Ai Vola i Inosi

1 Raica, a sa yaco ni’u sa kila tu, koi au, ko Inosi, ni a tamata yalododonu ko tamaqu—ni a vakavulici au ena nona vosa, kei na veisusugi kei na veivunauci ni Turaga—ka me vakalougatataki ga na yaca ni noqu Kalou ena ka oqo—

2 Ka’u na tukuna vei kemuni me baleta na noqu sasaga vakaukauwa ena mata ni Kalou, ni bera ni’u ciqoma na vakabokoci ni noqu ivalavala ca.

3 Raica, au a la’ki vakasasa manumanu kila ki veikau; ka a lutu vakavinaka sara ki lomaqu na veivosa ka’u a dau rogoca vakawasoma ni dau vosataka ko tamaqu me baleta na bula tawamudu, kei na nodra reki na yalododonu.

4 Ka sa waloloi na yaloqu; ka’u tekiduru e matana na noqu Dauniveibuli, ka’u a tagi vua ena masu kaukauwa kei na yalo ni vakatakekere me baleta na yaloqu; ka’u tagi tikoga vua ena siga taucoko; io, ni sa bogi mai au sa tabalaka cake tiko ga na domoqu me yaco ki lomalagi.

5 Ka sa rogo mai vei au e dua na domo ka kaya: Inosi, sa vosoti na nomu ivalavala ca, ka ko na vakalougatataki.

6 Ia koi au, ko Inosi, au kila ni sega ni rawa ni lasu na Kalou; o koya, sa seyavu kina mai yaloqu na noqu kila na noqu cala.

7 Ka’u sa kaya: Turaga, sa caka rawa vakacava?

8 Ka sa kaya vei au ko koya: Ena vuku ni nomu vakabauti Karisito, o koya ko sa sega mada ni bau rogoca se raica. Ka na oti mada e vuqa na yabaki ena qai vakaraitaki Koya mai vakayago; o koya gona, mo lako yani, sa vakabulai iko na nomu vakabauta.

9 Ia oqo, a sa yaco ni’u sa rogoca na vosa oqo sa tekivu me’u gadreva na nodra tiko vinaka na wekaqu, ko ira na Nifaiti; o koya, au sa sovaraka kina na yaloqu taucoko vua na Kalou ena vukudra.

10 Ia ni’u sa sasaga tiko ena yaloqu, raica, sa rogo tale mai na domo ni Turaga ki na noqu vakasama ka kaya: Au na sikovi ira na wekamu, ia ena vakatau ena nodra na muria na noqu vunau. Au sa solia vei ira na vanua oqo, ka sa vanua tabu; ka’u na sega ni cudruva vakavo ga ke ra sa ivalavala ca; o koya, au na sikovi ira kina na wekamu me vaka au a tukuna; ia na nodra talaidredre au na tauca ki uludra, ena rarawa.

11 Ia ni’u sa rogoca oti na vosa oqo, koi au, ko Inosi, sa tekivu me dei sara na noqu vakabauti koya na Turaga, ka’u sa masu vagumatua sara vua ena vukudra na wekaqu, na Leimanaiti.

12 Ka sa qai yaco ni sa oti na noqu masu kei na cakacaka vagumatua, sa kaya vei au na Turaga: Au na vakayacora vei iko na ka ko sa gadreva, ena vuku ni nomu vakabauta.

13 Ia raica oqo, sai koya oqo na noqu gagadre ka’u a gadreva vua—ni kevaka ena yaco me ra na lutu ki na talaidredre ka yaco me ra vakarusai sara ko ira na noqu tamata na Nifaiti, ka ra sa sega ga ni vakarusai na Leimanaiti, ni na maroroya na Turaga na Kalou na kedra ivolatukutuku na noqu tamata na Nifaiti; ia kevaka sa yaco vakakina ena kaukauwa ni ligana tabu, ena qai vakalesui mai ena dua na siga mai muri kivei ira na Leimanaiti, de rawa ni ra vakabulai kina—

14 Ia ena gauna oqo sa tawayaga na neimami sasaga tiko me ra vakalesui tale ki na vakabauta dina. Ka ra sa bubului kina ena nodra cudru, ni kevaka ena rawa, era na vakarusai keimami kei na neimami ivolatukutuku, kei na nodra ivakarau kece na neimami qase.

15 O koya, me vaka au kila ni sa rawa vua na Turaga na Kalou me maroroya na neimami ivolatukutuku, au a tagi tiko ga kina ki vua, ni a kaya vei au ko koya: Na veika kece ko sa kerea ena vakabauta, ka vakabauta ni ko na ciqoma ena yaca i Karisito, ko na rawata vakaidina.

