1 Ao ngkai e koro bukina bwa I karekea te reta mai iroun Amoron, te uea, are e taekinna iai bwa ngkana I kainaomataia bure ake man te buaka are ti a tia n anai ao e na anga te kaawa are Anetebwara nakoira.

2 Ma I kanakoa te reta nakon te uea, bwa ti kakoaua bwa e tau korakoraia ara taanga ni buaka n anaa te kaawa are Anetebwara; ao ngkana ti kainaomataia bure ibukin te kaawa anne ao ti taku bwa bon baaba ngaira, ao ti bon ti kona ni kainaomataia ara bure ngkana ti kaibibitia ma Nibwaite ake a kabureaki.

3 Ao Amoron e rawa n au reta, bwa e rawa ni kaibibiti bure; ngaia are ti a waaki ni katauraoi bwa ti na kaitaraa te kaawa are Anetebwara.

4 Ma kaain Anetebwara a bon kitana te kaawa, ma ni biri nako nakon kaawa ake a bubura riki tabeua, ake bon aia bwaai, bwa a na kamatoatoai; are ngaia are te kaawa are Anetebwara e a reke i nanon baira.

5 Ao ikai are e a toki iai aia kauabwi ma waniua n ririki n tautaeka taan moti.

6 Ao e koro bukina bwa ni moan waakin te kauabwi ma ruaiwa n ririki, ao ti a karekea bwaunara ni bwaai ake ti kainnanoi, ao kamwaitan riki ara taanga ni buaka, man te aba are Taraemera, ao man aaba ake a uakaan, nakon te mwaiti ae onoua te ngaa mwaane, irarikiia natia mwaane Amonaite ake a roko n raonia tariia, are au koraki are uangaa. Ao nooria, ti bon korakora, eng, ao a bon mwaiti ara bwai ake ti kainnanoi ake ti a uoti mangaira.

7 Ao e koro bukina bwa bon nanora bwa ti na kateirakea te buaka ma te taanga ni buaka are e katukaki bwa a na kawakina te kaawa are Kumeni

8 Ao ngkai nooria, N na kaotia nakoim bwa e bon koro bukin are ti tangiria; eng, n ara taanga ni buaka ae korakora, ke ni mwakoron ara taanga ni buaka ae korakora, ao ti bon otabwaninia te kaawa are Kumeni n te bong, teutana i mwaain are a na karekei bwaai ake a kainnanoi.

9 Ao e koro bukina bwa ti bon tiku n otabwaninia te kaawa i nanon tairiki aika a bati; ma ti bon matu ma ara kabaang, man taratara, bwa a na aki roko Reimwanaite nakoira n te tairiki n tiringira, bwa e mwaiti aia tai ni kata aei; ma ni mwaitin te tai are a kata aei ao e bon bwaro raraaia.

10 E aki maan ao a roko bwaai ake a kainnanoi, ao a nang rin n te kaawa n te tairiki. Ao a kuba bwa ai tiaki Reimwanaite ma ai ngaira Nibwaite; ngaia are, ti bon anaia ma aia bwaai ake a kainnanoi.

11 Ao e ngae ngke Reimwanaite a bon kamaenakoaki ma ni bwaai ake a boutokaaki iai n te aro aei, a bon matoatoa naba nanoia bwa a na taua te kaawa; ngaia are e bon riai bwa ti na uoti bwaai ake a kainnanoi ma ni kanakoi nako Iutea, ao ara bure nakon te aba are Taraemera.

12 Ao e koro bukina bwa e aki bati te bong i mwina ao Reimwanaite a moanna ni bwara nanoia n te ibuobuoki; ngaia are a anganako te kaawa nako nanon baira; ao ngaia are e a koro bukin ara babaire ibukin karekean te kaawa are Kumeni.

13 Ao e koro bukina bwa e korakora mwaitia ara bure, n te aro are e ngae ngke e rang korakora mwaitira, ti a bon kairoroaki bwa ti na kabonganaia ara taanga ni buaka ni kabane ni kawakinia ke ti na tiringia.

14 Bwa nooria, a bon otinako ni mwaiti, ma ni buaka n taian atibu, ma ambo, ma te bwai are e kona n reke i baia, n te aro are ti tiringia nakon uangaa mwaitia i mwin are a taenikai nakoira bwa ara bure man te buaka.

15 Ngaia are e bon riai ibukira, bwa ti na katoka maiuia, ke ti na tararuaia, ma te kabaang i baira; nakon te aba are Taraemera; ao I rarikin anne e bon ti tau bwaai ake ti kainnanoi ibukiia ara botanaomata, e ngae ngke iai are ti anaia mai irouia Reimwanaite.

16 Ao ngkai, n taai ni kaangaanga aikai, ao bon te bwai ae kakawaki bwa ti na iangoa aroia ara bure man te buaka aikai; ma e ngae n anne, ti bon motikia bwa ti na kanakoia nakon te aba are Taraemera; ngaia are ti rinea mwakoron ara koraki, ma n anganiia te tautaeka i aoia ara bure bwa a na nakon te aba are Taraemera.

17 Ma e koro bukina bwa n te ingabong a bon okirikaki. Ao ngkanne nooria, ti bon aki titirakinia ibukiia bure; bwa nooria, a bon roko Reimwanaite i aora, ao a bon oki bwa a na kamaiuira bwa ti na aki bwaka nako nanon baia. Bwa nooria, Amoron e a bon tia ni kanakoa bwa boutokaakiia bwaunaia ae boou ni bwaai aika a kainnanoi ma te taanga ni buaka ae mwaiti.

