Say Libro nen Moroni
Tekap 1
Si Moroni so nansulat ya onkana ed pankaabigan na saray Lamanite—Saray Nephite ya ag da iburi si Cristo so pinapatey. Ñgalñgali K.C. 401–421.
1 Natan siak, Moroni, kayari na impañgisampot ko na pamatikey ed say kasulatan na saray totoo nen Jared, impasen ko ya ag ak la mansulat na kaaruman to, balet ag ak ni inatey; tan ag ko impapakabat so inkasiak ed saray Lamanite no andi siak so deralen da.
2 Tan nia, saray bakal da so mapalalo ed sebeg dia ed limog na inkasikara a dili, tan makaseñgeg ed busol da pinatey da so balang sakey a Nephite ya ag mañgiburi ed si Cristo.
3 Tan siak, Moroni, ag ko iburi si Cristo, lapu ed ontan, siak so manaakar-akar ed angan iner a nayarian ko a laen onkana ed pañgiagel ko ed bilay ko.
4 Dia ed ontan, nansulat ak na pigara ni a beñgatla, a sumlang ed saman so impañgipasen ko; lapu ed impasen ko ya ag ak la makapansulat na arum ni; balet mansulat ak ni na daiset a beñgatla, ag la piga wala so kakanaan to ed saray kaagian ko, saray Lamanite, ed saray arapen ya agew, unong ed linawa na Katawan.