1 Ug karon ako, si Moroni, mopadayon sa pagtapos sa akong talaan mahitungod sa kalaglagan sa katawhan kinsa akong ginasulat.

2 Kay tan-awa, gisalikway nila ang mga pulong ni Ether; kay siya sa pagkatinuod misulti kanila sa tanang butang, gikan sa sinugdanan sa tawo; ug nga human ang mga tubig mihubas gikan sa ibabaw niini nga yuta nahimo kining pinili nga yuta labaw sa tanang mga yuta, usa ka pinili nga yuta sa Ginoo; mao nga gusto sa Ginoo nga serbisyohan siya sa tanang tawo nga nagpuyo sa ibabaw niini;

3 Ug nga mao kini ang dapit sa Bag-ong Jerusalem, nga moabot gikan sa langit, ug ang balaan nga santuwaryo sa Ginoo.

4 Tan-awa, nakita ni Ether ang mga adlaw ni Kristo, ug namulong siya mahitungod sa usa ka Bag-ong Jerusalem dinhi niini nga yuta.

5 Ug namulong usab siya mahitungod sa balay ni Israel, ug sa Jerusalem diin si Lehi naggikan—human nga kini pagalaglagon kini pagatukoron pag-usab, usa ka balaan nga siyudad sa Ginoo; mao nga, dili kini ang bag-ong Jerusalem kay gihimo kini sa panahon nga karaan; apan pagatukoron kini pag-usab, ug mahimo nga balaang siyudad sa Ginoo; ug pagatukoron kini ngadto sa balay ni Israel—

6 Ug nga ang usa ka Bag-ong Jerusalem pagatukoron dinhi niini nga yuta, ngadto sa salin sa binhi ni Jose, kay mahitungod niana nga mga butang adunay usa ka sumbanan.

7 Kay sama sa pagdala ni Jose sa iyang amahan paingon sa yuta sa Ehipto, gani sa iyang pagkamatay didto; mao nga, ang Ginoo midala og usa ka salin sa binhi ni Jose gikan sa yuta sa Jerusalem, aron magmaluluy-on siya sa binhi ni Jose aron dili sila mangamatay, gani sama nga nagmaluluy-on siya sa amahan ni Jose aron dili siya mamatay.

8 Mao nga, ang salin sa binhi ni Jose pagatukoron dinhi niini nga yuta; ug mahimo kini nga yuta sa ilang kabilin; ug magtukod sila og usa ka balaan nga siyudad ngadto sa Ginoo, sama sa karaan nga Jerusalem; ug dili na sila pagalibogon, hangtod nga moabot ang kataposan sa higayon nga ang yuta mahanaw.

9 Ug adunay bag-o nga langit ug bag-o nga yuta; ug sama kini sa karaan gawas lamang nga ang karaan mahanaw na, ug ang tanan nga butang mahimo na nga bag-o.

10 Ug unya matukod ang Bag-ong Jerusalem; ug bulahan sila kinsa nagpuyo didto, kay mao kini sila kansang mga sapot puti pinaagi sa dugo sa Kordero; ug mao kini sila kinsa naihap taliwala sa salin sa binhi ni Jose, kinsa anaa sa balay ni Israel.

11 Ug unya matukod usab ang karaan nga Jerusalem; ug ang mga lumulupyo niini, bulahan sila, kay nahugasan sila sa dugo sa Kordero; ug sila mao kadtong gitibulaag ug gipundok gikan sa upat ka suok sa yuta, ug gikan sa amihanan nga mga nasod, ug mga tig-ambit sa katumanan sa pakigsaad nga gihimo sa Dios ngadto sa ilang amahan, nga si Abraham.

12 Ug sa panahon nga moabot kini nga mga butang, mapahinabo ang giingon sa kasulatan, nga adunay mga tawo nga nahiuna, nga maulahi; ug adunay mga tawo nga naulahi, nga mahiuna.

13 Ug ako mosulat unta og dugang pa, apan gidid-an ako; apan mahinungdanon ug kahibulongan ang mga panagna ni Ether; apan sila miisip kaniya nga walay bili, ug misalikway kaniya; ug motago siya sa usa ka lungag sa bato inigka adlaw, ug inigka gabii moadto siya sa pagtan-aw sa mga butang nga mahitabo sa katawhan.

14 Ug samtang nagpuyo siya sa usa ka lungag sa bato gihimo niya kining nahibilin nga talaan, nagtan-aw sa kalaglagan nga nahitabo sa katawhan, inigka gabii.

