Ja’ Chcalbecutic Jutebuc Smelolal Ta Sventa
Ti Libro Mormone

Ti Libro Mormone ja’ lequil poco’ lo’iletic ta sventa slumal America, ta vo’nej ti bu la jyich’ ts’ibael ta taq’uin vunetique, ti ta Libroe ja’ te ta xal xtoc ti oy chan chop taq’uin vunetic ti te pasbil o ta taq’uine:

Staq’uin vuntac Nefi, ti jech cha’chopique: Its’inal taq’uin vun xchi’uc banquilal taq’uin vun. Ti bayuque ja’ te ta xquiltic ta sventa lequilal xchi’uc ti c’u x-elan abtejic xchi’uc ti c’u x-elan chanubtasbanic ti lequil viniquetique. Ti c’alal jech ta xchibal xae ja’ ta xal ti spoco’ lo’ilal stalel jteclumetic jech chac c’u cha’al ta xal ta (1 Nefi 9:2–4) ja’ o no’ox, c’alal li’oy Mosíah, jech ti ta banquilal taq’uin vunetique ja’ te la jyich’ aq’uel xtoc ti c’u x-elan tsots sc’oplal ti cuxlejal ta ch’ulelale.
Staq’uin vuntac Mormón, ti ja’ te pasbil ta jmoj xchi’uc banquilal staq’uin vuntac Nefie, pasbil ta Mormón ti c’usi ep la jyich’ alele. Ti li’ taq’uin vunetique, te tsacal ti c’u x-elan la sts’ac batel spoco’ lo’il sts’ibaoj Mormón xchi’uc bu la sts’ac batel xnich’on Moronie.
Staq’uin vuntac Eter, ja’ te tsacal spoco’ lo’il Jareditaetic. Ti li’ poco’ lo’iletique la spas ta jmoj Moroni, ti bu la sts’ac batel ya’yej stuc xchi’uc la spas ta jmoj xchi’uc scotol poco’ lo’iletic ti ja’ sbi slibro Eter.
Ti c’unil c’anal taq’uin vunetique, la jyich’batel ta steclumal Lehi ta Jerusalen ta sjabilal vaquib ciento (600) jabil sc’an xtal Cajvaltic Jesucristo, ti va’aye ja’ te tsacal “svo’ pocal slibro Moisés … Xchi’uc ti spoco’ lo’ilic ta sliquebal o no’oxe … C’alal to ta sliquebal ti c’alal och ta Ajvalilal Sedequías ajvalil te ta Juda: xchi’uc xtoc ti c’u x-elan la xcholic sc’oplale” (1 Nefi 5:11–13). Ti ta libro Mormone oy ep lo’iletic li ta taq’uin vunetic ti ta xal ta sventa Isaias xchi’uc to yantic lequil viniquetic ta Bibliae, jech chac c’u cha’al oy ep lequil viniquetic ti muyuc bu chal ta Bibliae.

Ti Libro Mormone pasbil ta vo’lajuneb chop o me ta vo’lajuneb voc’ tsotsic sc’oplal ti ja’ sbi ti ta jun no’ox o Libro pasbile, ta jujuntale ja’ yich’ojbe sbi ti boch’o la spase. Ti ba’yuc vaquib Libro ti te to xlaj ta Omnie, ja’ la jyich’ jelubtasel ta yan c’op te ta its’inal staq’uin vuntac Nefi. Te ta slibro Omni xchi’uc c’alal to ta Mosíah ja’ te tsacal to’ox ti sbats’i ya’yejtac Mormone. Ti te ta ts’ibile ja’ te pasbil ta jmoj ti lo’iletic ti te ts’ibabil ta its’inal taq’uin vunetic ti bu la spas ta jmoj Mormón xchi’uc banquilal taq’uin vunetique.

Ti bu tu j-epe, te xlic ta Mosíah xc’ot c’alal to ta svucubal capitulo ta svun Mormón, ja’ xtoc ti la sjelubtas ta yan c’op xchi’uc ti bu la spas ta jmoj xchi’uc banquilal staq’uin vuntac Nefie. Ti te xa ta slajebe, te xlic ta svaxquibal capitulo svun Mormón xc’ot c’alal to ta slajeb ti abtelale, la jyich’ ts’ibael ta Moroni, snich’on Mormón, ta ts’acal ti c’alal la spas ti poco’ lo’iletic ta sventa c’uxi ch’italel stote, la spas ta jmoj xchi’uc spoco’ lo’ilic Jareditaetic (ti ja’ sbi libro Eter) ti ta ts’acal ja’ o jech te la sts’ac batel ti bu otquinbil jech chac c’u cha’al Slibro Moronie.

Ja’ jech sba yepal jabil la jyich’ ts’ibael o tal ti slibro Mormone xlictal ta vaquib ciento (600) jabil tsc’an xtal Jesucristo c’alalto ta sjabilal chanib ciento xchi’uc jun xcha’vinic (421) jabil ti jech ayem xa ox Cristoe, Moroni, ti ja’ xa slajeb lequil vinic xchi’uc j-al poco’ lo’iletic ta steclumal Nefitaetic, la smac lec ti spoco’ ch’ul lequil lo’ilic xchi’uc la snac’ ta sventa Cajvaltic, ti c’uxi xu’ xcha’ loc’uc yan velta ta baq’uine, jech chac c’u cha’al ya’yej Riox la jyalbe sc’oplal ta slequil vinictac ta vo’neje. Ta sjabilal mil xchi’uc vaxaquib ciento xchi’uc oxib xcha’vinic (1823) jabil jech chac c’u cha’al li’ ta orae, ja’ stuc ti Moronie, jech yich’ cha’ cuxesel, la svu’lan lequil vinic José Smith la jyac’be ta sc’ob ti bu ts’ibabil taq’uin vunetique.

Ja’ jech chac c’u cha’al ba’yuc li’e: Ti bu ba’yuc sliqueb ti libro Mormone, yich’ puquel sc’oplal ta Ingles c’op, la jyich’ meltsanel jutuc ti bu chopol yich’ tael ti c’alal la jyich’ jelubtasel ta castia c’ope. Ti li’ sliquebe ja’ te oy ti bu la jyich’ meltsanel xchi’uc ti bu la jyich’ c’uxubinel jech chac c’u cha’al lecuc xc’ot ti abtelal chac c’u cha’al ts’ibabil ta sliquebe, jech chac c’u cha’al ba’yuc sliqueb ti bu laj cha’ q’uel lequil vinic José Smith.