Parungtal

Say Libro nen Mormon so sakey a libro na masanto a kasulatan a mipara ed Biblia. Saya so sakey a kasulatan nipaakar ed piruruñgo na Dios ed saray kadaanan a totoo a nanayam ed America tan say lugan to so inkagnap na andi-angaan ya evangelio.

Say libro so insulat na dakel a kadaanan a profeta dia ed panamegley na espiritu na profesiya tan puyan. Saray salita ra, so nisulat ed saray piligo a balitok, so inulit tan pinatikey nen profeta a managsulat na awaran a manñgaran na Mormon. Say kasulatan mañgiiter na salaysay na duara ya ankabaleg a bansa ya asabi ra so atagey a kipapasen na aliguas. Say sakey so nanlapu ed Jerusalem nen 600 S.C., tan kayari to nia nansian ed duara a bansa, ya akabatan a saray Nephite tan saray Lamanite. Saman so sakey sinmabi ya asasakbay sanen say Katawan kinewkew to so saray salita diman ed Tori na Babel. Saya ya olop so akabatan a saray Jaredite. Kayari na libu-libo a taon, sikara ya amin so aderal likud ed saray Lamanite, tan sikara so manunaan señgeg na saray American Indian.

Say sankamakanaan ya agawa a nisulat ed Libro nen Mormon so say dili ya impampulong na Katawan Jesu Cristo ed limog na saray Nephite ag abayag nen kayari to ya inmoli ed bilay. Saya so añgiter na doctrina na evangelio, añgidatak ed plano na kilalaban, tan mañgibaga ed saray totoo no anto so gawaen da pian nagamoran da so kareenan ed saya a bilay tan andi-angaan a kilalaban ed bilay ya onsabi.

Kayari na impakasumpal nen Mormon ed saray insulat to, iniawat to so kasulatan ed anak to a laki si Moroni, a sikato so añgiarum na pigara a salita to a dili tan iniamot to so saray piligo ed pukdol na Cumorah. Sanen Septiembre 21, 1823, si Moroni lamlamang, ed saman magloria la, ya inmoli ed bilay a too, so nampanengneng ed si Profeta Joseph Smith tan binañgatan to nipaakar ed saman so kadaanan a kasulatan tan say getma a pañgipatalus ed salita ya English.

Ed genap a panaon saray piligo so niawat la ed si Joseph Smith, a sikato so añgipatalus ed saraya ed panamegley na palabo tan pakapanyari na Dios. Say kasulatan natan so nipalapag la ed dakel a salita a saya so balo tan kaaruman a tasi a si Jesu Cristo so Anak na mabilay a Dios tan amin ya ondago ed sikato tan ononor ed saray gangan tan tutuntonen ed evangelio to so nilaban.

Nipaakar ed saya a kasulatan si Profeta Joseph Smith inkuan to: “Imbagak ed saray kaagian a say Libro nen Mormon so sikato so sankadugaan nen say dinan a libro dia ed dalin, tan say bato a sekder na relihion tayo, tan say too lalo a maasinger ed Dios ed panamegley na itumbok to ed saray bañgat ed saya, nen say arum a libro.”

Onarum ed si Joseph Smith, say Katawan so añgiter ni na labinsakey a makanengneng ed balitok a piligo ed inkasikara a dili tan manmaliw a nidumadoma a tasi na katuaan tan kasantosan na Libro nen Mormon. Saray nisulat a paneknek da so nilugan dia a “Say Paneknek na Talora a Tasi” tan “Say Paneknek na Walora a Tasi.”

Babagaan mi so amin a totoo ed inerman a pasen a basaen da so Libro nen Mormon, a motekteken da ed puso ra so talus na balita a lugan to, tan ontepet ed Dios, say Andi-angaan ya Ama, dia ed ñgaran nen Cristo no say libro so tua. Saraman so mañgituloy ed saya a kimey tan ontepet ya awalaan na pananisia so makagamor na paneknek na katuaan tan kasantosan na saya dia ed pakapanyari na Espiritu Santo. (Nengneñgen so Moroni 10:3–5.)

Saraman so makagamor ed saya a masanto a tasi manlapu ed Masanto ya Espiritu onsabi met ed sikara so pikakabat ed panamegley na saman met lamlamang a pakapanyari a si Jesu Cristo sikato so Manañgilaban na mundo, a si Joseph Smith so managpuyan to tan profeta ed saraya a sampot ya agew, tan say Simbaan nen Jesu Cristo na Saray Sasantos ed Kaunoran ya Agew so panarian na Katawan a niletneg lamet dia ed dalin, sakey a paraan ed komadua ya isabi na Mesias.