Kahs in Fahkwack Luhlahlfongi Lal Mwet Pahluh Joseph Smith

Kahs lal Mwet Pahluh Joseph Smith sifacna ke tuhkuh luhn Puk luhn Mormon pa:

“Ke ekuh ke … lwen longoul sie ke Septempuh [1823] … nga eisyucyang nuh ke pruhe ac nguhsr moniyuck nuh sin God Kuhlacna. …

“Ke nga tuh mukwi in pruhe nuh sin God, nga liyacack kahlwem se sikyak ke infuhkihl se luhk ah, ma tahfwelah in yohkwaclihk ne ke na infuhkihl sac kahlwem liki na infulwen lwen, ke in kihtin pacl sac na mwet se sikyak sisken mwe oan luhk, tulac yen engyeng uh, tuh niyacl tiac na puhsral infohk uh.

“El nukum nuknuk fohn sralacp fasrfasr na pwacye se. Nga soenna liye fin facluh kain in fasrfasr se inge; nga tiac pac luhlahlfongi muh oasr kuhtwena ma fin facluh ma kuh in oreklac in arulacna fasrfasr ac sahromrom. Pahol tiac nukumyucklac, ac oacyacpac pahol nuh lucng, lucng kuhtuhsrihk liki pukun pahol; na, oacyacpac, niyacl tiac nukumyucklac, oacyacpac niyacl nuh lucng, lucng kuhtuhsrihk liki fukun niyacl. Insifacl ac inkwacwacl tiac pac nukumyucklac. Nga kuh in liye lah wacngihn nuknuk sahyac el nukum sahyacn nuknukfohn se inge, mweyen ikacklah, oruh nga tuh kuh in liye iniwacl.

“Nuknuk fohn se lal inge tiac arulacna fasrfasr muhkwena, tuhsruhk mahnol nohfohn arulacna wolacna oruh tiac kuh in ahkuhtweyucki, ac luhmahl pwacye lah oacna sahrom uh. Infuhkihl uh arulacna kahlwem, tuhsruhk tiac arulacna kahlwem oacna kihtihn acn na ma raunweack mahnol. Ke nga tuhfahna in ngwetwacng nuh sel ah, nga sahngweng; tuhsruhk sahngweng sac kihtihn pacl na som likiyuc.

“El pahngonyuc ke inek, ac fahk nuh sihk lah el sie mwet utuck pweng suhpweyuckme liki ye muhtuhn God nuh yuruk, ac lah inel pa Moroni; lah oasr orekma se God El ac use nuh sihk in oruh; ac lah inek ac motkweyuck nuh ke ma wo ac ma koluk inmahsrlon muhtuhnfacl, kain in mwet, ac kahs nuhkwewa, kuh ac sramsramkihnyuck ke ohiyac wo ac koluk inmahsrlon mwet nuhkwewa.

“El fahk lah oasr puk se fihliyucki, sihmihsyucklac fin plwet kol, ma sruhmuhn sie sramsram kacn mwet mahtuh omeet ma muhta fin acn se inge, ac acn ma elos tuhkuh we me. El oacyacpac fahk lah fohnlah luhn Wosasuc kawihl neinyuckyak loac, oacna ke tuh eisyuckyang sin Mwet Lahngo nuh sin mwet mahtuh omeet yoh sac;

“Oacyacpac, lah oasr yot luo ma kapriyuck ke frem selfuh—ac yot inge, kapriyucki nuh ke sie mwe loeyuck, tuhkweni oraclah ma se ma pahngpahng Urim ac Thummim—fihliyucki wi plwet inge; ac sruokyac ac orekmakihnyacn yot inge pa oraclah ‘mwet liyactwen’ ke pacl mahtuh omeet kuh ke pacl somlah ah; ac lah God El ahkolah ma inge nuh ke srihpen lweng ke puk inge. …

“Sifilpac, el fahk nuh sihk, lah ke pacl se nga ac eis plwet ingoh ma el sramsram kac—tuh pacl se ma ac eisyuck ma inge soenna sikyak—nga enenuh in tiac sang kuhtwena mwet in liye; tiac pac mwe loeyuck weacng Urim ac Thummim; nuh selos muhkwena suc nga sapkihnyuck in ahkkahlwemye nuh selos; nga fin tuh oruh nga ac tuh fah kuhnausyucklac. Ke el sramsram nuh sihk ke plwet inge, aruhruhma se ikacklah ke nuhnak luhk uh tuh nga kuh in liye acn se ma puhlwet inge fihliyucki we, ac arulacna kahlwem ac siena oruh nga tuh sifilpac etuh acn sac ke nga tuh som muhtwacta we.

“Tukun sramsram se inge, nga liye ke kahlwem ke infuhkihl uh muhtwacwacack in maeni nuh sisken mahnol suc sramsram nuh sihk, ac fahfahlac in orek ohinge ne ke na infuhkihl uh sifilpac lohsrlah, sahyacn na siskacl; ke, kihtin pacl sac na nga liyacack, oacna ke tuh sikyak ah, motonoac se ikacklah suwohswohsyak nuh inkuhsrao, ac el sowack nuh lucng ne ke na el wacngihnlac, ac infuhkihl uh oacna met ah met liki kahlwem inkuhsrao se inge tuh sikyak ah.

