Testimonion I Prufeta As Joseph Smith

I fino’ i Prufeta as Joseph Smith put i finatton i Lepblon Mormon:

“Gi puengen … bente unu gi Septembre mit ocho sientos bente tres (1823) … humanao yu’ manaitai yan manayuyot gi as Yu’os …

“Anai hu a’agang huyong si Yu’os, hu ripara un manana gi kuatto-ku ya sigi ha’ muma’lak mas ki nu anai talo’ani, ya ensigidas annok giya guahu un petsona, ya tumohtohge gi aire, ya i addeng-ña ti ha papacha i satge.

“Ha u’usa un sen a’apaka’ na kallon sutana. A’paka’ña ki nu hafa na ginen i tano’ ni’ hu li’e’; yan ti hu hongge na guaha guini gi tano’ siña ma fa’tinas sen a’apaka’ yan ma’lak. Ti ma tatampe magagu i kannai-ña. I addeng-ña ma tampe esta i hilo’ i patas-ña. I ilu-ña yan aga’ga’-ña ti ma tatampe lokkue’. Siña ha’ hu li’e’ na ni hafafa ha’ magagu-ña otro fuera di este na sutana sa’ ma bababa ya siña hu li’e’ i pecho-ña.

“Ti i magagu-ña ha’ sen a’apaka’, lao guiya lokkue’ sen ma’lak ya i fasu-ña sen ma’lak kulan i lamlam. I kuatto sen ma’lak lokkue’ lao ti gef ma’lak ki nu i uriya-ña. Fine’nana anai pa’go hu li’e’, ma’a’ñao yu’, lao ma’pos chaddek i linihan-hu.

“Ha agang yu’ nu i na’an-hu ya ha sangani yu’ na matto gui’ komu tentago’ Yu’os ya i na’an-ña si Moroni; ya si Yu’os guaha che’cho’-ña para guahu. Ilek-ña na i na’an-hu para ma onra yan ma eskandalu nu i taotao gi todu i nasion, familia, yan lengguahi siha, put sino gi entre todu i grupon i taotao, guaha siempre ilek-ñiha na maolek yu’, yan guaha siempre ilek-ñiha na mala yu’.

“Ilek-ña na guaha lepblo ma hafot ni’ ma tuge’ gi plegon oru. Gi lepblo gaige i estorian i taotao siha ni’ mañaga antes gi kontenensian Amerika, yan i estorian i hale’-ñiha. Ilek-ña lokkue’ na gi halom i lepblo gaige i kabales na tai finakpo’ na ebangheliu, ni’ i Satbadot ha na’i i antigu na taotao siha.

“Ilek-ña lokkue’ na guaha dos na acho’ gi flechan plata ya este siha na acho’, chechetton guatu gi plegon pecho ya ma fa’nana’an i Urim yan i Thummim — manggagaige yan i plegon oru siha; ya hayi gumogo’te yan umu’usa este siha na acho’ manma a’a’gang i Manmanlili’e’ gi tiempon antigu; ya si Yu’os ha pripara i acho’ siha para ramienta yanggen ma translada i lepblo.

“Ta’lo, ha sangani yu’ na yanggen hu chule’ i plegu ni’ ha sasangan — sa’ i tiempo ti mafatto ni’ para u ma chule’ — ti debi para bai hu fama’nu’i ni hayiyi nu i plegon pecho yan i Urim yan i Thummim; ayu ha’ siha ni’ ma kumanda yu’ para bai hu fa’nu’i; yanggen mama’nu’i yu’ siempre ma destrosa yu’. Mientras ha kuentutusi yu’ put i plegu siha, hu li’e’ un imahen ya ma baba i hinasso-ku, ya siña hu li’e’ i lugat anai ma hafot i plegu siha. I imahen sen klaru ya hu sen tungo’ i lugat anai humanao yu’ guihi despues.

“Despues di ha sangani yu’ este siha, hu li’e’ i manana gi kuatto na humihot gi uriyan i tataotao-ña i kumuentutusi yu’. Ha kontenuha taiguihi estaki humomhom i kuatto taimanu ha’ antes ya ti humomhom i uriya-ña. Pues gotpe hu li’e’ kulan latgeron kandet ya ma baba hulo’ esta i langet, estaki malingu ya i kuatto humomhom taimanu ha’ antes di annok este na ininan i langet.

