1 Inararok ya anak ko, nansulat ak ed sika lamet pian komon nakabatan mo a mabilay ak ni; balet nansulat ak ed sika nipaakar ed sakey a makapaermen.

2 Tan nia, makapaermen so impibakal ko ed saray Lamanite, a dia ed saya ag kami tinmaluna; tan si Archeantus so inatey ed panamegley na espada, tan ontan met nen Luram tan Emron; on, tan dakel so atigway ed bilang na saray apili-pili a totoo mi.

3 Tan natan nia, anak ko, mapaga ak ag la piga saray Lamanite deralen da so saya a totoo; lapu ed sikara so ag mambabawi, tan si Satanas pagagalawen to ra ya andi-tonda ya onsanok so sakey tan sakey.

4 Nia, siak so mansasagpot ed sikara ya andi-tonda; tan sano salitaen ko so salita na Dios ed makdem a pananalita sikara so ongiwgiw tan onsanok sumpa ed siak; tan no anlemek so pañgibagak paaweten da so saray puso ra sumpa ed saya; lapu ed onia, mapaga ak ag la piga say Espiritu na Katawan so tinmonda la a mimiayam ed sikara.

5 Tan mapalalo so sanok da a dia ed pakanengneng ko angapo so takot da ed patey; tan abalang da la so panañgaro ra, ed balang sakey tan sakey; tan napgaan ira ed dala tan andi-tonda a kibabales.

6 Tan natan, inararok ya anak ko, manwari ya ontan la so inkaawet da, mankimey ta a siseseet; tan no ontonda ta a mankimey, naawit ta ed silong na katutolan; lapu ed wala so kimey a nepeg ta a sumpalen legan a wala ta ni ed saya a tabernaculo a dalin, pian natalo ta so kabusol na amin a matunong, tan mampainawa so kamarerua ta ed panarian na Dios.

7 Tan natan nansulat ak nipaakar ed paniirap na saraya a totoo. Tan unong ed pikakabat a naawat ko a nanlapu ed si Amoron, nia, saray Lamanite dakel so saray adakep da, ya inala ra nanlapu ed tori na Sherrizah; tan wala so saray lalaki, bibii, tan ugogaw.

8 Tan saray asawa a lalaki tan kaamaan na saraman so bibii tan ugogaw so pinapatey da; tan ipapakan da ed saraya a bibii so laman na saray asawa ra a lalaki, tan saray ugogaw ed saray laman na kaamaan da; tan angapo so danum, likud ed daiset labat, so iiter da ed sikara.

9 Tan manwari ya onia a baleg a karumsisan na saray Lamanite, ag to ni apalabsanan so saray totoo tayo ed Moriantum. Tan nia, dakel ed saray bibii ya anak na saray Lamanite so inala ra a dinakep; tan kayari ra a naala ed sikara so saman so pinabli tan sankablian ed amin a beñgatla, a saya so kalinisan tan kagalañgan—

10 Tan kayari ra a ginawa so saya a beñgatla, sikara so pinatey da ed sankaruksaan a kanengneñgan, a pinairapan da ra ed laman ya anga ed sikara so inatey; tan kayari ra a ginawa so saya, kinan da so saray laman da a siñga saray monanakap, lapu ed awet na saray puso ra; tan saya so gagawaen da a tanda na sebeg da.

11 O inararok ya anak ko, panon a saray totoo a siñga saraya, ya angapo so inkabañgat da—

12 (Tan pigpigara a taon ni labat so linmabas, tan sikara so maong ya inkabañgat tan makaparuyo a totoo)

13 Balet O anak ko, panon so saray totoo a siñga saraya, a say panliketan da wala ed baleg a karumsisan—

14 Panon a nailaloan tayo a say Dios pukpokan to so lima to ed pañgokom to sumpa ed sikatayo?

15 Nia, say pusok mannañgis: Abagey la so saya a totoo. Paway ka la a mañgokom, O Dios, tan saniban mo so saray kasalanan da, tan karelmeñgan da, tan karumsisan da ed arap na lupam!

