1 Ao ngkai, e koro bukina bwa n aia kauabwi ma onoua n ririki n tautaeka taan moti i aoia ana botanaomata Nibwaai, nooria, ngke a uti Reimwanaite ni moaningabongin moan bongin te moan namwakaina, nooria, a kunea Amarakaai ni mate n oin ana umwa n rianna; ao a noora naba Teaenikam bwa e tauraoi ni buakaniia n te bong arei.

2 Ao ngkanne, ngke a noora aio Reimwanaite ao a bon maaku; ao a kitana aia babaire ibukin mwanangaia n nakon te aba n nako meang, man oki rikaaki ma aia taanga ni buaka nakon te kaawa are Mureki, ma ni kakaea katanaia n aia bwai ni kamatoatoa.

3 Ao e koro bukina bwa tarin Amarakaai e bon rineaki bwa te uea i aoia te botanaomata; ao arana bon Amoron; ngaia are te uea are Amoron, are tarin te uea are Amarakaai, e bon rineaki bwa e na uea i mwina.

4 Ao e koro bukina bwa e anga te tua nakoia ana botanaomata bwa a na kaawakin taian kaawa ake a bubura akekei, are a tia n anai ni bwaron raraaia; bwa bon akea kaawa aika a tia n anai ma ti man buan raraaia aika a bati.

5 Ao ngkai, Teaenikam e nooria bwa a teimatoa nanoia Reimwanaite n tangiria n tau taian kaawa ake a bubura akekei ake a bon tia n anai, ao mwakoron nako te aba ake a bon tia n riki bwa aia bwai; ao ngke e a manga noora korakoran mwaitia, ao e kataua Teaenikam bwa e aki riai bwa e na kataia n ekiia nako n aia tabo ni katantan.

6 Ma e katikuia ana koraki n taabo ake a uakaan, bwa aongkoa a katauraoi nakon te buaka; eng, ma ni koauana raoi e bon katauraoi ni katanna mai irouia, ni katei taian oo n otabwaninia ma ni katauraoi taabo ni katantan.

7 Ao e koro bukina bwa e waaki ni katauraoi nakon te buaka n uaa ae Moronaai e kanakoa mwaitia ana koraki bwa a na kamatoa ana taanga ni buaka.

8 Ao Moronaai e kanakoa te kaetieti nakoina bwa e na tauiia bure ni kabane ake a mena i nanon baina; bwa n aroia Reimwanaite ake a tia n tauiia bure aika a mwaiti, ao ngaia e riai naba n tauiia aia bure ake Reimwanaite bwa te kabomwi ibukiia naake a tia n anaaki irouia Reimwanaite.

9 Ao e kanakoa naba te oota nakoina bwa e na kamatoatoa te Aba ni mari, man tararua te kawai are e irariki are e kaineti nakon te aba n nako meang, bwa mwiina ao Reimwanaite a na taua te tabo anne ma ni karekea korakoraia iai man aki karauia man itera nako.

10 Ao Moronaai e kananako naba nakoina, man tangiria bwa e na kakaonimaki ni kawakina mwakoron te aba anne, ao bwa e na ukoukori aanga ni kabane ni karawawataia Reimwanaite n te mwakoro anne, n aron korakorana, bwa tao e na kona ni manga anai n te aro ni kamwane ke n aanga riki tabeua, taian kaawa ake a bubura akekei ake a bon tia n anaaki mai i nanon baia; ao bwa e na mwakuria kamatoaia ma kakorakorakia taian kaawa ake a bubura ake a uakaan, ake a tuai n reke i nanon baia Reimwanaite.

11 Ao e taku naba nakoina, I tangiria bwa N na roko nakoim, bwa nooria, a roko iaora Reimwanaite n tian abara are i rarikin taari i maeao; ao nooria, I nako ni kaaitaraia mangaia are I aki kona ni kawariko.

12 Ngkai, te uea (Amoron) e a tia ni kitana te aba are Taraemera, man tia ni kaongoa te uean aine aron maten tarina, man tia n ikotiia te koraki ae mwaiti, man tia ni mwananga ni kaaitaraia Nibwaite n tian te aba are i rarikin taari i maeao.

13 Ao ngaia are e waaki n aki karauia Nibwaite, ma ni kataia ni kaira nako mwakoron aia taanga ni buaka nakon mwakoron te aba arei, ao e a tia n tuangiia ake e katikuia bwa a na tauii taian kaawa ake a bubura are e a tia n anai, ao bwa a na aki karauia naba Nibwaite ake n te tia i rarikin taari i mainiku, ao a riai n taua abaia Nibwaite ngkai a mwaaka iai, n aron korakoran aia taanga ni buaka.