“Umasson yu’ ya hu hahasso este na unikon eksperensia ya hu hahasso hafa ha sangani yu’ este na tentago’ i langet. Pues, mientras sigi ha’ hu hasso, gotpe hu li’e’ na i kuatto-ku ha tutuhon ta’lo mumanana, ya gi un mumento, tumohtohge ta’lo i tentago’ langet gi fi’on i kattre-ku.

“Ha tutuhon ta’lo sumangani yu’ parehu siha yan anai matto gi fine’nana na biahi, sin ma tulaika hafa yan i sinangan-ña antes; — ha sangani yu’ put sentensia siha ni’ addet para u fatto gi tano’; dangkolo na minayulang ginen ha’ilas, gera, yan peste siha; ya este siha na sentensia para u ma susedi gi tano’ duranten este na hinirasion. Despues di ha sangani yu’ este siha, humanao hulo’ gi tano’ taimanu ha’ bida-ña antes.

“Esta guini na tiempo sen taddong i empresian i hinasso-ku, ti siña yu’ maigo’, ya mampos yu’ manman ni’ i lini’e’-hu yan hiningok-ku. Lao mas yu’ manman anai annok ta’lo i tentago’ gi fi’on i kattre-ku; ya hu hungok ta’lo ha sangan ayu siha i ha sangani yu’ esta, ya ha sangani yu’ na si Satanas siempre ha chagi para u tienta yu’ (put i mamopble i familian tata-hu) para bai hu chule’ i plegu para bai hu riku. Ha akonseha yu’ para munga ma cho’gue este ya ilek-ña na ayu ha’ solamente rason-hu para bai chule’ i plegu siha sa’ put para bai hu glorifika si Yu’os, yan para bai hu hatsa i rainon Yu’os; sino ti siña hu chule’ i plegu siha.

“Despues di este i mina’tres na bisita-ña, humanao ta’lo hulo’ gi langet, ya hu hasso ta’lo este na estrañon eksperensia-ku. Pues ensigidas despues di ha dingu yu’ i tentago’ gi mina’tres biahi, umo’o’ i gayu ya hu rialisa na ogga’an esta, ya i bisita-hu yan guahu siguru tinaka’ todu i pupuengi.

“Despues di este, kumahulo’ yu’ ginen i kattre ya humanao yu’ macho’cho’; lao anai hu kechagi macho’cho’ taimanu ha’ antes, hu sodda’ na sen yayas yu’, ya ti siha hafa hu cho’gue. Si tata-hu ni’ humahami macho’cho’ ha ripara na guaha ti maolek, ya ha tago’ yu’ tatte gi gima’. Hu tutuhon guatu gi gima’, lao anai hu kechagi umekulo’ gi kellat, malingu todu i fuetsa-ku. Poddong yu’ gi tano’ ya apmamñaihon na lalangu yu’.

“Ayu fine’nana hu hasso i guaha bos kumuentutusi yu’ yan uma’agang yu’ ni’ na’an-hu. Hu atan hulo’ ya hu li’e’ i parehu ta’lo na tentago’ tumotohge gi hilo’-hu ya inariyayayi ni’ manana taimanu ha’ antes. Ha ripiti ta’lo todu i ha sangani yu’ gi painge. Ha kumanda yu’ para bai hu hanao gi as tata-hu ya bai hu sangani nu i imahen yan tinago’ Yu’os ni’ hu risibi.

“Hu osge gui’; Hu bira yu’ tatte gi as tata-hu ni’ gagaige ha’ gi tirenu ya hu sangani todu ni’ lini’e’-hu. Ha sangani yu’ na ginen as Yu’os ya para bai hu hanao ya bai hu cho’gue i tinago’ i tentago’. Hu dingu i tirenu ya humanao yu’ para i lugat ni’ ilek-ña i tentago’ siempre gaige na ma hahafot i plegu. Sa’ gef klaru i imahen ni’ hu li’e’, hu tungo’ i lugat gigon matto yu’ guatu.