15 Ug nahitabo nga nianang mao nga tuig diin siya gisalikway gikan sa taliwala sa katawhan dihay nagsugod nga dakong gubat taliwala sa katawhan, kay dihay daghan nga mialsa, kinsa gamhanang mga tawo, ug nagtinguha sa paglaglag ni Coriantumr pinaagi sa ilang tinago nga mga plano sa pagkadaotan, nga gipamulong na.

16 Ug karon si Coriantumr, nga nagtuon, mismo, sa tanang kahanas sa gubat ug sa tanang kaigmat sa kalibotan, mao nga nakig-away siya kanila kinsa nagtinguha sa paglaglag kaniya.

17 Apan wala siya maghinulsol, ni ang iyang madanihon nga mga anak nga lalaki ni mga anak nga babaye; ni ang madanihon nga mga anak nga lalaki ug mga anak nga babaye ni Cohor; ni ang madanihon nga mga anak nga lalaki ug mga anak nga babaye ni Corihor; ug sa kataposan wala nay madanihon nga mga anak nga lalaki ug mga anak nga babaye sa ibabaw sa tibuok yuta nga naghinulsol sa ilang mga sala.

18 Mao nga, nahitabo nga sa unang tuig nga si Ether nagpuyo sa usa ka lungag sa bato, daghang katawhan ang gipatay pinaagi sa espada niadtong tinago nga mga kalihokan, nga nakig-away batok kang Coriantumr aron ilang maangkon ang gingharian.

19 Ug nahitabo nga ang mga anak nga lalaki ni Coriantumr nakig-away sa hilabihan ug nagkadugo sa hilabihan.

20 Ug sa ikaduha nga tuig ang pulong sa Ginoo midangat ngadto ni Ether, nga siya molakaw ug managna kang Coriantumr nga, kon siya maghinulsol, ug ang tibuok niyang panimalay, ang Ginoo mohatag kaniya sa iyang gingharian ug moluwas sa katawhan—

21 Kay kondili, pagalaglagon sila, ug ang tibuok niyang panimalay gawas sa iyang kaugalingon. Ug siya mabuhi lamang aron makakita sa katumanan sa mga panagna nga gipamulong mahitungod sa lain pang katawhan nga makaangkon sa yuta nga ilang kabilin; ug sila ang molubong ni Coriantumr; ug ang matag kalag pagalaglagon gawas kang Coriantumr.

22 Ug nahitabo nga si Coriantumr wala maghinulsol, ni ang iyang panimalay, ni ang katawhan; ug ang mga gubat wala mohunong; ug nagtinguha sila sa pagpatay ni Ether, apan milayas siya gikan kanila ug mitago pag-usab didto sa lungag sa bato.

23 Ug nahitabo nga dihay mitungha nga si Shared, ug nakig-away usab siya kang Coriantumr; ug siya mipildi kaniya, hangtod nga sa ikatulo nga tuig siya mibihag kaniya.

24 Ug ang mga anak nga lalaki ni Coriantumr, sa ikaupat nga tuig, mipildi ni Shared, ug nakaangkon sa gingharian pag-usab alang sa ilang amahan.

25 Karon nagsugod nga dihay gubat sa ibabaw sa tibuok yuta, matag tawo uban sa iyang panon nga nakig-away alang nianang iyang gitinguha.

26 Ug dihay mga tulisan, ug sa kataposan, ang tanang matang sa pagkadaotan anaa sa ibabaw sa tibuok yuta.

27 Ug nahitabo nga si Coriantumr hilabihan kasuko kang Shared, ug misulong siya kaniya uban sa iyang mga kasundalohan aron makig-away; ug nag-abot sila sa dakong kasuko, ug nag-abot sila sa walog sa Gilgal; ug ang panag-away nahimong hilabihan ka pintas.

28 Ug nahitabo nga si Shared nakig-away batok kaniya sulod sa tulo ka adlaw. Ug nahitabo nga si Coriantumr mibuntog kaniya, ug migukod kaniya hangtod nga miabot siya sa kapatagan sa Heshlon.

29 Ug nahitabo nga si Shared nakig-away kaniya pag-usab didto sa kapatagan; ug tan-awa, nabuntog niya si Coriantumr, ug miabog kaniya og balik ngadto sa walog sa Gilgal.

30 Ug si Coriantumr nakig-away kang Shared pag-usab didto sa walog sa Gilgal, diin gibuntog niya si Shared ug mipatay kaniya.

31 Ug si Shared misamad ni Coriantumr sa iyang bitiis, nga siya wala na makig-away pag-usab sulod sa duha ka tuig, diin sa mao nga panahon ang tanang katawhan sa ibabaw sa yuta nagpaagas sa dugo, ug walay usa nga makapugong kanila.