16 Ka sa tu vei au na vakabauta, ka’u sa tagica vua na Kalou me maroroya na ivolatukutuku; ka sa veiyalayalati kina kei au ko koya ni na kauta yani kivei ira na Leimanaiti ena nona gauna ga vaka i koya.

17 Ia koi au, ko Inosi, au kila ni na vaka ga na veiyalayalati sa kitaka ko koya; ka sa vakacegu kina na yaloqu.

18 Ka sa kaya vei au na Turaga: Ko ira na nomu qase era a gadreva talega vei au na ka oqo; ia ena vakayacori vei ira me vaka na nodra vakabauta; ni a vaka na nomu na nodra vakabauta.

19 Ia oqo a sa yaco ni koi au, ko Inosi, au sa veilakoyaki voli ena kedra maliwa na tamata i Nifai, ka parofisaitaka na veika ena yaco mai, ka vakadinadinataka na veika au sa rogoca ka raica.

20 Ka’u sa vakadinadinataka ni ko ira na tamata i Nifai era a segata vagumatua me ra vakalesui ira tale mai na Leimanaiti ki na vakabauta dina ni Kalou. Ia sa tawayaga na neimami sasaga; sa dei tu ga na nodra veicati, ka ra sa muria na gagadre ca ni yalodra ka sa yaco ni ra sa tamata kila, vakarerevaki, ka tamata dauvakadave dra, ka sinai ena dauqarava na kalou matakau kei na dukadukali; era sa kania na manumanu daukata; ka vakaitikotiko ena vale laca, ka ra dauveilakoyaki voli ena lekutu ka vau tu na tolodra ena ivau kuli ni manumanu ka toro na uludra; era sa matai ni vakayagataka na dakai titi, kei na isele takelo kei na imatau. Ia e vuqa vei ira sa dau kedra kakana ga na lewe ni manumanu droka; ka ra sa segata tiko ga me ra vakarusai keimami.

21 Ka sa qai yaco ni ra sa cukita na vanua ko ira na tamata i Nifai, ka tea e vuqa na veimataqali sila, kei na vuata, kei na qele ni manumanu, kei na qele ni bulumakau ena kena veimataqali, kei na me, kei na me kila, kei na vuqa talega na ose.

22 Ia era sa lewe vuqa sara na parofita ena keimami maliwa. Ka ra sa domodomoqa na tamata, ka dredre na nodra kila ka.

23 Ia sa sega tale ni dua na ka, na itovo kaukauwa ga, na vunautaki kei na parofisaitaki ni ivalu, na veicacati, kei na veivakarusai, kei na kena tukuni wasoma tiko ga vei ira na mate, kei na balavu ni gauna tawamudu, na lewa kei na kaukauwa ni Kalou, kei na ka kece oqo—sa vakayavalati ira tiko ga me ra na rerevaka na Turaga. Au kaya ni sa sega ni dua na ka, ka vakavo na veika oqo, kei na kena tukuni vakamatata sara vei ira, me ra taqomaki rawa kina mai na nodra lako sobu yani vakatotolo ki na rusa. Ia sa vakaoqo na veika au sa vola me baleti ira.

24 Ka’u sa raica na nodra ivalu na Nifaiti kei na Leimanaiti ena noqu veisiga.

25 Ka sa yaco ni’u sa qai qase sara mai, ka sa oti yani e dua na drau vitusagavulu kaciwa na yabaki mai na gauna ka biuti Jerusalemi mai kina na neimami qase ko Liai.

26 Ka’u sa raica ni sa voleka me’u na lako sobu ki na noqu ibulubulu, ka a vakauqeti au na kaukauwa ni Kalou me’u vunau ka parofisai vei ira na tamata oqo, ka tukuna vei ira na vosa me vaka na dina sa tu vei Karisito. Ka’u sa tukuna tiko ena noqu veisiga kecega, ka’u sa rekitaka vakalevu duadua mai na veika e vuravura.

27 Ka sa voleka me’u na lako yani ki na vanua ni noqu vakavakacegu, ki vua na noqu Dauveivueti; ni’u sa kila ni sa i koya ga au na vakacegu kina. Ka’u na rekitaka na siga ena tokara kina na yago tawa mate rawa na yago mate oqo, ka’u na tucake e matana; au na qai raica kina na matana ena yalo marau, ka na kaya mai vei au ko koya: Lako mai vei au, ko sa vakalougatataki, ka sa vakarautaki tu e dua na tikina me nomu ena vale nei Tamaqu. Emeni.