1 Natan siak, Moroni, isulat ko so antokaman a nanunotan ko a maong; tan mansulat ak ed saray kaagian ko, a Lamanite; tan labay ko a nakabatan da a masulok la ya apat a lasus tan duamplo a taon so linmabas nanlapu ed inkiiter na saray tanda ed isabi nen Cristo.

2 Tan ikapot ko la so saraya a kasulatan, kayari a mambalikas ak na pigara a salita dia ed pañgikerew ko ed sikayo.

3 Nia, kerewen ko ed sikayo sano nabasa yo so saraya a beñgatla, no saya so kakabatan ed Dios a saraya so nabasa yo, so nanunotan yo no panon so panañgasi na Katawan ed saray anak na totoo, manlapu ed impamalsa ed si Adan anga ed panaon a naawat yo so saraya a beñgatla, tan motektek yo so saraya ed saray puso yo.

4 Tan sano naawat yo so saraya a beñgatla, ikerew ko ed sikayo ya itepet yo ed Dios, say Andi-Angaan ya Ama, ed ñgaran nen Cristo, no saraya a beñgatla so aliwa a tua; tan no sikayo so onkerew ed matuor a puso, tekep na peteg a gagala, a walaan na pananisia ed si Cristo, ipanengneng to so katuaan ed sikayo, ed panamegley na pakapanyari na Espiritu Santo.

5 Tan dia ed pakapanyari na Espiritu Santo nakabatan yo so katuaan na amin a beñgatla.

6 Tan antokaman a beñgatla a maong so maptek tan tua; dia ed ontan, angapo so sakey a maong ya iburi to si Cristo, balet saya so birbiren to.

7 Tan nakabatan yo komon ya angapo la so arum, dia ed pakapanyari na Espiritu Santo; dia ed ontan kerewen ko ed sikayo ya ag yo iboburi so pakapanyari na Dios; tan sikato so mankikimey dia ed pakapanyari, unong ed pananisia na saray anak na totoo, a sikato met lamlamang natan tan nabuas, tan dia ed ando la ya ando.

8 Tan lamet, kerewen ko ed sikayo, kaagian ko, ya ag yo iboburi so saray palabo na Dios, tan saraya so dakel; tan saraya so manlalapu ed saksakey a Dios. Tan wala so nanduroma a pamaakaran a saraya a palabo so niiter natan; balet saksakey met lamlamang a Dios so mankikimey ed amin; tan saraya so niiter ed panamegley na panañgipalikna na Espiritu na Dios ed saray totoo, pian sikara so makagungona.

9 Tan nia, dia ed sakey iter na Espiritu na Dios, pian ibañgat to so salita na kakabatan;

10 Tan dia ed sananey, pian ibañgat to so salita na karonuñgan ed saman lamlamang ya Espiritu;

11 Tan dia ed sakey, say mapalalo a pananisia; tan dia ed sananey, say palabo na panagpaabig ed saman lamlamang ya Espiritu;

12 Tan lamet, dia ed sakey, pian sikato so makapankimey na saray makapakelaw a milagro;

13 Tan lamet, dia ed sananey, pian sikato so makapamprofesiya nipaakar ed amin a beñgatla;

14 Tan lamet, dia ed sakey, say pakanengneng ed saray angeles tan panagtalima na saray espiritu;

15 Tan lamet, dia ed sananey, say amin a kanengneñgan na salita;

16 Tan lamet, dia ed sananey, say panañgipatalus ed saray salita tan nanduroma a kanengneñgan na salita.

17 Tan saraya ya amin a palabo onsabi ed panamegley na Espiritu nen Cristo; tan saraya so onsabi ed balang sakey a too a pigapigara, unong ed linawa to.

18 Tan kerewen ko ed sikayo, inararok a kaagian, a nunoten yo a balang sakey a maong a palabo so manlapu ed Cristo.

19 Tan kerewen ko ed sikayo, inararok a kaagian, a nunoten yo a sikato lamlamang nen karoman, natan, tan dia ed ando la ya ando, tan saraya ya amin a palabo ya asalitak, a saraya so maespiritu, so kapiganman ag nayari a naandi, legan a say mundo so akatalindeg, likud labat ed ag-pananisia na saray anak na totoo.

20 Dia ed ontan, nakaukolan a wala so pananisia; tan no nakaukolan a wala so pananisia nakaukolan met a wala so ilalo; tan no nakaukolan a wala so ilalo nakaukolan met a wala so panañgasi.