14 Ao ngaia are Nibwaite a mena i nanon te aro ae kakamaku ni banen aia kauabwi ma onoua n ririki n tautaeka taan moti i aoia ana botanaomata Nibwaai.

15 Ma nooria, e koro bukina bwa n aia kauabwi ma itiua n ririki n tautaeka taan moti, ao Teaenikam, man ana kaetieti Moronaai—are e katea te taanga ni buaka bwa e na kawakina tian te aba i maiaki ao i maeao, e a tia ni waakina mwanangana nakon te aba ni Mari, bwa e na buoka Teaenikam ma ana koraki ni manga anai taian kaawa ake a tia ni bua mai irouia—

16 Ao e koro bukina bwa Teaenikam e karekea te kaetieti bwa e na ekaanako te kaawa are Mureki, man anaia ngkana e kona.

17 Ao e koro bukina bwa Teaenikam, e katauraoi bwa e na ekaanako te kaawa are Mureki, ma ni mwananga ma ana taanga ni buaka ni kaaitaraia Reimwanaite; ma e nooria bwa e aki kona n tokanikai i aoia ngkai a mena n aia tabo ni katantan; ngaia are e katuka te baire are a na waakinna man oki rikaaki nakon te kaawa are te aba ni Mari, n tataninga rokon Moronaai, bwa e na karekea kakorakoraia ana taanga ni buaka.

18 Ao e koro bukina bwa e roko Moronaai ma ana taanga ni buaka n te aba ni Mari, ni banen aia kauabwi ma itiua n ririki n tautaeka taan moti i aoia ana botanaomata Nibwaai.

19 Ao ni moan wakinan te kauabwi ma waniua n ririki, Moronaai ma Teaenikam ma mataniwia aia mataniwi aika a mwaiti a tewea te kabowi ni buaka—bwa tera ae a na karaoia bwa aonga n otinako ni buaka mangaia Reimwanaite; ke bwa tao n aanga riki tabeua ao a kona ni mwaamwanaiia bwa a na otinako man aia tabo ni kamanomano, bwa e aonga n reke aia raka i aoia bwa aonga n anaa te kaawa are Mureki.

20 Ao e koro bukina bwa e kanakoia taan uaa rongorongo nakon aia taanga ni buaka Reimwanaite, are e tararua te kaawa are Mureki, nakon aia tia kairiri, are arana Iakobwa, n tangiria bwa e na otinako ma ana taanga ni buaka bwa e na kaitibo mangaia n taabo ake a maataata i marenaia kaawa aika uoua aikai. Ma nooria, Iakobwa, are te Tioramwaite, e bon rawa n roko ma ana taanga ni buaka bwa e na kaitibo mangaia n te tabo are e maataata.

21 Ao e koro bukina bwa Moronaai, ai bon akea ana kantaninga bwa e na kaitibo mangaia n te tabo ae a na boraoi iai, ngaia are, e karaoa te babaire bwa e na kabwaka nanoia bwa a na otinako Reimwanaite man aia tabo ni kamanomano.

22 Ngaia are e karekea te anga are Teaenikam e na kairia ti tabeman ana koraki ma ni mwananga nako rarikin taari; ao Moronaai ma ana taanga ni buaka, ana mwananga nakon te rereua n te bong, i maeaon te kaawa are Mureki; are ngaia, are n te ingabong, ngke aia taan tararua Reimwanaite a noora Teaenikam, a biri nako n tuanga Iakobwa, are aia tia kairiri.

23 Ao e koro bukina bwa aia taanga ni buaka Reimwanaite a bon mwananga ni kaitaraa Teaenikam, ni kataua inanoia bwa ibukin korakoran mwaitia ao a na bon tokanikai iaon Teaenikam ibukin uarereken ana mwaiti. Ao ngke Teaenikam e noora aia taanga ni buaka Reimwanaite n roko ni kaitaraa, e okirikaki nako rarikin taari, i meang.

24 Ao e koro bukina bwa ngke Reimwanaite a nooria bwa e a biri nako, a kaninikoriaia ni kakioia ma te unga n nano. Ao ngke Teaenikam e bon tabe ni kairia nako Reimwanaite ake a tabe ni kakioa ma e aki reke irouia, nooria, Moronaai e tua bwa mwakoron ana taanga ni buaka ake raona a na mwananga nakon te kaawa, man taua.

