1 Tala bandeko balingami na ngai, komonaka ete nazwi ndingisa mpo na koya epayi na bino, boye nakomeka kolobela bino na lokota na ngai; iyo, na monoko na ngai moko, komonaka ete ezali mbala ya yambo nalobeli bino na maloba ya monoko na ngai, mpo nakangamaki mobimba na kiti ya bosambisi, mpe nazalaki na mikumba mike ete nakokaki koya epayi na bino te.

2 Mpe kutu nakokaki te koya sikawa na ntango oyo soki ezalaki te ete kiti ya bosambisi epesamaki na mosusu, mpo na koyangela na esika na ngai; mpe Nkolo na boboto mingi andimaki ete naya epayi na bino.

3 Mpe tala, nayei kozalaka na elikya monene mpe mposa mingi ete nakuta ete bino bomikitisaki liboso ya Nzambe, mpe ete bokobaki na kobondelaka ngolu na ye, ete nakuta ete bozalaki bato bazangi mpamela liboso na ye, ete nakuta ete bozalaki na kokoso kokoso ya boponi oyo bandeko na bino bazalaki na yango na Zalayemila.

4 Kasi nkombo ya Nzambe epambolama, ete apesi ngai nzela ya koyeba, iyo, apesaki ngai bosepeli monene koleka ya koyebaka ete batiami lisusu na nzela ya bosembo.

5 Mpe natie motema ete, engebene na Molimo ya Nzambe oyo azali na ngai, ete nakozala na bosepeli likolo na bino; nzokande nazali na mposa te ete bosepeli na ngai likolo na bino eya na ntina ya mitungisi mpe mawa mingi oyo nazwi mpo na bandeko ya Zalayemila, mpo tala, bosepeli na ngai eyaki likolo na bango nsima ya kotambolaka na nzela ya motungisi mpe mawa mingi.

6 Kasi tala, natie motema ete bozali te na ezaleli ya bozangi boyambi mingi lokola ezalaki bandeko na bino; natie motema ete botombwami te na lolendo ya mitema na bino; iyo, natie motema ete botie te mitema na bino likolo ya bozwi mpe biloko ya mpamba mpamba ya mokili; iyo, natie motema ete bokumbameli banzambe ya bikeko te, kasi bokumbamelaka Nzambe ya solo mpe ya bomoi, mpe ete bozelaka bolimbisi ya masumu na bino, elongo na bondimi ya libela, boye esengeli koya.

7 Mpo tala, nalobi epayi na bino ezali na makambo mingi oyo koya; mpe tala, ezali na likambo moko oyo ezali na motuya mingi koleka yango nyonso—mpo tala, ntango ezali mosika mpenza te oyo Mosikoli azala mpe aya na kati ya bato na ye.

8 Tala, nalobi te ete akoya na kati na biso na ntango oyo akofanda na tabelenakele ya kufa; mpo tala, Molimo alobi te epayi na ngai ete ekozala bongo. Sikawa mpo na oyo etali likambo oyo nayebi te; kasi oyo nayebi mingi, ete Nkolo Nzambe azali na nguya ya kosala makambo nyonso oyo ezali engebene na liloba na ye.

9 Kasi tala, Molimo molobeli ngai likambo oyo mingi: Belela epayi ya bato oyo, kolobaka—Boyambola, mpe bolengela nzela ya Nkolo, mpe botambola na banzela na ye, oyo ezali semba; mpo tala, bokonzi ya lola ezali penepene, mpe Mwana ya Nzambe akoya likolo ya etando ya mabele.

10 Mpe tala, akobotama na Malia, na Yelusaleme oyo ezali mboka ya batata na biso ya kala, mpe akozala moseka, sani ya motuya mpe eponama, oyo akozipama na elili mpe akozwa zemi na nguya ya Molimo Mosantu, mpe akobota mwana mobali moko, iyo, kutu Mwana ya Nzambe.

11 Mpe akokende, koyokaka mpasi ya bolozi mpe mitungisi mpe masenginia ya ndenge na ndenge; mpe oyo ete liloba ekoka kokokisama oyo elobi ete akokamata likolo na ye bolozi mpe bokono ya bato na ye.

12 Mpe akokamata likolo na ye liwa, ete akoka kofungola singa liwa oyo ezali kokanga bato na ye; mpe akokamata likolo na ye bokono na bango, ete nsopo na ye ekoka kotonda na boboto, engebene na mosuni, ete akoka koyeba engebene na mosuni lolenge boni kosalisa bato na ye engebene na bokono na bango.

13 Sikawa Molimo moyebi makambo nyonso; nzokande Mwana ya Nzambe akoyoka mpasi engebene na mosuni ete akoka kokamata likolo na ye masumu ya bato na ye, ete akoka kolongola bobuki mobeko na bango engebene na nguya ya bokangoli na ye; mpe sikawa tala, oyo ezali litatoli oyo ezali na ngai.

14 Sikawa nazali koloba epayi na bino ete bosengeli koyambola, mpe kobotama lisusu; mpo Molimo alobi soki bobotami lisusu te bokoki kosangola libula ya bokonzi ya lola te; boye boya mpe bobatisama mpo na boyamboli, ete bosukwama uta na masumu na bino, ete bokoka kozala na bondimi epayi na Mwana ya mpate ya Nzambe, oyo alongolaka masumu ya mokili, oyo azali na nguya mpo na kobikisa mpe kopetola uta na bozangi bosembo nyonso.

