1 Tan agawa a si Shez, a kapolian nen Heth—tan si Heth so inatey ed eras, tan amin a kabubong to likud lambeñgat ed si Shez—dia ed ontan, si Shez ginapoan to a tiponen lamet so saray asiansian a totoo.

2 Tan agawa a si Shez anunotan to so inkaderal na kaamaan to, tan sikato so añgipaalagey na matunong a panarian; lapu ed anunotan to so ginawa na Katawan ed impañgawit to ed si Jared tan say laki ya agi to a binmaliw ed kaaraleman; tan sikato so nankurang ed dalan na Katawan; tan sikato so nanilalak na lalaki tan bibii.

3 Tan say sankapañguloanan ya anak to a laki, a say ñgaran to Shez, so inmalsa sumpa ed sikato; angaman ontan, si Shez so kinabil na lima na sakey a matakew, lapu ed mapalalo a kayamanan to, a saya so añgawit na kareenan lamet ed si ama to.

4 Tan agawa a si ama to so añgipaalagey na dakel a ciudad ed tapew na dalin, tan saray totoo ginapoan da lamet so ontayak ed amin a tapew na dalin. Tan si Shez so nambilay anga ed mapalalo a takken; tan inilalak to si Riplakish. Tan sikato so inatey, tan si Riplakish so nanoley a sinmublay ed sikato.

5 Tan agawa a si Riplakish ag to ginawa so saman so matunong ed pakanengneng na Katawan, tan sikato so awalaan na dakel ya asawa tan kamalala, tan impasakbat to ed takeb na saray totoo so makapaermen a sasakbaten; on, sikara so impambuis to na ambelat a buis; tan nanlapu ed saray buis sikato so nampaalagey na saray maawang a paalagey.

6 Tan sikato so añgipaalagey na mapalalo a marakep a trono ya onkana ed sikato; tan sikato so añgipaalagey na dakel a pañgawan, tan siopaman ya ag makabayar na buis sikato so impisok to ed pañgawan; tan siopaman so ag mambayar na buis sikato so impisok to ed pañgawan tan ingangan to a magnayon ira a mansagpot onkana ed pambilay da, tan siopaman ya ag to labay so mansagpot ingangan to a pateyen.

7 Lapu ed ontan agamoran to so amin a mararakep a kimey, on, angan saray marakep a balitok to so pinarakep ed atagey ya ori ed dalem na pañgawan; tan amin a nengneng na marakep ya inkakimey so impagawa to ed dalem na pañgawan. Tan agawa a pinairap to so saray totoo ed onkana inkabalangkantis tan karumsisan to.

8 Tan sanen sikato so nanoley ed loob na apataplo tan dua a taon saray totoo so inmalsa sumpa ed sikato; tan ginmapo lamet so bakal ed saman a dalin, lapu ed saya si Riplakish so apatey, tan saray kapolian to so sinunson da ed paway na dalin.

9 Tan agawa a kayari na dakel a taon, si Morianton (sikato so sakey a kapolian nen Riplakish) so nantipon na ñgayew to a nanlapu ed saraman so apagit, tan sikara so linma ya akilaban ed saray totoo; tan sikato so akagamor na pakapanyari ed dakel a ciudad; tan say bakal nanmaliw a mapalalo ya ermen, tan nampatuloy ed dakel a taon; tan asamsam to so pakapanyari ed amin a dalin, tan inletneg to so inkasikato ya ari ed amin na dalin.

10 Tan kayari na impañgiletneg to ed inkasikato ya ari pinalemew to so ambelat a sasakbaten na saray totoo, a lapu ed saya sikato so akala na palabo ed mata na saray totoo, tan sikato so nilanaan da ya ari ra.

11 Tan ginawa to so kaptekan ed saray totoo, balet aliwa a dia ed inkasikato a dili lapu ed kinarakel na inkabalangkantis to; lapu ed ontan sikato so ataksing ed arap na Katawan.

12 Tan agawa a si Morianton so añgipaalagey na dakel a ciudad, tan saray totoo nanmaliw a mapalalo a mayaman legan ed oley to, mandapag ed saray paalagey, tan dia ed saray balitok tan pilak, tan dia ed saray dawa, tan dia ed saray karnero, tan saray baka, tan saray beñgatla a nipawil ed sikara.

13 Tan si Morianton so nambilay ed mapalalo a takken, tan dia ed saman inilalak to si Kim; tan si Kim so nanoley a sinmublay ed si ama to; tan sikato so nanoley a walo a taon, tan inatey si ama to. Tan agawa a si Kim so ag nanoley ed inkamatunong, dia ed ontan sikato so ag pinalaboan na Katawan.

14 Tan say agi to a laki so tinmalindeg ya inmalsa sumpa ed sikato, lapu ed saya sikato so naawit ed inkadakep; tan sikato so nansiansia ed inkadakep ed amin ya agew to; tan sikato so nanilalak na lalaki tan bibii dia ed inkadakep, tan dia ed katakkenan to inilalak to si Levi; tan sikato so inatey.

15 Tan agawa a si Levi so nanlingkor ed loob na inkadakep kayari impatey nen ama to, ed loob na apataplo tan dua a taon. Tan sikato so akibakal sumpa ed ari na dalin, lapu ed saya agamoran to so panarian ya onkana ed sikato.

