1 I nooria tariu aika kam tangiraki, n nooran ae I a tia ni kariaiakaki bwa N na kawaringkami, mangaia ae I kataia n taetae nakoimi n oin au taetae; eng, n oin wiiu, n nooran ae ai tibwa au moan tai ae I a tia n taetae nakoimi n taeka mai wiiu, bwa I a tia ni kabanea au tai n te kaintekateka ni motikitaeka, ao kioina ngke e tiraua tabeu ngaia are I aki kona n roko iroumi.

2 Ao N na bon aki kona naba n roko n te tai aei ngke arona bwa e aki kanakoaki te kaintekateka ni motikitaeka nakon temanna, bwa e na tautaeka n onea mwiiu; ao te Uea n ana nanoanga ae bati e a tia ni kariaia bwa N na roko iroumi.

3 Ao nooria, I a roko ma au kantaninga aika a korakora ao te nano ae bati bwa N na kunea bwa kam a tia n nanorinano i matan te Atua, ao bwa kam waaki nako ni butiia ana akoi, ao bwa N na kunea bwa akea ami bure i matana, ao bwa N na kunea bwa kam aki mena n te kaangaanga n aroia tarira ake i Taraemera.

4 Ma e na kakabwaiaki aran te Atua, bwa e a tia n anganai bwa N na ataia, eng, e a tia n anganai te kimwareirei ae korakora bwa N na ataia bwa a tia ni manga kateaki ni kawain ana raoiroi.

5 Ao I onimaki n aron tamnein te Atua are irou, bwa N na manga kimwareirei naba ibukimi; ma e ngae n anne I aki tangiria bwa kimwareireiu ibukimi e na roko man te karawawataki ao te nanokawaki ae bati n aron are I a tia ni karekea ibukiia tarira ake i Taraemera, bwa nooria, kimwareireiu e reke ibukiia i mwin te rinanon te karawawataki ao te nanokawaki ae bati.

6 Ma nooria, I onimakinna bwa kam aki mena n te aro n aki kakoaua n aroia tarimi; I onimakinna bwa kam aki tabekakirake ni kainikatongan nanomi; eng, I onimakinna bwa kam tuai ni katikui nanomi iaon kaubwain ao bwain te aonaba ae akea manenaia, eng, I onimakinna bwa kam aki taromauri bouananti, ma kam taromauria te Atua ae koaua ao e maiu, ao kam kariaria kamaunan ami bure, ma te onimaki ae aki totoki, are e na roko.

7 Bwa nooria, I taku nakoimi bwa e na tiraua te bwai ae e na roko; ao nooria, iai te bwai teuana are e raka kakawakina nakoia ni kabane—bwa nooria, e aki raroa te tai are te Tia Kaboko e na roko i buakoia ana aomata.

8 Nooria, I aki taku bwa e na roko i buakora n ana tai ni maiu n rabwatana; bwa nooria, e tuai n tuangai te Tamnei bwa e na bon aio arona. Ngkai ni kaineti ma te bwai aio I aki ataia; ma I ti ataa aio, bwa te Uea ae te Atua iai mwaakana ni karaoi bwaai ni kabane are e kaineti ma ana taeka.

9 Bwa nooria, e a tia n taekina aio te Tamnei nakoiu, ni kangai: Tang nakoia te botanaomata aio, ni kangai—Rairinanomi, ao katauraoa kawain te Uea, ao nakonako ni kawaina, ake a eti; bwa nooria, e a kaan uean karawa, ao natin te Atua e na roko iaon te aonaba.

10 Ao nooria, e na bungiaki iroun Maria, i rarikin Ierutarem are abaia ara bakatibu, are te kibono, te bwai ni mwakuri ae kakawaki man rineaki, are e na rabunaki ma ni kariki ni mwaakan te Tamnei ae raoiroi, ao e na karika natina, eng, ae natin te Atua.

11 Ao e na waaki, n rinanon te kainnano ni maraki ma te karawawataaki ao te kaririaki n aekaia nako; ao aio bwa e na kakoroaki te taeka are e taku bwa e na uota i aona marakiia ao aorakiia ana aomata.

12 Ao e na uota i aona te mate, bwa e aonga ni kabwara ana kabaebae te mate are e kabaeiia ana aomata; ao e na uota i aona mamaaraia, bwa e na on nanoia n te nanoanga ni kaineti ma te maiu n rabwata, bwa e na ataia ni kaineti ma te maiu n rabwata bwa e na kanga ni buokiia ana aomata ni kaineti ma mamaaraia.

13 Ngkai te Tamnei e atai bwaai ni kabane; ma e ngae n anne natin te Atua e rinanon te maraki n aron te maiu n rabwata bwa e na katokaa i aona aia bure ana aomata, bwa e aonga ni kamaunai riaoan tua irouia n aron mwaakan ana kamaiu; ao ngkai nooria, aio te koaua are e mena irou.