21 Tan likud no wala ed sikayo so panañgasi kapiganman ag kayo nilaban ed panarian na Dios; ni say sikayo so nilaban ed panarian na Dios no angapo so pananisia yo; ni say nilaban kayo no angapo so ilalo yo.

22 Tan no angapo ed sikayo so ilalo sirin wala ed sikayo so kaermenan; tan say kaermenan onsabi makaseñgeg ed karelmeñgan.

23 Tan si Cristo petepeteg a nankuan ed kaamaan tayo: No wala so pananisia yo nagawaan yo so amin a beñgatla a manepeg ed siak.

24 Tan natan mansalita ak ed amin a sampot na dalin—a no onsabi so agew a say pakapanyari tan saray palabo na Dios so naandi ed limog yo, saya so makaseñgeg ed ag-pananisia.

25 Tan abagey so saray anak na totoo no saya so kipapasen; tan angapo la so mangagawa na maong ed limog yo, andi ni angan sakey. Tan no wala so sakey ed limog yo a mangagawa na maong, sikato so mankikimey dia ed pakapanyari tan saray palabo na Dios.

26 Tan abagey so saraman so mamaandi ed saraya a beñgatla tan sikara so ompatey, lapu ed sikara so ompatey ed saray kasalanan da, tan sikara so ag nilaban ed panarian na Dios; tan saya so salitaen ko unong ed saray salita nen Cristo, tan ag ak mantitila.

27 Tan kerewen ko ed sikayo a nunoten yo so saraya a beñgatla; lapu ed say panaon so masiglat ya onsabi pian nakabatan yo ya ag ak nantila, tan siak so nanengneng yo diman ed panagsalaysayan na Dios; tan say Katawan a Dios ikuan to ed sikayo: Ag ko kasi imbawag so saray salitak ed sikayo, a saraya so insulat na saya a too, a siñga sakey a manakis a nanlapu ed saray inaatey, on, angan siñga sakey a mansasalita a manlalapu ed sapok?

28 Ibawag ko ed sikayo so saraya a beñgatla pian nasumpal so saray profesiya. Tan nia, saraya so manlapu ed sañgi na angapo so angaan a Dios; tan say salita to so niesaes manlapu ed sakey a kailalakan anga ed sakey a kailalakan.

29 Tan say Dios ipanengneng to ed sikayo, a saman so insulat ko so tua.

30 Tan lamet kerewen ko ed sikayo a komon ondago kayo ed Cristo, tan ombemben kayo ed balang sakey a maong a palabo, tan ag yo didiwiten so saray mauges a palabo, odino say marutak a beñgatla.

31 Tan bañgon kayo, tan talindeg kayo manlapu ed sapok, O Jerusalem; on, tan isulong mo so marakep a kawes mo, O bii ya anak na Sion; tan paeletan mo so saray palpal mo tan paawang mo so saray ketegan mo ed ando la ya ando, pian sika komon la so ag nagewgew, pian saray paknaan na Andi-Angaan ya Ama a ginawa to ed sika, O kailalakan na Israel, so nasumpal.

32 On, ondago kayo ed Cristo, tan manmaliw kayo a nagnap ed sikato, tan iburi yo ed inkasikayo so amin ya aliwan makadios; tan no iburi yo ed inkasikayo so amin ya aliwan makadios, tan aroen yo so Dios ed amin a pakayari, kanunotan tan biskeg yo, dia ed ontan say gracia to so magenap ed sikayo, a dia ed gracia to sikayo komon so manmaliw a nagnap ed si Cristo; tan no dia ed gracia na Dios sikayo so manmaliw a nagnap ed si Cristo, ag yo nayarian ya iburi so pakapanyari na Dios.

33 Tan lamet, no sikayo dia ed gracia na Dios manmaliw kayo a nagnap ed si Cristo, tan ag yo iburi so pakapanyari to, dia ed ontan sikayo so napasanto ed si Cristo dia ed gracia na Dios, ed panamegley na interter na dala nen Cristo, a saya so kabiañgan ed paknaan na Ama onkana ed pamaandi na saray kasalanan yo, pian sikayo so manmaliw a masanto, ya angapo so mansa.

34 Tan natan mampatanir ak la ed amin. Magano ak la a mampainawa ed paraiso na Dios, anga ed say espirituk tan laman ko so mantipon lamet, tan siak so naawit a tinmaluna a binmeltang ed dagem, a miarapan ed sikayo ed makaruyo a salaysayan na makapanyari a Jehova, say Andi-Angaan ya Okom na saray mandapag a mabilay tan inatey. Amen.