1 Hwɛ m’enuanom adɔfo, hom nhwɛ dɛ wɔama mo kwan dɛ me mbra hom nkyɛn, dɛm ntsi mobɔbɔ mbɔdzen makasa akyerɛ hom wɔ me kasaa mu; nyew, obefi mankasa m’anomu, hom ehu dɛ iyi nye aber a odzi kan a makasa akyerɛ hom ma hom aatse m’anomukasa, medze me mber nyina tsenaa atsɛmbu egua no do, na ɔnam dɛ m’edwuma dɔɔ sõ so ntsi ɔamma menntum ammba hom nkyɛn.

2 Na nkyɛ murunntum mpo mmba dɛm aber yi mu sɛ nnyɛ dɛ wɔdze atsɛmbu egua no ama obi dɛ ɔnhyɛ m’ananmu a; na ɔnam Ewuradze n’ehumbɔbɔr do na ɔama me kwan dɛ membra hom nkyɛn.

3 Na hwɛ, medze enyidado kɛse na pɛ na medze aba robɔhwɛ dɛ hom abrɛ homho adze wɔ Nyankopɔn enyim, na dɛ hom kɔ do kotoserɛ n’adom, ama meehu dɛ hom nndzi fɔ biara wɔ n’enyim, ama meehu dɛ hom nngye kyim dɛ mbrɛ hɛn enuanom a wɔwɔ Zarahemla no nna wɔyɛ no.

4 Mbom nhyira nka Nyankopɔn ne ndzin, dɛ ɔama mehu, nyew, ɔama menya enyigye mbordo dɛ mobohu dɛ ɔama woetsim bio wɔ ne tsenenee kwan no mu.

5 Na Nyankopɔn no Sunsum a ɔwɔ mo mu no ma megye dzi dɛ mibenya enyigye wɔ hom so homho; na mammpɛ dɛ mobodua amandzehu pii mu na medzi yaw ansaana medzi dɛw wɔ homho dɛ mbrɛ minyaa wɔ enuanom a wɔwɔ Zarahemla ho no, na hwɛ, muduaa amandzehu na awerɛhow mu ansaana mirinya enyigye wɔ hɔn ho.

6 Mbom hwɛ, megye dzi dɛ hom nnyɛ ekyingyefo pii dɛ hom enuanom no; megye dzi dɛ hom mma ahantanyɛ nnhyɛ hom akoma mu; nyew, megye dzi dɛ hom mmfaa hom akoma nntaa wiadze mu ahonya nye egyangyandze do; nyew, megye dzi dɛ hom nnsom abosom, na mbom hom som nokwar na tseasefo Nyankopɔn no, na dɛ hom dze daapem gyedzi rohwɛ hom bɔnfakyɛ a ɔbɛba no kwan.

7 Na hwɛ, mese hom dɛ ndzɛmba pii bɛba; na hwɛ, adze kor na noho hia kyɛn ne nyinara—na hwɛ, mber no nnyi ekyir koraa, na Ɔpomfo tseasefo no bɛba abɛtsena no nkorɔfo mu.

8 Hwɛ, mennka dɛ ɔdze ne nyimpadua no bɛba abɛtsena hɛn mu dɛm mber no mu; na hwɛ, Sunsum no annse me dɛ ɔtse dɛm. Afei ɔfa dɛm adze yi ho no minnyim; na mbom ɔfa iyi dze minyim dɛ, Ewuradze Nyankopɔn wɔ tum dɛ ɔyɛ ndzɛmba nyinara dɛ mbrɛ n’asɛm se.

9 Mbom hwɛ, Sunsum no akã iyi akyerɛ me dɛ: Tsẽa mu kã kyerɛ dɔm yi dɛ—Hom nnu homho na hom nsiesie Ewuradze no kwan mu, na hom nnantsew n’akwan a ɔtsen no mu; na hwɛ, sor ahenman no abɛn, na Nyankopɔn ne Ba no reba asaase enyi do.

10 Na hwɛ, Mary na ɔbɔwo no, wɔ Jerusalem mantam a ɔyɛ hɛn egyanom asaase no do, ɔno na ɔyɛ ɔbaabun soronko, a ɔasan mu eyi no, nyia Sunsum Krɔnkrɔn no tum bɛhyɛ no do ma oenyinsen, na ɔawo babanyin, nyew, Nyankopɔn ne Ba no mpo.

11 Na obefir edzi, ɔatse yaw na oehu amandze na obenya nsɔhwɛ ahorow biara bi; na iyi bɛma asɛm no aahyɛ mã, dza ɔkã dɛ, na ɔbɛfa no nkorɔfo hɔn yaw nye yarba ato noho do.

12 Na ɔbɛfa owu ato no do, ama oesiansian owu mpokyerɛ a ɔkyekyer no nkorɔfo no, na ɔbɛfa hɔn mberɛwyɛ ato no do, ama ehumbɔbɔr aahyɛ n’abadaa mã dɛ mbrɛ ɔtse wɔ honam mu, ama ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse no.

13 Na Sunsum no nyim ndzɛmba nyina; naaso Nyankopɔn ne Ba no bohu amandze wɔ honam mu ama ɔaafa no nkorɔfo hɔn bɔn ato no do, ama ɔnam no nkwagye tum no do aapepa hɔn mbrato; na afei hwɛ, iyi nye dasegye a ɔwɔ mo mu.

