1 Tan wala met so sinmabi ed saray agew nen Com a dakel a profeta, tan improfesiya ra so kaderal na saman a dakel a totoo likud no sikara so mambabawi, tan ompawil ira ed Katawan, tan ikaindan da so panagpatey tan karelmeñgan da.

2 Tan agawa a saray profeta so ag-inawat na saray totoo, tan sikara so binmatik ed si Com a paiyagel, lapu ed saray totoo pampipilalekan da ra a pateyen.

3 Tan sikara so namprofesiya ed si Com na dakel a beñgatla; tan sikato so abendicionan ed saray nakekeraan ni ya agew to.

4 Tan sikato so nambilay ed maabig ya inkatakken tan inilalak to si Shiblom; tan si Shiblom so nanoley a sinmublay ed sikato. Tan say laki ya agi nen Shiblom so inmalsa sumpa ed sikato, tan ginmapo so mapalalo a baleg a bakal ed amin a dalin.

5 Tan agawa a say laki ya agi nen Shiblom ingangan to ya amin a profeta a namprofesiya ed kaderal na saray totoo so pateyen;

6 Tan linmesa so baleg a segsegang ed amin a dalin, tan pinaneknekan da ya onsabi so baleg ya ayew ed saman a dalin, tan ontan met ed saray totoo, tan wala so baleg a kadederal ed limog da, a saya so angapo ni ya agawgawa ed tapew na dalin, tan saray pokel da so siñga bunton a dalin ed tapew na dalin likud no sikara so mambabawi ed saray karelmeñgan da.

7 Tan ag da dineñgel so voces na Katawan, lapu ed saray marelmeng a pannununoñgan da; dia ed ontan, wala so ginmapo a bakal tan baliñgaan ed amin a dalin, tan ontan met ed dakel ya eras tan salot, dia ed onia wala so baleg ya agawa a kadederal, ya angapo ni kapara to ya akabatan ed tapew na mundo; tan saya ya amin so agawa legan na saray agew nen Shiblom.

8 Tan saray totoo ginapoan da so mambabawi ed saray karelmeñgan da; tan lapu ed onia so ginawa ra say Katawan so awalaan na panañgasi ed sikara.

9 Tan agawa a pinatey da si Shiblom, tan si Seth so naawit ed inkadakep, tan sikato so nanayam ed inkadakep ed amin ya agew to.

10 Tan agawa a si Ahah, ya anak to a laki, so akagamor na panarian; tan sikato so nanoley ed saray totoo ed amin ya agew to. Tan ginawa to so amin a kanengneñgan na karelmeñgan ed saray agew to, a saya so señgegan na interter na dakel a dala; tan daiset so saray agew to.

11 Tan si Ethem, lapu ed sikato so kapolian nen Ahah, so akagamor ed panarian; tan ginawa to met so marelmeng ed saray agew to.

12 Tan agawa a dia ed saray agew nen Ethem sinmabi so dakel a profeta, tan namprofesiya ra lamet ed saray totoo; on, improfesiya ra a say Katawan sigpot a deralen to ra ed tapew na dalin likud no sikara so mambabawi ed saray karelmeñgan da.

13 Tan agawa a saray totoo pinaawet da so saray puso ra, tan ag da dineñgel so saray salita ra; tan saray profeta so nanermen tan sikara so tinmaynan ed limog na saray totoo.

14 Tan agawa a si Ethem so nanoley ya okom ed karelmeñgan ed amin ya agew to; tan inilalak to si Moron. Tan agawa a si Moron so nanoley a sinmublay ed sikato; tan si Moron ginawa to so marelmeng ed arap na Katawan.

15 Tan agawa a wala so inmalsa ed limog na saray totoo, makaseñgeg ed saman so maamot a panununoñgan a saya so nipatalindeg pian naala ra so pakapanyari tan gungona; tan wala so tinmalindeg a makapanyari a too ed limog da unong ed karelmeñgan, tan sikato so akilaban ed si Moron, a dia ed saya asamsam to so kapaldua na panarian; tan sikato so nanoley ed kapaldua a panarian ed dakel a taon.

16 Tan agawa ya asamsam nen Moron, tan agamoran to so panarian lamet.

17 Tan agawa a wala lamet so tinmalindeg a sananey a makapanyari a too; tan sikato so kapolian na say laki ya agi nen Jared.

18 Tan agawa ya asamsam to ed si Moron tan agamoran to so panarian; lapu ed ontan, si Moron so nambilay ed inkadakep ed amin a nakdaan na saray agew to; tan inilalak to si Coriantor.

19 Tan agawa a si Coriantor so nanayam ed inkadakep ed amin na saray agew to.

20 Tan dia ed saray agew nen Coriantor sinmabi so dakel a profeta, tan sikara so namprofesiya ed saray ankakabaleg tan makapakelkelaw a beñgatla, tan inkelyaw da so pambabawi ed saray totoo, tan likud no sikara so mambabawi say Katawan a Dios gawaen to so panañgokom sumpa ed sikara onkana ed sigpot a kaderal da.

21 Tan say Katawan a Dios mañgibaki odino mañgawit na sananey a totoo a mankayarian ed dalin, ed leksab na pakapanyari, a siñga kanengneñgan na impañgawit to ed kaamaan da.

22 Tan ag da inawat so amin na saray salita na profeta, lapu ed saray maamot a muyoñgan da tan inkarelmeng na karumsisan.

23 Tan agawa a si Coriantor, inilalak to si Ether, tan inatey, lapu ed sikato so nanayam ed inkadakep ed amin ya agew to.