Kaddada’ Na Esplikasion
Put I Lepblon Mormon

I Lepblon Mormon sagradu na notan i taotao siha gi antigu na tiempon Amerika ya ma matka gi piesan metat. Kuattro na klasen plegu ma sangan gi lepblo.

Dos klasi i Plegon Nephi: i Dikike’ na Plegu yan i Dangkolo na Plegu. I dikike’ masña put i kasu siha ni espiritu’at yan i fina’na’guen i prufeta siha, ya i dangkolo siha put i historian i taotao siha. (1 Nephi 9:2–4) Lao desde tiempon Mosiah lokkue’ i dangkolo na plegu siha ha konsiste empottante siha na espiritu’at ni’ mayot.
I Plegon Mormon, ha konsiste ni’ mangaddada’ na pinila’ Mormon ginen i Dangkolo na Plegon Nephi yan meggai siha na tinige’. Este siha na plegu lokkue’ na manggaige i kontenuhasion i historia ginen as Mormon yan palu ginen i lahi-ña as Moroni.
I Plegon Ether, anai gaige siha i historian i Jaredites. Este na nota ha na’kaddada si Moroni, ya ha na’daña’ sinangan-ña siha yan ha na’daña’ i nota yan i historia gi titula “Lepblon Ether.”
I Plegon Bronse ni’ chinile’ i taotao Lehi ginen Jerusalem gi sais sientos b.c. Ha konsiste este i “singko na lepblon Moises, … yan lokkue’ notan i Judios desde i tutuhon … esta i tutuhon i finata’chong Zedekiah, i rai Judah; Yan lokkue’ i prufisiha siha ginen i sagradu na prufeta siha” (1 Nephi 5:11–13) Meggai na tinige’ siha gi plegu sinangan as Isaiah yan otro siha na prufetan bibliku yan lokkue’ ti prufetan bibliku, gaige gi Lepblon Mormon.

I Lepblon Mormon ha konsiste kinse na patte pat dibision ma tungo’, fuera di unu, na lepblo siha, kada unu ma tungo’ ginen i na’an i prinsipat na tinige’. I fine’nana na patte, (i fine’nana na sais na lepblo siha, makpo’ gi Omni) ma translada ginen i Dikike’ na Plegon Nephi. Entalo’ i lepblon Omni yan Mosiah gaige i ma a’agang Fino’ Mormon siha. Este i Fino’ Mormon siha ha totche i nota siha ni’ mamatka gi Dikike’ na Plegu siha yan i kaddada’ na tinige’ Mormon nu i Dangkolo na Plegu.

I mas anakko’ na patte, ginen Mosiah esta Mormon, todu i kapitulu siette, ha konsiste i trinansladan Mormon ni’ ha na’kaddada’ gi Dangkolo na Plegon Nephi. I uttemo na patte, ginen Mormon, kapitulu ocho, asta i uttemon i lepblo, ha matka si Moroni, lahen Mormon, ni’, anai ha na’fonhayan i notan i lina’la’ tata-ña, ha cho’gue i notan Jaredite siha ya ha na’kaddada’ (ya ma agang Lepblon Ether) pues ha na’halom i patte siha ni’ ma a’agang Lepblon Moroni.

Guihi gi añu A.D. kuattro sientos bente unu (421), si Moroni, i uttemo na prufetan Nephite yan i mangge’ historia siha, ha huchom i sagradu na nota ya ha na’na’ hulo’ gi Saina, para u ma laknos gi uttemo na diha siha, taimanu ha’ anai ma sangan i prufetan antigu ginen i bos Yu’os. Gi a.d. mit ocho sientos bente tres (1823), este as Moroni, guihi esta ma risurekta na taotao, ha bisita i Prufeta Joseph Smith, ya ha na’i nu i ma matka na plegu siha.