1 Tan agawa si Orihah so añgokom ed saman a dalin ed inkamatunong dia ed amin ya agew to, a saray agew to so mapalalo a dakel.

2 Tan sikato so nanilalak na lalaki tan bibii; on, talomplo tan sakey so ilalak to, a dia ed saraya duamplo tan talo so lalaki.

3 Tan agawa ya inilalak to met si Kib ed intakken to. Tan agawa a si Kib so nanoley a sinmublay ed sikato; tan si Kib inilalak to si Corihor.

4 Tan sanen si Corihor so mantaon na talomplo tan dua inmalsa sumpa ed si ama to, tan sikato so linma tan nanayam ed dalin na Nehor; tan sikato so nanilalak na lalaki tan bibii, tan sikara so mapalalo a malimgas; lapu ed ontan si Corihor dakel so saray totoo ya akitipon ed sikato.

5 Tan sanen akatipon la na ñgayew sikato so pinmegdat ed dalin na Moron a diman so panaayaman na ari, tan sikato so dinakep da, ya agawa so sinalita nan agi nen Jared a sikara so naawit ed inkadakep.

6 Natan say dalin na Moron, a saya so panaayaman na ari, so asinger ed saman a dalin a tatawagen ya Apalis na saray Nephite.

7 Tan agawa a si Kib so nambilay ed inkadakep, tan saray totoo to so wala ed oley nen Corihor ya anak to a laki, anga ed sikato so mapalalo a tinmakken; manwari ya ontan si Kib inilalak to si Shule ed inkatakken to, legan a sikato ni so wala ed inkadakep.

8 Tan agawa a si Shule so sinmanok ed say laki ya agi to; tan si Shule so binmiskeg, tan nanmaliw a makapanyari ed biskeg na sakey a too, tan sikato met so makapanyari ed panañgokom.

9 Dia ed ontan, sikato so linma ed pukdol na Efraim, tan sikato so nantunaw nanlapu diman ed pukdol, tan nangawa na saray espada a nanlapu ed asiro ya onkana ed saraman so akitipon a totoo ed sikato; tan kayari a sikato so añgiter na kampilan ed sikara sikato so pinmawil ed ciudad na Nehor, tan nilabanan to so laki ya agi to a si Corihor, a lapu ed saya a pamaakaran agamoran to so panarian tan impawil to ed si ama to a Kib.

10 Tan natan lapu ed saya a beñgatla a ginawa nen Shule, initer nen ama to ed sikato so panarian; dia ed ontan sikato so nanoley a sinmalat ed si ama to.

11 Tan agawa a ginawa to so panañgokom ed inkamatunong; tan intayak to so panarian to ed amin a tapew na dalin, tan saray totoo nanmaliw la ra a mapalalo a dakel.

12 Tan agawa a si Shule so nanilalak na dakel a lalaki tan bibii.

13 Tan si Corihor so nambabawi ed dakel a kaugsan a ginagawa to; lapu ed ontan initer to ed si Shule so pakapanyari ed panarian to.

14 Tan agawa a si Corihor so awalaan na dakel ya anak a lalaki tan bibii. Tan dia ed limog na saray lalaki ya anak nen Corihor wala so sakey a say ñgaran to Noah.

15 Tan agawa a si Noah inmalsa sumpa ed si Shule, ya ari, tan ontan met ed si ama to a Corihor, tan aguyor to si Cohor ya agi to a laki, tan ontan met ed amin a kaagian to tan dakel ed saray totoo.

16 Tan sikato so akilaban ed si Shule, ya ari, lapu ed saya agamoran to so dalin a tawir da; tan sikato so nanmaliw ya ari ed saman a kabiañgan na dalin.

17 Tan agawa ya akilaban lamet ed si Shule, ya ari; tan adakep to si Shule, ya ari, tan sikato so inawit to a dinakep to ed Moron.

18 Tan agawa a sanen sikato so ñgalñgali to la pateyen, saray lalaki ya anak nen Shule so nankurang a maamot ed abong nen Noah dia ed labi tan sikato so pinatey da, tan dineral da so puerta na pañgawan tan impaway da si ama ra, tan sikato so impasen da ed trono to diman ed dili a panarian to.

19 Dia ed ontan, say laki ya anak nen Noah impaalagey to so panarian a sinmublay ed sikato; manwari ya ontan ag da naala so pakapanyari ed si Shule ya ari, tan saray totoo ya uoleyan nen Shule ya ari so inmaliguas a mapalalo tan sikara so binmiskeg.

20 Tan say bansa so apaldua; tan wala so duara a panarian, say panarian nen Shule, tan say panarian nen Cohor, ya anak nen Noah.

21 Tan si Cohor, ya anak nen Noah, ingangan to ed saray totoo to a labanan da si Shule, a dia ed saya sikara so tinalo nen Shule tan pinatey da si Cohor.

22 Tan natan si Cohor wala so sakey ya anak to a laki ya atawag a Nimrod; tan si Nimrod initer to so panarian nen Cohor ed si Shule, tan sikato so akala na palabo ed mata nen Shule; kanian si Shule initer to so ankakabaleg ira a palabo ed sikato, tan ginawa to ed panarian nen Shule so saray unong ed kaliktan to.

23 Tan ontan met dia ed panaon na impanoley nen Shule wala so saray sinmabi a profeta ed limog na saray totoo, a sikara so nibaki a nanlapu ed Katawan, ya improfesiya ra a say karelmeñgan tan panañgigalang ed saray talintao na saray totoo so mañgaawit na ayew ed saman a dalin, tan sikara so nepeg a naderal no ag ira mambabawi.

24 Tan agawa a saray totoo so nanlodlurey sumpa ed saray profeta, tan sikara so binalaw da. Tan agawa a si ari Shule so nanokom sumpa ed saraman ya amin a nanlodlurey ed saray profeta.

25 Tan sikato so nangawa na sakey a gangan ed lapag na saman a dalin, ya añgiter na pakapanyari ed saray profeta a nayari ra ya onla ed inerman a pasen a labay da; tan lapu ed saya saray totoo so naawit ed pambabawi.

26 Tan lapu ed saray totoo so nambabawi ed saray kasalanan da tan panañgigalang da ed saray talintao say Katawan inligyas to ra, tan ginmapo ra lamet ya inmaliguas ed dalin. Tan agawa a si Shule so nanilalak na lalaki tan bibii dia ed inkatakken to.

27 Tan angapo la so saray bakal ed saray agew nen Shule; tan anunotan to so saray ankabaleg a beñgatla a ginawa na Katawan ed kaamaan da ed impañgawit to ed sikara a binmaliw ed baleg a kaaraleman anga ed dalin a sipan; lapu ed saman sikato so manoley ya okom ed inkamatunong ed amin ya agew to.