1 Ao ngkai e koro bukina bwa Moronaai e aki toki ana katauraoi nakon te buaka, ke ni kamanoia ana botanaomata mai irouia Reimwanaite; bwa e karekea te anga are a na taanga ni buaka a na waaki ni moan aia kauabwi n ririki n tautaeka taan moti, bwa a na waaki ni kenikena te tano n otabwaninia taian kaawa ake a bwainaki irouia Nibwaite.

2 Ao i taubukin taian bwarikoriko n tano ao e karekea te anga bwa a na kateaki kaai, eng, taian kai aika a kateaki ae abwakin te aomata, n otabwaninia taian kaawa.

3 Ao e karekea te anga bwa iaon taian kai aika a kateaki aikai a na kateaki rabwatan kaai aika a kakang ni kateaki iaon taian kai n otabwanin; ao a bon matoatoa man rietata.

4 Ao e karekea te aanga are a na kateaki taian taua ake a tararua aon taian rabwata ni kai akekei, ao e karekea te anga are a na kateaki taabo ni katantan iaon taian taua akekei, n te aro bwa aia atibu ma aia kanoa ni katebe Reimwanaite a na aki kona n ikoaki iai.

5 Ao a bon tauraoi ni karekare n atibu mai taubukin taian taua, n aron are a tangiria ma korakoraia, n tiringa are e mwananga ni kaniia oon te kaawa are bubura.

6 Ngaia are Moronaai e katauraoa te anga n totoko ae matoatoa ma ni kaaitaraia aia kairiribai, n otabwaninia te kaawa ae bubura ni kabane ni kabuta te aba.

7 Ao e koro bukina bwa Moronaai e karekea te anga are ana taanga ni buaka a na mwananga nako mainikun te rereua, eng, ao a mwananga nako ma ni kakioia ni kabane Reimwanaite ake a mena i mainikun te rereua nakon oin abaia, are e mena i maiakin te aba are Taraemera.

8 Ao tian te aba are Nibwaai e biri n te rain ae eti ma i rarikin taari mai mainiku nako maeao.

9 Ao e koro bukina bwa Moronaai ngke e a tia ni kakioia ni kabane Reimwanaite man te rereua i mainiku, are i meangin abaia ni bwaibwai, e karekea te anga are kaain te aba are Taraemera ma aba ake a otabwaninia a na mwananga nakon te rereua are i mainiku, nakon te tia are i rarikin taari, man taua te aba.

10 Ao e katikuia taian taanga ni buaka i maiaki, n tian te aba are aia bwai, ma ni karekea te anga are a na katei taian anga ni kamatoatoa bwa aonga ni kamanoia aia taanga ni buaka ma aia aomata mai nanon baia aia kairiribai.

11 Ao ngaia are e kaakeai aia anga ni kamatoatoa Reimwanaite n te rereua are i mainiku, eng, ao i maeao naba, ni kamatoatoa te tia i marenaia Nibwaite ao Reimwanaite, i marenan te aba are Taraemera ma te aba are Nibwaai, mai taari maeao, ni biri nako atuun te karaanga are Tiran—Nibwaite a bwaina te aba ni kabane are e mena i meangin te aba are te Aba ni Mari, n aron nanoia.

12 Ngaia are Moronaai, ma ana taanga ni buaka, are e tabe n rikirake ni katoa bong ibukin koauan te kawakinaki are a karekea man ana mwakuri, a bon ukora te anga are a na kaakea korakoraia ma mwaakaia Reimwanaite man aaba ake a bwaibwai iai, n te aro bwa a na manga akea mwaakaia iaon aaba ake a bwaibwai iai.

13 Ao e koro bukina bwa Nibwaite a katea aan te kaawa ae bubura, ao a arana te kaawa bwa Moronaai; ao e mena i rarikin taari mai mainiku; ao e mena i maiaki i rarikin tian abaia Reimwanaite.

14 Ao a waaki naba ni kawenea aan te kaawa ae bubura i marenan te kaawa are Moronaai ma te kaawa are Aaron, ni katoma tian Aaron ma Moronaai; ao a arana te kaawa, ke te aba bwa Nibwaaia.

