1 Ao e koro bukina bwa a kateia taan tararua i aoia aia bure ake Reimwanaite, ao a kairoroia bwa a na waaki n tauniia aia mate, eng, ma aia mate naba Nibwaite ake a tiringaki; ao Moronaai e kateia mwaane i aoia bwa a na tararuaia i nanon aia tai ni karaoa aia beku.

2 Ao Moronaai e nakon te kaawa are Mureki ma Riaai, man taua taekan te kaawa ao e a manga angan Riaai. Ao ngkanne nooria, Riaai aei bon te mwaane are e a bon tia ni mena ma Moronaai n angiin ana bubuaka; ao bon te mwaane ae aekan Moronaai, ao a bon kukurei i marenaia n nooran aki kabuanibwaia; eng, ao a bon tangiriia, man tangiraki naba irouia ana botanaomata Nibwaai.

3 Ao e koro bukina bwa i mwin are a tia Reimwanaite n tauniia aia mate ma aia mate naba Nibwaite, a bon kamwanangaki n oki nakon te Aba ni Mari; ao Teaenikam, i aan ana kaetieti Moronaai, e tua bwa a na mwakuri ni kena te mwanono ni katobibia te aba, ke te kaawa are Te Mari.

4 Ao e karekea te anga are a na katea te kateitei ae te oo ae te kai iaon rabeen te mwanono; ao a kawaerakea te tano mai nanon te mwanono nako oin te kateitei are te oo ae te kai; ao a karekea te anga are a na mwakuri iai Reimwanaite ni karokoa ae a katobibia te kaawa are Te Mari n otabwaninia n oo aika matoatoa ae te kai ma te tano, ae rianako abwabwakina.

5 Ao te kaawa ae bubura aio e riki bwa te tabo ni kamanomano ae matoatoa man te tai anne ao n te kaawa aio a bon tararuaaki iai bure ake Reimwanaite; eng, i nanon te oo are a bon tuangiia bwa a na kateia n oin baia. Ngkai Moronaai e bon kairoroaki bwa e na karekea te anga are a na mwakuri Reimwanaite, kioina ngkai e bon beebete tararuakia ngkana a mwakuri; ao ngkana e tangiriia ana taanga ni buaka bwa a na ekii nakoia Reimwanaite.

6 Ao e koro bukina bwa Moronaai e a karekea te tokanikai iaon teuana aia taanga ni buaka Reimwanaite ae moan te korakora, ma ni karekea tauan te kaawa are Mureki, are bon teuana te tabo ni kamanomano ae matoatoa ibukiia Reimwanaite n te aba are Nibwaai; ao ngaia are e a tia naba ni katea te tabo ni kamanomano ibukin kawakinaia ana bure.

7 Ao e koro bukina bwa e a bon aki manga kataia ni buaka ma Reimwanaite n te ririki anne, ma e kabonganaia ana koraki bwa a na katauraoi nakon te buaka, eng, ao ni katei naba taabo ni katantan mai irouia Reimwanaite, eng, ma ni kamaiuia aia aaine ma natia man te rongo ao te karawawataki, ao ni karekea te amwarake ibukin aia taanga ni buaka.

8 Ao ngkai e koro bukina bwa aia taanga ni buaka Reimwanaite, ake i rarikin taari maeao, i maiaki, i nanon ana tai ni mwawa iai Moronaai ibukin te waaki ni kakaitara i bon i buakoia Nibwaite, are e a karika te kaiangatoa i marenaia, e a reke abaia Nibwaite tabeua irouia, eng, n te aro are e a reke tauan tabeua aia kaawa ni mwakoron te aba anne.

9 Ao ngaia are ibukin te buakaka i marenaia, eng, ibukin te kaiangatoa ma te waaki ni kakaitara i buakoia a bon mena n te aro ae moan te kakamaku.