25 Ao a karaoa aio, man tiringia ni kabane ake a tiku bwa a na kaawakina te kaawa, eng, ni kabane naake a rawa n anga nako aia bwai ni buaka.

26 Ao ngaia are Moronaai e a taua te kaawa are Mureki ma mwakoron ana taanga ni buaka, ao e mwananga ma ake nikiraia bwa e na kaitibo ma Reimwanaite ngkana a oki ma ni kakioan Teaenikam.

27 Ao e koro bukina bwa Reimwanaite a kakioa Teaenikam ni karokoa ae a roko n uakaan ma te kaawa are te aba ni Mari, ao a kaitiboaki iroun Riaai ma ana taanga ni buaka ae uarereke, are e bon katukaki bwa e na kawakina te kaawa are Te Mari.

28 Ao ngkai nooria, ngke mataniwia aia mataniwi Reimwanaite a noora Riaai ma ana taanga ni buaka bwa e bon roko ni kaaitaraia, a bon biri nako n te aro ae mangaongao, bwa mwiina aki roko n te kaawa are bubura are Mureki i mwaain ae e ooia Riaai; bwa a bon kua i mwin mwaamwanangaia, ao ana koraki Riaai a bon aki kua.

29 Ao ngkai Reimwanaite a bon aki ataia bwa Moronaai e mena ibukiia ma ana taanga ni buaka; ao a bon ti maaka Riaai ma ana koraki.

30 Ngkai Riaai e bon aki tangiria bwa e na ooia n uaa ae e kaitibo ma Moronaai ma ana taanga ni buaka.

31 Ao e koro bukina bwa i mwaain ae a okirikaki Reimwanaite n ae raroa a bon otabwaniniaki irouia Nibwaite, irouia ana koraki Moronaai n te itera are teuana, ao ana koraki Riaai n te itera are teuana, are a bon bane n aki kua man onrake n te korakora; ma Reimwanaite a bon kua i mwin mwanangaia ae abwaabwaki.

32 Ao Moronaai e tua bwa ana koraki a na buakaniia n uaa ae a anganako aia bwaai ni buaka.

33 Ao e koro bukina bwa Iakobwa, ngkai bon aia mataniwi, ao ngkai bon te Tioramwaite naba, ao bon te aomata ae e rarawa ni kokonaki, e kairia Reimwanaite ni buaka ma te un ae korakora ni kaaitaraMoronaai.

34 Ibukina bwa Moronaai e mena ni kawaia, ngaia are Iakobwa e bon korakora nanona bwa e na tiringia ma ni karekea kawaina nakon te kaawa are Mureki. Ma nooria, Moronaai ma ana koraki a bon korakora riki; ngaia are a bon aki anga te kawai nakoia Reimwanaite.

35 Ao e koro bukina bwa a uaia ni buaka man itera aika uoua ma te un ae korakora; ao a bon mwaiti ake a mate man itera aika uoua; eng, ao Moronaai e bon ikoaki ao Iakobwa e mate.

36 Ao Riaai e kakorakora mai ibukiia ma te un ae korakora ma ana koraki aika a korakora, n te aro are Reimwanaite ake a mena i buki a anganako aia bwai ni buaka; ao nikiraia, a bon mangaongao, man aki ataia bwa a na biri nako ke a na un.

37 Ngkai Moronaai ngke e noora mangaongaoia, e taku nakoia: Ngkana kam uoti mai ami bwai ni buaka man anga nako, nooria ti na katoka kawawaean raraami.

38 Ao e koro bukina bwa Reimwanaite ngke a ongo taeka aikai, mataniwia aia mataniwi, ni kabane ake aki tiringaki, a roko man tewenakoi aia bwai ni buaka i waen Moronaai, man tuangiia aia koraki bwa a na karaoa naba are a karaoia.

39 Ma nooria, a bon mwaiti ake a rawa; ao naake a rawa n anga aia kabaang a bon anaaki ma ni kabaeaki, ao aia bwaai ni buaka a bon anaaki mai irouia, ao a bon kairoroaki bwa a na mwananga ma tariia nakon te Aba ni Mari.

40 Ao ngkai mwaitia aia bure ake anaaki e bon raka iaon mwaitia ake a tiringaki, eng, nakon naba mwaitia ake a bon tiringaki man itera ake uoua.