Sie Mwe Ahkuhtweyac Fototo ke Puk luhn Mormon

Puk luhn Mormon pa sie ma sihmlac muhtahl luhn mwet fin acn mahtuh America ac tuh taflweyucklac fin plwet osra. Ma sihmlac inge tuhkuh we me tuh orekweni nuh sie pa ke ma tahklac inge:

1. Plwet lal Nephi, ma kain in atac luo: plwet srihsrihk ac plwet luhlahp. Ma se met ingacn ma tuh orekmakihnyuck suwohs nuh ke ohiyac muhtahl ac orekma ac luti luhn mwet pahluh, a ma se tok ingacn tuh orekmakihnyuck yohk nuh ke sramsram mahtuh luhn mwet suc sruhmuhnyuck kac ah (1 Nephi 9:2–4). E ke pacl lal Mosiah ah me, tuhsruhk, plwet luhlahp uh oacyacpac nein ma nguhnnguhn na yohk srihpac.

2. Plwet lal Mormon, ma nein sie sramsram ma tuh ahkfototoyeyucklac sel Mormon liki plwet luhlahp lal Nephi, weacng mwe ahkuhtweyac pucspucs. Plwet inge oacyacpac nein sie tuhtahflah ke sramsram mahtuh sel Mormon ac tahfweyucklac sin wen se nahtuhl suc pa Moroni.

3. Plwet lal Ether, ma sramsramkihn sie sramsram mahtuh luhn mwet Jared. Ma sihmlac se inge tuh ahkfototoyeyucklac sel Moroni, suc isohngwacng kahs lal sifacna ac sang ma sihmlac in weacng sramsram mahtuh yohk ye sifac se “Puk lal Ether.”

4. Plwet Prahs ma utuckme sin mwet lal Lehi liki acn Jerusalem ke yac 600 Met Liki Kraist. Ma inge nein “puk limekohsr lal Moses, … ac oacyacpac sie ma sihmlac kacn mwet Jew e ke muhtwacwacackiyac ah, … fahsruh ne ke muhtwacwacackiyacn kol lal Zedekiah, tohkohsrah luhn Judah; ac oacyacpac kahs in pahluh luhn mwet pahluh muhtahl” (1 Nephi 5:11–13). Fahk pucspucs ke plwet inge, fahk ke kahs lal Isaiah ac mwet pahluh ke ma suhmuhslah sahyac ac ma tiac sihmihsyucklac, sikyak ke Puk luhn Mormon.

Puk luhn Mormon oracni ip singucul limekohsr, ma etweyuck, sahyacn na ma se, oacna puk, kwacna suleyucklac ke inen mwet suhmuhslah luhn ma inge. Ip se emet (puk ohnkohsr emet, sahflah ke Omni) pa sie lweng ke plwet srihsrihk lal Nephi. Inmahsrlon puk lal Omni ac Mosiah pa sie ma isohsyang pahngpahng Kahs lal Mormon. Ma isohsyang se inge kuhpahsriyac ma sihmlac ma taflweyucklac ke plwet srihsrihk nuh ke sramsram ahkfototoyeyucklac lal Mormon ke plwet luhlahp.

Ip loeloes se emet, ke Mosiah nuh ke Mormon sapta 7, pa sie lweng ke sramsram ahkfototoyeyucklac lal Mormon ke plwet luhlahp lal Nephi. Ip sahflah, ke Mormon sapta 8 nuh ke sahflahiyacn ip se, tuh taflweyucklac sel Moroni, wen nahtuhl Mormon, suc tukun el ahksahfyelah ma sihmlac ke moul luhn pahpah tuhmwacl, el oraclah sie sramsram ahkfototoyeyucklac ke ma sihmlac luhn mwet Jared (suc pa Puk lal Ether) ac tohkoh sang in weacng ip ma etweyuck muh Puk lal Moroni.

Ke kuh sahp ke yac 421 Tukun Kraist, Moroni, mwet pahluh yohk etuh lal ke ma mahtuh sahflah se luhn mwet Nephi, siliyac ma sihmlac muhtahl ac okanlah nuh sin Leum, in utuckme ke lwen sahflah uh, oacna ke palyeiyuck ke puhsren God ke mwet pahluh Lal omeet ah. Ke yac 1823 Tukun Kraist, Moroni se pacna inge, in pacl sac el sie mwet sifilpac moulyak, el muhtwacta yohrohl Mwet Pahluh Joseph Smith ac in pacl el sang plwet taflweyucklac inge nuh sel.

Ke ma sihmlac se inge: Sra puk ke sifac na pwacye uh, met liki na sra puk ke koano an, tuh itucklac liki plwet ac pa sie ip ke ma sihmlac muhtahl. Ikucslah an tiac sihmlac ke sihm kuhruh, oacna ke 1 Nephi ac met liki na Mosiah sapta 9, oacyacpac pa ma sihmlac muhtahl. Ikucslah an sihm kuhruh, oacna ke sifac ke sapta an, tiac pa ingacn ohiyacn sihm na pwacye kac uh tuhsruhk mwe kahsruh lutlut ma weacng in ahkfihsrwacsrye ritiyac.

Kuhtuh tahfonglac srihsrihk ke kahs uh tuh kalweniyuck ke ma sihmlac met ke Puk luhn Mormon ma oreklac ke English. Sihmlac se inge nein mwe ahkpwacye ma fal in sang ma inge in insese nuh ke ma sihmlac oreklac ac ma sihmlac met ma sihmihsyucklac sel Mwet Pahluh Joseph Smith.