1 Tan natan siak, Moroni, ituloy ko so pañgiter ko ed kasulatan nen Jared tan si agi to.

2 Tan agawa a kayari a say Katawan imparaan to so saraman a bato ya inawit na say laki ya agi nen Jared ed tuktok na palandey, say laki ya agi nen Jared so linmasur ed palandey, tan inkarga to so saray bato ed dalem na saray sakayan a niparaan, sansakey ed nantupag a sampot; tan nia, saraya so añgiter na liwawa ed saray sakayan.

3 Tan dia ed onia say Katawan ginawa to a saray bato so onliwawa ed kabiluñgetan, a mañgiter na liwawa ed saray totoo, bibii, tan ugogaw, pian ag ira ombaliw ed saray baleg a danum ed kabiluñgetan.

4 Tan agawa a sanen niparaan da la ya amin a nengneng na naakan, pian nayarian da so mambilay ed danum, tan ontan met ed naakan na saray manok tan ayayep da, tan antokaman a monanakap odino ayep odino manok a nepeg ya awiten da—tan agawa a sanen asumpal da la ya amin so saraya a beñgatla sikara la so linmugan ed saray sakayan da, tan binmuat la ra ya onarap ed dayat, ya inmatalek da so inkasikara ed Katawan a Dios da.

5 Tan agawa a say Katawan a Dios pinawala to so maksil a dagem a sinmibok ed tapew na saray danum, a nampaarap ed dalin a sipan; tan dia ed onia sikara so nampatawpataw ya intolak na daluyon na dayat ed arap na dagem.

6 Tan agawa ya aminpigapiga a sikara so nipalgep ed kaaraleman na dayat, lapu ed saray daluyon a pinmalandey a tinmatabon ed sikara, tan ontan met ed saray maksil tan makapataktakot a bagyo a say nanseñgegan to say inkakasil na dagem.

7 Tan agawa a sanen sikara so nitabon ed kaaraleman ya angapo so danum a nayari a makasakit ed sikara, malet so sakayan da a siñga plato, tan ontan met malet a siñga biong nen Noe; dia ed ontan sanen sikara so aliktob na dakel a danum sikara so tinmawag ed Katawan, tan sikara so pinalimmuas to ed tapew na danum.

8 Tan agawa a say dagem ag tinmonda a sinmibok ya amaarap ed dalin a sipan legan da a wala ed danum: tan dia ed onia sikara so asunson ed arapan na dagem.

9 Tan sikara so nancancion na saray pandayew ed Katawan; on, say laki ya agi nen Jared so nancancion na saray pandayew ed Katawan; tan sikato so akisalamat tan nandayew ed Katawan ed dukey na sanagew; tan sanen sinmabi so labi, ag ira tinmonda a nandaydayew ed Katawan.

10 Tan dia ed onia sikara so asunson; tan angapo so saray monanakap na dayat a makaderal ed sikara; ni saray balyena so makapatonda ed sikara; tan awalaan ira na nampatuloy a liwawa, dia ed tapew na danum odino dia ed dalem na danum.

11 Tan dia ed onia sikara so asunson, ed loob na talora a lasus tan apataplo tan apat ya agew ed tapew na danum.

12 Tan sikara so sinmakbit ed gilig na dayat diman ed dalin a sipan. Tan sanen ginmatin la so saray sali ra ed gilig na dayat ed dalin a sipan intewek da so inkasikara ed tapew na dalin, tan nampaabeba ra ed inkasikara a dili ed arap na Katawan, tan tinmerter so lua na gayaga ed arap na Katawan, lapu ed kinabaleg na maaro a panañgasi to ed sikara.

13 Tan agawa a sikara so linma ed tapew na dalin, tan ginapoan da a dalosan so dalin.

14 Tan si Jared wala so apatira ya anak to a lalaki; tan atawag ira na Jacom, tan Gilgah, tan Mahah, tan Orihah.

15 Tan say laki ya agi nen Jared so nanilalak na lalaki tan bibii.

16 Tan saray kakaaro nen Jared tan say laki ya agi to wala so bilang da a duamplo tan dua a kakamarerua; tan sikara met so nanilalak na lalaki tan bibii sakbay na insabi da ed dalin a sipan; dia ed ontan, ginmapo ra a dinmakel.

17 Tan sikara so nibañgat a mankurang a mapaabeba ed arap na Katawan; tan sikara met so nibañgat a nanlapu ed tagey.

18 Tan agawa a ginapoan da so ontayak ed tapew na dalin, tan ondakel tan ondalos ed dalin; tan sikara so binmiskeg ed dalin.

19 Tan say laki ya agi nen Jared so ginmapo la ya onmasiken, tan anengneng to a magano la so ilasur to ed lubok; dia ed ontan inkuan to ed si Jared: Tiponen tayo so saray totoo tayo pian sikara so bilañgen tayo, pian nakabatan tayo ed sikara no anto so pilalek da sakbay na ilasur tayo ed saray lubok tayo.

20 Tan unong ed saya saray totoo so atipon a nankakasakey. Natan say bilang na saray lalaki tan bibii ya anak na say laki ya agi nen Jared so duamplo tan dua a kakamarerua; tan say bilang na saray lalaki tan bibii ya anak nen Jared so labindua, tan apatira so lalaki ya anak to.

21 Tan agawa a binilang da so saray totoo ra; tan kayari a binilang da ra, intepet da no anto so gawaen da ya onkana ed sikara sakbay a sikara so onlasur ed saray lubok da.

22 Tan agawa a saray totoo pilalek da a lanaan so sakey ed saray anak da a lalaki a manmaliw ya ari ed sikara.

23 Tan natan nia, saya so makapaermen ed sikara. Tan say laki ya agi nen Jared inkuan to ed sikara: Petepeteg a saya a beñgatla so mamaarap ed inkadakep.

24 Balet si Jared inkuan to ed si agi to a laki: Abuloyan mo ra a nawalaan na ari. Tan dia ed ontan inkuan to ed sikara: Mampili kayo na gawaen yo ya ari ed limog na saray anak mi a lalaki, angan siopa a labay yo.

25 Tan agawa a pinili ra so pañguloan ya ilalak na say laki ya agi nen Jared; tan say ñgaran to Pagag. Tan agawa ya ag to inawat tan ag to labay a sikato so ari ra. Tan saray totoo labay da a si ama to so mamasoot ed sikato, balet si ama to ag to labay; tan ingangan to ed sikara ya ag da pasuoten so sakey a too a manmaliw ya ari ra.

26 Tan agawa a nansusublayan da a pinili a manmaliw ya ari so saray lalaki ya agi nen Pagag, tan ag da labay.

27 Tan agawa a ni saray lalaki ya anak nen Jared angapo so malabay likud lambeñgat ed sakey; tan si Orihah so alanaan a nanmaliw ya ari na saray totoo.

28 Tan ginapoan to so manoley, tan saray totoo ginmapo ra ya inmaliguas; tan nanmaliw ira a mapalalo a mayaman.

29 Tan agawa a si Jared so inatey, tan ontan met nen agi to a laki.

30 Tan agawa a si Orihah so nankurang a mapaabeba ed arap na Katawan, tan nodnunoten to so ontan la a kinabaleg na beñgatla a ginawa na Katawan ed si ama to, tan imbañgat to met so saray totoo to ya agay la so kinabaleg na beñgatla a ginawa na Katawan ed saray ama ra.