1 Tan agawa a sanen si Coriantumr so inmabig la so saray sugat to, ginmapo a nanunotan to so saray salita nen Ether ya imbalikas to ed sikato.

2 Anengneng to a wala so inatey ed panamegley na espada ya abot-abuten na duara a laksa ed saray totoo to, tan ginapoan to so onermen ed puso to; on, wala la so inatey a duara a laksa a mabibiskeg a lalaki, tan ontan met ed kaasawaan da tan saray anak da.

3 Ginapoan to so mambabawi ed saray mauges a ginawa to; ginapoan to a nunoten so saray salita ya imbalikas na sañgi na amin a profeta, tan anengneng to a saraman so nasusumpal ed onia, ya anga ed kamelagan na tulnek; tan nanermen so kamarerua to tan ag to labay so naligliwa.

4 Tan agawa a sikato so nangawa na sulat ed si Shiz, a pilalek to ya iligyas to la so saray totoo, tan ikbanan to so panarian makaseñgeg ed bilay na saray totoo.

5 Tan agawa a sanen naawat nen Shiz so sulat sikato so nansulat ed si Coriantumr, a sano isuko to so inkasikato, pian sikato so pateyen to ed dili ya espada to, iligyas to so bilay na saray totoo.

6 Tan agawa a saray totoo ag ira nambabawi ed saray karelmeñgan da; tan saray totoo nen Coriantumr so apagalaw a sinmanok sumpa ed saray totoo nen Shiz; tan saray totoo nen Shiz so apagalaw a sinmanok sumpa ed saray totoo nen Coriantumr; lapu ed ontan, saray totoo nen Shiz nilabanan da so saray totoo nen Coriantumr.

7 Tan sanen si Coriantumr anengneng to a ñgalñgali la ra nadakep sikato so binmatik lamet ed arap na saray totoo nen Shiz.

8 Tan agawa a sikato so akasabi ed saray danum na Ripliancum, a, no saya so ipatalus, so baleg, odino pinalabsanan to so amin; lapu ed ontan, sanen sinmabi ra ed saya a danum impaalagey da so saray abong-abong da ya abel; tan si Shiz impaalagey to met so abong-abong to ya abel ed asinger ed sikara; tan dia ed ontan dia ed kaimbuasan sikara so linma ed bakal.

9 Tan agawa a sikara so nanlalaban na mapalalo a makapaermen a bakal, a dia ed saya si Coriantumr so asugatan lamet, tan sikato so naandian na liknaan lapu ed abawasan na dala.

10 Tan agawa a saray ñgayew nen Coriantumr dinesdes da so saray ñgayew nen Shiz kanian sikara so tinalo ra, kanian sikara so apabatik da; tan sikara so binmatik ed mamaabalaten, tan impaalagey da so saray abong-abong da ya abel ed sakey a pasen a tatawagen na Ogath.

11 Tan agawa a say ñgayew nen Coriantumr impaalagey da so saray abong-abong da ya abel ed pukdol na Ramah; tan saya lamlamang a pukdol so añgiamotan nen amak a Mormon ed saray kasulatan ed Katawan, a saraya so sagrado.

12 Tan agawa a tinipon da ya amin so totoo ed amin a tapew na dalin, ya ag apatey, likud labat ed si Ether.

13 Tan agawa a si Ether naimatonan to so amin a kiwas na saray totoo; tan anengneng to a saraman so totoo a kaiba nen Coriantumr so akitipon a linmaok ed ñgayew nen Coriantumr; tan saraman so totoo a kaiba nen Shiz so akitipon met a linmaok ed ñgayew nen Shiz.

14 Dia ed ontan, sikara so nantipon na saray totoo dia ed loob na apatira a taon, pian naala ra ya amin so wala ed tapew na dalin, tan pian naawat da so amin a biskeg a nayarian da ya awaten.

15 Tan agawa a sanen sikara la ya amin so atipon a nankakasakey, balang sakey no dinan a ñgayew so pitiponan to, a kaiba ra so saray kaasawaan da tan saray anak da—mandapag a lalaki, bibii tan ugogaw so naayuraan na agamil ed bakal, a wala so salimbeng, salimbeng ed pagew, tan salimbeng ed ulo, tan sikara so akawesan ya onkana ed bakal—sikara so nankurang ya akiabet ed sakey sumpa ed sananey a mibakal; tan sikara so nanlalaban ed legan na saman ya agew, tan angapo so analo.

16 Tan agawa a sanen sinmabi so labi sikara so abanalan, tan sikara so nampainawa ed saray kampo ra; tan kayari a sikara so nampainawa ed saray kampo ra sikara so nanaglem tan naniñgel lapu ed inkaandi na saray inatey ed saray totoo ra; tan ontan la so kasil na akis da, saray panaglem da, tan paniñgel da, kanian napno so dagem na mapalalo ya uñgol da.