16 Tan kayari to a naala ya onkana ed inkasikato so panarian ginawa to so matunong ed pakanengneng na Katawan; tan saray totoo so inmaliguas ed dalin; tan sikato so nambilay ed maong a takken, tan nanilalak na lalaki tan bibii; tan inilalak to met si Corom, a sikato so nilanaan to ya ari a sinmublay ed sikato.

17 Tan agawa a si Corom ginawa to so saman so maabig ed pakanengneng na Katawan ed amin ya agew to; tan sikato so nanilalak na dakel a lalaki tan bibii; tan kayari na impakanengneng to ed dakel ya agew sikato so inatey, siñga saray arum dia ed dalin; tan si Kish so nanoley a sinmublay ed sikato.

18 Tan agawa a si Kish so inatey met, tan si Lib so sinmublay ed sikato a nanoley.

19 Tan agawa a si Lib ginawa to met so maabig ed pakanengneng na Katawan. Tan dia ed saray agew nen Lib saray madita ya oleg so inaatey la. Dia ed ontan sikara so linma ed dalin a mamaabalaten, a mañganop na naakan ya onkana ed saray totoo ed saman a dalin, tan say dalin so amayakmakan na saray ayayep na katakelan. Tan si Lib so nanmaliw met a maong ya omaanop.

20 Tan sikara so añgipaalagey na sakey a baleg a ciudad ed saman so makisir a pasen na dalin, ed saman a pasen a say dayat pinaldua to so dalin.

21 Tan iniagel da so dalin a mamaabalaten a pinagnayon da a kalawakan, pian onkana ed panaganopan da. Tan say amin a tapew na dalin ed mamabaybay so napno na saray totoo.

22 Tan sikara so mapalalo ed kuli, tan sikara so nansasaliwan tan nanlalakoan tan sikara so nannegosyo ed sakey tan sakey, pian sikara so makaala na gungona,

23 Tan sikara so nankimey ed amin a nengneng na minas tan sikara so nankimey ed balitok, tan pilak, tan balatyang, tan gansa, tan amin a nengneng na saray mital; tan sikara so nankutkot ed dalin; dia ed ontan, insasakbit da so saray ankakabaleg a bunton na dalin pian sikara so makaala na minas, na balitok, tan pilak, tan balatyang, tan tanso. Tan sikara so nankimey ed amin a nengneng na mararakep a kimey.

24 Tan sikara so awalaan na abel a seda, tan mararakep ya inkagawa ya abel a lienso; tan sikara so nankimey na nambabañgil a nengneng na abel, pian nakawesan da so inkasikara ed inkalakseb da.

25 Tan sikara so nangawa na amin a kanengneñgan na kagawaan ya onkana ed panagdalos, mandapag a pambaka tan panagtanem, say panagani tan say panagbokalkal, tan ontan met ed say panagilik.

26 Tan sikara so nangawa na amin a kanengneñgan na kagawaan a saraya so ikana ra ed saray ayep da a panagkimey.

27 Tan sikara so nangawa na amin a kanengneñgan na agamil ed bakal. Tan sikara so nankimey ed amin a kanengneñgan na kimey a makatawag na imano,

28 Tan angapo la so arum a totoo a mapalar nen say sikara, tan lalo a pinaaliguas ed lima na Katawan. Tan sikara so wala ed dalin ya apili-pili ed amin a dalin, tan say Katawan so añgibaga ed saya.

29 Tan agawa a si Lib so nambilay na dakel a taon, tan nanilalak na lalaki tan bibii; tan inilalak to met si Hearthom.

30 Tan agawa a si Hearthom so nanoley a sinmublay ed si ama to. Tan sanen si Hearthom so akapanoley la ed loob na duamplo tan apat a taon, nia, say panarian so naala ed sikato. Tan sikato so nanlingkor ed dakel a taon ed inkadakep, on, angan amin ed saray nakdaan ya agew to.

31 Tan inilalak to si Heth, tan si Heth so nambilay ed inkadakep ed amin ya agew to. Tan si Heth inilalak to si Aaron, tan si Aaron so nanayam ed inkadakep ed amin ya agew to; tan inilalak to si Amnigaddah, tan si Amnigaddah so nanayam met ed inkadakep ed amin ya agew to; tan inilalak to si Coriantum, tan si Coriantum so nanayam ed inkadakep ed amin ya agew to; tan inilalak to si Com.

32 Tan agawa a si Com naala to so kapaldua ed say panarian. Tan inoleyan to so kapaldua ed say panarian ed loob na apataplo tan dua a taon; tan sikato so linma a linmaban sumpa ed ari, si Amgid, tan sikara so nanlaban ed loob na dakel a taon, dia ed loob na saya a panaon si Com naala to so pakapanyari ed si Amgid, tan agamoran to so pakapanyari ed nakekeraan ed panarian.

33 Tan dia ed saray agew nen Com wala so ginmapo a matatakew ed saman a dalin; tan inkana ra so saray daan a plano, tan sikara so nanagamil na samba a siñga ugali na kadaanan, tan nampilalekan da lamet a deralen so panarian.

34 Natan si Com so akilaban a maong sumpa ed sikara; angaman ontan, sikato so ag tinmaluna ed sikara.