1 Sakey a sulat nen amak a Mormon, ya insulat to ed siak, Moroni; tan saya so insulat to ed siak nen kayari ya atawag ak ed panagpulong. Tan onia so insulat to ed siak, ya inkuan to:

2 Inararok ya anak ko, Moroni, maliket ak a maong a say Katawan Jesu Cristo so sinonunot ed sika, tan sika so tinawag to ed panagpulong to, tan dia ed masanto a kimey to.

3 Sinonunot ak lawas ed sika ed saray pikakasik, tan andi-tonda a mampipikasi ed Dios Ama ed ñgaran na Masanto ya Anak to, si Jesus, a dia ed sikato, ed andi-angaan a kaabigan tan gracia to, a sika so pagnayonen to a pansiansiaen ed pananisia ed ñgaran to ya anga ed sampot.

4 Tan natan, anak ko, mansalita ak ed sika nipaakar ed saman so akapaermen ed siak a maong; tan apaermen ak lapu ed saray baliñgaan a linmesa ed limog yo.

5 Tan, no akabatan ko so katuaan, wala so baliñgaan ed limog yo nipaakar ed biniag na saray ankekelag ya anak yo.

6 Tan natan, anak ko, pilalek ko a nepeg a mankimey ka a siseseet, pian saya a baleg a liñgo so naekal ed limog yo; tan, lapu ed saya a gagala siak so nansulat ed saya a sulat.

7 Tan tampol kayari ya akabatan ko so saraya a beñgatla ed sikayo intepet ko ed Katawan so nipaakar ed saya a pamaakaran. Tan say salita na Katawan so sinmabi ed siak ed panamegley na pakapanyari na Espiritu Santo, a nankuan:

8 Deñgel yo so saray salita nen Cristo, a Mananundon yo, say Katawan yo tan Dios yo. Nia, linma ak ed mundo ya ag mantawag ed saray matunong no ag saray makasalanan a mambabawi; saray angapo so sakit da ag da nakaukolan so managtambal, balet saraman so wala so sakit; dia ed ontan, saray ankekelag ya ugogaw so nagnap, lapu ed ag da ni nayarian so mangawa na kasalanan; dia ed ontan say ayew ed si Adan so naekal ed sikara lapu ed siak, kanian angapo so pakapanyari to ed sikara; tan say gangan na panaggalsim so naekal la lapu ed siak.

9 Tan dia ed onia a kanengneñgan so impañgipanengneng na Espiritu Santo ed saray salita na Dios ed siak; dia ed ontan, inararok ya anak ko, kabat ko a sakey a mareen a panlodlurey ed arap na Dios, so maminiag ed saray ankekelag ya ugogaw.

10 Nia ikuan ko ed sika a saya so ibañgat mo—say pambabawi tan biniag mo onkana ed saray wala so eebatan da tan saray nayarian da la so mangawa na kasalanan; on, ibañgat mo ed saray ateng a sikara so nakaukolan a mambabawi tan pabiniagan, tan mampaabeba ra ed inkasikara a siñga saray ankekelag ya ugogaw, tan sikara ya amin so nilaban a kaiba ra so saray ankekelag ya anak da.

11 Tan saray ankekelag ya anak da ag da nakaukolan so mambabawi, ni say biniag. Nia, say biniag so onkana ed pambabawi ed panumpal na saray gangan nipaakar ed pamaandi na saray kasalanan.

12 Balet saray ankekelag ya ugogaw so mambibilay ed si Cristo, angan nanlapu la ed inletneg na mundo; no andi, say Dios so sakey a Dios a wala so lalabien to, tan ontan met sakey a manañguman a Dios, tan manañgibiig na saray totoo; tan pigara la so karakel na saray ankekelag ya ugogaw so inaatey ya ag abiniagan!

13 Dia ed ontan, no saray ankekelag ya ugogaw so ag nilaban no angapo so biniag, saraya so linma la ed andi-angaan ya infierno.

14 Nia ikuan ko ed sikayo, siopaman so mañgipasen a saray ankekelag ya ugogaw so nakaukolan da so biniag sikato so wala ed sankapaitan a kipapasen tan wala ed balor na kasalanan; tan sikato so ag awalaan na pananisia, ilalo, odino panañgasi; dia ed ontan, no sikato so nataksing legan a wala ed sikato so saya a kanunotan, sikato so nakaukolan a napelag ed infierno.

15 Tan agay la a makapataktakot a karelmeñgan so pañgipasen a say Dios ilaban to so sakey ya ogaw lapu ed biniag, tan saman so sakey nakaukolan ya ompatey lapu ed sikato so ag abiniagan.