14 Ngkai I taetae nakoimi bwa kam na rairinanomi, ma ni bungiaki kaua; bwa e taku te Tamnei ngkana ko aki bungiaki kaua ko aki kona ni karekea uean karawa; ngaia ae nako mai ao bwabetitoaki nakon te rairannano bwa kam na tebokaki man ami bure, bwa kam aonga n onimakina ana Tiibu te Teei te Atua, are e anaa buren te aonaba, are e mwaaka ni kamaiu ao ni kaitiaki buakaka ni kabane.

15 Eng, I taku nakoimi nako mai ao tai maaku, ao katikui bure ni kabane, are kam kakai rootaki iai, are a kabaeingkami rikaki nakon te kamaunaki, eng nako mai ao waaki, ao kaotia nakon te Atua bwa kam kukurei n rairinanomi man ami bure man rin i nanon te berita ae tabu ma ngaia ma ni kaawakin ana tua, ma ni kakoaua nakoina n te bong aei n rinimi i nanon te ran ni bwabetito.

16 Ao ane e karaoa aio, ma ni kaawakin ana tua te Atua man te tai aio, te aomata anne e na bon uringa bwa I a tia n taku nakoina, e na reke irouna te maiu ae akea tokina, n aron ana koaua te Tamnei ae Tabu, are e kaotiota te koaua inanou.

17 Ao ngkai tariu aika kam tangiraki, kam kakoauai bwaai aikai? Nooria, I taku nakoimi, eng, I ataia bwa kam kakoauai; ao te kawai are I ataia bwa kam kakoauai iai bon man ana kaotioti te Tamnei are e mena irou. Ao ngkai ibukin ami onimaki ae korakora ni kaineti ma te bwai aei, eng, ni kaineti ma bwaai ake I a tia n taekin, ao e korakora kimwareireiu.

18 Bwa n aron are I a tia n taekinna mai moana, bwa e korakora nanou bwa kam aki mena i nanon te kaangaanga n aroia tarimi, ao I kunea bwa e karauaki nanou.

19 Bwa I nooria bwa kam mena ni kawain te raoiroi, I nooria bwa kam mena n te kawai are e kaineti nakon uean te Atua; eng, I nooria bwa kam kaeta kawaina.

20 I nooria bwa e a tia ni kaotaki nakoimi, ni koauan ana taeka, bwa kam aki kona n nakonako ni kawai aika a bwaoua, ke tao e na bibitaki man te bwai are e a tia n taekinna; ke tao e na kona n rairaki man te atai nakon te maing, ke man te bwai ae e eti nakon ae e bure; mangaia ae kawaina aiaron te mronron ae akea tokina.

21 Ao e aki mena n tembora aika a barekareka; ao te kammaira ke te bwai ae bareka e bon aki kona ni butimwaeaki n uean te Atua; mangaia ae I taku nakoimi e na roko te tai, eng ao e na riki te kabanea ni bong, bwa te aomata are e kammaira e na tiku n arona ni kammaira.

22 Ao ngkai tariu aika kam tangiraki irou, I a tia n taekin bwaai aikai nakoimi bwa I kan kautingkami nakon namakinan nakoami nakon te Atua, bwa kam na nakonako n itiaki i matana, bwa kam na nakonako ni kawainana botaki ae tabu te Atua, i mwin are kam a tia ni butimwaeaki.

23 Ao ngkai I tangiria bwa kam na nanorinano, ao aantaeka man rau; ni kakai butiaki; n onrake n te taotaonakinnano ma te taonannano i nanon te tai ae maan; n taubaang ni bwaai ni kabane; ma ni botumwaaka ni kaawakin ana tua te Atua n taai nako; ni bubuti ibukin bwaai aika kam kainnanoi, aika bwaai n tamnei ma bwain te rabwata; ma ni karabwarabwa n taai nako nakon te Atua ibukin bwaai ake kam karerekei.

24 Ao nooria bwa e na iai iroumi te onimaki, te kantaninga ae raoiroi, ao te tangira ae kororaoi, ao ngkanne kam na onrake ni mwakuri aika a raraoi.

25 Ao e na kakabwaiaingkami te Uea, ao ma ni kaitiaki kunnikaimi, bwa kam aonga n uotaki ma ni katekatekaki ma Aberaam, Itaaka, ao Iakobwa, ao taian burabeti aika a tabu ake a tia ni maiu man moan te aonaba, man tia ni kaitiaki kunnikaimi n aron kunnikaia ngkai a itiaki, bwa kam aonga n aki manga kitana uean karawa.

26 Ao ngkai tariu aika kam tangiraki irou, I a tia n taekin taeka aikai nakoimi n aron te Tamnei are e kaotiota te koaua inanou; ao tamneiu e korakora kimwareireina, ibukin te kakaonimaki ao te ongeaba are kam a tia n anga nakon au taeka.

27 Ao ngkai, e na mena ana rau te Atua i aomi, ao iaon ami auti ao abami, ao iaon ami nanai ni man ma ami ikota ni man, ao bwaai ni kabane ake ami bwai, ami aine ao natimi, n aron ami onimaki ao ami mwakuri aika a raraoi, man te tai aio n uaa ae e aki totoki. Ao I a tia n taetae. Amen.