1 Tan agawa ya inilalak to si Omer, tan si Omer so nanoley a sinmublay ed sikato. Tan si Omer inilalak to si Jared; tan si Jared nanilalak na lalaki tan bibii.

2 Tan si Jared so inmalsa sumpa ed si ama to, tan sikato so linma tan nanayam ed dalin na Heth. Tan agawa a sinagyat to so dakel a totoo, lapu ed kasiliban na panagsalita to, anga ed naala to so kapaldua na panarian.

3 Tan sanen naala to la so kapaldua na panarian nilabanan to si ama to, tan inawit to si ama to ed inkadakep, tan ginawa to a sikato so manlingkor ed inkadakep;

4 Tan natan, dia ed saray agew na impanoley nen Omer sikato so wala ed inkadakep ed kapaldua na saray agew to. Tan agawa a sikato so nanilalak na lalaki tan bibii, a dia ed limog da si Esrom tan Coriantumr;

5 Tan sikara so awalaan na mapalalo a pasnok lapu ed kagagawa nen agi ra a Jared, lapu ed saya añgitalindeg ira na ñgayew tan nilabanan da si Jared. Tan agawa a sikato so nilabanan da ed labi.

6 Tan agawa a sanen apatey da so ñgayew nen Jared sikato met so ñgalñgali da la pateyen; tan sikato so akikasi ed sikara a sikato so ag da papateyen, tan iter to la so panarian ed si ama to. Tan agawa ya iniabuloy da ed sikato so bilay to.

7 Tan natan mapalalo so ermen nen Jared lapu ed inkabalang na panarian to, tan inteen to so puso to ed panarian tan gloria na mundo.

8 Natan say bii ya anak nen Jared lapu ed mapalalo a marunong, tan dia ed anengneng to so kaermenan nen ama to, anunotan to so mangawa na sakey a plano a dia ed saya nabawi to so panarian ya onkana ed si ama to.

9 Natan say bii ya anak nen Jared so magangana a maong. Tan agawa a sikato so akitungtong ed si ama to, tan inkuan to ed sikato: Anto so makaseñgeg a say amak mapalalo so ermen to? Ag to kasi abasa so kasulatan ya inawit na kaamaan tayo ya imbaliw ed baleg a kaaraleman? Nia, angapo kasi so nisulat nipaakar ed saray atateng ya inmuna, a sikara dia ed panamegley na maamot a plano agamoran da so saray panarian tan baleg a gloria?

10 Tan natan, lapu ed ontan, nepeg a mampabaki so amak ed si Akish, ya anak nen Kimnor; tan nengneng mo, magangana ak, tan siak so onsayaw ed arap to, tan sikato so paliketen ko, pian pampilalekan to ak ya asawaen; dia ed ontan no kerewen to ed sika a siak so iter mo ed sikato ya asawa, dia ed ontan ikuan mo: Sikato so iter ko no awiten mo dia ed siak so ulo nen amak, ya ari.

11 Tan natan si Omer so kaaro nen Akish; dia ed ontan, sanen si Jared so nampabaki ed si Akish, say bii ya anak nen Jared so nansayaw ed arap to kanian sikato so apaliket to, a dia ed saya nampilalekan to ya asawaen. Tan agawa a sikato so nankuan ed si Jared: Sikato so iter mo ed siak ya asawaen ko.

12 Tan si Jared inkuan to ed sikato: Sikato so iter ko ed sika, no awiten mo ed siak so ulo nen amak, ya ari.

13 Tan agawa a si Akish tinipon to ed abong nen Jared so amin a kakanayon to, tan inkuan to ed sikara: Sambaan yo kasi ed siak a sikayo so matuor ed sakey a beñgatla a pilalek ko ed sikayo?

14 Tan agawa a sikara ya amin so nansamba ed sikato, dia ed Dios na tawen, tan ontan met ed katawenan, tan ontan met ed dalin, tan dia ed saray ulo ra, a siopaman ya onsian ed pañgiter to na tulong a pilalek nen Akish naandi so ulo to; tan siopaman so mañgipaamta ed saray beñgatla ya ipakabat nen Akish ed sikara, sikato met lamlamang so naandian na bilay.

15 Tan agawa a dia ed onia sikara so akiabubon ed si Akish. Tan si Akish impansamba to ra ed samba a siñga saraman so kadaanan a sikara so nampilalek met na pakapanyari, a saya so nanaawatan a nanlapu ed si Cain, a sikato so managpatey a nanlapu la ed gapo.

