Ndimbola ya Mokuse mpo na oyo etali Buku ya Mormon

Buku ya Mormon ezali lisolo ya makomi ya bule ya bato bazwamaki kati na Amerika ya kala mpe ekomami likolo ya manzanza ya bibende. Buku uta na oyo wapi lisolo ya makomi oyo ekomamaki ezali oyo elandi:

1. Bapalaki ya Nefi, oyo ezalaki ndenge mibale: bapalaki ya mike mpe bapalaki ya minene. Ya yambo etali mpenza makambo ya molimo mpe misala mpe mateya ya baprofeta, nzokande ya nsuka etali mingi mingi mambi ya kala mpe ya mokili ya bato balobeli na kati (1 Nefi 9:2–4). Uta na ntango ya Mosiya, nzokande, Bapalaki ya Minene ezalaki mpe na makambo ezali na motuya monene mpo na molimo.

2. Bapalaki ya Mormon, oyo ezali na bokuse ya nkoma ekomami na Mormon uta na bapalaki ya minene ya Nefi, elongo na ndimbola mingi. Bapalaki oyo ezalaki lisusu na elandeli ya mambi ya kala oyo ekomami na Mormon mpe makambo ebakisami na mwana na ye ya mobali Moroni.

3. Bapalaki ya Etele, oyo elakisi mambi ya kala ya Bayelede. Lisolo ya makomi oyo ekomamaki na bokuse na Moroni, oyo akotisaki ndimbola na ye moko mpe asangisaki lisolo ya makomi oyo na mambi mobimba ya kala na nse ya nkombo ya “Buku ya Etele.”

4. Bapalaki ya Motako ememamaki na bato ya Lehi uta na Yelusaleme na mobu 600 Liboso na mbotama ya Klisto. Na kati ezalaki na “buku mitano ya Mose, … mpe lisusu lisolo ya makomi moko ya Bayuda uta na ebandeli, … kokita kino na ebandeli ya boyangeli ya Sidikiya, mokonzi ya Yuda; mpe lisusu masakoli ya baprofeta basantu” (1 Nefi 5:11–13). Matangi mingi uta na bapalaki oyo, oyo ezali kotanga Yisaya mpe baprofeta misusu ya Biblia mpe baoyo ya Biblia te, mamonani kati na Buku ya Mormon.

Buku ya Mormon ezali na biteni zomi na mitano soki te bokaboli, oyo eyebani, longola se moko, lokola buku, buku mbala na mbala ebiangami na nkombo ya mokomi na yango monene. Ndambo ya yambo (buku motoba ya yambo, kosukaka na Omini) ezali bobongoli uta na bapalaki ya mike ya Nefi. Kati na buku ya Omini mpe Mosiya ekotisami eteni moko oyo ebiangami Maloba ya Mormon. Bokotisi oyo ekangisi lisolo ya makomi ekomama na bapalaki ya mike elongo na bokuse ya bapalaki ya minene na Mormon.

Ndambo eleki molai, uta na Mosiya kino na Mormon mokapo 7, ezali bobongoli na bokuse ya bapalaki ya minene ya Nefi na Mormon. Ndambo ya nsuka, uta na Mormon mokapo 8 kino nsuka ya liboke oyo, ekomamaki na Moroni mwana ya Mormon, oyo, nsima ya kosilisa lisolo ya bomoi ya tata na ye, asalaki bokuse ya lisolo ya Bayelede (lokola Buku ya Etele) mpe nsima abakisaki biteni eyebana lokola Buku ya Moroni.

Na mobu soki te penepene na mobu 421 ya Mobu ya Nkolo, Moroni, profeta ya nsuka na baprofeta bakomi ya bonkoko ya Banefi, akangaki lisolo ya makomi oyo ya bule mpe abombaki yango epayi ya Nkolo, mpo ebimisama lisusu na mikolo ya nsuka, lokola elobamaki yambo esalema na mongongo ya Nzambe na nzela ya baprofeta na Ye ya kala. Na 1823 ya Mobu ya Nkolo, Moroni se moko oyo, na ntango wana moto oyo asekwa, abimelaki Profeta Joseph Smith mpe nsima apesaki bapalaki ekomama epayi na ye.

Mpo na oyo etali bobimisi ya buku oyo: Lokasa ya ebandeli ya nkombo, oyo ezali koya sikasikawa liboso ya lokasa ya makambo ezali kati na buku, ezwami uta na bapalaki mpe ezali eteni moko ya nkoma ya bule. Nkoma na italiki kati na boyingisi, ndakisa na 1 Nefi mpe oyo ezali koya sikasikawa liboso ya mokapo ya 9 ya Mosiya, ezali mpe lokola nkoma ya bule. Nkoma na italiki kati na boyingisi, ndakisa na mitu ya mikapo, ezali nkoma uta na ebandeli te kasi masalisi mpo na boyekoli oyo etiami na kati mpo na kosalisa batangi.

Ndambo ya mabunga ekobaki kolandisama na bobimisi eleka ya Buku ya Mormon na lokota ya Angele. Bobimisi oyo ezali na mabongisi ya mabunga yango oyo elongobani mpo na koyokanisa makomi yango na nkoma na maboko oyo elengelamaki liboso mpo na bobimisi ya buku na mbala ya yambo lokola ebongisamaki na Profeta Joseph Smith.