15 Ao a waaki naba n te ririki anne ni katei kaawa i meang, teuana ae e kateaki n te aro ae kaokoro a aranna bwa Riaai, are e mena i meang i rarikin tian mataniwin te bike.

16 Ao ikai are e a toki te kauabwi n ririki.

17 Ao a mena n aroia ae nakoraoi ana botanaomata Nibwaai ni moan aia kauabwi ma teuana n ririki n tautaeka taan moti i aoia ana botanaomata Nibwaai.

18 Ao e korakora nako raoin aroia, ao e riki rake n rianako kaubwaia; eng, ao a kariki ma ni matoatoa n te aba.

19 Ao ikai are ti a noora ana nanoanga ma momotiraoin ana babaire te Uea, ni kakoroi bukin ana taeka nakoia natia aomata; eng, ti kona n nooria bwa a kaotaki koauan ana taeka, n te tai aei, ake e taekin nakon Riaai, ni kangai:

20 Ko na kakabwaiaaki ma natim; ao a na kakabwaiaaki, ngkana a kaawakin au tua ao a na rikirake aroia n te aba. Ma uringnga, bwa ngkana aki kaawakin au tua ao a na kanakoaki mai matan te Uea.

21 Ao ti nooria bwa a kaotaki koauan taian berita aikai nakoia ana aomata Nibwaai; bwa man aia unraa ma aia itabaraara, eng, aia tiritiri, ma aia urubwai n anai bwai, ma aroia n taromauri bouananti, ma aia waaki ni kabekaau, ma aia mwakuri aika a ribaki, i marenaia, are a uoti nakoia taian buaka ma kamaunakia.

22 Ao naake a kakaonimaki ni kaawakin ana tua te Uea, a bon kainaomataki n taai nako, ao ngaa ma ngaa tariia aika a buakaka ake a tiku n tautoronaki, ke ni mate n te kabaang, ke ni kerikaaki n aia aki onimaki, man ikotaki ma Reimwanaite.

23 Ma nooria bon akea riki taai aika a tia n rang kakukurei irouia ana botanaomata Nibwaai, ma ana bong Nibwaai, nakon bong n ana tai Moronaai, eng, ao n te tai naba aei ae aia kauabwi ma teuana n ririki n tautaeka taan moti.

24 Ao e koro bukina bwa aia kauabwi ma uoua n ririki n tautaeka taan moti e bon toki naba i nanon te rau; eng, ao te kauabwi ma teniua n ririki.

25 Ao e koro bukina bwa ni moan waakinan aia kauabwi ma aua n ririki n tautaeka taan moti, ao e na bon reke naba te rau i buakoia ana botanaomata Nibwaai ngke arona bwa akea te kauntaeka ae reke ni kaineti ma te aba are Riaai, ao te aba are Morianton, are e toma ma tian Riaai; are a kaai ni mena n te tia i rarikin mataniwin te bike.

26 Bwa nooria, aomata ake kaain Morianton a taua mwakoron te aba are Riaai; ngaia are e riki te un ae korakora i marenaia, n te aro are ana aomata Morianton a tabeki aia bwai ni buaka ma ni kaaitaraia tariia, ao a bon matoatoa nanoia bwa a na tiringia n te kabaang.

27 Ma nooria, aomata ake kaain te aba are Riaai a biri nakon ana tabo Moronaai, ma ni butiia ibukin buokaia bwa nooria a bon aki bure.

28 Ao e koro bukina bwa aomata ake kaain Morianton, ake a kairaki iroun te aomata ae arana Morianton, a kunea bwa kaain Riaai a bon biri nakon ana tabo Moronaai, a bon korakora maakuia bwa mwiina ao ana taanga ni buaka Moronaai e na roko n tiringia.

29 Ngaia are, Morianton e karina te iango inanoia bwa a na biri nako, nakon te aba are i meang, are e onrake n taian nei aika a bati, man taua te aba are n nako meang.

