1 Tan natan siak, Moroni, isulat ko so daiset ed saray salita nen amak a Mormon, ya imbalikas to nipaakar ed pananisia, ilalo, tan panañgasi; tan dia ed onia a kanengneñgan so impansalita to ed saray totoo, unong ed impañgibañgat to ed sikara ed dalem na sinagoga ya impaalagey da ed pasen a panagpikasian.

2 Tan natan siak, Mormon, mansalita ak ed sikayo, inararok a kaagian; tan lapu ed gracia na Dios Ama, tan say Katawan tayo a Jesu Cristo, tan say masanto a linawa to, lapu ed palabo na impantawag to ed siak, a siak so naabuloyan a mansalita ed sikayo ed saya a panaon.

3 Dia ed onia, mansalita ak ed sikayo a miembro na simbaan, sikayo a matoluk a mananumbok nen Cristo, tan akagamor na magenap ya ilalo a lapu ed saya nayarian yo so onloob ed painawaan na Katawan, manlapu ed saya a panaon ya anga ed arapen a sikayo so mipainawa ed sikato ed tawen.

4 Tan natan kaagian ko, naimanok so saraya a beñgatla ed sikayo makaseñgeg ed mareen a kurang yo ed limog na saray anak na totoo.

5 Lapu ed anunotan ko so salita na Dios a nankuan a dia ed saray kimey da sikara so nakabatan yo; tan no saray kimey da so maong, dia ed ontan sikara so maong met.

6 Tan nia, inkuan na Dios a say sakey a too no sikato so mauges, ag to nayarian a gawaen so beñgatla a maong; tan no sikato so mañgisaklang na antokaman a bagat, odino mampikasi ed Dios, likud no gawaen to so saya ed matua a gagala angapo so gungona to.

7 Tan nia, saya so ag nibilang ed sikato ya onkana ed inkamatunong.

8 Tan nia, no say sakey a too no sikato so mauges a mañgiter na bagat, saya so gawaen to a sisosuknar; dia ed ontan saya so nibilang ed sikato a siñga lamlamang impagnayon to ed sikato so bagat; dia ed onia sikato so nibilang a mauges ed arap na Dios.

9 Tan siñga ontan met saya so nibilang a kaugesan ed sakey a too, no sikato so mampikasi tan angapo so peteg a gagala ed puso to; on, tan angapo so gungona to ed saya, lapu ed say Dios angapo so awaten to a siñga onia.

10 Dia ed onia, say sakey a too no sikato so mauges ag to nayarian a gawaen so sakey a maong; ni say sikato so makapañgiter na maong a bagat.

11 Tan nia, say ampait a subol ag to nayarian so mamapaway na maong a danum; ni say maong a subol ag to nayarian so mamapaway na ampait a danum; dia ed ontan, say sakey a too ya aripen na demonyo ag to nayarian so ontumbok ed si Cristo; tan no tumboken to si Cristo ag to nayarian so manmaliw ya aripen na demonyo.

12 Dia ed ontan, amin a beñgatla a maong so manlalapu ed Dios, tan saman so mauges so manlalapu ed demonyo; lapu ed say demonyo so kabusol na Dios, tan sikato so andi-tonda a milalaban ed sikato, tan mambabaga tan mañgaayat ed pankasalanan, tan mangagawa na mauges ya andi-tonda.

13 Balet nia, saman so manlalapu ed Dios so mambabaga tan mañgaayat a mangawa na maong ya andi-tonda; dia ed ontan, balang sakey a beñgatla a mambabaga tan mañgaayat a mangawa na maong, tan mañgaro ed Dios, tan manlingkor ed sikato, so tanguyor a nanlapu ed Dios.

14 Dia ed ontan, deñgel kayo, inarok a kaagian, pian ag yo ibaga a saman so mauges a saya so nanlapu ed Dios, odino saman so maong tan nanlapu ed Dios a saya so nanlapu ed demonyo.

15 Tan nia, kaagian ko, niiter ed sikayo so panañgibiig, pian nakabatan yo so maong ed mauges; tan say dalan na panañgibiig so malinew, pian nakabatan yo ed nagnap a pikakabat, a siñga unong ed liwawa na agew no ipareng ed biluñget na labi.

16 Tan nia, say Espiritu nen Cristo so niiter ed balang sakey a too, pian nibiig to so maong ed mauges; dia ed ontan, ipanengneng ko ed sikayo so dalan na panagtutol; tan balang sakey a beñgatla a mambaga a mangawa na maong, tan mankuyong a manisia ed si Cristo, sikato so imbaki ed pakapanyari tan palabo nen Cristo; dia ed ontan nakabatan yo komon dia ed nagnap a pikakabat a saya so nanlapu ed Dios.

17 Balet antokaman a beñgatla a mañguyong ed too a mangawa na mauges, tan ag manisia ed si Cristo, tan sikato so iburi to, tan ag manlingkor ed Dios, dia ed ontan nakabatan yo komon ed nagnap a pikakabat a saya so nanlapu ed demonyo; tan dia ed onia a kanengneñgan so panagkimey na demonyo, lapu ed angapo so too a kuyoñgen to a mangawa na maong, andi, angapo so angan sakey; ni saray angeles to; ni saray impaoleyan da so inkasikara ed sikato.