10 Ao ngkai nooria, iai te bwai ae I kan taekinna ni kaineti ma ana aomata Amon, ake bon Reimwanaite, ngkoa; man ana mwakuri Amon ma tarina, ke man te mwaaka ao ana taeka te Atua, a bon tia n rairaki nakon te Uea; ao a bon tia n uotaki rikaaki nakon te aba are Taraemera, man te tai anne a tia ni kawakinaki irouia Nibwaite.

11 Ao ibukin aia berita ao a bon tukaki bwa a na aki tabeki bwaai ni buaka ni kaaitaraia tariia; bwa a bon tia ni karaoa te berita bwa a na aki manga kawawaea te raraa; ao ni kaineti ma aia berita a na bon mate; eng, a na bon kariaia bwa a na bwaka nako nanon baia tariia, ngke arona bwa akea te nanoanga ma te tangiria ae korakora are a kaotia Amon ma tariia nakoia.

12 Ao ibukin aio a bon kairaki nakon te aba are Taraemera; ao a bon tararuaki man te tai anne irouia Nibwaite.

13 Ma e koro bukina bwa ngke a noora te kakamaku, ma te karawawataki ae bati ma kangaanga ake a rinanona Nibwaite ibukiia, a bon onrake n te nanoanga ao a bon tangiria bwa a na tabeki bwaai ni buaka n tei ibukin abaia.

14 Ma nooria, ngke a nang tabeki aia bwaai ni buaka, a bon taonaki nako n ana kairoro Ereman ma tarina, ibukina bwa a nang bon urua te berita are a tia ni karaoia.

15 Ao Ereman e maaku bwa mwiina a urua ao a na bua tamneia; ngaia are ni kabane ake a karaoa te berita ae tabu aei a bon kairoroaki bwa a na nooria tariia n rinanon karawawatakia, n te aro ae rang kakamaku n te tai aei.

16 Ma nooria, e koro bukina bwa iai natia mwaane aika a mwaiti, ake a bon aki karaoa te berita ae tabu are a a na aki tabeki aia bwai ni buaka n tei bon ibukiia ni kaaitaraia aia kairiribai; ngaia are a bon ikoikotiia n te tai aei, ni kamwaitia ake a kona n tabeki bwaai ni buaka, ao a bon araniia bwa Nibwaite.

17 Ao a karaoa te berita ae tabu bwa a na buaka ibukin inaomataia Nibwaite, eng, bwa a na kawakina te aba ni kukurei ni mate ibukina; eng, ao a bon berita n ae tabu naba bwa a na bon aki anganako inaomataia, ma a na buaka n taai nako ni kawakinia Nibwaite ao man kawakinia man te tautoronaki.

18 Ao nooria, bon uangaa mwaitia ataeinimwaane aikai, ake a karaoa te berita ae tabu man anai aia bwai ni buaka bwa a na tei ibukin abaia.

19 Ao nooria ngkanne, ngkai a bon tia n riki mai mwaina bwa bwaai ni karawawata nakoia Nibwaite, a bon riki n te tai aei, bwa taan korakora aia boutokaa; bwa a bon anai aia bwai ni buaka, ao a tangiria bwa e na riki Ereman bwa aia tia kairiri.

20 Ao bon ataeinimwaane, ao a bon rang korakora aki mamakuia ibukin te ninikoriaia, ao te korakora naba ma te marurung; ma nooria bon tiaki ti aei—bwa bon mwaane aika a kokoaua n taai nako ni bwaai nako ake a onimakinaki iai.

21 Eng, bon mwaane aika a kokoaua man taua ma nanoia, bwa a bon tia n reireinaki bwa a na kaawakin ana tua te Atua man nakonako ma te eti i matana.

22 Ao e koro bukina bwa e mwananga Ereman ni kairia ana tautia aika uoua te ngaa rorobuaka n ataeinimwaane, bwa a na boutokaia aomata ake n tian te aba i maiaki i rarikin taari are i maeao.

23 Ao ikai are e a toki aia kauabwi ma waniua n ririki n tautaeka taan moti i aoia ana botanaomata Nibwaai.