“Nga oan nuhnkuh ma se sikyak ah, ac fwefwelac na pwacye ke ma fwack nuh sihk sin mwet utuck pweng wolacna se inge; ke, infulwen nuhnak luhk uh, nga sa na liyacack lah infuhkihl se luhk ah sifilpac muhtwacwacack in kahlwemwack, ac kihtihn pacl sac na, oacna ke tuh sikyak ah, mwet utuck pweng inkuhsrao sac pacna el sifilpac tulac sisken acn in oan se luhk ah.

“El muhtwacwacack, ac sifilpac fahk ma pacna el tuh oruh ke muhtwacta se lal emet ah, wacngihn ma eklac; ma el tuh oruh, el fahk nuh sihk ke nuhnuhnkuh yohk ma ac fah tuhkuh nuh fin facluh, ke ongaiyac yohk luhn sracl in mongo, mweun, ac mas; ac lah nuhnuhnkuh upac inge ac tuhkuh nuh facluh ke fihl se inge. Ke el fahk ma inge, el sifilpac sowack nuh lucng oacna ke el oruh met ah.

“Ke pacl se inge, arulacna loal mokleyuck se ma fihliyucki ke nuhnak luhk uh, tuh muhtuhk tiac ke mutul, ac nga oan oelac fwefwelac ke ma nga kwewana liye ac lohng ah. Tuhsruhk nga lut ke nga sifilpac liye mwet utuck pweng sacpacna sisken acn in oan luhk, ac nga lohng ke el fahk kuh sifilpac kalweni in fahk nuh sihk ma pacna met ah; ac use pac kai se nuh sihk, fahk nuh sihk lah Setuhn el ac srihke in srihfeyuc (ke srihpen ohiyac suhkahsruhp luhn sucu luhn pahpah tuhmuhk), in eis plwet inge nuh ke srihpac luhn kahsruhp. Ma inge el kaiyuc in tiac oruh, fahk lah nga enenuh in tiac lohacng nuh ke kuhtwena ma sahyac ke nga eis plwet inge tuhsruhk tuh in kaksakihn God, ac in tiac mokleyuck ke kuhtwena nuhnak sahyacn na in muhsaheack tohkohsrahi Lal; tuh fin tiac ohinge nga tiac kuh in eis ma inge.

“Tukun muhtwacta ahktolu se inge, el sifilpac sowack nuh lucng inkuhsrao oacna met ah, ac nga sifilpac motko ma usrnguck ma sikyak nuh sihk ah; ke kihtin pacl se na tukun mwet utuck pweng se inkuhsrao ah sowack nuh lucng likiyuc ke pacl ahktolu ah, won ah tuhkak, ac nga liye lah lwenwelihk, ohinge sirape lasr ah orek ke fong na fohn sac.

“Tohkohyang na nga tuhkahkwek liki mwe oan luhk, ac, oacna pacl nuhkwewa, som in oruh orekma enenweyuck ke lwen uh; tuhsruhk, ke nga srihke in orekma oacna pacl sahyac, nga konwacack lah kuhiyuck arulacna muhnahslah oruh nga tiac kuh in oruh kuhtwena ma. Pahpah tuhmuhk, suc wiyuc orekma, el liye lah oasr ma elyah se sihk, ac fahk nga in som nuh lohm ah. Nga muhtwacwacack ke srihpac se in som nuh lohm ah; tuhsruhk, ke nga srihke in tuhpallah kalkal se ke innimac se kuht oasr we ah, kuhiyuck nohfohn wacngihnlac, ac nga puhtatlac oan fin infohk uh, ac ke puhlan pacl se nga tiac etuh kuhtwena ma.

“Ma se emet ma nga kuh in esam pa sie puhsra ma sramsram nuh sihk, pahngonyuc ke inek. Nga ngwetwack, ac liye mwet utuck pweng sac pacna tulac fin sifuhk, rauniyucklac ke kahlwem oacna met ah. El sifilpac fahk nuh sihk ma nuhkwewa ma el fahk nuh sihk ke fong se met ah, ac el sapkihn nuh sihk in som nuh yurun pahpah tuhmuhk ac fahk nuh sel ke aruhruhma ac masap ma nga eis ah.

“Nga ahkos; nga fohlohklac nuh yurun pahpah tuhmuhk ke innimac ah, ac fahk nohfohn ma inge nuh sel. El topuk nuh sihk lah ma inge ma sin God, ac fahk nuh sihk in som ac oruh oacna sapkihnyuck sin mwet utuck pweng sac. Nga som liki innimac uh, ac som nuh ke acn se ma mwet utuck pweng sac fahk nuh sihk muh plwet inge fihliyucki we ah; ac ke srihpen kahlwemiyen aruhruhma se ma sikyak nuh sihk ke ma inge, nga etuh acn sac ke pacl se na nga sun ah.