17 Tan agawa a dia ed kaimbuasan sikara lamet so nanlalaban, tan agay la tan makapataktakot so saman ya agew; manwari ya ontan, angapo so analo, tan sanen sinmabi so labi lamet napno so dagem na saray akis da, tan saray panaglem da, tan saray panermen da, makaseñgeg ed inkaandi na saray inatey ed saray totoo ra.

18 Tan agawa a si Coriantumr nangawa lamet na sulat ed si Shiz, a pilalek to a sikato so ag la onla a mibakal, balet alaen to la so panarian, tan iligyas to so bilay na saray totoo.

19 Balet nia, say Espiritu na Katawan so tinmonda la a miaayam ed sikara, tan si Satanas so awalaan na nagnap a pakapanyari ed puso na saray totoo, lapu ed sikara so adakep ed kaawetan na saray puso ra, tan say inkabulag na saray nunot da pian sikara so naderal; lapu ed ontan sikara lamet so linma ya akilaban.

20 Tan agawa a sikara so nanlalaban ed loob na saman ya agew, tan sanen sinmabi so labi inmugip la ra a sankabembenan da so saray espada ra.

21 Tan dia ed kaimbuasan sikara so nanlalaban ya anga ed sinmabi so labi.

22 Tan sanen sinmabi so labi sikara so abuek ed sanok, a siñga sakey a too ya abuek na alak; tan sikara lamet so inmugip a sankabembenan da so saray espada ra.

23 Tan dia ed kaimbuasan nanlalaban ira lamet; tan sanen sinmabi so labi sikara ya amin so niparukol ed panamegley na espada likud ed limamplo tan dua ed saray totoo nen Coriantumr, tan anemaplo tan siam ed saray totoo nen Shiz.

24 Tan agawa a sikara so inmugip a sankabembenan da so saray espada ra ed saman a labi, tan dia ed kaimbuasan sikara lamet so nanlalaban, tan sikara so nanlalaban ed angaan na nayarian da ed panamegley na saray espada ra tan salimbeng da, ed loob na saman ya agew.

25 Tan sanen sinmabi so labi wala so talomplo tan dua ed saray totoo nen Shiz, tan duamplo tan pito ed saray totoo nen Coriantumr.

26 Tan agawa a sikara so añgan tan inmugip, tan namparaan ira ed patey dia ed kaimbuasan. Tan sikara so ankakabaleg tan mabibiskeg a lalaki no nipaakar ed biskeg na too.

27 Tan agawa a sikara so nanlalaban ed loob na talora ya oras, tan sikara so naandian na liknaan lapu ed naekalan ira na dala.

28 Tan agawa a sanen saray totoo nen Coriantumr so akala ra na magenap a biskeg a sikara so makakurang, ñgalñgali a sikara la so ombatik a mañgiagel ed saray bilay da; balet nia, inmalagey si Shiz, tan ontan met na saray totoo to, tan insamba to ed sanok to a pateyen to si Coriantumr odino andi sikato so ompatey ed panamegley na espada.

29 Lapu ed ontan, inosilan to ra, tan dia ed kaimbuasan sikara so naabotan to; tan sikara lamet so nanlalaban ed panamegley na espada. Tan agawa a sanen sikara la ya amin so niparukol ed panamegley na espada, likud ed si Coriantumr tan si Shiz, nia si Shiz naandian na liknaan lapu ed abawasan na dala.

30 Tan agawa a sanen si Coriantumr so sinmaral ed espada to, pian makapainawa na daiset, tinipas to so ulo nen Shiz.

31 Tan agawa a kayari to a tinipas so ulo nen Shiz, tan si Shiz inatagey to so laman to ya intekang to so lima to tan abaktar; tan kayari a sikato so nairapan a sinmuñgap, sikato so inatey.

32 Tan agawa a si Coriantumr so niparukol ed dalin, tan nanmaliw a siñga angapo la so bilay to.

33 Tan say Katawan nansalita ed si Ether, tan inkuan to ed sikato: Sika so onla. Tan sikato so linma, tan anengneng to a saray sinalita na Katawan so amin asumpal; tan sinumpal to so saray kasulatan to; (tan say kakalasus a kabiañgan ag ko la insulat) tan saraya so iniamot to ed sakey a kanengneñgan ya unong na impakaalmo na saray totoo nen Limhi ed saraya.

34 Natan saray sampot a salita ya insulat nen Ether so saraya: No bilang say Katawan gawaen to ed siak so kauman na kanengneñgan ko ed inkalaman, odino itepel ko so linawa na Katawan ed saya a laman, ag la makana ed siak, dapot no siak so nilaban ed panarian na Dios. Amen.