“Gi fi’on i sengsong Manchester, gi New York, guaha dangkolo na okso’, i mas takhilo’ guihi na lugat. I plegu siha manggaige gi halom kahitan acho’ gi ge’lichan na bandan este na okso’ hihot gi sanhilo’. Este na acho’ fedda’ gi talo’ yan aridondo gi sanhilo’ na banda. I uriya-ña mas kanifes yan tinatampe odda’ ya i talo’ ha’ a’annok gi hilo’ i tano’.

“Despues di hu na’suha i edda’, hu sodda’ i dekka’-hu ni’ gaige gi kanton i acho’, ya hu na’i animu ya hu hatsa i acho’. Hu atan halom ya hu li’e’ i plegu siha, i Urim yan i Thummim, yan i plegon pecho taimanu ha’ ilek-ña i tentago’. Ma fa’tinas i kahon ginen acho’ ya un klasen simento gumogo’te. Gi sampapa’ i kahon, dos na acho’ uma’asson hihot guatu gi un banda, ya gi hilo’ este na dos acho’ ma po’lo i plegu siha yan otro ophetu siha.

“Hu kelaknos i plegu huyong lao ha chomma’ yu’ i tentago’ ya ha sangani yu’ ta’lo na ti mafatto i tiempo-ña para bai hu laknos ya ti direcho na tiempo pa’go estaki maloffan kuattro años ta’lo. Ilek-ña para bai hu fatto tatte gi ekso’ eksakto un añu na tiempo ya para u gaige guihi ya bai in asodda’. Ilek-ña na debi bai hu cho’gue este kada sakkan estaki matto i tiempo para bai hu risibi i plegu siha.

“Taimanu ha’ ha kumanda yu’, humanao yu’ para i ekso’ kada uttemon i sakkan. Umasodda’ ham yan i tentago’ guihi ya kada biahi ha chachalani yan ha na’tungo’ yu’ put hafa siha i Saina para hu cho’gue yan para taimanu na manera para u ma kondukta i rainon Yu’os gi uttemo diha siha.

“Put fin matto i tiempo para bai hu risibi i plegu siha, i Urim yan i Thummim, yan i plegon pecho. Gi Septembre bente dos, mit ocho sientos bente siette (1827), humanao yu’ taimanu ha’ bidada-hu gi uttemon i sakkan. I tentago’ Yu’os ha na’i yu’ i plegu siha ya ilek-ña: Na debi di para responsapble yu’ nu siha, ya yanggen hu na’falingu put i dihada-hu pat deskuidu-hu, u ma na’suha yu’ siempre gi as Yu’os; lao yanggen hu cho’gue todu i nina’siña-hu para bai hu adahi estaki matto i tentago’ Yu’os para u chule’ tatte, pues siempre para bai ma prutehi.

“Ti apmam na hu tungo’ sa’ hafa na ha tago’ yu’ i tentago’ Yu’os para bai hu gef adahi i plegu siha, yan hafa na ilek-ña na para u fatto para u chule’ tatte yanggen monhayan hu cho’gue i tinago’-ña. Sa’ gigon ma tungo’ i taotao siha na hu chuchule’ i plegu siha, ma na’setbe todu pusipble na empeñu para u ma chule’ giya guahu. Ma chagi todu planu para u ma kechule’. I pinetsigi mas addet ki nu i maloffan siha. Lao ginen i tinemtom Yu’os maolek ha’ i plegu siha giya guahu. Anai hu cho’gue todu i ma tago’ yu’ matto i tentago’ Yu’os ya hu na’i. Gaige giya guiya tanto pa’go na tiempo este i diha dos gi Mayu, mit ocho sientos trentai ocho. (May 2, 1839).”

I notan antigu, ni’ ma laknos ginen i tano’, komu bos i taotao siha ni’ kumekuentos ginen i petbos, ya ma translada para kuentos pa’go ginen i rigalu yan alentos Yu’os ni’ ma testigu gi Dichosu na testigu, ma popblika primet para i tano’ gi Engles gi mit ocho sientos trenta (1830) na sakkan.