15 Iyo, nalobi epayi na bino ete boya mpe bobanga te, mpe botika mpembeni masumu nyonso, oyo ezali kotungisa bino na bopete, oyo ezali kokanga bino na nse mpo na bokufi, iyo, boya, mpe bokende liboso mpe bomilakisa epayi ya Nzambe na bino ete bolingi koyambola masumu na bino mpe kokota kati na bondeko ya liyokani elongo na ye mpo na kobatela mitindo na ye, mpe kotatola yango epayi na ye mokolo oyo na kokendaka kati na mai ya libatisi.

16 Mpe moto nyonso oyo asali oyo, mpe abombi mitindo ya Nzambe uta sikawa kokende liboso, se ye moko wana akomikundola nini nalobaki epayi na ye, iyo, akomikundola ete nalobaki na ye, akozwa bomoi ya seko, engebene na litatoli ya Molimo Mosantu, oyo atatoli na ngai.

17 Mpe sikawa bandeko balingami na ngai, ezali bino kondima makambo oyo? Tala, nalobi epayi na bino, iyo, nayebi ete bondimi yango; mpe nzela oyo nayebi ete bondimi yango ezali na limonisi ya Molimo oyo azali na ngai. Mpe sikawa lokola bondimi na bino ezali makasi mpo na oyo etali likambo oyo wana, iyo, mpo na oyo etali makambo oyo nalobaki, monene ezali bosepeli na ngai.

18 Mpo lokola nalobaki epayi na bino uta na ebandeli, ete nazalaki na mposa mingi ete bozalaki te na ezaleli ya kokoso ya boponi lokola bandeko na bino, kutu boye namoni ete mposa na ngai esepelisami.

19 Mpo namoni ete bozali na banzela ya bosembo; namoni ete bozali na nzela oyo ememaka na bokonzi ya Nzambe; iyo, namoni ete bozali kosembola banzela na ye.

20 Namoni ete eyebisamaki epayi na bino, na nzela ya litatoli ya liloba na ye, ete akoki kotambola na banzela ya nioka nioka te; mpe abongwanaka te uta na oyo wana alobaki; mpe abongwanaka soki moke te ezala na loboko ya mobali soki te na loboko ya mwasi, soki te uta na oyo wana ezali sembo mpo na oyo wana ezali mabe; boye, botamboli na ye ezali zunguluke ya seko.

21 Mpe afandaka te na batempelo ezanga bosantu; mpe bosoto to eloko nyonso ya mbindo ekoki koyambama kati na bokonzi ya Nzambe te; boye nalobi epayi na bino ete ntango ekoya, iyo, mpe ekozala na mokolo ya nsuka, ete ye oyo azali na bosoto akotikala na bosoto na ye.

22 Mpe sikawa bandeko balingami na ngai, nalobaki makambo oyo epayi na bino ete nakoka kolamusa bino na koyokaka malamu na motema mpo na mosala na bino na Nzambe, ete bokoka kotambola na kozangaka mpamela liboso na ye, ete bokoka kotambola engebene na molongo mosantu ya Nzambe, engebene na oyo boyambamaki.

23 Mpe sikawa nalingi ete bozala bato na bomikitisi, mpe bato na botosi mpe boboto; petepete mpo na koyokela mosusu; botonda na bompikiliki mpe motema molai; kozalaka na montei na makambo nyonso; kozalaka na molende na kobombaka mitindo ya Nzambe ntango nyonso; kosengaka mpo na biloko nyonso kani oyo bozali na yango mposa, ezala ya molimo mpe ya ntango; ntango nyonso kozongisaka matondi epayi ya Nzambe mpo na biloko nyonso kani bozwi.

24 Mpe mona ete bozali na bondimi, elikya, mpe bolingani, mpe soki bongo botonda ntango nyonso na misala malamu.

25 Mpe tika ete Nkolo apambola bino, mpe abomba bilamba na bino na mbindo te ete bokoka na nsuka komemama mpo na kofanda elongo na Abalayama, Yisaka, mpe Yakobo, mpe baprofeta basantu baoyo bazalaki uta mokili ebanda, kobatelaka bilamba na bino ete ezala mbindo te kutu lokola bilamba na bango ezali mbindo te, kati na bokonzi ya lola mpo na kobima libanda lisusu te.

26 Mpe sikawa bandeko balingami na ngai, nalobi maloba oyo epayi na bino engebene na Molimo oyo azali kotatola na ngai; mpe molimo na ngai mosepeli mingi koleka mpenza, na ntina ya molende koleka mpe bokebi boye bopesi epayi na liloba na ngai.

27 Mpe sikawa, tika ete kimia ya Nzambe ezala na bino, mpe na bandako mpe bamboka na bino, mpe likolo ya bibwele mpe bitonga na bino, mpe nyonso oyo bozali na yango, basi mpe bana na bino, engebene na bondimi mpe misala malamu na bino, uta na ntango oyo mpe libela. Mpe boye nalobi. Amene.