30 Ao nooria, a na bon karaoa nanon te babaire aei, (are e na bon karekea te kananokawaki ae bati) ma nooria, Morianton bon te mwaane ae e kakai rotaki, ngaia are e a un naba iroun temanna ana toro te aine, ao e toka i aona ma ni karawataa n oroia.

31 Ao e koro bukina bwa e biri nako, ao e roko nakon ana tabo Moronaai, ao e tua nakon Moronaai bwaai ni kabane ni kaineti ma te bwai are e riki, ma aron naba aia iango ni biri nako nakon te aba are n nako meang.

32 Ngkai nooria, aomata ake a mena n te Aba ni mari, ke te aba are Moronaai, a maaku bwa mwiina a ongo n ana taeka Morianton ao man ikotaki ma ana aomata, ao ngaia are e na taua taekan mwakoron te aba, are e na kona n riki bwa aan te kakauntaeka ae korakora i marenaia ana botanaomata Nibwaai, eng, are taian kakauntaeka are e na karika bwakan inaomataia.

33 Ngaia are Moronaai e kanakoa te taanga ni buaka, ma aia tautia ma aia bwai, ni katokia ana aomata Morianton, ni katoka birinakoia nakon te aba are n nako meang.

34 Ao e koro bukina bwa aki roko irouia ni karokoa ae a roko n tian te Aba are e Kamaroa; ao a roko ni katokia ikanne, n te kawai ae wariki are e kaineti nako taari nakon te aba are n nako meang, eng, i rarikin taari, i maeao ao i mainiku.

35 Ao e koro bukina bwa te taanga ni buaka are e kanakoa Moronaai, are e kairaki iroun te mwaane ae Teaenikam, e bon kaitibo ma ana botanaomata Morianton; ao a bon rang matoa nanoia n rawa n ongo ana aomata Morianton (kioina ngkai a mwaamwanaki n ana buakaka ma ana taeka ni kekeweia) ao e waaki te buaka i marenaia, are e tiringaki iai Morianton iroun Teaenikam ma ni konaia ana taanga ni buaka, man uotia bwa bure, man oki rikaaki nakon ana tabo Moronaai. Ao ngaia are e a toki aia kauabwi ma aua n ririki n tautaeka taan moti i aoia ana botanaomata Nibwaai.

36 Ao ngaia are a uotaki n oki ana botanaomata Morianton. Ao ngke a berita n te berita ae tabu bwa a na kawakina te rau ao a bon kaokaki nakon te aba are Morianton, ao e reke te itoman i marenaia ma ana aomata Riaai; ao a bon kaokaki naba nakon abaia.

37 Ao e koro bukina bwa n te ririki naba anne ao e a manga kaokaki te rau nakoia ana botanaomata Nibwaai, bwa Nibwaai, te kauoman ni mataniwi irouia taan moti, e mate i mwin tiana ni mena n te kaintekateka ni motikitaeka ma te kororaoi ae eti i matan te Atua.

38 Ma e ngae n anne, e bon aki ongo iroun Aramwa bwa e na anai taian rongorongo ma bwaai ake a taraaki iroun Aramwa ma ana bakatibu bwa a rang tabu; ngaia are Aramwa e anga nakon natina te mwaane, are Ereman.

39 Nooria, e koro bukina bwa natin Nibwaaia te mwaane e bon rineaki bwa e na tekateka n te kaintekateka ni motikitaeka, i mwin tamana; eng, e bon rineaki bwa e na mataniwia taan moti man riki bwa te kowana i aoia aomata, ma ni karaoa te berita ao te otenanti ae tabu bwa e na motikitaeka n ae raoiroi, ma ni kawakina inaomataia aomata, man anganiia aroia ae raka ae tabu n taromauri bwa a na taromauria te Uea ae Atuaia, eng, ni kateimatoa ana waaki te Atua n ana bong ni kabane, ma ni kaira anne e buakaka nakon te momotiraoi ae riai ni kaineti ma te bure are e karaoia.

40 Ngkai nooria, arana bon Bwaoraan. Ao Bwaoraan e tekateka n ana kaintekateka tamana, ma ni waakina ana tautaeka ni banen te kauabwi ma aua n ririki, i aoia ana botanaomata Nibwaai.