Say
Libro nen Mormon

Dia ed ontan, saya so sakey a pinatikey a kasulatan nipaakar ed saray totoo nen Nephi, tan ontan met ed saray Lamanite—Nisulat onkana ed saray Lamanite, a sikara so nakdaan ed kailalakan na Israel; tan ontan met ed saray Judio tan Gentiles—Insulat ed panamegley na gangan, tan ontan met ed panamegley na espiritu na profesiya tan puyan—Insulat tan inkapot, tan insinop ed Katawan, pian ag ira naderal—Ya onsabi ed panamegley na palabo tan pakapanyari na Dios angan dia ed pañgipatalus ed saraya—Inkapot na lima nen Moroni, tan insinop ed Katawan, ya onsabi ed genap a panaon ed panamegley na Gentiles—Say impañgipatalus ed saya dia ed panamegley na palabo na Dios.

Sakey a pinatikey a kasulatan a nanlapu ed Libro nen Ether met, a saya so sakey a kasulatan nipaakar ed saray totoo nen Jared, a sikara so nitaytayak ed saman a panaon nen say Katawan kinewkew to so salita na saray totoo, sanen sikara so mampapaalagey na tori pian makasabi ed tawen—A saya so mañgipanengneng ed saray nakdaan ed kailalakan na Israel no anto so saray ankakabaleg a beñgatla a ginawa na Katawan ed saray kaamaan da; tan komon nakabatan da so saray paknaan na Katawan, ya ag ira nibantak ya ando la ya ando—Tan ontan met onkana a pankuyong ed saray Judio tan Gentiles a si Jesus sikato so Cristo, say Andi-Angaan a Dios, ya ipapanengneng to so inkasikato ed amin a bansa—Tan natan, no wala so saray kakulañgan saraya so liñgo na totoo; lapu ed ontan, ag yo tututolan so saray nipaakar ed Dios, pian komon sikayo so narumog ya andi-dukit ed yuroñgan na panañgokoman nen Cristo.