Entrodusion

I Lepblon Mormon ha konsiste siha eskritura ni’ siña ma kompara yan i Biblia. Nota siha put si Yu’os yan i antigu na taotao Amerika siha ya ha konsiste, parehu yan i Biblia, i kabales na tai finakpo’ na ebangheliu.

Ma tuge’ i lepblo nu i prufeta siha ginen i espiriton prufisiha yan ribilasion. I fino’-ñiha, ma tuge’ gi plegon oru, ya ha kopia yan ha na’kaddada’ si Mormon, un prufeta yan taotao historia. Gi nota ha sangan put dos dangkolo na sibilasasion. Unu ginen Jerusalem gi sais sientos B.C., pues ma sipara para dos na nasion, unu i Nephites yan i otro Lamanites. I otro hagas ha’ manggaige desde anai ha na’appleng i Saina i hila’-ñiha gi Toren Babel. Este na grupu ma fa’na’an i Jaredites. Despues di mit na años, todu manma destrosa fuera di i Lamanites, ya siha i prinsipat na guellon i Indios Amerikanu siha.

I mas seknefikante na sinesedi ma nota gi Lepblon Mormon anai muministro i Saina as Jesukristo gi inetnon i Nephites despues di ma risurekta. Ha sangan i dottrinan i ebangheliu, ha obra i planon satbasion, yan ha sangani i taotao siha hafa debi di u ma cho’gue para u guaha pas guini na lina’la’ yan i tai finakpo’ na satbasion gi mamaila’ na lina’la’.

Anai monhayan i tinige’-ña siha si Mormon, ha na’i i lahi-ña Moroni. Si Moroni guaha lokkue’ didide’ tinige’-ña pues ha na’na’ i plegon oru gi ekso’ Cumorah. Gi diha bente unu gi Septembre, mit ocho sientos bente tres, este na Moroni, i pa’go glorifikao yan ma risurekta na taotao, umanok gi me’nan i Prufeta as Joseph Smith, ya ha chachalani i Prufeta put i antigu na nota yan i ma pula’-ña gi fino’ Engles para i mamamaila’ na tiempo.

Pues ma entrega i plegu siha gi as Joseph Smith, ya ha translada ginen i rigalu yan alentos Yu’os. I nota pa’go ma popblika gi meggai siha na lengguahi komu nuebu yan otro na testigu na si Jesukristo guiya i lahen i lala’la’ na Yu’os ya todu i tumattiyi gui’ yan ma osge i lai yan otdenansian i ebangheliu-ña siempre ma satba.

Put este na nota ilek-ña si Prufeta Joseph Smith: “Hu sangani i taotao siha na i Lepblon Mormon i mas dinanche ki nu hafa na lepblo gi tano’, yan guiya i fondasion i rilihon-ta, ya i taotao siempre mas hihot gi as Yu’os yanggen ha aplika yan ha kontenuha i fina’na’gue-ña, ki nu hafa otro na lepblo.

Fuera di si Joseph Smith, i Saina ha na’fanmanli’e’ onse siha na taotao ni’ plegon oru para u fanespesiat na testigu put i minagahet yan i dinichoson este i Lepblon Mormon. I ma tuge’ na testimonion-ñiha ma na’dana’ guini komu i “Testimonion i Tres na Testigu Siha” yan i “Testimonion i Ocho na Testigu Siha”.

In kombibida todu i taotao siha para u ma taitai i Lepblon Mormon, ya u ma konsidera gi kurason-ñiha i enfotmasion ni’ ha konsiste, ya u ma faisen si Yu’os, i Tai Finakpo’ na Tata, gi na’an i Kristo kao magahet este na lepblo. Ayu siha i tumattiyi este na chalan yan mamaisen gi hinengge siempre manggai testimoniu nu i minagahet-ña yan i dinichosu-ña ginen i alentos i Espiritu Santo. (Espiha Moroni 10:3–5.)

Ayu siha i mamfina’nu’i nu i dichosu na testigu ginen i Espiritu Santo siempre lokkue’ ginen i parehu na alentos na u ma tungo’ na si Jesukristo guiya i Satbadot i tano’; na si Joseph Smith fina’nunu’i, chinachalalani yan ninana’i iyo-ña prufeta ginen as Yu’os guini gi uttemo na diha siha. Ya ma establisa i rainon i Saina ta’lo guini gi tano’ ginen I Gima’ Yu’os Jesukristo ni’ Manatatte na Mañantos para priparasion i sigundo na finatton Mesias.