tanan nga butang sila gibayaw sa garbo sa ilang mga mata, kay nagsugod sila sa pagsul-ob og mahalon kaayong mga sapot.

7 Karon kini ang hinungdan sa hilabihan nga kasakit ni Alma, oo, ug sa daghan nga katawhan nga gitudlo ni Alma nga mga magtutudlo, ug mga pari, ug mga anciano diha sa simbahan; oo, daghan kanila naguol kaayo tungod sa kadaotan nga ilang nakita nga nagsugod sa ilang katawhan.

8 Kay nakita nila ug natan-awan uban sa tumang kasubo nga ang katawhan sa simbahan misugod nga mabayaw sa garbo sa ilang mga mata, ug nagpahimutang sa ilang mga kasingkasing diha sa mga katigayonan ug sa kawang nga mga butang sa kalibotan, nga nagsugod sila sa pagkamabiay-biayon, sa usa ngadto sa lain, ug misugod sila sa paglutos niadtong mga dili motuo sumala sa ilang kaugalingon nga kabubut-on ug kahimuot.

9 Ug sa ingon niana, niining ikawalo nga tuig sa paghari sa mga maghuhukom, dihay misugod nga hilabihan nga mga panagbingkil taliwala sa katawhan sa simbahan; oo, dihay mga kasina, ug panagbangi, ug daotan og tuyo, ug mga pagpanglutos, ug garbo, hangtod gani milabaw sa garbo niadtong dili sakop sa simbahan sa Dios.

10 Ug sa ingon niana natapos ang ikawalo nga tuig sa paghari sa mga maghuhukom; ug ang pagkadaotan sa simbahan nahimong dako nga babag niadtong dili sakop sa simbahan; ug sa ingon niana ang simbahan nagsugod nga wala na mouswag.

11 Ug nahitabo sa pagsugod sa ikasiyam nga tuig, nakita ni Alma ang pagkadaotan sa simbahan, ug nakita usab niya nga ang ehemplo sa simbahan misugod sa pagdala niadtong dili mga matuohon gikan sa usa ka tipik sa kadaotan ngadto sa lain, sa ingon nagdala sa kalaglagan sa katawhan.

12 Oo, nakita niya ang dako nga pagkadili patas sa kahimtang sa katawhan, ang uban nagmapahitas-on sa ilang mga kaugalingon, nagtamay sa uban, gitalikdan ang mga timawa ug ang mga hubo ug kadtong mga gigutom, ug kadtong mga giuhaw, ug kadtong mga masakiton ug mga gisakit.

13 Karon mao kini ang dakong hinungdan sa pagbangotan sa katawhan, samtang ang uban nagpaubos sa ilang kaugalingon, sa pagtabang niadtong nagkinahanglan sa ilang panabang, sama sa paghatag sa ilang kabtangan ngadto sa mga kabos ug mga timawa, pagpakaon sa mga gigutom, ug sa pag-antos sa tanan nga matang sa kasakit, alang kang Kristo, kinsa moanhi sumala sa espiritu sa panagna;

14 Nagpaabot nianang adlawa, nga nagbaton og kapasayloan sa ilang mga sala; nga puno sa hilabihan nga kamaya tungod sa pagkabanhaw sa mga patay, sumala sa kabubut-on ug gahom ug kaluwasan pinaagi ni Jesukristo gikan sa mga gapos sa kamatayon.

15 Ug karon nahitabo nga si Alma, nga nakakita sa mga kasakit sa mapainubsanon nga mga sumusunod sa Dios, ug sa mga pagpanglutos nga gipahamtang diha kanila pinaagi sa nahibilin sa iyang katawhan, ug nagtan-aw sa tanan nila nga dili patas nga kahimtang, nagsugod sa hilabihan nga pagkaguol; bisan pa niana ang Espiritu sa Ginoo wala mohunong sa pagtabang kaniya.

16 Ug mipili siya og tawo nga maalamon kinsa sakop sa mga anciano sa simbahan, ug mihatag kaniya og gahom sumala sa tingog sa katawhan, nga siya makabaton og gahom sa paghimo og mga balaod sumala sa mga balaod nga gihatag na, ug sa pagpatuman niini sumala sa mga kadaotan ug mga krimen sa katawhan.

17 Karon ang ngalan niini nga tawo mao si Nephihah, ug gitudlo siya nga labaw nga maghuhukom; ug milingkod siya sa hukmanan aron sa paghukom ug pagdumala sa katawhan.

18 Karon wala siya hatagi ni Alma og katungdanan sa pagkalabaw nga pari sa tibuok simbahan, apan gipabilin sa iyang kaugalingon ang katungdanan sa pagkalabaw nga pari; apan iyang gitugyan ang hukmanan ngadto kang Nephihah.

19 Ug kini gibuhat niya aron siya sa iyang kaugalingon makig-uban sa iyang katawhan, o taliwala sa katawhan ni Nephi, aron iyang masangyaw ang pulong sa Dios ngadto kanila, sa pagdasig nila nga mahinumdom sa ilang katungdanan, ug aron iyang hunungon, pinaagi sa pulong sa Dios, ang tanan nga garbo ug pagkamalimbongon ug tanan nga panagbingkil nga anaa sa iyang katawhan, nakakita nga walay paagi nga siya makausab kanila gawas sa paghatag og lunsay nga pagpamatuod batok kanila.

20 Ug sa ingon niana sa pagsugod sa ikasiyam nga tuig sa paghari sa mga maghuhukom sa katawhan ni Nephi, si Alma mitugyan sa hukmanan ngadto kang Nephihah, ug bug-os niyang gihalad ang iyang kaugalingon ngadto sa labaw nga pagkapari sa balaan nga kapunongan sa Dios, sa pagpamatuod sa pulong, sumala sa espiritu sa pagpadayag ug pagpanagna.