1 Tan natan siak, Moroni, ituloy ko a sumpalen so kasulatan ko nipaakar ed kaderal na saray totoo a sikara so isosulat ko.

2 Tan nia, ag da inawat so amin a salita nen Ether; tan petepeteg ya imbaga to ed sikara so amin a beñgatla, manlapu ed ingapo na too; tan kayari ya inmekat so danum ed tapew na dalin saya so nanmaliw ya apili-pili a dalin ed amin ya arum a dalin, sakey a dalin a pinili na Katawan; dia ed ontan say Katawan pilalek to ya amin a totoo a manayam ed tapew na saya so manlingkor ed sikato;

3 Tan saya so pasen na Balo a Jerusalem, ya onleksab manlapu ed tawen, tan say masanto ya ayaman na Katawan.

4 Nia, si Ether anengneng to so saray agew nen Cristo, tan sinalita to so nipaakar ed Balo a Jerusalem ed saya a dalin.

5 Tan asalita to met so nipaakar ed kailalakan na Israel, tan say Jerusalem a nanlapuan nen Lehi—kayari a saya so naderal saya so ipaalagey lamet, sakey a masanto a ciudad ed Katawan; dia ed ontan, ag nayari a saya so Balo a Jerusalem tan sipor la so saya nen kadaanan a panaon; balet saya so ipaalagey lamet, tan manmaliw a masanto a ciudad na Katawan; tan saya so ipaalagey ed kailalakan na Israel—

6 Tan say sakey a Balo a Jerusalem so ipaalagey ed saya a dalin, ya onkana ed saray nakdaan ed boleg nen Jose, a saya a beñgatla wala nen saman so kaolibay to.

7 Tan unong a si Jose inawit to so ama to ed dalin na Egipto, angan ontan sikato so inatey diman; dia ed ontan, say Katawan añgawit na sakey a nakdaan ed boleg nen Jose ya impaway ed dalin na Jerusalem, tan sikato so mapañgasi ed saray boleg nen Jose pian sikara so ag ompatey, angan siñga panañgasi to ed ama nen Jose kanian sikato so ag ompatey.

8 Dia ed ontan, saray nakdaan ed abong nen Jose so nipatalindeg ed saya a dalin; tan saya so dalin a tawir da; tan impaalagey da so sakey a masanto a ciudad ya onkana ed Katawan, a siñga Jerusalem ed kadaanan; tan sikara so ag la nakewkew, ya anga ed kasampotan so onsabi sano saya a dalin so naandi.

9 Tan wala so balo a tawen tan balo a dalin; tan saraya met lamlamang so kaolibay na daan, likud no saman so daan so naandi la, tan amin a beñgatla nanmaliw la a balo.

10 Tan dia ed saman onsabi so Balo a Jerusalem; tan mapalar so saray manaayam diman, lapu ed saray kawes da so apaputi ed panamegley na dala na Cordero; tan sikara so nibilang ed limog na nakdaan ed boleg nen Jose, a sikara so wala ed kailalakan na Israel.

11 Tan dia ed saman onsabi met la so Jerusalem a kadaanan; tan saray manaayam diman, sikara so mapalar, lapu ed sikara so naorasan la ed dala na Cordero; tan sikara so nitaytayak tan atipon a nanlapu ed apatira a suyok na dalin, tan nanlapu ed saray dalin ed baybay a bansa, tan sikara so akibiang ed pakasumpal na paknaan a ginawa na Dios ed kaamaan da, ya Abraham.

12 Tan sano saraya a beñgatla so onsabi, say kagawa na masanto a kasulatan a nankuan, wala so saray akauna, manmaliw ira a sampot; tan wala so saray sampot, a manmaliw a makauna.

13 Tan ñgalñgali ak mansulat ni na dakel, balet siak so asebelan; balet makana tan makapakelaw so saray profesiya nen Ether; balet sikato so ag da pinabli, tan sikato so pinapaway da; tan sikato so inmamot ed dalem na letak na bato legan na agew, tan dia ed labi sikato so pinmaway a mannengneng ed saray beñgatla ya onsabi ed saray totoo.

14 Tan legan na panaayam to ed dalem na letak na bato ginawa to so nakekeraan ni ed saya a kasulatan, a nenengneñgen to so kadederal ya onsasabi ed saray totoo, ed labi.

