1 Ngkai e koro bukina bwa ngke e a tia ni karekea te reta aio Moronaai ao e a bon korakora riki unna, ibukina bwa e bon kororaoi ana atatai Amoron n ataakin ana bure; eng, e ataia bwa Amoron e ataia ae e aki eti bukin kateirakeakin te buaka ibukin kaaitarakia ana botanaomata Nibwaai.

2 Ao e taku: Nooria, I rawa ni kaibibiti ara bure ma Amoron ma ti ngkana e katoki ana waaki ni kabane, n aron are I taekinna n au reta; bwa I aki kona n anganna bwa e na korakora riki nakon ae ngkai.

3 Nooria, I ataia bwa te tabo are a tararuaki iai au aomata ake a kairaki nako bwa bure irouia Reimwanaite; ao ngkai Amoron e rawa n anganai are I tangiria n au reta, nooria, N na anganna n aron au taeka; eng, N na ukoukora te mate i buakoia ni karokoa ae a bubuti reken te rau.

4 Ao ngkai e koro bukina bwa ngke e a tia n taekin bwaai aikai Moronaai, e karekea te anga are e na karaoaki te kakae, bwa tao e na kunea te mwaane ae kanoan Reimwan i buakoia.

5 Ao e koro bukina bwa e kunea temanna, ao arana bon Reimwan; ao bon ngaia temanna ma i buakoia ana toro te uea are e tiringaki iroun Amarakaai.

6 Ngkai Moronaai e karekea te anga are Reimwan ma raona tabeman a na nakoia taan tararuaia Nibwaite.

7 Ngkai Nibwaite a tararuaki n te kaawa are Kiite; ngaia are Moronaai e rinea Reimwan ma ni karekea te anga are e na iai tabeman raona ake a na iria.

8 Ao ngke e a tairiki Reimwan e nakoia taan tararuaia Nibwaite, ao nooria, a noora rokona ao a weteia; ma e taku nakoia: Tai maaku, nooria, Ngai bon te Reimwanaite. Nooria, ti biri nako mai irouia Nibwaite, ao a matu; ao nooria ti anai aia wain man uoti ma ngaira.

9 Ngkai ngke Reimwanaite aikai a ongo taeka aikai a bon butimwaea ma te kukurei; ao a taku nakoina: Anganiira am wain bwa ti na mooi; ti kukurei ngkai kam uota te wain bwa ti a bon kua.

10 Ma e taku Reimwan nakoia: Ti na kawakina te wain aei ni karokoa ae ti a nako ni buakaniia Nibwaite. Ma ana taeka aikai a bon kaingainga riki nanoia bwa a na tangiria ni kan mooi n te wain.

11 Bwa, a taku: Ti a bon kua, ngaia are ti na ana te wain, ao i mwin teutana te tai ao ti na karekea bwaunara te wain, are e na kakorakoraira ni kaaitaraia Nibwaite.

12 Ao e taku Reimwan nakoia: Kam kona ni karaoa ae kam tangiria.

13 Ao e koro bukina bwa a bon mooi n te wain ni karawataa; ao e bon kangkang irouia, ngaia are a bon karawataa riki mooia iai; ao e bon matoatoa, bwa e a tia ni karaoaki bwa e na matoatoa.

14 Ao e koro bukina bwa a bon mooi ao a kukurei, ao i mwin te tai ae aki maan ao a bon bane ni koro ni manging.

15 Ao ngkai ngke Reimwan ma ana koraki a nooria bwa a bon bane ni koro ni manging, ao a matu nako, a oki rikaaki nakon Moronaai man tuanga bwaai ni kabane ake a tia n riki.

16 Ao ngkai aio bon ana iango Moronaai. Ao Moronaai e a tia ni katauraoia ana koraki ma aia bwai ni buaka; ao e nako n te kaawa are Kiite, ngke a matu nako ma ni koro ni mangingin Reimwanaite, man teweia nako bwai ni buaka nakoia bure, n te aro are a banen reke aia bwai ni buaka.

17 Eng, aia aaine naba, ma natia, ma naake a kona ni kabonganai bwaai ni buaka, ao ngke e a tia ni karekei aia bwai ni buaka bure akekei Moronaai; ao a karaoaki bwaai aikai ni kabane i nanon te aki kakarongoa.