16 Tan saraya so nisinop ed pakapanyari na demonyo pian saraya a samba so niiter ed saray totoo, pian napagnayon ira ed kabiluñgetan, pian ontulong ira ed siopaman a mananap na pakaoley pian makagamor na pakapanyari, tan mamatey, tan mansamsam, tan mantila, tan mangawa na amin a kanengneñgan na karelmeñgan tan inkabalangkantis.

17 Tan say bii ya anak nen Jared so añgiter ed puso to a mananap ed saray beñgatla nipaakar ed saray kadaanan; tan si Jared so añgiter ed puso nen Akish; dia ed ontan, si Akish so añgiter ed saray kakanayon to tan kakaaro to, ya intabin to ra ya iniarawi ed marakep a sipan a mangawa ed antokaman a beñgatla a pilalek to.

18 Tan agawa a sikara so nantibukel na maamot a pannununoñgan, angan siñga gawa na saraman ed kadaanan; a saya a pannununoñgan so sankarumsisan tan sankarelmeñgan ed labas na amin, dia ed mata na Dios.

19 Tan say Katawan ag mankikimey ed maamot a pannununoñgan, ni say labay to a say too so mamaterter na dala, balet dia ed amin a beñgatla saya so insebel to, nanlapu la ed gapo na too.

20 Tan natan siak, Moroni, ag ko la isulat so kanengneñgan na saray samba ra tan saray pannununoñgan da, lapu ed nipakabat ed siak a saya so wala ed amin a limog na totoo, tan saya so wala ed limog na saray Lamanite.

21 Tan saya so señgegan na inkaderal na saya a totoo a sikara natan so sasalitaen ko, tan ontan met ed inkaderal na saray totoo nen Nephi.

22 Tan siopaman a bansa a mañgitalindeg ed onia a maamot a pannununoñgan, pian makagamor na pakapanyari tan gungona, anga ed itayak da ed saray bansa, nengneng yo, sikara so naderal; lapu ed say Katawan ag to itepel a say dala na saray sasantos to, a pinaterter da, sikara so lawas ya onakis ed sikato a manlapu ed dalin onkana ed kababales ed sikara tan ag to ra ibales.

23 Dia ed ontan, O sikayo a Gentiles, kakabatan ed Dios a saraya a beñgatla so nepeg ya ipanengneng ed sikayo, pian dia ed saya sikayo komon so mambabawi ed saray kasalanan yo, tan ag yo itepel a saraya a panagpatey a pannununoñgan so ontaluna ed sikayo, a saraya so nipatalindeg pian makaala na pakapanyari tan gungona—tan say kimey, on, angan say kimey na kadederal so onsabi ed sikayo, on, angan say espada na kaptekan na Andi-Angaan a Dios so ondapo ed sikayo, ed kibasbas tan kaderal yo no abuloyan yo a saraya a beñgatla so nagawa.

24 Dia ed ontan, say Katawan igagangan to ed sikayo, a sano nanengneng yo so saraya a beñgatla ya onsabi ed limog yo komon naliing so liknaan yo ed makapataktakot a kipapasen, makaseñgeg ed saya a maamot a pannununoñgan ya onsabi ed limog yo; odino abagey la so saya, lapu ed dala na saraman so pinatey; lapu ed sikara so onakis a manlapu ed sapok onkana ed kababales ed saya, tan ed saraman so añgitalindeg ed saya.

25 Tan nagawa a siopaman a mañgipatalindeg ed saya ya anapen to so pañgekal ed kawayañgan na amin a dalin, nacion, tan saray bansa; tan saya so mañgawit na kagawa na kaderal na amin a totoo, tan saya so impatalindeg na demonyo, a sikato so ama na amin a tila; angan saman lamlamang so matila a nampalikdo ed saray unaan ya atateng tayo, on, angan saman lamlamang so managtila a nangangan ed too a mangawa na panagpatey a nanlapu la ed gapo; a sikato so amaawet ed puso na saray totoo kanian pinapatey da so saray profeta, tan tinutopak da ra, tan sikara so pinapaway da a nanlapu la ed gapo.

26 Dia ed ontan, siak, Moroni, siak so nigangan a mañgisulat ed saraya a beñgatla pian nipaliis so mauges, tan pian onsabi so panaon a si Satanas angapo so pakapanyari to ed puso na saray anak na totoo, balet sikara komon so nakuyong a mangawa na maong ya andi-tonda, pian komon sikara so makasabi ed subol na amin ya inkamatunong tan sikara so nilaban.