1 Tan natan siak, Moroni, ituloy ko so saray kasulatan ko. Dia ed ontan, nia, agawa a lapu ed saray maamot a pannununoñgan nen Akish tan saray kakaaro to, nia, asamsam da so panarian nen Omer.

2 Manwari ya ontan, say Katawan so mapañgasi ed si Omer, tan ontan met ed saray anak to a lalaki tan bibii ya ag da inanap so kaderal to.

3 Tan say Katawan pinasakbayan to si Omer ed sakey a kugip a sikato so ontaynan ed saman a dalin; dia ed ontan si Omer so tinmaynan ed saman a dalin a kaiba to so boleg to, tan nambaroy ira ed loob na dakel ya agew, tan sinmabi tan linmabas ira ed pukdol na Shim, tan akasabi ra ed pasen ya akaderalan na saray Nephite, tan manlapu diman dia ed mamabukig, tan akasabi ra ed sakey a pasen a tatawagen na Ablom, ed gilig na dayat, tan diman impaalagey to so abong-abong to ya abel, tan ontan met na saray anak to a lalaki tan bibii, tan amin a kabubong to, likud lambeñgat ed si Jared tan say boleg to.

4 Tan agawa a si Jared so alanaan ya ari na saray totoo, ed panamegley na lima na karelmeñgan; tan initer to so anak to a bii ed si Akish ya asawaen to.

5 Tan agawa a si Akish nampilalekan to so bilay na katulañgan to a laki; tan inkana to lamet ed saraman so nansamba ed samba unong ed kadaanan, tan agamoran da so ulo nen katulañgan to a laki, sanen sikato so manyodyurong ed trono to, a mampapaliwawa ed saray totoo to.

6 Tan agay la a kabaleg so intayak na saya a mauges tan maamot a muyoñgan kanian dineral to so puso na amin a totoo; dia ed ontan si Jared pinatey da diman ed trono to, tan si Akish so sinmublay ed sikato.

7 Tan agawa a si Akish ginmapo ya onimon ed say laki ya anak to, dia ed ontan sikato so impukok to ed pañgawan, tan daiset labat odino angapo ni so papaiter to a kanen ya anga ed sikato so inatey.

8 Natan say agi na saman so inatey, (a say ñgaran to Nimrah) so nampasnok ed si ama to lapu ed ginawa to ed say laki ya agi to.

9 Tan agawa a si Nimrah so nantipon na daiset a bilang na totoo, tan sikara so binmatik a pinmaway ed saman a dalin, tan linma ra tan akiayam ira ed si Omer.

10 Tan agawa a si Akish so nanilalak na arum ya anak, tan atanguyor da so puso na saray totoo, tan angaman sikara so nansamba ed sikato a gawaen da so amin a kanengneñgan na karelmeñgan unong ed pilalek to.

11 Natan saray totoo nen Akish nampilalekan da so gungona, angan siñga met say pampilalek nen Akish ed pakapanyari; dia ed ontan, niiter ed saray lalaki ya anak nen Akish so kuarta, a makaseñgeg ed saya naala ra so babaleg a kabiañgan na saray totoo ya akila ed sikara.

12 Tan agawa a ginmapo so bakal ed baetan na saray lalaki ya anak nen Akish tan si Akish, a saya so binmayag ed dakel a taon, on, angan dia ed inkaderal na ñgalñgali lawari amin a totoo ed panarian, on, angan amin, likud labat ed talomplo a kamarerua, tan saraman so binmatik a kaiba ed kailalakan nen Omer.

13 Dia ed ontan, si Omer lamet so nipawil ed dalin a tawir to.

14 Tan agawa a si Omer ginmapo la ya ontakken; manwari ya ontan, dia ed intakken to inilalak to si Emer; tan nilanaan to si Emer a manmaliw ya ari ya onsublay a manoley ed sikato.

15 Tan kayari to a nilanaan si Emer a manmaliw ya ari anengneng to so kareenan ed saman a dalin ed loob na duara a taon, tan sikato so inatey, lapu ed anengneng to so mapalalo a dakel ya agew, a saraya so napno na ermen. Tan agawa a si Emer so nanoley a sinmublay ed sikato, tan sikato so anumpal ed saray kurang nen ama to.

16 Tan say Katawan ginapoan to lamet ya ekalen so ayew ed saman a dalin, tan say kailalakan nen Emer so inmaliguas a mapalalo ed silong na oley nen Emer; tan dia ed loob na anemaplo tan dua a taon sikara so nanmaliw a mapalalo a mabiskeg, lapu ed saya sikara so nanmaliw a mapalalo a mayaman—

17 Tan wala ed sikara so amin a kanengneñgan na buñga, tan bokel na dawa, tan seda, tan pino a lienso, tan balitok, tan pilak, tan saray ankabli a beñgatla.

18 Tan ontan met ed amin a kanengneñgan na ayayep, dueg, tan baka, tan karnero, tan baboy, tan kanding, tan dakel ni a kanengneñgan na ayayep ya onkana a naakan na too.