“Fototo nuh ke mura Manchester, ke Ontario county, New York, tulac inging yohk se, ac pa fuhlwact emet ke kuhtwena inging ke acn tuhlan la. Ke lacfahl rohtoh ke inging se inge, tiac loes liki fin tohktohk sac, ye yot na luhlahp se, plwet inge oan, fihliyucki lun pohk yot se. Yot se inge mahtoltol ac raun infulwac ah ke acn lucng kac, ac srikolo siskac ah, oruh infulwac ah kuh in liyeyuck fin infohk uh, tuhsruhk siskac ah nohfohn rauniyucklac pihkihnyucki ke fohk uh.

“Eislah fohk uh liki, nga sruhkwack sie sahk in tipucl ah, ma nga oracacng nuh ye sisken yot sac, ac tanyac kuhtuh srihsrihk oracack nuh lucng. Nga ngwetwacng nuh loac, ac pwacyena lah nga tuh liye plwet inge, Urim ac Thummim, ac mwe loang, oacna ke fwackyuck sin mwet utuck pweng sac. Pohk se ma ma inge oan loac oreklac ke fihliyucki yot nuh sie ke kain in simacn. Ke ye pohk sac yot luo oan lac lac lun pohk sac, ac plwet ac ma sahyac weacng oan fin yot inge.

“Nga srihke in eislah ma inge, tuhsruhk sruhngwacyuck sin mwet utuck pweng sac, ac sifilpac fahkyuck nuh sihk lah pacl in utuckyak luhn ma inge soenna tuhkuh, lah ac tiac, ne ke na yac ahkosr tukun pacl sac; tuhsruhk el fahk nuh sihk lah nga enenuh in tuhkuh nuh ke acn sac pacna ke yac se na tukun pacl sac, ac lah el ac sunyuc we, ac lah nga enenuh in tahfwelah in oruh ohinge ne ke na pacl se ac tuhkuh in eis plwet inge.

“In oruh oacna, ke tuh sapkihnyuck nga ah, nga tuh som ke kapihn kais sie yac, ac ke kais sie pacl nga sokwack mwet utuck pweng sac pacna we, ac tuh eis ahkuhtweyac ac lahlmwetmwet sel ke kais sie sirape lasr ah, fal nuh ke ma suc Leum El ac tuh fah oruh, ac tohkohsrahi Lal ac tuh fah kolyuck fuhkah ac ke ohiyac meac ke lwen sahflah. …

“Ke lusen pacl se pacl uh tuhkuh in eis plwet, Urim ac Thummim, ac mwe loang. Ke lwen ahklongoul luo ke Septempuh, sie tausin alfoko ac longoul itkohsr, nga tuh som oacpacna ke kapihn siepacna yac nuh ke acn se suc ma inge fihliyucki we, mwet utuck pweng inkuhsrao sac pacna use ma inge nuh sihk ke kahs in kai se inge: lah nga enenuh in karuhnguhnwacng ma inge; lah nga fin soaru wacngihnlac ma inge, kuh ke kuhtwena lingucn luhk, nga ac fah lihsyucklac; tuhsruhk nga fin orekmakihn nohfohn kuhiyuck in karuhnguhnwacng ma inge, ne ke na el, mwet utuck pweng sac, ac pahngonwack ma inge, ma inge fah karihngihnyuck.

“In kihtin pacl nga sokwack srihpac se efuh nga tuh eis kahs in kai na upac in karuhnguhnwacng in wo, ac efuh mwet utuck pweng sac tuh fahk lah ke nga oruh ma suc enenweyuck in pouk, el ac pahngon ma inge. Tuh tiacna paht na etweyuck lah ma inge oasr yuruk, na kuhiyac na fokoko oreklac in eislah ma inge likiyuc. Ohiyac nuhkwewa ma oreklac uh oreklac nuh ke srihpac se ingacn. Ahkkolukyeyuck uh upaclah liki met ah, ac mwet pucspucs acsmak pacl nuhkwewa in eislah ma inge likiyuc fin kuh. Tuhsruhk ke lahlmwetmwet luhn God, ma inge karihngihnyuck wo in pouk, ne ke na nga oraclah ma suc enenweyuck in pouk. Ke pacl se, oacna akwuck la, ke mwet utuck pweng sac pahngon ma inge, nga eisacng ma inge nuh sel; ac el karuhnguhnwacng ma inge ne misenge, suc pa lwen ahkluo ke Mei, sie tausin alfoko ac tolngoul alkosr.”

Nuh ke kuhtuh pac ma sihmlac fohnlah uh, liye Joseph Smith—Sramsram Mahtuh ke Mwe Sang Sacohklacna.

Ma sihmlac mahtuh inge tuh utuckuh liki facluh oacna puhsren sie un mwet sramsram me liki fohk uh, ac luhngasyucklac nuh ke kahs in pacl inge ke mwe sang ac kuh luhn God oacna ke ahkpwacyeiyuck ke mwe ahkpwacye Muhtahl, tuh sihmlac emet nuh facluh ke kahs English ke yac 1830 oacna The Book of Mormon.