18 Tan natan, kaagian ko, nanenengneng ko ya amta yo so liwawa ya agamilen yo ed pantutol, a saya a liwawa so liwawa nen Cristo, manseet kayo pian ag kayo mañgokom ed andi-katunoñgan; lapu ed saman lamlamang a panañgokom sikayo met so naokom.

19 Dia ed ontan, mapeget a kerewen ko ed sikayo, kaagian, a panseetan yo ya anapen so liwawa nen Cristo pian komon nakabatan yo so maong ed mauges; tan no ombemben kayo ed balang sakey a maong a beñgatla, tan saya so ag yo balawen, petepeteg a manmaliw kayo ya anak nen Cristo.

20 Tan natan, kaagian ko, panon a nayarian yo so ombemben ed balang sakey a maong a beñgatla?

21 Tan natan onla ak ed saman so pananisia, a saya so inkuan ko a salitaen ko; tan ibagak ed sikayo so dalan no iner nayari kayo ya ompeket ed balang sakey a maong a beñgatla.

22 Tan nia, say Dios lapu ed kabat to so amin a beñgatla, lapu ed sikato so nanlapu ed andi-angaan ya anga ed andi-angaan, nia, imbaki to so saray angeles a mantalima ed saray anak na totoo, pian iparungtal da so nipaakar ed isabi nen Cristo; tan dia ed si Cristo onsabi so balang sakey a maong a beñgatla.

23 Tan say Dios imparungtal to met la ed saray profeta, ed dili a sañgi to, a si Cristo so onsabi.

24 Tan nia, wala so nanduroma a pamaakaran ya impañgipanengneng to na saray beñgatla ed saray anak na totoo, a saraya so maong; tan amin a beñgatla a maong so nanlapu ed si Cristo; odino andi saray totoo sikara so nigapol, tan angapo so maong a beñgatla ya onsabi ed sikara.

25 Dia ed ontan, ed panamegley na panagtalima na saray angeles, tan ed balang sakey a salita a manlalapu ed sañgi na Dios, saray totoo ginapoan da so manisia ed si Cristo; tan lapu ed pananisia, binmemben ira ed balang sakey a maong a beñgatla; tan onia so agawa anga ed insabi nen Cristo.

26 Tan kayari na insabi to saray totoo so nilaban lapu ed pananisia ed ñgaran to; tan dia ed pananisia, sikara so nanmaliw ya anak na Dios. Tan peteg a si Cristo so mabilay lawas imbalikas to so saraya a salita ed kaamaan tayo, a nankuan: Antokaman a beñgatla a kerewen yo ed Ama dia ed ñgaran ko, no saya so maong, dia ed pananisia a saya so sisiaen yo a naawat yo, nia, saya so nagawa ed sikayo.

27 Dia ed ontan, inararok a kaagian, tinmonda la so saray milagro lapu ed tinmukutok la ed tawen si Cristo, tan sikato la so inmirong ed nikawanan a lima na Dios, pian kerewen to ed Ama so saray pankatunoñgan na panañgasi ya initer to ed saray anak na totoo?

28 Lapu ed sikato so inmebat ed saray sampot na gangan, tan kayarianen to so amin a wala so pananisia ra ed sikato; tan saraman so wala so pananisia ra ed sikato so ompeket ed balang sakey a maong a beñgatla; dia ed ontan sikato so añgiapireng ed pankaabigan na saray anak na totoo; tan sikato so andi-angaan a manaayam ed saray katawenan.

29 Tan lapu ed saya so ginawa to, inararok a kaagian, tinmonda la so saray milagro? Nia ikuan ed sikayo, Andi; ni saray angeles so tinmonda a mantatalima ed anak na saray totoo.

30 Tan nia, sikara so wala ed silong na oley to, a mantalima unong ed salita na gangan to, ya ipapanengneng da ed inkasikara a sikara so mabiskeg ed pananisia, tan ag-nagiing a kanunotan ed amin a kanengneñgan na inkadios.

31 Tan say susumpalen na pulong da so say pantawag ed saray totoo a mambabawi, tan sumpalen tan gawaen da so kimey ed paknaan na Ama, a ginawa to ed saray anak na totoo, pian niparaan so dalan ed limog na saray anak na totoo, dia ed pañgibawag da ed saray salita nen Cristo ed saray apili ya igangan na Katawan, pian sikara so mampaneknek ed sikato.

32 Tan dia ed pangawa ed saya, say Katawan a Dios ipaparaan to so dalan pian say nakdaan ed saray totoo so nawalaan na pananisia ed Cristo, pian say Espiritu Santo so nawalaan na pasen ed dalem na saray puso ra, unong ed pakapanyari to nia; tan unong ed saya a kanengneñgan sumpalen na Ama, so saray paknaan a ginawa to ed saray anak na totoo.

33 Tan si Cristo inkuan to: No wala so pananisia yo ed siak nawalaan kayo na pakapanyari a mangawa na antokaman a beñgatla a manepeg ed siak.