19 Tan wala met so saray kabayo ra, tan asno, tan wala ra met so elepante tan maamo ya ayep ya inkana na saray Jaredite; a saraya ya amin so makana ed too, tan nagkalalo la ed saray elepante tan saray maamo ya ayep ya inkana na saray Jaredite.

20 Tan dia ed onia initer na Katawan so bendicion to ed saya a dalin, a saya so apili-pili ed amin ya arum a dalin; tan ingangan to a siopaman a mankayarian ed saya a dalin so kayarianen to ed Katawan, odino andi sikara so naderal sano sikara la so nagnap ed karelmeñgan; tan dia ed saraya, inkuan na Katawan: Iter ko so nagnap a sanok ko.

21 Tan si Emer so nanoley ya okom ed inkamatunong ed amin ya agew to, tan sikato so nanilalak na dakel a lalaki tan bibii; tan inilalak to si Coriantum, tan nilanaan to si Coriantum a manoley ya onsalat ed sikato.

22 Tan kayari a nilanaan to si Coriantum ya onsalat a manoley nambilay ni na apat taon, tan anengneng to so kareenan ed saman a dalin; on, tan angan anengneng to so Anak na Inkamatunong, tan sikato so nangayaga tan nangloria ed agew to; tan sikato so inatey ed kareenan.

23 Tan agawa a si Coriantum so nankurang ed saray bakat nen ama to, tan añgipaalagey na dakerakel tan ankakabaleg a ciudad, tan initer to so saman so maong ed saray totoo to legan na amin na agew to. Tan agawa a sikato so ag awalaan na anak anga ed sanen sikato la so mapalalo a tinmakken.

24 Tan agawa ya inatey si asawa to, tan mantaon la na sanlasus tan dua. Tan agawa a si Coriantum inala to ya inasawa, dia ed inkatakken to, so sakey a malangwer ni a marikit, tan nanilalak na lalaki tan bibii; dia ed saman sikato so nambilay na sanlasus tan apataplo tan dua a taon.

25 Tan agawa ya inilalak to si Com, tan si Com so nanoley a sinmublay ed sikato; tan sikato so nanoley ya apataplo tan siam a taon, tan inilalak to si Heth; tan inilalak to met so arum ni a lalaki tan bibii.

26 Tan saray totoo so binmuyak lamet ed tapew na amin a dalin, tan ginmapo lamet so baleg a karelmeñgan ed tapew na dalin, tan si Heth ginapoan to a gawaen lamet so saray maamot a plano ed kadaanan, pian deralen to si ama to.

27 Tan agawa ya iniepas to ed trono si ama to, tan sikato so pinatey to ed dili ya espada to; tan sikato so sinmublay ed pasen to.

28 Tan wala so saray profeta a sinmabi lamet ed saman a dalin, ya añgikelyaw na pambabawi ed sikara—a nakaukolan ya iparaan da so dalan na Katawan odino andi onsabi so ayew ed tapew na dalin; on, angan wala so baleg ya eras, a dia ed saya sikara so naderal no ag ira mambabawi.

29 Balet saray totoo ag da sinisia so saray salita na profeta, balet sikara so pinapaway da; tan saray arum impelag da ra ed abot tan tinaynanan da ra ya ompatey. Tan saraya ya amin a beñgatla so agawa unong ed gangan na ari, a si Heth.

30 Tan agawa a ginmapo so baleg a gawat ed saman a dalin, tan saray manaayam diman ginmapo ra a naderal ed ontan la a mapalalo a gano lapu ed gawat, lapu ed angapo so uran ed tapew na dalin.

31 Tan sinmabi met so dakel a madita ya oleg ed tapew na saman a dalin, tan sinamalan da so dakel a totoo. Tan agawa a saray ayayep da so ginmapo ra ya ombatik ya onarawi ed saray dakel a madita ya oleg, ya amaarap ed dalin a mamaabalaten, a saya so tinawag na saray Nephite a Zarahemla.

32 Tan agawa ya amayamay so inatey ed sikara ed dalan; angaman ontan, wala so saray akabatik ed dalin a mamaabalaten.

33 Tan agawa a say Katawan ginangan to a saray oleg ya ag da la ra osilan, balet alaren da so dalan pian ag makalabas so totoo, pian siopaman a salien to so onlabas sikato so nabaktar lapu ed saray madita ya oleg.

34 Tan agawa a saray totoo tinunton da so dalan na saray ayayep, tan kinan da so saray bangkay na saray inaatey ed dalan, anga ed sikara so naakan ya amin. Natan sanen saray totoo anengneng da a sikara so andi-saew ya ompatey ginapoan da so mambabawi ed saray kasalanan da tan akikasi ra ed Katawan.

35 Tan agawa a sanen sikara so nampaabeba ed inkasikara a magenap ed arap na Katawan sikato so añgibaki na uran ed tapew na dalin; tan saray totoo ginapoan da so ombulaslas lamet, tan ginmapo so saray buñga ed saray bansa ed baybay, tan dia ed saray bansa ed kaliber-liber. Tan say Katawan impanengneng to so pakapanyari to ed sikara ed impañgiligyas to ed sikara ed eras.