16 Tan lamet, anak ko, dakel so saray balo a bibii tan saray bibii ya anak da a tinmilak ed Sherrizah; tan say kabiañgan na saray tagano ya ag la inawit na saray Lamanite, nia, saray ñgayew nen Zenephi so inawit da ya intaynan, tan pinaulyan da ra a manaakar-akar no iner so pakarumogan da na naakan; tan dakel ed saray akokulaw so naandian na liknaan ed dalan tan sikara so inaatey.

17 Tan say ñgayew a kaibak so makapoy; tan say ñgayew na saray Lamanite so wala ed baetan na Sherrizah tan siak; tan no kaonoñgan karakel so saray binmatik ed ñgayew nen Aaron sikara so naplag ed makapataktakot a panagdusa ra.

18 O say karelmeñgan na saray totook! Dia ed sikara angapo so uksoy tan angapo so panañgasi. Nia, sakey ak labat a too, tan say biskeg ko so biskeg met labat na sakey a too, tan ag ko la nipasuot so saray gangan ko.

19 Tan sikara so nanmaliw a mabiskeg ed saray karelmeñgan da; tan nampapara ra a maruksa, ya angapo so iligyas da, ni matakken odino malangwer; tan panliketan da so amin a beñgatla likud labat ed saman so maong; tan say segsegang a liliknaen na saray bibii tan saray ugogaw ed amin a tapew na saya a dalin so pinalabsanan to ya amin so beñgatla; on, say dila ag to nayarian ya ibalikas, ni say nayari ya isulat.

20 Tan natan, anak ko, ag ko la tungtoñgen so saya a makapataktakot a kipapasen. Nia, kabat mo so karelmeñgan na saya a totoo; kabat mo ya angapo so principio ra, tan angapo la so pakalikna ra; tan say karelmeñgan da pinalabsanan da so saray Lamanite.

21 Nia, anak ko, ag ko ra nayarian ya iparungtal ed Dios ag la piga a siak so bakbaken to.

22 Balet nia, anak ko, sika so iparungtal ko ed Dios, tan manmatalek ak ed Cristo a sika so nilaban; tan mikasi ak ed Dios ya iligyas to so bilay mo, pian natasian mo so ipawil na saray totoo to ed sikato, odino say sigpot a kaderal da; lapu ed kabat ko a sikara so ompatey likud no sikara so mambabawi tan ompawil ira ed sikato.

23 Tan no sikara so ompatey saya so siñga agawa ed saray Jaredite, lapu ed kagustoan na linawa na saray puso ra, ya aanapen da so dala tan say kibabales.

24 Tan no bilang sikara so ompatey, kabat mi a dakel ed saray kaagian mi so sinmisian a tinmipon ed saray Lamanite, tan dakel ni so saray onsian met ed sikara; dia ed ontan, mansulat ka na pigara a beñgatla, no sika so nailigyas tan siak so ompatey tan ag taka la napinengneñgan; balet matalek ak a napinengneñgan taka ni ed magano a panaon; tan wala so saray masanto a kasulatan ya iawat ko ed sika.

25 Anak ko, manmaliw ka a matuor ed si Cristo; tan komon saray beñgatla ya insulat ko so ag mamaermen ed sika, a mañgidetdet ed sika ed patey; balet sika komon so ampayaen nen Cristo, tan saray nilikna to a kairapan tan say impatey to, tan say impañgipanengneng to ed laman to ed kaamaan tayo, tan say panañgasi to tan andukey a panañgitepel to, tan say ilalo ed gloria to tan ed say andi-angaan a bilay, so ilugan mo ed nunot mo dia ed ando la ya ando.

26 Tan say gracia komon na Dios Ama, a say trono to so wala ed tagey na saray katawenan, tan say Katawan tayo a Jesu Cristo, a sikato so manyodyurong ed nikawanan a lima na pakapanyari to, anga ed amin a beñgatla so manmaliw a wala ed pakaoley to, so niwala, tan kaolop mo komon ed ando la ya ando. Amen.