1 Tan natan mansalita ak nipaakar ed biniag. Nia, saray elders, sacerdote, tan managbañgat so abiniagan; tan sikara so ag abiniagan likud no sikara so añgiter na buñga ya ontukoy ed pankanepegan da ed saya.

2 Ni say sikara so añgawat na siopaman ed biniag likud no sikara so dinmago ya awalaan na maermen a puso tan mambabawi ya espiritu, tan tinasian da ed simbaan a sikara so matua a nambabawi ed amin a kasalanan da.

3 Tan angapo so naawat ed biniag likud no akoen da ed inkasikara so ñgaran nen Cristo, ya awalaan ira na mabiskeg a gagala a manlingkor ed sikato ya anga ed kasampotan.

4 Tan kayari a sikara so naawat ed biniag, tan sikara so naawit tan alinisan ed pakapanyari na Espiritu Santo, sikara so nibilang ed limog na saray totoo na simbaan nen Cristo; tan saray kañgaranan da so inala, pian sikara so nunoten tan bayuboan na saray maong a salita na Dios, pian sikara so mansiansia ed duga a dalan, tan sikara so pagnayonen ya andi-tonda a sibabantay ed pikakasi, a manmatalek labat ira ed saray matunong a kakagawa nen Cristo, a sikato so akangawa tan manañgisumpal ed pananisia ra.

5 Tan say simbaan mabetbet so pantitipon da, a manayuno tan mampikasi, tan mitungtong ed sakey tan sakey nipaakar ed pankaabigan na saray kamarerua ra.

6 Tan sikara so mabetbet a mantitipon a mañgan na tinapay tan alak, a pakanodnunotan ed Katawan a Jesus.

7 Tan sikara so malet a nanimaton pian angapo so kasalanan ed limog da; tan siopaman a narumog a mangagawa na kasalanan, tan talora a tasi na simbaan so mantasi ed sikara ed arap na saray elders, tan no sikara so ag nambabawi, tan ag mampatua, say kañgaranan da so ekalen ed listaan, tan sikara so ag la nibilang ed limog na saray totoo nen Cristo.

8 Balet no panon kabetbet so pambabawi ra tan ikerew da na pirdona, tekep na petepeteg a gagala, sikara so napirdona.

9 Tan dia ed saray pantitipon da saya so gagawaen da unong ed kanengneñgan na saray kimey na Espiritu, tan say pakapanyari na Espiritu Santo; lapu ed say pakapanyari na Espiritu Santo so añgiwanwan ed sikara a mampulong, odino mambilin, odino mampikasi, odino onkerew, odino mancancion, iñgen saya so agawa.