Sliquebal

Ti Libro Mormone ja’ ch’ul ts’ibiletic jech chac c’u cha’al Biblia. Ja’ poco’ lo’il ti c’u x-elan la jyal jtotic Riox ta jnaclejetic ta vo’nej ti li’ ta America xchi’uc ja’ jech chac c’u cha’al Biblia, ti lequil c’op ta sventa sbatel osile.

La sts’ibaic ti libro epal mol lequil viniquetic ta Ch’ul Espíritu jech chac c’u cha’al la jyalbeic sc’oplal xchi’uc ti c’u x-elan ac’bat yilique, ts’ibabil ta ba c’anal taq’uin, ja’ jech yich’ alel yich’ ts’ibael ta jun lequil vinic jts’ibaej poco’ lo’iletic sbi Mormón. Ti ta vune ja’ te ts’ibabil o ti c’u x-elan chib muc’tic tsobajele. Ti june c’ot ta Jerusalen ti c’alal sc’an to ox vaquib ciento (600) jabil sc’an xtal Jesucristoe, ja’ o jech ta ts’acal la svoc’ sbaic ta cha’ voc’ muc’tiquil jteclum jech chac c’u cha’al Nefitaetic xchi’uc Lamanitaetic. Ti yane ja’ xa ox ep c’ac’al ba’yuc sc’otel ti c’alal Cajvaltic muyuc la jya’ybe lec sc’opic ti te ta muc’ta tec’ubal Babele. Ti va’ay c’u yepalic jtsopique ja’ otquinbilic ta sbiic Jareditaetic. Ta ts’acal ti ta epal mil jabile, scotolic yich’ic vuq’uesel jech chac c’u cha’al Lamanitaetic, ti yu’un ja’ ba’yuc inyoetic ti li’ ta Americae.

Jech ti c’u x-elan c’otem ta pasel ti tu jtsots sc’oplal ti c’usitic te ts’ibabil ti ta slibro Mormón ti yu’un ja’ yabtel stuc ti Cajvaltic Jesucristo ta stojolalic ti Nefitaetic ta ts’acal jutuc ti c’alal cha’cuxe. Ti ja’ la yac’ ta ilel c’u x-elan ti lequil mantaletique, la sts’ibaic ti c’uxi xu’ chi jcolutique, xchi’uc ta xich’ albel viniquetic ti c’usi xu’ ta spasic ti c’uxi xu’ ta staic slequilalic xchi’uc xcuxlejalic ta sbatel osil, ti c’uxi oyuc xcuxlejalic ti c’u yepal to c’ac’al li’oyique.

Ta ts’acal ti c’alal laj ti sts’ibtaque, Mormón la yac’be snich’on Moroni ti spoco’ lo’iltaque, ti jech to la sts’ac jay beluque, ja’ o jech la snac’, ti taq’uin vunetic te ta vits Cumorah, (1823) ta jun xcha’vinic septiembre ta sjabilal mil vaxaquib ciento xchi’uc oxib xcha’vinic jabil, ja’ stuc Moroni, ta ts’acal ti jech ts’uiltasbil xchi’uc cha’ cuxesvil, te vinaj ta stojolal lequil vinic José Smith jech la jyalbe jech chac c’u cha’al ta vo’nej ts’ibiletic, jech chac c’u cha’al yich’ jelubtasel ta Ingles c’ope.

Ti c’alal c’ot sc’ac’alile, la jyich’ ac’bel ti taq’uin vunetic ti José Smith ti boch’o la sjelubtas ta yan c’op ta stsatsal xchi’uc ta svu’el Rioxe. Ti libroe ta xich’ puquel li’ ta ora ta epal c’opetic jech chac c’u cha’al ta xal ta jamal ta ach’ xchi’uc ta xal batel, ti Cajvaltic Jesucristo ti ja’ snich’on ti cuxul Rioxe, xchi’uc scotolic ti boch’o ta sc’an ta xtalic ta stojolale xchi’uc ti ta xch’unic ti smantaltaque xchi’uc ti mantaletic ta sventa slequil c’ope xu’ ta xcolic.

Ja’ jech x-elan chac c’u cha’al poco’ lo’iletique, ti lequil vinic José Smith jech la jyal: Laj xa calbe hermanoetic ti ja’ bats’i lequil Libro ta scotol Libroetic li’ ta sba banamil, ti Libro yu’un Mormone xchi’uc ja’ ta xalbutic ti c’usi jch’unojtique, xchi’uc ti jun vinic ta xnopaj batel ta stojolal Riox ti me ja’ ta spas batel lec ti c’usi chale, jech chac c’u cha’aluc yan Libroe.

Jech chac c’u cha’al José Smith, Cajvaltic la spas ta mantal yantic buluchib viniquetic ti ac’o yilicuc ta sat stuquic ti c’anal taq’uin vunetique xchi’uc ti ja’uc c’oticuc ta texticoal ta bats’imelel ta sventa xchi’uc ta slequilal ti slibro Mormone. Ti c’usi la jyalic ta jamale li’ ts’ibabil ta jmoj xchi’uc abtelal ja’ c’otem ta sliquebal “ti la jyalic ta jamal ti oxib texticoetique” xchi’uc ti c’u x-elan “la jyalic ta jamal ti vaxaquib texticoetique.”

Ta xcalbecutic scotol quirisianoetic, ti te bu no’ox oyique, ti ac’o sq’uelic ti slibro Mormone, ac’o xchi’in ta lo’il yo’nton ta sventa ti lo’iletic te oye ja’o sjac’be Riox ti totil ta sbatel osile, ta sbi Cajvaltic ti me lec ta bats’i melel ti libroe, ti boch’otic jech ta spasique xchi’uc ti me ta sc’an ta xch’unolajel yo’ntonique, ta staic, xu’ ta xalic ta jamal ta stsatsal Ch’ul Espíritu ti c’u x-elane xchi’uc ti slequilal ti Libroe. (Q’uelo Moroni 10:3–5.)

Ti boch’otic ta xich’ic ti c’u x-elan li’ albil ta jamal ta slequil Ch’ul Espíritu e xchi’uc xu’ ta sna’ic ta stsatsal no’oxtoc, ti Jesucristo ja’ Jcoltavanej ta sbejel banamile. Ti José Smith ja’ jelubtasej c’op xchi’uc ti ja’ lequil vinic ti li’ ta slajeb c’ac’ale, xchi’uc ta xch’ulna Jesucristo ta ch’ul Viniquetic ta Slajebal C’ac’al ti ja’ stsatsal Riox ti li’ oy yan velta ta sba banamile, ti c’uxi chi yac’butic jchantic ta sventa ti c’u x-elan ta xtal xchibal velta ti Jcoltavanej ta xtale.