14 Afei mese hom dɛ hom nnu homho, na wɔnwo hom fofor; osiandɛ Sunsum no se, sɛ wɔannwo hom fofor a hom runntum nnya sor ahenman no; dɛm ntsi hom mbra ma wonuma hom nkɔ nnuho mu, ama wɔaahohor hom ho efi hom bɔn mu, ama hom eenya gyedzi wɔ Nyame n’Eguambaa no a oyi wiadze bɔn kɔ no mu, nyia ɔwɔ tum a ɔdze gye nkwa na ɔtsew adze nyinara a no ho nntsew ho no.

15 Nyew, mese hom dɛ hom mbra na mma hom nnsuro, na hom nyi bɔn biara a ɔnnkyɛr na wɔatõtõ hom no akwa, dza ɔkyekyer hom to hɔ ma ɔsɛɛ hom, nyew, hom mbra na hom nkeyi homho nkyerɛ Nyankopɔn dɛ hom apen do dɛ hom bonu homho efi hom bɔn ho na hom nye no edzi ahyɛmu dɛ hom bedzi ne mbrasɛm do, dɛ hom bɔkɔ enuma esu mu dze agye dase ama no ndɛ da yi.

16 Na obiara a ɔyɛ iyi na obedzi Nyankopɔn ne mbrasɛm do ofi ndɛ dze kɔ no, ɔnoara kor so bɛkaa dɛ mese dɛm nyimpa no, nyew, mese no dɛ, obenya onnyiewiei nkwa, dɛ mbrɛ Sunsum Krɔnkrɔn ne dasegye tse, dza ɔgye ho dase wɔ mo mu no.

17 Na afei m’enuanom adɔfo, ana hom gye dɛm ndzɛmba yinom dzi? Hwɛ, mese hom dɛ minyim dɛ hom gye dzi; na Sunsum a ɔwɔ mo mu no na ɔda no edzi ma muhu dɛ hom gye dzi. Na afei osiandɛ hom gyedzi a ɔwɔ mu no yɛ dzen ntsi, nyew, wɔ ne ndzɛmba a makã no ho ntsi midzi dɛw mbordo.

18 Na dɛ mbrɛ ahyɛse no mekãa kyerɛɛ hom, dɛ memmpɛ dɛ hom behihim dɛ mbrɛ hom enuanom no yɛe no ntsi, mehu dɛ m’ebisadze ayɛ hɔ.

19 Osiandɛ muhu hom dɛ hom nam tsenenee akwan do; muhu hom dɛ hom nam kwan a ɔdze hom bɔkɔ Nyankopɔn n’ahenman mu no do; nyew, muhu hom dɛ hom retsentsen n’akwan.

20 Muhu dɛ n’asɛm gye dase ma hom hu dɛ, orunntum nnantsew akwan akyewakyew do; anaadɛ ɔnnsakyer dza ɔakã; anaaso dɛ ɔnndan mmfi nyimfa nnkɔ bankum, anaadɛ ommfi dza oye ho nnkɔ dza omuo ho; dɛm ntsi, n’akwan yɛ kor na ɔkɔ aprɔw onnyiewiei.

21 Na ɔnntsena temple a no mu nntsew mu; anaa efĩfĩdze anaa biribiara a no ho nntsew no wɔrenngye no wɔ Nyankopɔn n’ahenman mu hɔ; dɛm ntsi mese hom dɛ mber bɛba, nyew, na ɔbɛyɛ da a odzi ewiei, a nyia ɔyɛ fĩ no bɛda ho atsena n’efĩfĩdze mu.

22 Na afei m’enuanom adɔfo, makã dɛm nsɛm yinom akyerɛ hom dze ekenyan hom ma hom akaa hom dwuma a ɔsɛ dɛ hom dzi dze ma Nyankopɔn, ama hom aanantsew a fɔdzi biara nnyi hom ho wɔ n’enyim, ama hom aanantsew Nyame ne nhyehyɛɛ krɔnkrɔn no a wɔagye hom ato mu no do.

23 Na afei mepɛ dɛ hom brɛ hom ho adze, na hom yɛ setsie na botoo; hom yɛ asomberɛw; hom ma abotar nye penkyɛr hyɛ hom mã; hom to hom bo ase wɔ adze nyinara mu; hom mia homho dzi Nyankopɔn ne mbrasɛm do mber nyina; hom bisa dza hom hia, wɔ sunsum nye honam afamu nyina; na aber nyinara hom mfa ndaase mma Nyankopɔn wɔ biribiara a hom benya ho.

24 Na hom nhwɛ nnya gyedzi, eyidado, na ayamuyie; na afei no ndwuma pa bɛhyɛ hom mã daa.

25 Na Ewuradze nhyira hom, na ɔnhwɛ ma nkekãa biara mmba hom ntar mu, ama ewiei no wɔnye hom aabɛkã Abraham, Isaac, na Jacob, nye nkɔnhyɛfo krɔnkrɔn no a ofitsi wiadze ahyɛse wɔaba no ho, na hom ntar a nkekãa biara nnyi mu dɛ hɔn so hɔn ntar so nkekãa biara nnyi mu no, ama hom nye hɔn aabɔmu atsena sor ahenman no mu a hom rimmfi edzi bio.

26 Na afei m’enuanom adɔfo, Sunsum no a ɔgye dase wɔ mo mu no do na menam kã dɛm nsɛm yi kyerɛ hom; na me kra dzi dɛw kɛse osiandɛ hom agye m’asɛm no ato mu enyiber do.

27 Na afei, Nyame n’asomdwee mbra hom nye hom efiefi na nsaase, nye hom nguankuw na anantwikuw, nye dza hom wɔ nyina, nye hom mbaa nye mba banyin nyinara do, dɛ mbrɛ hom gyedzi na ndwuma pa tse, ofi aber yi dze kɛpem afebɔɔ. Na dɛm na mese. Amen.