Boyingisi

Buku ya Mormon ezali liboke ya makomi masantu oyo ekokani na Biblia. Ezali lisolo ya makomi ya misala ya Nzambe elongo na bafandi ya kala ya Baamerika mpe ezali na litondi ya nsango malamu ya libela.

Buku yango ekomamaki na baprofeta mingi ya kala na lisalisi ya molimo ya masakoli mpe ya emoniseli. Maloba na bango, ekomami likolo ya bapalaki ya wolo, etangamaki mpe ekomamaki na bokuse na profeta mokomi ya mambi ya kala moko na nkombo ya Mormon. Lisolo ya makomi yango ezali kopesa lisitwale ya bikolo minene mibale. Moko eyaki uta na Yelusaleme na mobu 600 Liboso na mbotama ya Klisto, mpe ekabwanaki nsima na bikolo mibale, oyo eyebani lokola Banefi mpe Balamani. Mosusu eyaki kala mingi liboso ntango Nkolo abulunganisaki nkota na Linongi ya Babele. Lingomba oyo eyebani lokola Bayelede. Nsima ya bankoto ya mibu, bango nyonso babebisamaki longola se Balamani, mpe bazali na kati ya bankoko ya Baindia ya Amerika.

Likambo monene oyo ekomami na Buku ya Mormon ezali mosala ya ye moko Nkolo Yesu Klisto na kati ya Banefi kala mingi te nsima ya bosekwi na Ye. Ezali kolimbola malongi ya nsango malamu, ezali kopesa bokuse ya mwango ya lobiko, mpe ezali koyebisa bato nini basengeli kosala mpo ete bazwa kimia na bomoi oyo mpe lobiko ya seko na bomoi ezali koya.

Esilaki Mormon kokokisa nkoma na ye, apesaki lisolo yango na mwana na ye mobali Moroni, oyo abakisaki mwa maloba na ye moko mpe abombaki bapalaki na Ngomba ya Kumola. Na mokolo ya 21 sanza ya libwa, na mobu ya 1823, Moroni se moko oyo, na ntango yango moto oyo akembelama, oyo asekwa, amonanaki na Profeta Joseph Smith mpe apesaki ye malakisi mpo na oyo etali lisolo ya makomi ya kala mpe bobongoli esengelami mpo na yango na lokota ya Angele.

Na ntango esengeli bapalaki epesamaki epayi na Joseph Smith, oyo abongolaki yango na lisalisi ya likabo mpe nguya ya Nzambe. Lisolo ya makomi oyo ebimisami sikawa na nkota mingi lokola litatoli ya sika mpe ya bobakisi ete Yesu Klisto azali Mwana ya Nzambe ya bomoi mpe ete nyonso oyo bakoya epayi na Ye mpe bakotosa mibeko mpe makuli ya nsango malamu na Ye bakoka kobikisama.

Mpo na oyo etali lisolo ya makomi oyo Profeta Joseph Smith alobaki: “Nayebisaki bandeko bandimi ete Buku ya Mormon ezalaki buku ekomami malamu koleka buku nyonso mosusu likolo ya mabele, mpe libanga likonzi ya eyamba na biso, mpe moto akoki kopusana penepene mingi na Nzambe na kokangamaka na malako na yango, koleka buku nyonso mosusu.”

Likolo ya Joseph Smith, Nkolo alengelaki bato basusu zomi na moko mpo na komona bapalaki ya wolo mpo na bango moko mpe mpo na kozala banzeneneke baleki malamu mpo na oyo etali bosolo mpe bonzambe ya Buku ya Mormon. Matatoli ekomama na bango ekotisami awa elongo lokola “Litatoli ya Banzeneneke Misato” mpe “Litatoli ya Banzeneneke Mwambe.”

Tobiangi bato nyonso uta na bisika nyonso ete batanga Buku ya Mormon, bamanyola na mitema na bango maloba ezwami na kati, mpe nsima batuna Nzambe, Tata ya Seko, na nkombo ya Klisto soki buku yango ezali solo. Bango oyo bakolanda toli oyo mpe bakosenga na bondimi bakozwa litatoli ya bosolo mpe ya bonzambe na yango na nguya ya Molimo Mosantu. (Tala Moroni 10:3–5.)

Bango oyo bakozwa litatoli ya bonzambe oyo uta na Molimo Mosantu bakoya mpe lisusu koyeba na nguya se moko wana ete Yesu Klisto azali Mobikisi ya mokili, ete Joseph Smith azali mobimisi mpe profeta na Ye na mikolo oyo ya nsuka, mpe ete Eklezia ya Yesu Klisto ya Basantu ba Mikolo mya Nsuka ezali bokonzi ya Nkolo oyo etiami mbala moko lisusu likolo ya mabele, na bolengeli mpo na Boyei ya Mibale ya Masiya.