18 Ao e koro bukina bwa mwaane ake ti kanakoia ma bure a bon okirikaki n tuoia, kioina ngkai a nang tokanikai i aora.

19 Ma nooria, au koraki ake uangaa ma onongaun a bon kakorakoraia ni buaka; eng, a bon matoatoa i mataia Reimwanaite, ma n tiringia ni kabane ake a kaaitaraia.

20 Ao ngke nikiraia ara taanga ni buaka a nang moanna ni kerikaaki mai mataia Reimwanaite, nooria, naake uangaa ma onongaun a bon tei ni matoatoa ma n aki bwarannano.

21 Eng, ao a bon ongeaba ma ni karaoi raoi nanon taeka ni kairiri ni kabane; eng, ao e bon karaoaki nakoia n aron aia onimaki; ao I bon uring taeka ake a taekin nakoiu are a reireinaki irouia tinaia.

22 Ao ngkai nooria, bwa bon natiu mwaane aikai, ma mwaane ake a bon tia n rineaki bwa a na kairia bure, ake a reke irouia te tokanikai ae korakora aei; bwa bon ngaia ake a konaia Reimwanaite; ngaia are a bon kakioaki n oki nakon te kaawa are Maentaai.

23 Ao ti kaoka ara kaawa are Kumeni, ao ti aki bane n tiringaki n te kabaang, ma e ngae n anne, a bon mwaiti ara koraki ake a bua.

24 Ao e koro bukina bwa i mwin are a biri nako Reimwanaite, I anga naba ngkekei te kaetieti bwa au koraki ake a ikoaki a na anaaki mai buakoia ake a mate, man tua bwa a na karaoaki ikoakiia.

25 Ao e koro bukina bwa uabubua, mai buakoia au koraki ake uanga ma onongaun, ake a tong ibukin buan raraaia; ma e ngae n anne, ibukin raoiroin te Atua, ao ti a bon rangi ni miimi, ao a bon kimwareirei naba ara taanga ni buaka ae bwanin, bwa bon akea naba temanna mai i buakoia ae bua maiuna; eng, ao bon akea naba temanna mai i buakoia ae e aki mwaiti ikoakina.

26 Ao ngkai, kawakinan maiuia bon te bwai ae rangi ni kamiimi nakon ara taanga ni buaka ae bwanin, eng, bwa a bon kamaiuaki ao iai te ngaa ma i buakoia tarira ake a tiringaki. Ao ti bon bukinna bwa e riki man mwaakan te Atua ae kamimi, ibukin korakoran aia onimaki n te bwai are a tia n reireinaki bwa a na kakoaua—bwa iai te Atua ae momotiraoi, ao anne e aki nanokokoraki, ao a na bon kawakinaki ni mwaakana ae moan te kamimi.

27 Ngkai aio aron aia onimaki naake I a tia n taekinia; a bon ataei, ao a matoatoa aia iango, ao a bon aki toki n onimakina te Atua.

28 Ao ngkanne e koro bukina bwa i mwina are ti a tia n tabeakinia ara koraki ake a ikoaki, man tauniia ara mate ma aia mate naba Reimwanaite, are a bon mwaiti, nooria, ti bon titirakina Kite aroia bure are a bon waaki mangaia nakon te aba are Taraemera.

29 Ao ngkai Kite bon mataniwia mataniwi i aoia te koraki ake a rineaki bwa a na tararuaia ni mwanangaia nakon te aba.

30 Ao ngkai, aikai taeka ake e taekin Kite nakoiu: Nooria, ti bon waaki rikaaki nakon te aba are Taraemera ma ara bure. Ao e koro bukina bwa ti kaitibo ma taan kareke rongorongo man ara taanga ni buaka, ake a bon kanakoaki bwa a na taratara aia tabo n tiku Reimwanaite.

31 Ao a takarua nakoira ni kangai—Nooria, a mwananga aia taanga ni buaka Reimwanaite nakon te kaawa are Kumeni; ao nooria, a na roko i aoia, eng, ma n tiringia ara botanaomata.

32 Ao e koro bukina bwa ara bure a bon ongo aia takarua, are e a karika ninikoriaia; ao a teirake ni kaaitaraira.

33 Ao e koro bukina bwa ibukin aia kaitara ao tia kariaia bwa ti na tiringia n ara kabaang. Ao e koro bukina bwa a biri ni mwaiti ni kaitarai ara kabaang, n te aro are, a mwaiti riki mai i buakoia ake a tiringaki; ao nikiraia a bon otinako mai i buakora ma ni biri nako mai iroura.

34 Ao nooria, ngke a tia ni biri nako ao ti a bon aki kona ni karekeia, ti bon mwananga ma te kawaekoa nakon te kaawa are Kumeni; ao nooria, ti bon roko n te tai are ti na kona ni buokiia tarira ni kawakina ara kaawa.

35 Ao nooria, ti a manga kainaomataki riki mai nanon baia ara kairiribai. Ao e na kakabwaiaki aran Atuara; bwa nooria, bon ngaia are e kainaomataira; eng, are e karaoa te bwai ae korakora aio ibukira.

36 Ngkai e koro bukina bwa ngke Ngai, Ereman, e a tia n ongo ana taeka Kite aikai, I a bon onrake n te kimwareirei ae bati ibukin raoiroin te Atua ni kawakinira, bwa ti aonga n aki mate; eng, I onimakinna bwa tamneia ake a tia n tiringaki a bon tia n rin i nanon raun Atuaia.