18 Ma ngke arona bwa a bon uti Reimwanaite, nooria a bon koro ni manging ao a na tia n tiringaki irouia Nibwaite.

19 Ma nooria, bon tiaki aio nanon Moronaai, bwa e bon aki kukurei n te tiriaomata ke kawawaean te raraa, ma e kukurei ni kawakinaia ana botanaomata man tiringakia; ao aio ibukina bwa e rawa n reke nakoina te motikitaeka ae aki motiraoi, ao e rawa ni bwaka i aoia Reimwanaite man tiringia i nanon aia tai ni koro ni manging.

20 Ma e a tia ni karekea te bwai are e tangiria; bwa e a tia ni karekei aia bwai ni buaka bure ake Nibwaite ake a mena i nanon oon te kaawa, ma n tia n anganiia te korakora bwa a na tauii mwakoro ake a mena i nanon te oo.

21 Ao e karekea te anga are mwaane ake raona a na kerikaaki teuana te raka ni wae mai irouia, ma n otabwaninia aia taanga ni buaka Reimwanaite.

22 Ngkai nooria e karaoaki aio n te tairiki, n te aro are ngke a uti Reimwanaite n te ingabong a nooria bwa a bon otabwaniniaki irouia Nibwaite ma itinaniku, ao bwa bure bon iai aia bwaai ni buaka.

23 Ao ngaia are ti nooria bwa e a reke korakoraia Nibwaite i aoia; ao a kunea bwa n te aro ae e bon aki riai bwa a na un ma Nibwaite; ngaia are mataniwia aia mataniwi e a tangiri aia bwai ni buaka, ao a uoti man tewenakoi i waeia Nibwaite, ma ni bubuti nanoangakia.

24 Ngkai nooria, bon aio are e tangiria Moronaai. E anaia bwa ana bure man te buaka, ma n taua te kaawa, ma n tua bwa ni kabane bure ake Nibwaite a na bane ni kainaomataki; ao a bon kaaina ana taanga ni buaka Moronaai, ao a bon kakorakora ana taanga ni buaka.

25 Ao e koro bukina bwa e tua bwa Reimwanaite ake a kairaki bwa bure, a na bon waaki ni mwakuri ni kamatoatoai mwakuri ni kamatoatoa ni katobibia te kaawa are Kiite.

26 Ao e koro bukina bwa ngke e a tia ni kamatoatoaki te kaawa ae Kiite, n aron are e tangiria, e tua bwa ana bure a na kairaki nakon te kaawa are Te Mari ao e tararua te kaawa anne ma te korakora ae rianako.

27 Ao e koro bukina bwa e ngae ngke a waaki ni kamwamwane Reimwanaite, a bon tauii ma ni kaawakin aia bure ni kabane ake a tia n anai, ma n tararuai taabo ni kabane ma bwaai ake a raka ake a tia ni manga anai.

28 Ao e koro bukina bwa a manga tokanikai riki Nibwaite, ma ni manga tangira inaomataia ma bwaai ni kabane ake a riai n reke irouia.

29 A mwaiti aia tai Reimwanaite ni kataia n otabwaninia n te bong, ma i nanon aia tai ni kataia ao a bon mwaiti aia bure ake a bon bua ma i buakoia.

30 Ao a mwaiti aia tai ni kataia n anganako aia wain nakoia Nibwaite, n te aro are ana tiringia ni bwai ni kamamate ke n te koro ni manging.

31 Ma nooria, a bon aki iremwe n uringa aia Uea ae Atuaia Nibwaite n te tai aei ae aia tai n rinanon te karawawataki. A bon aki kona ni mwane n aia bwai ni kamwane; eng, a bon aki kona ni mooi n aia wain, ma ti ngkana a bon anganiia moa tabemwaang bure ake Reimwanaite.

32 Ao ngaia are a bon rangi karaurau bwa a na akea te bwai ni kamamate ae e na kabutaki i buakoia; bwa ngkana aia wain e na kamamate nakon te Reimwanaite e na bon kamamate naba nakon te Nibwaite; ao ngaia are a katai moa aia mooi ni kabane.

33 Ao ngkai e koro bukina bwa e bon riai bwa Moronaai e na waaki ni katauraoi n ninianako te kaawa are Morianton; bwa nooria, a bon tia Reimwanaite man aia beku korakora ni kamatoatoa te kaawa are Morianton ni karokoa ae riki bwa te tabo ni katantan ae rianako matoatoana.

34 Ao a aki toki n uotia taanga ni buaka aika a boou nakon te kaawa anne, n ikotaki ma bwaunaia aika a boou ni bwaai ake a kainnanoi.

35 Ao ikai are e a toki iai aia kauabwi ma ruaiwa n ririki n tautaeka taan moti i aoia ana botanaomata Nibwaai.