15 Tan agawa a dia ed saman lamlamang a taon a sikato so pinapaway da a nanlapu ed limog na saray totoo wala so ginmapo a sakey a baleg a bakal ed limog na saray totoo, tan wala so dakel ya inmalsa a mabibiskeg a totoo, tan nampilalekan da a deralen si Coriantumr ed maamot a plano na karelmeñgan, a saya so asalita la.

16 Tan natan si Coriantumr, lapu ed naaral to, ed inkasikato, so amin a kiwas ed pibabakal tan amin a kasiliban na mundo, dia ed ontan sikato so akilaban ed saray nampilalek a manderal ed sikato.

17 Balet sikato so ag nambabawi, ni saray malilingas ya anak to a lalaki ni say bibii; ni saray malilingas a lalaki tan bibii ya anak nen Cohor; ni saray malilingas a lalaki tan bibii ya anak nen Corihor; tan dia ed antikey a salita, angapo ed amin a malilingas ya anak a lalaki tan bibii na amin a dalin so nambabawi ed saray kasalanan da.

18 Dia ed ontan, agawa a dia ed unaan a taon ya impanayam nen Ether ed letak na bato, dakel so saray totoo so apatey ed panamegley na espada na saraman so maamot a panununoñgan, a sikara so milalaban sumpa ed si Coriantumr pian nagamoran da so panarian.

19 Tan agawa a saray lalaki ya anak nen Coriantumr so akibakal a maong tan dakel a dala so tinmerter.

20 Tan dia ed komadua a taon sinmabi so salita na Katawan ed si Ether, a sikato so onla a mamprofesiya ed si Coriantumr a, sano sikato so mambabawi, tan amin a kabubong to, say Katawan iter to ed sikato so panarian to tan iligyas to so saray totoo—

21 Odino andi sikara so naderal tan amin a kabubong to likud lambeñgat ed sikato. Tan sikato labat so mambilay pian naimatonan to so kasumpal na saray profesiya a saraya so asalita la nipaakar ed sananey a totoo a mañgawat ed saman a dalin ya onkana a tawir da; tan si Coriantumr awaten to so pañgipumpon ed panamegley da; tan balang sakey a kamarerua so naderal likud lambeñgat ed si Coriantumr.

22 Tan agawa a si Coriantumr so ag nambabawi, ni saray kabubong to, ni saray totoo; tan say bakal ag tinmonda; tan nampilalekan da a pateyen si Ether, balet sikato so binmatik a tinmaynan ed sikara tan sikato so inmamot lamet ed letak na bato.

23 Tan agawa a wala so tinmalindeg a say ñgaran to Shared, tan akilaban met ed si Coriantumr; tan sikara so tinalo to, a dia ed onia ed komatlo a taon sikara so inawit to ed inkadakep.

24 Tan saray lalaki ya anak nen Coriantumr, dia ed komapat a taon, tinalo ra si Shared, tan abawi ra so panarian lamet ya onkana ed si ama ra.

25 Natan wala so ginmapo a bakal ed amin a tapew na dalin, a balang sakey a too tan say kaolop to so milalaban unong ed pilalek to.

26 Tan wala so saray matatakew, tan dia ed antikey a salita, amin a kanengneñgan na karelmeñgan ed amin a tapew na dalin.

27 Tan agawa a si Coriantumr mapalalo so pasnok to ed si Shared, tan sikato so linma sumpa ed sikato a kaiba to so ñgayew to a milaban; tan sikara so nanabet ed baleg a pasnok, tan sikara so nanabet ed patar na Gilgal; tan say bakal so nanmaliw a mapalalo a makapaermen.

28 Tan agawa a si Shared so akibakal ed sikato ed loob na talora ya agew. Tan agawa a si Coriantumr so analo ed sikato, tan sikato so inosilan to anga ed patar na Heshlon.

29 Tan agawa a si Shared so akibakal lamet ed patar; tan nia, tinalo to si Coriantumr, tan sikato so sinunson to anga ed patar na Gilgal.

30 Tan si Coriantumr so akibakal lamet ed si Shared ed patar na Gilgal, tan dia ed saya tinalo to si Shared tan sikato so pinatey to.

31 Tan si Shared asugatan to si Coriantumr ed ulpo, kanian sikato so ag la linma ed bakal ed loob na duara a taon, a dia ed loob na saya a panaon amin a totoo ed tapew na dalin so mampapaterteran na dala, tan angapo so mambano ed sikara.