16 Abagey la so saraman so mampikewet ed saray dalan na Katawan ed onia a kanengneñgan, lapu ed sikara so nabalang likud no sikara so mambabawi. Nia, siak so mansalita ya awalaan na kasil na linawa, niiter ed siak so pakaoley a nanlapu ed Dios; tan ag ko takotan no anto so nagawaan na sakey too, lapu ed say nagnap ya aro ipulisay to ya amin so takot.

17 Tan siak so napno na panañgasi, a saya so andi-angaan ya aro; dia ed ontan, amin ya ugogaw so nampapara ed siak; dia ed ontan, inarok so saray ankekelag ya ugogaw ed nagnap ya aro; sikara ya amin so nampapara tan minanabang ed kilalaban.

18 Tan kabat ko a say Dios so aliwa a sakey a Dios a wala so lalabien to, ni say manañguman a pinalsa, balet sikato so ag-mañguman manlapu ed amin ya andi-angaan anga ed amin ya andi-angaan.

19 Saray ankekelag ya ugogaw ag da nayarian so mambabawi; dia ed ontan, sakey a makapataktakot a karelmeñgan so pañgiburi ed dalisay a panañgasi na Dios ed sikara, lapu ed sikara ya amin so mabilay ed sikato makaseñgeg ed panañgasi to.

20 Tan siopaman so mañgikuan a saray ankekelag ya ugogaw nakaukolan da so biniag iboburi to so panañgasi nen Cristo, tan ipapasen to ya andi-kana so saman so bagat to a pamaandi na kasalanan tan say pakapanyari na pananundon to.

21 Abagey la so saray onia, lapu ed wala ra ed kaatapan na patey, infierno, tan andi-angaan a kairapan. Saya so salitaen ko ya andi-talaw; say Dios so añgigangan ed siak. Deñgel yo so saraya tan manisia kayo, odino sikara so ontalindeg sumpa ed sikayo ed yuroñgan na panañgokoman nen Cristo.

22 Tan nia amin ya ankekelag ya ugogaw so mabilay ed si Cristo, tan ontan met amin na saraman so angapo so gangan ed sikara. Lapu ed say pakapanyari na inkarundon so onsabi ed amin ya angapo so gangan ed sikara; dia ed ontan, saman so ag atutolan, odino saman so wala ed silong na ag atutolan, ag nayari a mambabawi; tan dia ed siñga saraya say biniag so angapo so kana to—

23 Balet sakey a panlodlurey ed arap na Dios, so pañgiburi ed panañgasi nen Cristo, tan say pakapanyari na Masanto ya Espiritu to, tan say panmatalek ed saray inatey a kimey.

24 Nia, anak ko, saya a beñgatla so ag nepeg ya onia; lapu ed say pambabawi so wala ed saraman so wala ed silong na katutolan tan silong na ayew na isumlang ed gangan.

25 Tan saray unaan a buñga na pambabawi so say biniag; tan say biniag onsabi ed panamegley na pananisia onkana ed pakasumpal na saray gangan; tan say pakasumpal na saray gangan awiten to so pamaandi na saray kasalanan;

26 Tan say pamaandi na saray kasalanan so mañgawit na inkaolimek, tan panagpaabeba na puso; tan lapu ed inkaolimek tan panagpaabeba na puso onsabi so dalaw na Espiritu Santo, a saya a Managligliwa a mamano na ilalo tan nagnap ya aro, a saya ya aro so mansiansia ed panamegley na seet ed pikakasi, anga ed say kasampotan so onsabi, sano amin a sasantos so miayam ed Dios.

27 Nia, anak ko, mansulat ak lamet ed sika no ag ak ni ompaway sumpa ed saray Lamanite. Nia, say kinon na saya a bansa, odino saray totoo na Nephite, pinaneknekan to so inkaderal da likud no sikara so mambabawi.

28 Mampikasi ka onkana ed sikara, anak ko, pian onsabi komon ed sikara so pambabawi. Balet nia, mapaga ak ag la piga a say Espiritu so tinmonda la a mimiayam ed sikara; tan dia ed kabiañgan na saya a dalin pampilpilalekan da met so pañgerep ed pakapanyari tan pakaoley a manlalapu ed Dios; tan iboburi ra so Espiritu Santo.

29 Tan kayari ya ag da inawat so ontan la a kinabaleg na pikakabat, anak ko, ag la mabayag sikara so ompatey, ed pakasumpal na saray profesiya ya imbalikas na saray profeta, ontan met ed saray salita na dili a Manañgilaban tayo.

30 Mampatanir ak la, anak ko, anga ed mansulat ak lamet ed sika, odino anga ed pakapannengneng ta lamet. Amen.