34 Tan inkuan to: Mambabawi kayo ya amin a totoo ed dalin, tan ondago kayo ed siak, tan mampabiniag kayo ed ñgaran ko, tan nawalaan kayo na pananisia ed siak, pian komon sikayo so nilaban.

35 Tan natan, inararok a kaagian, no onia so kipapasen na saraya a beñgatla so tua unong ed sinalitak ed sikayo, tan say Dios ipanengneng to ed sikayo, ed pakapanyari tan baleg a gloria ed sampot na agew, a saraya so tua, tan sano saraya so tua tinmonda la so agew na saray milagro?

36 Odino saray angeles tinmonda la ra a mampapanengneng ed saray anak na totoo? Odino binabawi to la so pakapanyari na Espiritu Santo ed sikara? Odino gawaen to kasi, anga ed say panaon so mansampot, odino say dalin so wala ni, odino wala ni kasi so sakey a too ed tapew to nia so nilaban?

37 Nia ikuan ko ed sikayo, Andi; lapu ed pananisia kanian say milagro so nagagawa; tan lapu ed pananisia kanian saray angeles so ompapanengneng tan mantalima ed saray totoo; dia ed ontan, no saraya a beñgatla so tinmonda abagey so saray anak na totoo, tan saya so lapu ed ag-pananisia, tan amin angapo so kana to.

38 Tan angapo so too a nilaban, unong ed saray salita nen Cristo, likud no sikara so nawalaan na pananisia ed ñgaran to; dia ed ontan, no saraya a beñgatla so tinmonda, sirin tinmonda met la so pananisia; tan makapataktakot so kipapasen na too, tan sikara so siñga angapo so inkarundon ya agawa.

39 Balet nia, inararok a kaagian, naimanok so saray magmaong a beñgatla ed sikayo, lapu ed nalmoan ko a wala so pananisia ed si Cristo lapu ed inkaolimek yo; tan no angapo so pananisia yo ed sikato sirin ag kayo manepeg a nibilang ed limog na saray totoo na simbaan to.

40 Tan lamet, inararok a kaagian, mansalita ak ed sikayo nipaakar ed ilalo. Panon a narapat yo so pananisia, likud no wala so ilalo yo?

41 Tan anto so panilaloan yo? Nia ikuan ko ed sikayo a nepeg nawalaan kayo na ilalo ed panamegley na bagat nen Cristo a pamaandi na kasalanan tan say pakapanyari na kioli to ed bilay, ya onoli ed bilay ya andi-angaan, tan saya lapu ed pananisia yo ed sikato unong ed sipan.

42 Dia ed ontan, no say sakey a too wala so pananisia to nakaukolan a wala so ilalo to; tan no angapo so pananisia angapo so ilalo.

43 Tan lamet, nia ikuan ko ed sikayo siopaman ag nawalaan na pananisia tan ilalo, likud no sikato so maolimek, tan mapaabeba ed puso.

44 Lapu ed no ontan, say pananisia tan ilalo to so andi kakanaan, angapo so nayari a naawat ed arap na Dios, likud ed saray maolimek tan mapaabeba ed puso; tan no say sakey a too so maolimek tan mapaabeba ed puso, tan mañgipatua ed pakapanyari na Espiritu Santo a si Jesus sikato si Cristo, nakaukolan sirin a wala so panañgasi to; tan no angapo so panañgasi to sikato so andi-kana; dia ed ontan nakaukolan a sikato so nawalaan na panañgasi.

45 Tan say panañgasi andukey so panañgitepel to, tan mapañgasi, tan aliwa a maibeg, tan ag mapaatagey, ag to anapen so kaabigan to a dili, aliwa a mainomay a nasugsogan, ag mannunot na mauges, tan ag mangayaga ed kasalanan balet mangayaga ed katuaan, itepel to so amin a beñgatla, manisia ed amin a beñgatla, manilalo ed amin a beñgatla, mansiansia ed amin a beñgatla.

46 Dia ed ontan, inararok a kaagian, no angapo so panañgasi yo, angapo so kakanaan yo, lapu ed say panañgasi ag nayari ya onkulang. Dia ed ontan, peket kayo ed panañgasi, a saya so sankamakanaan ed amin, tan amin a beñgatla onkulang—

47 Balet say panañgasi so dalisay ya aro nen Cristo, tan saya so mansiansia ed ando la ya ando; tan siopaman a narumog a mankayarian ed saya ed sampot ya agew, saya so maabig ed sikato.

48 Dia ed ontan, inararok a kaagian, mampikasi kayo ed Ama ed amin a biskeg na puso yo, pian komon sikayo so napano na saya ya aro, a saya so mañgiter ed amin a matua a mananumbok ed Anak to, a si Jesu Cristo; pian komon sikayo so manmaliw ya anak na Dios; pian sano sikato so ompanengneng manmaliw tayo a siñga sikato, tan sikato so nanengneng tayo unong ed inkasikato; pian komon niiter ed sikatayo so saya ya ilalo; pian komon sikatayo so napadalisay unong a sikato so dalisay. Amen.